“Ba Felan’ e En Nra Par nib Yul’yul’ Ngak Got ko Ngiyal’ ni Be Yib e Tin nib Mo’maw’ Riy Ngak”

¹ Bayi yib e skeng ngak gubin e Kristiano. (2 Tim. 3:12) Sana ra yib e skeng ngom ko m’ar, salpiy, ar’ar’, togopuluw, ara yugu ban’en. Ma fl’eg Satan e skeng ni fan ni nge magawonnagdad ngad paged e machib u mit e tabinaw, ara ngad talgad i pigpig ku Got. (Job 1:9-11) Uw rogon ni ra yib e falfalan’ ngom ni bochan e ke k’adan’um ngay?

² Mu Fl’eg Rogom ko Skeng: I pi’ Jehovah e Thin Rok ko tin riyul’, nib muun ngay e thin u murung’agen e yafos rok Jesus nge machib ni i tay. Faan gad ra rung’ag e thin rok Jesus ma ngad folgad rok, ma aram e gad be fl’eg e def nib mudugil ma gad be fl’eg rogodad ko skeng. (Luke 6:47-49) Maku bay yugu boch ban’en ni ma gelnagdad​—ni aram e pi walagdad ni Kristiano, muulung, nge pi babyor ni ma tamilangnag e thin ko Bible ni i fl’eg fare tapigpig nib yul’yul’ mab gonop. Maku ngad fanayed e tow’ath ni yib rok Got ni ngad meybilgad ngak.​—Matt. 6:13.

³ Maku i pi’ Jehovah e athap ngodad. Faanra mich e tin ni i micheg Jehovah u wan’dad, ma ra mang e athap rodad ni ba “angkar rok lanin’dad, ya be par nib mudugil.” (Heb. 6:19) Nap’an e ngiyal’ ko Bible, ma dabiyog ni nge chuw e barkow ni dariy e angkar riy, ni mus ko ngiyal’ nib fel’ e yafang. Faanra m’ug e lang, ma ngan nin’ e angkar nga maday, ma ra taleg e barkow ni nge ser nga daken e malang nge pil. Ku aram rogon e ngiyal’ ney, faanra ba gel e michan’ rodad ko pi n’en ni i micheg Got, ma gad ra par nib mudugil ko ngiyal’ nra yib e skeng ara gafgow ngodad. Rayog ni nge sum e magawon nib pay. Yugu aram rogon ni ba fel’ e machib ni tay Paul nge Barnabas u Lystra, machane papey ni ke thil salperad ko ngiyal’ ni ke yib e pi Jew ni yad e pi tatogopuluw.​—Acts 14:8-19.

⁴ Ra Mu K’adan’um Ngay Ma Ke Yib e Falfalan’ Ngom: Rayog e gapas nga lanin’dad ni faan gad ra par nib mudugil ni ngad machibgad ni yugu aram rogon nra yib e togopuluw ngodad. Mus ko ngiyal’ ni kan gafgownagdad ni bochan e kad folgad rok Kristus ma ke falfalan’dad ngay. (Acts 5:40, 41) Ra ngad k’adedan’dad ko skeng ma ke ayuwegdad ngad mon’oggad i yan ko sobut’an’, fol, nge k’adan’. (Deut. 8:16; Heb. 5:8; Jas. 1:2, 3) Be fil ngodad ni ngad pagedan’dad ngak Jehovah, nge pi n’en ni i micheg, ma ngad pired ni ir e manaf rodad.​—Prov. 18:10.

⁵ Gad manang ni dabi par e skeng ndariy n’umngin nap’an. (2 Kor. 4:17, 18) Ya skeng e ma pi’ e kanawo’ ngodad ni ngad micheged ko uw fene gel ni ba t’uf Jehovah rodad. Maku ra k’adan’dad ngay ma rayog ni ngad pied e fulweg ko pi ban ni tay Satan. Ere, dabi mulan’dad! “Ba felan’ e en nra par nib yul’yul’ ngak Got ko ngiyal’ ni be yib e tin nib mo’maw’ ngak, ni aram e yibe skengnag ya ra athamgil ndabi mul ko re skeng nem ma yira pi’ e yafas ngak.”​—Jas. 1:12.