Mu Dag ni Ga Be Pining e Magar ko Bin Th’abi Fel’ e Tow’ath ni Ke Pi’ Got
1. Mang fan ni gad ma pining e magar ngak Jehovah?
1 Boor e tow’ath ‘nrib manigil’ ni ke pi’ Jehovah, machane bin th’abi fel’ riy e aram fare biyul’ ni pi’ Fak. (Jas. 1:17) Boor e flaab nra yog riy ngodad nib muun ngay ni kan n’ag fan e denen rodad. (Efe. 1:7) Gubin ngiyal’ ni gad ma pining e magar ni bochan e re tow’ath ney. Nap’an nra chugur ko fare Puguran ma gad ma fal’eg i lemnag e re tow’ath ney.
2. Uw rogon ni nge m’ug ni gad be pining chon e tabinaw rodad e magar ko fare biyul’ ni ke pi’ Jesus?
2 Ngam Pining e Magar: Nap’an e Fol Bible ko Tabinaw ko fare wik u m’on ko Puguran ko March 30, ma rayog ni ngam yarmiyed chon e tabinaw rom ni ngam weliyed boch ban’en u murung’agen fare biyul ya nge yog ni ngan fal’eg i lemnag feni ga’ fan min pining e magar ni bochan. Maku rayog ni ngam beeged fapi thin nu Bible ni fan ko Puguran u taabang u gubin e rran. Ma ngki bigimed me fal’eg i lemnag rogon angin fare biyul ngak, nge rogon e lem rok ngak Jehovah, nge yugu boch e girdi’, nge rogon e gabul nge langlath u wan’. Kub fel’ ni ngam filed fagali tang ni kab beech ni yira yin’ u nap’an e Puguran ni number 8 nge 109.—Num. 8:1-26; Ps. 77:12.
3. Uw rogon ni ngad pininged e magar ngak Jehovah?
3 Ngam Dag ni Ga Be Pining e Magar: Faanra gad be tayfan fare biyul’ ma ra k’aringdad ni ngad weliyed murung’agen Jehovah ngak e girdi’ nge rogon feni gad ba t’uf rok me pi’ Fak ni nge yim’ ni fan ngodad. (Ps. 145:2-7) Nap’an e pul ni March nge April nge May ma boch e tabinaw e yad ma dag ni yad be pining e magar ngak Jehovah ko n’en ni ke rin’, ya yad ma guy rogon ni nge un reb i chon e tabinaw rorad ko auxiliary pioneer ara pioneer ni ayuw. Machane, faanra dabiyog ni ngam un i rin’ e re n’ey, ma gur, rayog ni ngam guy rogon ni nge yoor e tayim ni ngam un ko machib? (Efe. 5:16) Faanra gad be pining e magar ngak Jehovah, maku ra k’aringdad ni ngad ayuweged boch e girdi’ ni ngar uned ko Puguran. (Rev. 22:17) Mu yoloy nga but’ fithingan e piin ni ga be lemnag ni ngam sul ngorad, nge piin ni ga ma fil e Bible ngorad, nge girdi’ rom, nge girdi’ u tabon e maruwel rom, nge piin buguli yoror rom, mag un i wereg babyoren e Puguran ngak urngin e girdi’ nrayog, nib muun e pi girdi’ ney ngay.
4. Mang e ba fel’ ni ngad rin’ed u nap’an nra chugur ko Puguran?
4 Nap’an nra chugur ko Puguran, ma aram e ngiyal’ nrayog ni ngad daged ngak Jehovah gelngin feni ga’ fan u wan’dad fare tow’ath ni ke pi’ ko girdi’. Ngad fanayed e re ngiyal’ i n’em ni ngad pininged e magar ko fare biyul’ nge urngin e “flaab” ni yib rok Kristus.—Efe. 3:8.