Ngii Chaariy Jehovah E Tin Nib Fel’ Ni Kam Rin’
“Got rog . . . ku mu lemnageg ni fan ko pi n’ey ma ga chaariy . . . I gur e Got rog, um lemnageg ko tin ba fel’ ni kug rin’.”—NEHEMIAH 13:22, 31.
1. Mang e ra ayuweg e piin ni kar ognaged yad ku Got nge yog ni ngar weliyed ku Jehovah e n’en nib fel’ ni kar rin’ed?
PI TAPIGPIG rok Jehovah e bay urngin ban’en nib t’uf rorad nge yog ni ngan chaariy e tin bfel’ ni kar rin’ed. Mang fan? Ya ke fel’ thilrad Got ni bochan ni yad bang ko ulung rok u fayleng. Ke tamilangnag e tin nib m’agan’ ngay ngorad, ma ke ayuwegrad u daken gelngin nge yog e tamilangan’ ngorad ko tirok Got ban’en. (Psalm 51:11; 119:105; 1 Korinth 2:10-13) Bochan e pi n’en ney ma ma pining Jehovah e pi tapigpig rok u fayleng ni ngar weliyed ngak ko uw rarogorad nge pi n’en ni ur rin’ed ni bochan gelngin ni pi’ ngorad nge ayuw ko kan ni thothup rok.
2. (a) Uw rogon ni ke weliy Nehemiah ku Got e n’en nib fel’ ni ke rin’? (b) Mang e ke wenignag Nehemiah u tungun fare babyor ni ke yoloy?
2 Nehemiah e ir be’ ni ke weliy e n’en nib fel’ ni i rin’ ngak Got ma ir e en ni ma ayuweg e kap ku Artaxerxes (Longimanus) ni Pilung nu Persia. (Nehemiah 2:1) Kan dugliy Nehemiah ni nge mang governor ko piyu Jew ma ke ubing fare yoror nu Jerusalem u fithik’ e riya’ nge piin toogor rorad. Ke passig ko bin riyul’ e liyor ma ke n’igin ni nga un fol ko Motochiyel rok Got ma ke runguy e piin nib gafgow. (Nehemiah 5:14-19) I pining Nehemiah piyu Levi ni ngar biechnaged yad u gubin ngiyal’ mar matanagiyed e pi garog, mar ted fan min thothupnag e rofen ni Sabbath. Ere bay rogon ngak ni nge meybil ni nge gaar: “Got rog, ku mu lemnageg ni fan ko pi n’ey ma ga chaariy, ma ga runguyeg nga rogon ni gab gol ma ga ma t’ufegey.” Ma ba puluw ni nge museg Nehemiah e thin ko babyor ni kan thagthagnag ni nge yoloy e pi thin ney ni nge gaar: “I gur e Got rog, ma dab kum pag talig nge pi n’en nib fel’ ni kug rin’.”—Nehemiah 13:22, 31.
3. (a) Uw rarogon be’ ni ma ngongliy e ngongol nib fel’? (b) Mang boch e deer ni ngad fithed gadad riy u nap’an ni gad ma lemnag morngaagen Nehemiah?
3 Be’ nib fel’ e ma ngongliy e tin nib fel’ ban’en ma ma rin’ e tin nib mat’aw nge yib angin ko yugu girdi’. Aram rogon Nehemiah. Bay madgun Got u wan’ ma rib passig ko bin riyul’ e liyor. Maku, ke pining e magar ni ke yog ni nge pigpig ku Got ma ke weliy e n’en nib fel’ ni i rin’ ku Jehovah. Ngad lemnaged e pi n’en ni i rin’ ma ngad fithed gadad, ‘Uw rogon u wan’ug e maruwel ni pi’ Got ngog ni nggu rin’ nge tin nib mil fan ngog? Uw rogon e n’en ni kug pi’ ku Jehovah Got nge Jesus Kristus ni ngar chaariyew?’
Thingarda Weliyed e N’en ni Kad Rin’ed Ya Ke Tamilangan’dad ko Thin ko Bible
4. Mang e tay Jesus chilen ko pi gachalpen, ma mang e rin’ e piin ni “ba adag e yafas ni manemus”?
4 I tay Jesus chilen ko pi gachalpen ni gaar: “Mmmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad . . . , mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Rogon ni ngan pingeg e girdi’ ngar manged pi gachalpen e ngan fil ban’en ngorad. Ere piin ni kan fil ban’en ngorad ma “kar mat’awgad” mi yad ba adag ni ngar pared ndariy n’umngin nap’an” e ra un ko taufe ni bod ni rin’ Jesus. (Acts 13:48; Mark 1:9-11) Kar turguyed u laniyan’rad ni yad ba adag ni ngar folgad ko urngin ban’en ni ke tay chilen. Yad ra fil e thin riyul’ ni Thin Rok Got ma yad ra fol riy ma aram e yad ra ognaged yad ku Got.—John 17:3.
5, 6. Mang fare thin ni bay ko James 4:17? Mu weliy ko uw rogon.
5 Rogon fene ra tamilang u wan’dad e Thin ko Bible ma aram me gel e def ko michan’ rodad. Machane ku ra gel iyan rogon ni thingarda weliyed ku Got e n’en ni kad rin’ed. James 4:17 e begaar: “Cha’ nde rin’ e tin nib fel’ ni manang nsusun e ir e nge rin’ e ba kireb e rok, ni aram e ke denen.” Yog James e pi thin ney u tomren ni ke weliy morngaagen e piin ni ma yog ni yad ba sorok ma dar taga’gad nga daken Got. Faanra manang be’ ni dabi yib angin e pi n’en ni rin’ nfaanra dariy e ayuw rok Jehovah riy machane de ngongol nib puluw ko re nangan’ nem, ma aram ma ke denen. Ma pi thin nem ni yog James e ku ma sor fan ko denen ku be’ ni bochan nde rin’ ban’en. Ke weliy Jesus e fanathin u morngaagen e pi saf nge kaming ma kan turguy e kireb ko pi kaming ni bochan dar ayuweged pi walagen Kristus ma gathi bochan ni kar rin’ed ban’en nib kireb.—Matthew 25:41-46.
6 Bay reb e moon ni be fil e Pi Mich Rok Jehovah e Bible ngak machane ri boch uw ni be mon’og ko tirok Got ban’en ya dawori tal ko tamaggow ni yugu aram rogon ni manang ni susun ni nge tal. Ere reb e piilal e ke yog ngak ni nge poy e thin ko James 4:17. Ma ke weliy fare piilal ko uw fene ga’ fan e re thin nem me gaar: “Yugu aram rogon ndawor mu un ko taufe, machane thingar mu weliy ku Got e n’en ni kam rin’ nib mmil fan ngom e n’en ni ga ra turguy ni ngam rin’.” Ma aram me tal e re moon nem ko tamaggow, ma de n’uw nap’an nga tomren me bung rogon ni nge un ko taufe ni be yip’ fan ni ke ognag ir ku Jehovah Got.
Thingarda Weliyed Ku Got Rogon e Machib ni Gad Ma Tay
7. Uw rogon nrayog ni ngad daged ni gad be pining e magar riy ko “fare tamilangan’ rok Got”?
7 Susun ni gad ba adag ni ngad felan’naged e An Sunumegdad. Reb e kanawo’ nrayog ni ngad daged ni gad be pining e magar ku Got ko “tamilangan’ ni ke pi’” e ngan pingeg e girdi’ ngar manged pi gachalpen Jesus Kristus ni Fak. Ku aram rogon ni gad ra dag nib t’uf Got rodad nge girdi’. (Proverbs 2:1-5; Matthew 22:35-40) Arrogon, bochan ni ke tamilangan’dad ko Thin Rok Got ma aram e thingarda weliyed ngak e pi n’en ni kad rin’ed ma thingarda lemnaged e yugu girdi’ ni rayog ni ngar manged pi gachalpen Jesus.
8. Mang fan ni ke lemnag Paul ni thingari weliy ku Got e n’en ni rin’ ko machib?
8 I nang apostal Paul ni rayog ni ngan thap ko yafas ni manemus nfaan ran un ma ran fol ko fare thin nib fel’, maku faanra dabni fol riy ma ran un ko magothgoth. (2 Thessalonika 1:6-8) Ere ke nang ni thingari weliy ku Jehovah e machib ni ke tay. Ere Paul nge piin ni yad e kar ted fan e machib ni yad ma tay ma aram e kar siyeged ni nge m’ug riy e fel’ rogon ko salpiy ni bochan. Miki yog Paul ni gaar: “Dariy mat’awug ni nggu uf ni bochan e gu be machibnag ngak e girdi’ e thin nib fel’ ni yib rok Got. Ya bbugithin ni ke yog Got ngog ni nggu rin’. Faan mang e da gu machibnag ngak e girdi’ e thin nib fel’ ni yib rok Got ma ri gu ra gafgow!”—1 Korinth 9:11-16.
9. Mang malfith ni bay ko urngin e Kristiano ni thingara thanged?
9 Bochan ni kad ognaged gadad ku Jehovah ma gad e pi tapigpig rok, me ere ‘thingarda wereged fare thin nib fel’.’ Kan tay chilen ngodad ni ngad machibnaged fare thin ko Gil’ilungun Got. Ke mil fan ngodad e re n’em ya kad ognaged gadad ku Got. (Mu taarebnag ko Luke 9:23, 24.) Maku bay e malfith rodad ni thingarda thanged. I gaar Paul: “Bay e malfith rog ko piin ni yad e girdi’ nu Greek nge girdien yugu boch e nam ma ku bay e malfith rog ko piin nib gonop nge piin nib manan’: ere ri gu ba adag ni ngku gu machibnag e thin nib fel’ ngomed e piin ni gimed ma par u Roma.” (Roma 1:14, 15) Ke yog Paul ni bay e malfith rok ya i nang nib mmil fan ngak ni nge machibnag e girdi’ ma aram mi yad rung’ag e thin nib fel’ mar thapgad ko yafas ni manemus. (1 Timothy 1:12-16; 2:3, 4) Ere ke athamgil ni nge maruweliy e n’en ni kan tay chilen ngak ma aram me thang e malfith rok ko yugu girdi’. Maku arrogon gadad ni gad e Kristiano ma bay e malfith rodad ni thingarda thanged. Maku faanra gad ra machibnag u morngaagen Gil’ilungun Got ma aram e gad be dag nib t’uf Got rodad, nge Fak nge piin ni migid ngodad.—Luke 10:25-28.
10. Mang e rin’ boch e girdi’ ni fan ni ngar yoornaged e machib ni yad be tay?
10 Faanra gad ra fanay e llowan’ rodad nge tin ni gad ba salap riy ni ngad yoornaged e machib ni gad be tay ma aram e gad be weliy ku Got e n’en nib fel’ ni kad rin’ed. Susun: Ke yoor girdien yugu boch e nam ni be par u Britain e chiney. Me ere piin ni pioneer nib pag 800 iyad (aram e piin nib ma machibnag fare thin Gil’ilungun Got nib full-time) nge bokum miriay e Pi Mich Rok Jehovah e yad be fil e thin ko yugu boch e nam ni rayog ni ngar weliyed fare thin nib fel’ ngorad. Ma aram ma be garer e machib. Reb e pioneer ni be fil e thin nu China ko girdi’ e gaar: “Dagur lemnag ni rayog ni nggu fil e thin rog ngak yugu boch e Pi Mich Rok Jehovah, ni rayog ni ngar wereged fare thin riyul’ ngak e girdi’. Kari felan’ug ko re n’ey!” Rayog ni ngam wereg nge yoor e machib ni ga be tay ni aram rogon fa?
11. Mang e buch faani machibnag reb e Kristiano be’ u fithik’ e sabethin?
11 Faanra bay be’ ni be limach u maday ma dabi siy ni ra bagadad ma gad ra rin’ e n’en nrayog rodad ni ngad ayuweged e cha’ nem. Ku arrogon e pi tapigpig rok Jehovah ni yad ba adag ni ngar rin’ed urngin ban’en nrayog rorad ni ngar machibnaged e girdi’ u gubin ngiyal’. Reb e Mich Rok Jehovah e ke par u charen be’ ni ppin u lan e bus ma ke weliy e thin ko Bible ngak. Ke falfalan’ fare ppin ma boor e deer ni fith. Ma nap’an ni be n’en fare Mich ni nge chuw ko bus, me wenig fare ppin ni nge un ngak ngar ranow nga tafen ya ka bay boor e deer ni ba adag ni nge fith. Ere ke un fare Mich kar ranow. Ma mang e buch? Kan tababnag e Bible study ma nel’ e pul nga tomren me un fare ppin ko publisher ni dawori un ko taufe. Ma de n’uw nap’an nga tomren ma bay nel’ e study rok. Aram e flaab ni yib ya kan fanay e llowan’ nge salap ni fan ko pigpig ko Gil’ilungun Got!
12. Uw rogon nrayog ni ngad fanayed e salap rodad ko machib?
12 Ra ayuwegdad ngad salapgad ko machib ni faanra gad ra poy e pi babyor ni bod fa ke babyor ni 192 e page riy ni Tamilangan’ ni ma Pow’iy Iyan ko Yafas ni Manemus. Fare ulung ni Writing Committee ko Governing Body ko Pi Mich Rok Jehovah e kar pied e thin nrayog ni kun piliyeg e thin ko re ke babyor nem ko 140 mit e thin nge boch u nap’an e April ko 1996, ma ngiyal’ nem ma ke m’ay i fl’eg 30,500,000 ken e babyor ko 111 mit e thin. Kan fl’eg e re ke babyor nem ni ngan ayuweg e girdi’ ni ngar nanged fan e Thin Rok Got nge tin nib m’agan’ ngay nib gaman ma aram e ke bung rogorad nrayog ni ngar ognaged yad ku Jehovah mar uned ko taufe. Ma piin publisher e dabra filed e Bible ngak taabe u lan in e duw ma aram e rayog ni nge yoor e girdi’ ni yad ma fil e Bible ngorad ma nge yoor e machib ni yad ma tay ko machib u mit e tabinaw iyan. (Acts 5:42; 20:20, 21) Yad manang ni thingara weliyed ku Got e n’en ni kar rin’ed me ere yad ma ginang e girdi’ ko n’en nra rin’ Got. (Ezekiel 33:7-9) Machane n’en th’abi ga’ fan u wan’rad e ngar ted fan Jehovah mar ayuweged e girdi’ ni urngin nrayog rorad ni ngar nanged fare thin nib fel’ ma yad nang ni ke buch uw e tayim ni ka bay ko re m’ag nib kireb ney.
Pi Tabinaw e Thingara Weliyed ku Got e N’en ni Kar Rin’ed
13. Mang fan ni pi tabinaw ni ma fol rok Got e susun ni ngar filed e Bible u taabang u gubin ngiyal’?
13 Ra reb e girdi’ ma ra reb e tabinaw ni ke un ko tin riyul’ e Kristiano e thingara weliyed ku Got e n’en ni kar rin’ed me ere susun ni “ngar ilalgad iyan ko tirok Got ban’en” mar pared ni ba “mudugil e michan’ rorad.” (Hebrews 6:1-3; 1 Peter 5:8, 9) Susun, piin ni ur filed fare ke babyor ni Tamilangan’uy mar uned ko taufe e ba t’uf ni nguur nanged fan e Thin Rok Got ma thingara uned ko pi muulung u gubin ngiyal’ mar bieged e Bible nge pi babyor ko Kristiano. Ma pi tabinaw ko Kristiano e susun ni ngar filed e Bible u taabang u gubin ngiyal’ ya aram rogon ni ngar pared nib “od, mab mudugil e michan’ rorad, mar uned ko maruwel ni bod e piin pumoon, mar gelgad iyan.” (1 Korinth 16:13) Faanra gur be’ ni ani lolugen e tabinaw ma ri thingar mu weliy ku Got e n’en kam rin’ mab mil fan ngom ni ngam duruw’iy e tabinaw rom ko ggan nib spiritual. Bod rogon e ggan ni ma ayuweg fithik’ i dowey maku aram rogon e ggan nib spiritual ni ba t’uf ni ngam pared nib “fel’ rogon e michan’ romed” ni gur nge girdien e tabinaw rom.”—Titus 1:13.
14. Mang wenegan ni yib ko machib ni tay bochi ppin nu Israel ni kan fil e thin rok Got ngak?
14 Ra chaariy Got e tin nib fel’ ni kam rin’ nfaanra bay e bitir ko tabinaw rom ma kam fonownagrad ko tirok Got ban’en. Ya ra yib angin ngorad ni bod rogon fare buliyel nu Israel ni kan kol kan fek nga Syria u nap’an Elisha ni profet rok Got. Ke mang tapigpig rok fare ppin ku Naaman ni ir e ga’ ko salthaw nu Syria ma ba daraw. Yugu demtrug fene buch uw e duw rok ma ke yog e chi ppin nem ngak fare ppin ni masta rok ni gaar: “Faan mang e ra yan e masta rog i guy fare profet ni ma par u Samaria ma ra chuweg e daraw rok.” Bochan e machib ni tay ma aram e ke yan Naaman nga Israel, ma ke rin’ e n’en ni yog Elisha ngak me maluk u lan fare Lul’ ni Jordan ni medlip yay, ma aram me chuw e daraw rok. Miki un Naaman ko liyor ku Jehovah. Mu lemnag ko uw fene falfalan’ fachi ppin!—2 Kings 5:1-3, 13-19.
15. Mang fan ni baga’ fan ko piin gallabthir ni ngar skulnaged e bitir rorad ko tirok Got ban’en? Mu weliy.
15 De mom ni ngan chuguliy e bitir ni nge yib madgun Got u wan’rad ya re fayleng ney e dariy e gafarig nib fel’ riy ya bay u tan pa’ Satan. (1 John 5:19) Lois ni titaw ku Timothy nge Eunice ni chitingin e ur filew e Thin Rok Got ngak u nap’an ni kab madway. (2 Timothy 1:5; 3:14, 15) Thingar mu weliy ku Got e n’en ni kam rin’ ko bitir rom nib muun ngay ni ngam fil e Bible ngorad, ma ngam fekrad iyib ko pi muulung ko Kristiano u gubin ngiyal’ ma ngam fekrad ngar uned ngom ko machib. Reb e Kristiano u Wales, e ke pag 80 e duw rok e chiney ma ke yog ni nap’an e duw ni 1920 iyan ma ke un ko chitamangin ko machib mar ranow u but’ ni 6 e mayal nga daken reb e burey nga baraba’ (aram 12 e mayal oren) ni ngar weregew e pi tract ko Bible ngak e gird’ u lan e loway. Ke pining fare ppin e magar me gaar: “Nap’an ni gamow be yan e papa rog u but’ ma ereram e ngiyal’ ni ke ayuwgeg nge taw e thin riyul’ nga gumerchaeg.”
Piin Piilal e Ra Weliy e N’en ni Ur Rin’ed—Uw Rogon?
16, 17. (a) U Israel kakrom ma mang taw’ath ni maruwel ni kan pi’ ngak e piin piilal ni yad ba ilal ko tirok Got ban’en? (b) Mang fan ni kab baga’ e n’en nib mil fan ngak e piil piilal ni Kristiano ko ngiyal’ ney?
16 Solomon ni be’ nib gonop e gaar: “Piyan lolugey ni ke manna e aram ba teeliaw nib gamog nfaanra ba mat’aw ngongoley. (Proverbs 16:31) Machane gathi ke mus ni bochan ni ke pillibthir be’ ma aram e ke bung rogon ni nge yog e thin u lan e ulung rok Got. U Israel kakrom ma piin pillal ni yad ba ilal ko tirok Got ban’en e kan dugliyrad ni yad e pi tapuf oloboch nge piin ni ma ayuweg e ulung nge par nib mat’aw mab gapas mab yaram mab fel’ ko tirok Got ban’en. (Deuteronomy 16:18-20) Ku aram rogon u lan e ulung ko Kristiano machane kab boor ban’en nib t’uf ni nge rin’ e piin piilal ya be chugur iyan nga tungun e re m’ag ney. Ko mang fan?
17 Piyu Israel faram e yad e ‘girdi’ ni kan mel’egrad’ me chuwegrad Got u Egypt kakrom. Moses e ir e maaf u thilrad Got me pi’ fare Motochiyel ngorad me ere pi fakrad e ni gargelnagrad u lan ba nam ni kan ognag ku Jehovah me ere goo yad manang e pi motochiyel rok. (Deuteronomy 7:6, 11) Machane dariy be’ ko ngiyal’ ney e kan gargelnag u reb e nam ni kan ognag, ma buch uw e girdi’ e kan chuguliyrad u lan e tabinaw ni ma fol rok Got ma manang e thin riyul’ ko Bible. Ere piin ni ka fini tabab ni “ngar ranod ko thin riyul’” e ba t’uf ni ngan fil ngorad ko uw rogon ni ngar pared ni yad be fol ko thin ko Bible. (3 John 4) Aram e n’en ni kan pag fan ngak e piin piilal ni ‘dar paged fapi thin nib riyul’ ni kan fil ngorad, me ir e yad be fol riy’ mi yad ayuweg e girdi’ ku Jehovah!—2 Timothy 1:13, 14.
18. Miti mang ayuw e thingari pi’ e piin piilal ko ulung, ma mang fan?
18 Ba bitir ni fin be fil rogon e yan e ra dol me paraw nga but’. Ma sana be rus ma ba t’uf e ayuw ko gallabthir rok mi yow pi’ e athamgil nga laniyan’. Ku arrogon be’ ni ke ognag ir ku Jehovah e rayog ni nge dol fa nge mul ko tirok Got ban’en. Ma mus ngak apostal Paul ma kub t’uf ni nge athamgil nib elmirin ni nge rin’ e tin nib mat’aw ban’en nge tin nib fel’ u wan’ Got. (Roma 7:21-25) Pi tachugol saf ko yu rran’ i saf rok Got e ba t’uf ni ngar t’ufeged mar ayuweged e pi Kristiano ni kar rin’ed ban’en nib kireb machane kar kalgadngan’rad. Bay biyay ni ke yan e piin piilal nga tafen reb e ppin ni ke un ko taufe ma ke rin’ ban’en nib gel e oloboch riy, ma ke yog u p’eowchen e pumoon rok ni gaar: “Gu manang ni ngam tharbogneg ko ulung!” Me yor faani yog e piin piilal ngak ni yad ba adag ni ngar nanged ko uw rogon nrayog ni ngar ayuweged nge sul e tabinaw rok nga rogon ko tirok Got ban’en. Manang e piin piilal ni thingara weliyed ku Got e n’en ni kar rin’ed me ere kar ayuweged e cha’ nem ya kari kalngan’.—Hebrews 13:17.
Nguun Pi’ e N’en nib Fel’ ni Ngan Chaariy
19. Uw rogon ni nguuda weliyed ku Got e n’en nib fel’ ni kad rin’ed?
19 Piin piilal ko ulung nge urngin e tapigpig rok Got e ba t’uf ni nguur rin’ed e n’en ni nge yog ni ngan weliy ku Jehovah e n’en nib fel’ ni kar rin’ed. Rayog e re n’ey nfaanra gad ra fol ko Thin Rok Got ma gad rin’ e tin m’agan’ ngay. (Proverbs 3:5, 6; Roma 12:1, 2, 9) Ma ri gad ba adag ni ngad rin’ed e tin nib fel’ ko piin ni taareb e michan’ rodad. (Galatia 6:10) Machane, kab boor e n’en ni ngan kunuy ngan tay nga naun ma buch uw e piin nra maruweliy. (Matthew 9:37, 38) Ere ngad ngongliyed e ngongol nib fel’ ngak yugu boch e girdi’ ma gad wereg fare thin ko Gil’ilungun Got ngorad. Ra chaariy Jehovah e n’en nib fel’ ni kad rin’ed nfaanra gad ra lubeg e n’en ni kad ognaged gadad ngay, ma gad rin’ e tin nib m’agan’ ngay ma gad yul’yul’ i wereg fare thin nib fel’.
20. Mang e gad be fil ko pi n’en ni rin’ Nehemiah?
20 Ere nguud maruweliyed e maruwel rodad ni fan ngak Somol. (1 Korinth 15:58) Ma gad lemnag Nehemiah, nge rogon ni ke toy e yoror ko Jerusalem me n’igin ni nga un fol ko motochiyel rok Got, ma ke passig i mon’ognag e bin riyul’ e liyor. I yibilay ni dabi pag talin Jehovah Got urngin e tin nib fel’ ni ke rin’. Ngam yul’yul’ ku Jehovah ni aram rogon ma ra chaariy e tin nib fel’ ni kam rin’.
Mang e Fulweg Rom?
◻ Mang kanawo’ ni tay Nehemiah?
◻ Mang fan ni thingarda weliyed ku Got e n’en ni kad rin’ed ni bochan ni bay e tamilangan’ rodad?
◻ Uw rogon nrayog ni ngad weliyed ku Jehovah nib fel’ e pi n’en ni kad rin’ed ko machib?
◻ Mang e ra rin’ girdien e tabinaw me yog ni ngar weliyed e n’en nib fel’ ni kar rin’ed ku Got?
◻ Uw rogon ni ma weliy e piin piilal ko Kristiano ku Got e n’en ni kar rin’ed?
[Sasing ko page 15]
Bod rogon Paul ma rayog ni ngad weliyed ku Got e n’en nib fel’ ni kad rin’ed nfaanra gad ra wereg e thin ko Gil’ilungun
[Sasing ko page 16]
Ba gel e michan’ ko pi bitir rom ni bod fachi ppin nu Israel ni immoy u tafen Naaman fa?