Dab Mu Pagem—Dab Kum Lemnag Ndabiyog Rom
1. Mang fan ni bay boch e walag ndarur tababgad i fil e Bible ngak be’?
1 Ga ma siyeg ni ngam tabab i fil e Bible ngak be’ ni bochan e ga be lemnag ndabiyog rom? Immoy boch e tapigpig rok Got kakrom ni bod rogon Moses nge Jeremiah ni ur lemnaged ndabiyog ni ngar rin’ed e maruwel ni kan pi’ ngorad. (Ex. 3:10, 11; 4:10; Jer. 1:4-6) Boor e walag ni yad ma lem ni aray rogon. Ere, uw rogon ni ngar gelgad ko re n’ey?
2. Mang fan ndabi par ni kemus ni goo machib u mit e tabinaw e ngaud ted, ma gad pag boch e walag nge mang yad e ra guyed rogon ni ngar tababgad i fil e Bible ngak boch e girdi’?
2 Dab da paged talin ni Jehovah e dabi yog ngodad ni ngad rin’ed ban’en ni faanra manang ndabiyog rodad. (Ps. 103:14) Ere, fare maruwel ni kan tay chilen ngodad ni ngad rin’ed ni aram e ngad ‘pininged e girdi’ ngar manged boch i gachalpen’ Jesus, ma gad fil ngorad rogon ni ‘ngaur folgad’ ko tin ni ka nog ngodad e aram reb e maruwel nrayog ni ngad rin’ed. (Matt. 28:19, 20) Re tow’ath ney e gathi kemus ni pi arodad nib salap ara boor ban’en ni manang e ke pi’ Jehovah ngak. (1 Kor. 1:26, 27) Ere, susun ndabi par ni kemus ni goo machib u mit e tabinaw e ngaud ted, ma gad pag boch e walag nge mang yad e ra guyed rogon ni ngar tababgad i fil e Bible ngak boch e girdi’.
3. Uw rogon ni ke pi’ Jehovah mat’awdad ni ngad filed e Bible ko girdi’?
3 Jehovah e Ir e Ke Pi’ Mat’awdad: Jehovah e ir e ke pi’ mat’awdad ni ngad yognaged boch i gachalpen Jesus. (2 Kor. 3:5) Ke fil ngodad e tin riyul’ u Bible u daken e ulung rok, ma pi n’ey e bogi ban’en ni ki mada’ ko piin nib tolang e skul rorad u fayleng ma dar nanged. (1 Kor. 2:7, 8) Ke n’igin Got ni ngan yoloy e pi kanawoen e machib ni i tay e Bin Th’abi Salap e Tamachib ni aram Jesus ni ngad folwokgad riy, maku be skulnagdad u daken e ulung rok. Maku reb e gathi ke digeydad Jehovah ni gadad e ngad lemnaged rogon ni ngad filed e thin nu Bible ko girdi’. Ya bay boch ban’en ni ke pi’ ni bod rogon fare ke babyor ni Mang e Ri Be Fil e Bible?, ni bay e tin riyul’ riy nib mom ni ngan nang fan. Ere, gathi rib gel e mo’maw’ riy ni ngan fil e Bible ngak be’.
4. Mang fan nrayog ni nge pagan’dad nra ayuwegdad Jehovah?
4 I yog rok Moses nge Jeremiah ni ngar rin’ew e maruwel rorow u daken e ayuw rok Jehovah. (Ex. 4:11, 12; Jer. 1:7, 8) Ere, rayog ni nga dogned ngak Jehovah ni ngki ayuwegdad. Bin riyul’ riy e nap’an ni gad be fil e Bible ngak be’, ma aram e gad be ayuweg facha’ ni nge nang e tin riyul’ u murung’agen Jehovah, ma rib fel’ e re n’ey u wan’ Got. (1 John 3:22) Ere, mu nameg ni ngam tabab i fil e Bible ngak be’, ya aram ban’en ni yima rin’ ko machib nrib gel e felfelan’ ni yima tay riy ma boor e tow’ath nra yib riy.