Rogon ni Ngan Fanay fare Babyor ni Kenggin e What Can the Bible Teach Us?

Boor ban’en ni taareb rogon ko fa gal ke babyor ni kenggin e Teach Us nge Be Fil e Bible. Gad ma fanay e gal ke babyor ney ni ngad weliyed e tin riyul’ ni bay u lan e Bible ko girdi’, maku taareb rogon ni kan yarmiy e pi n’en ni bay riy. Machane kan fanay yu bugithin ko fare babyor ni Teach Us nib mom ni ngan nang fan ma kub tamilang. Re babyor ney e kan ngongliy ni fan ngak e piin nib mo’maw’ rorad ni ngar nanged fan fare babyor ni kenggin e Be Fil e Bible. Ku bay e endnote riy ara yugu boch e thin ni ke yan nga lon fare appendix ni be weliy fan yu bugithin ara boch e machib ni bay u reb e guruy nge reb. Mus ko fapi deer ni bay u tabolngin reb e guruy nge reb nge fare kahol u tungun e re guruy nem ni kenggin e “N’en ni Be Fil e Bible” ma kan chuweg. Machane, kan tay e summary ara boch e thin nib ga’ fan ni be fil e tin riyul’ nga lon. Re babyor ney e taareb rogon ko fare babyor ni Be Fil e Bible ni bochan e demtrug e ngiyal’ ma rayog ni ngan pi’ ni yugu aram rogon ni gathi ireram e re ke babyor ni ngan wereg ko girdi’ u lan e re pul nem. Ere, uw rogon nrayog ni ngad fanayed e pi n’en ni bay ko re babyor ney u nap’an ni ngan fil e Bible ngak be’?

SUMMARY: Nap’an e fol Bible mab ga’ ni gad ma beeg e pi paragraph ko fare babyor ni Be Fil e Bible ngemu’ ma gad fith e deer, ma rayog ni ngan rin’ e re n’ey u nap’an ni gad be fanay fare babyor ni kenggin e Teach Us. Machane, uw rogon ni faanra faen ni gimew be fil e Bible e gathi ri manang fan e thin nu Meriken ara dabiyog ni nge beeg e babyor nib fel’ rogon? Faanra aray rogon, ma rayog ni ngam filew fare babyor ni Teach Us u taabang ni aram e fare summary ni bay u tungun e pi guruy ko re babyor ney e ir e ngam filew u taabang, mag pi’ e athamgil nga laniyan’ ni nge beeg e re guruy nem ni yigoo ir. Ra reb e tin riyul’ ni bay ko fare summary ma rayog ni ngam weliyew u lan 15 e minit. Fare summary e de yoor ban’en ni kan weliy riy ni bod ni bay ko fare guruy, ere faen ni be fil e Bible ngak be’ e thingari fal’eg rogon u m’on riy, ma nge lemnag e pi n’en nib t’uf rok faen ni be fil e Bible ngak. Ma faanra ngar weliyew e pi n’en ni bay u reb e guruy nge reb, ma rayog ni nge tomuren e fol Bible ni yow be tay mi yow weliy fare summary ni fan e ngar sulow u daken fapi n’en ni bay ko re guruy nem.

PI ENDNOTE: Fa yu bugithin nge boch e machib ni bay ko pi endnote e kan yarmiy ni bod rogon ni bay ko fapi guruy. Faen ni be fil e Bible ngak be’ e rayog ni nge dugliy ko yow ra weliy e re n’em u nap’an e fol Bible fa dangay.