Yugu Boch E Saf Nge Fare M’ag Nib Biech

“Pi girdi’ nu bang . . . , urngin e piin ni be fol ko sabbath ma dar dariy fannaged ma yad be chichiiy pa’rad ko m’ag rog, ma ri gu ra fekrad iyib ko burey rog nib thothup.”​—ISAIAH 56:6, 7, New World Translation.

1. (a) Rogon e n’en ni pig e changar rok John nge guy ma mang fan ni yibe taleg e nifeng ko pufthin rok Jehovah? (b) Mang e ulung ni ke guy John?

FA BIN aningeg yay u lan e babyor ni Revelation ni i pig e changar rok apostal John, me guy fa aningeg i nifeng ko magothgoth ni be yip’ fan e pufthin rok Jehovah ni yibe tel ya ngan mu’ i dugliy urngin e girdi’ ko “fare Israel rok Got.” Pi girdi’ ney e yad e tin som’on e girdi’ ni ra flaab u daken Jesus, ni ir fa bin som’on i Owchen Abraham. (Galatia 6:16; Genesis 22:18; Revelation 7:1-4) Ma nap’an ni guy John e re n’em miki guy “ba ulung e girdi’ ni baga’, ndariy be’ nrayog ni nge theegrad, nra bad u gubin e nam, nge ganong, nge gubin mit e girdi’, ngu gubin e thin . . . , mi yad non ni baga’ lamrad ni be lungurad: ‘Kanawoen ma gamad thap ngak Got e yib rok fare Fak e Saf.’” (Revelation 7:9, 10. NW.) Pi thin ney ni “Kanawoen ma gamad thap ngak Got e yib rok fare Fak e Saf,” e be dag ni ku ra flaab fare ulung ni baga’ ni bochan Owchen Abraham.

2. Nap’an ni ke m’ug fare ulung ni baga’ ma uw rogon ni kan nang?

² Kan nang u morngaagen e re ulung ni baga’ ney ko duw ni 1935, ma chiney ma ke pag lal e milyon e girdi’ ko re ulung nem. Yad e piin nra magay nib fas ko fare gafgow ni baga’, ma Jesus e ra pi’ e yafas ni manemus ko pi girdi’ nem u nap’an ni ra dareg e “saf” ko “kaming.” Pi Kristiano ni yad fare ulung ni baga’ e yad girdien “yugu boch e saf” u lan fare fanathin rok Jesus u morngaagen e yu ran’ i saf. Yad ma athapeg e par ndariy n’umngin nap’an u paradis u fayleng.​—Matthew 25:31-46; John 10:16; Revelation 21:3, 4.

3. Uw rogon nib thil e pi Kristiano ni kan dugliyrad ko girdien yugu boch e saf ni fan ko fa bin nib biech e m’ag?

³ Ra flaab girdien fare 144,000 ko fare m’ag rok Abraham u daken e bin nib biech e m’ag. Yad bang ko re m’ag nem, me ere yad “ba’ u tan e runguy rok Got” ngu “tan e motochiyel rok Kristus.” (Roma 6:15; 1 Korinth 9:21) Ere ke mus ni fa 144,000 e girdi’ ni yad fare Israel rok Got e yad ma un ko abich nge garbod u nap’an e Puguran ko yam’ ni tay Jesus, ma ke mus ni goo yad e ke fl’eg Jesus fare m’ag ko Gil’ilungun Got u thilrad. (Luke 22:19, 20, 29) Girdien fare ulung ni baga’ e gathi yad bang ko fa bin nib biech e m’ag. Machane yad ma chag u taabang ko fare Israel rok Got mi yad par u lan fare “binaw” rorad. (Isaiah 66:8) Ere ku yad e yad ba’ u tan e runguy rok Jehovah ngu tan e motochiyel rok Kristus. Gathi yad bang ko fa bin nib biech e m’ag machane yad ra un ko flaab riy.

“Girdi’ nu Bang” nge “fare Israel rok Got”

4, 5. (a) Rogon ni yog Isaiah, ma mang ulung e ra pigpig ku Jehovah? (b) Uw rogon ni ke lebug e thin ko Isaiah 56:6, 7 u daken fare ulung ni baga’?

⁴ Yoloy Isaiah ni profet ni gaar: “Pi girdi’ nu bang ni kar uned ku Jehovah ni ngar pigpiggad ngak ma ba t’uf rorad fare ngochol rok Jehovah mi yad adag ni ngar manged e pi tapigpig rok, nge urngin e piin ni be fol ko sabbath ma dar dariy fannaged ma yad be chichiiy pa’rad ko m’ag rog, ma ri gu ra fekrad iyib ko burey rog nib thothup mi yad par nib falfalan’ u lan tafen e meybil rog. Gu ra felan’ ko pi maligach rorad ni kan urfeg u daken e altar rog.” (Isaiah 56:6, 7) Ere u Israel, ma “girdi’ nu bang” ni gathi yad piyu Israel e ra liyor ku Jehovah​—ma ra t’uf rorad e ngochol rok, mi yad fol ko fare m’ag ko Motochiyel, mu ur folgad ko sabbath, ma yad ra pi’ e maligach u tempel, ni aram “tafen e meybil” rok Got.”​—Matthew 21:13.

⁵ Ngiyal’ ney ma pi “girdi’ nu bang” ni kar uned ku Jehovah e yad fare ulung ni baga’. Yad ma pigpig ku Jehovah u taabang ko fare Israel rok Got. (Zekariah 8:23) Yad ma pi’ e maligach ni ke felan’ Got ngay ni bod fare Israel rok Got. (Hebrews 13:15, 16) Yad ma meybil u lan e tempel nib spiritual rok Got ni “tafen e meybil.” (Mu taarebnag ko Revelation 7:15.) Yad ma fol ko sabbath u gubin e wik? Piin ni kan dugliyrad ko kan ni thothup nge girdien yugu boch e saf e dan tay chilen ngorad ni ngar rin’ed. (Kolose 2:16, 17) Machane, yog Paul ngak e pi Kristiano ni Hebrew ni gaar: “Machane rogon e chiney e ka ba’ e toffan ni nge tay girdien Got ni bod e toffan ni tay Got ko re rran ni man e medlip ngay. Ya en nra yan nge un ngak Got ko toffan e ra toffan ko maruwel rok, ni bod rogon Got ni toffan ko maruwel rok.” (Hebrews 4:9, 10) Pi girdi nem ni Hebrew e ur uned ko “toffan ko sabbath” u nap’an ni kar uned ko kanawo’ rok Got ni ir e ma “mat’awnag Got” e girdi’ riy ngak, mar toffangad ndabkuura guyed rogon ni ngar mat’awnaged yad u daken e fol ko Motochiyel. (Roma 10:3, 4) Pi Kristiano ni kan dugliyrad ma gathi yad piyu Israel e ku yad be un ko re toffan nem ya yad ma un ko kanawo’ rok Got ni ir e ma mat’awnag Jehovah e girdi’ riy ngak. Ku arrogon fare ulung ni baga’ ni yad ma un ko re toffan nem.

6. Uw rogon ni ma chichiiy yugu boch e saf pa’rad ko fa bin nib biech e m’ag?

⁶ Maku, girdien yugu boch e saf e yad ma chichiiy pa’rad ko fa bin nib biech e m’ag ni bod e pi girdi’ nu bang ni ur folgad ko fare m’ag ko Motochiyel. Uw rogon? Gathi yad bang ko re m’ag nem machane yad ma fol ko pi motochiyel riy ma ma yib angin ngorad ni bochan. (Mu taarebnag ko Jeremiah 31:33, 34.) Girdien yugu boch e saf e yad bod e piin ni kan dugliyrad ni kan yoloy e pi motochiyel rok Jehovah nga ‘gum’ercha’rad.’ Ri ba t’uf rorad e pi motochiyel rok Jehovah ma yad ma fol riy. (Psalm 37:31; 119:97) Yad manang Jehovah ni bod e pi Kristiano ni kan dugliyrad. (John 17:3) Ma uw rogon e circumcise ara ngan maadad ko pumoon? Gonapan 1,500 e duw u m’on ni kan fl’eg e bin nib biech e m’ag me yog Moses ko piyu Israel ni gaar: “Thingar mu circumcise naged gum’er’cha’med.” (Deuteronomy 10:16; Jeremiah 4:4) Nap’an ni kan taleg fare Motochiyel ma daki t’uf e circumcise machane girdien fachi ulung nge yugu boch e saf e thingara “circumcisenaged” gum’ercha’rad. (Kolose 2:11) Bin tomur, ma ma n’ag Jehovah fan e oloboch ko girdien yugu boch e saf u daken rachaen Jesus ni “rachaen ni bayi micheg e m’ag.” (Matthew 26:28; 1 John 1:9; 2:2) Gathi yad pi fak Got nib spiritual ni bod fare 144,000 i girdi’. Machane ke mat’awnag Got girdien yugu boch e saf ngak ni bod rogon ni i mat’awnag Abraham ngak me pining e “fager rok Got” ngak.​—Matthew 25:46; Roma 4:2, 3; James 2:23.

7. Mang e rayog ni nge athapeg girdien yugu boch e saf ko ngiyal’ ney, ni yad e piin ni kan mat’awnagrad ngak Got ni bod Abraham?

⁷ Ngan pining e mat’aw ngak fa 144,000, ya aram e kan bing e kanawo’ ni ngar athapeged ni ngar uned ku Jesus ko gagiyeg u Gil’ilungun Got u tharmiy. (Roma 8:16, 17; Galatia 2:16) Ma ngan pining e mat’aw ko yugu boch e saf ni yad e pi fager rok Got ya aram e rayog ni ngar athapeged e par u fayleng ndariy n’umngin nap’an u paradis​—ni yad ra magay nib fas ko Armageddon ni yad fare ulung ni baga’ ara ngan ‘fasegrad ko yam’ ni yad e tin nib mat’aw.’ (Acts 24:15) Rib fel’ e re taw’ath nem ni nge yog e athap ni aram rogon ma ngan m’ag fager ku An Th’abi Ga’ u palpal th’ib, ma ngan “par u lan e tento [rok]”! (Psalm 15:1, 2, NW.) Arrogon, girdien fachi ulung nge yugu boch e saf e yad ba flaab u daken Jesus, ni ir Owchen Abraham.

Bin nib Baga’ e Rorran ko Biyul’

8. Mang e be yip’ fan e pi maligach ni un pi’ ko Rofen ni Biyul’ ko fare Motochiyel?

⁸ Nap’an ni weliy Paul u morngaagen e bin nib biech e m’ag me weliy morngaagen fa Rofen ni Biyul’ ko fare m’ag ko Motochiyel. Rofen nem ma kan pi’ boch e maligach​—reb e fan ko pi prist ko ganong ni Levi ma reb e fan ko fa tin ni ka bay ko fa 12 i ganong ni gathi yad e prist. Kan weliy faram ni re n’ey e be yip’ fan e maligach ni pi’ Jesus ni ra ayuweg fare 144,000 ni yad be athapeg e par u tharmiy nge bokum milyon e girdi’ ni yad be athapeg e par u fayleng.a I dag Paul nrogon nra lebug e re n’em ma ra yib angin e biyul’ ni pi’ Jesus u daken e bin ni baga’ e Rorran ko Biyul’ ko fa bin nib biech e m’ag. Jesus e ir fare Prist nib Tolang ko re rran nem ni baga’, me pi’ e yafas rok nib flont nib maligach ma ra fanay e binem e “biyul’ ndariy n’umngin nap’an” ni fan ko girdi’.​—Hebrews 9:11-24.

9. Mang e ke yog ko pi Kristiano ni Hebrew ni kan dugliyrad ni bochan fa bin nib biech e m’ag?

⁹ Boor e Kristiano ni Hebrew u nap’an e bin som’on e chibog e “yad be tiyan’rad ko fare Motochiyel.” (Acts 21:20) Ere ke yog Paul ngorad ni gaar: “[Jesus] e ir e ngongliy rogon e bin nib beech e m’ag, ni fan ko piin ni ke piningrad Got ni nge yog e flaab ndariy n’umngin nap’an ngorad ni ke yog Got nra pi’ ngorad. Re n’em e rayog ni fan e yam’ ni ke tay e ir e ke biyuliy e girdi’ ko pi’ kireb ni kar ngongliyed ko ngiyal’ ni baaram ni yad be par u tan e bin som’on e m’ag.” (Hebrews 9:15) Fa bin nib biech e m’ag e ke pithig e pi Kristiano ni Hebrew ko fa bin kakrom e m’ag ni re m’ag nem e ke tamilangnag e denen rorad. Ke magar e bin nib biech e m’ag ya rayog e “flaab ndariy n’umngin nap’an ngorad ni ke yog Got nra pi’ ngorad.”

10. Piin ni kan dugliyrad nge girdien yugu boch e saf e yad ma pining e magar ku Got ko mang?

¹⁰ Ra yib angin e maligach ni biyul’ ko “urngin” e piin ni ke “mich u wan’[rad] e en ni Fak Got.” (John 3:16, 36) I gaar Paul: “Aram rogon ni Kristus e ku ni pi’ ni maligach nri taab yay ni nge chuweg e denen rok boor e girdi’. Ma bayi yib i m’ug ko yay ni nge man e l’agruw yay ngay, ni gathi fan ko denen, machane bochan e nge thapeg ngak Got e piin ni yad be sonnag.” (Hebrews 9:28) Ngiyal’ ney ma piin ni be sap ngak Jesus e ba muun ngay e tin ni ka bay e Kristiano ni kan dugliyrad ni yad fare Israel rok Got nge fa bokum milyon e girdi’ ni yad fare ulung ni baga’ ni yad be athapeg e par ndariy n’umngin nap’an. Yad gubin e yad ma pining e magar ku Got ni bochan fa bin nib biech e m’ag nge pi flaab ni bayi yibnag ni yafas ni manemus, nge ku bochan e bin ni baga’ e rorran ko Biyul’ nge maruwel rok Jesus ni ir fare Prist nib Tolang u lan e Gin’en Nth’abi Thothup.

Yoor Pa’ ni fan ko Pigpig nib Thothup

11. Mang e ma rin’ e piin ni kan dugliyrad nge girdien yugu boch e saf u fithik’ e falfalan’ ni bochan ni kan biechnag lanin’rad u daken e maligach ni pi’ Jesus?

¹¹ U lan e babyor ni yan ngak piyu Hebrew me tamilangnag Paul ni maligach ni pi’ Jesus ko fa bin nib biech e m’ag e kab baga’ fan ko pi maligach ni un pi’ ni fan ko denen ko fa bin kakrom e m’ag. (Hebrews 9:13-15) Maligach rok Jesus e rayog ni nge “beechnag lanin’dad ko ngongol ndariy fan, nge yog nda pigpiggad ngak fare Got ni be par nib fos.” “Ngongol ndariy fan” ko pi Kristiano ni Hebrew e ba muun ngay e “denen ni kan rin’ u tan e bin kakrom e m’ag.” Ma “ngongol ndariy fan” ko pi Kristiano ko ngiyal’ ney ba muun ngay e denen ni ur rin’ed faram ma kar kalgadngan’rad riy me n’ag Got fan. (1 Korinth 6:9-11) Kan biechnag laniyan’ e pi Kristiano ni kan dugliyrad ma aram mi yad maruwel ni “pigpig nib thothup nfan ngak fare Got ni be par nib fos.” Maku er rogon fare ulung ni baga’. Ke biech lanin’rad u daken “rachaen fare Fak e Saf,” ma aram mi yad bay ko tempel nib spiritual rok Got, ni yad be “pigpig ngak ni rran nge nep’.”​—Revelation 7:14, 15.

12. Uw rogon ni gad ma dag ni “mmich u wan’dad ma der maruwaran’dad”?

¹² Miki gaar Paul: “Ere ngad chuchugurgad ngak Got ni gadad ba yul’yul’ u lanin’dad ngak ma mmich u wun’dad nder maruwaran’dad rok, nge lanin’dad ni kan klinnag ndakir yog ngodad ban’en nib kireb ni kad rin’ed nge dowef ni kan maluknag ko ran nib machalbog.” (Hebrews 10:22) Uw rogon nrayog ni ngad daged ni “mmich u wan’dad nder maruwaran’dad rok”? Yog Paul ko pi Kristiano ni Hebrew ni gaar: “Ere ngad chichiiyed pa’dad ko re n’en ni ir e ke l’agan’dad ngay ni ir e gadad be weliy murung’agen ya ba pagan’dad ngak Got nra rin’ e tin ni ke yog. Ere nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.” (Hebrews 10:23-25) Faanra ba gel e michan’ rodad ma ‘dabda paged e muulung rodad.’ Gad ra falfalan’ ni ngad pied e athamgil nga laniyan’ e pi walagdad mi yad pi’ e athamgil nga lanin’dad min k’aringdad ngad t’ufeged e yug girdi’ ma ngad ngongliyed e ngongol nib fel’ min gelnagdad ni ngad tamilangnaged e athap rodad u fithik’ e yoor, ndemtrug ko fa bin u fayleng ara tharmiy.​—John 13:35.

Fare “M’ag Ndariy N’umngin Nap’an”

13, 14. Uw rogon ni ra par fa bin nib biech e m’ag ndariy n’umngin nap’an?

¹³ Mang e ra buch u tomren ni yan urngin e 144,000 nga tharmiy? Ma aram e dakuriy fan fa bin nib biech e m’ag? Ngiyal’ nem ma dakuriy e tin ni ka bay ko fare Israel rok Got ni ke magay u fayleng. Urngin e piin ni yad bang ko re m’ag nem e ra moy rok Jesus “ko gin nsuwon e [Chitamangin.]” (Matthew 26:29) Machane ke yoloy Paul e babyor ngak piyu Hebrew ni gaar: “Fare Got ko gapas . . . e ke faseg e en ni ga’ ni ma gafaliy e saf ni bochan rachaen nfan ko fare m’ag ni dabi m’ay biid” (Hebrews 13:20; Isaiah 55:3) Uw rogon ni ra par e re m’ag nem ndariy n’umngin nap’an?

¹⁴ Ya som’on ma dabkun tay yugu reb nga luwan ni bod fare m’ag ko Motochiyel. Bin l’agruw, ma angin ni yib riy e dabi m’ay biid, ni bod rogon e gagiyeg rok Jesus ni ir e Pilung. (Mu taarebnag ko Luke 1:33 ko 1 Korinth 15:27, 28.) I m’agan’ Jehovah ngay ni ra par fare Gil’ilungun nu tharmiy ndariy n’umngin nap’an. (Revelation 22:5) Bin dalip, ma ra ul’ul’ iyan angin nra yibnag fa bin nib biech e m’ag ko girdien yugu boch e saf. Nap’an e Gagiyeg rok Kristus ko Biyu’ e Duw, ma piin nib yul’yul’ e ra ul’ul’ e pigpig rorad ku Jehovah ni “rran nge nep’ u lan e tempel rok” ni bod ni yad be rin’ e chiney. Dabki lemnag Jehovah e denen rorad faram ni kan n’ag fan u daken “rachaen e m’ag [rok Jesus].” Yad ra par nib mat’aw u mit Jehovah ni yad e pi fager rok, ma kan yoloy e pi motochiyel rok nga gum’ercha’rad.

15. Mu weliy rogon thilrad Jehovah nge piin ni ma liyor ngak u lan e bin nib biech e fayleng.

¹⁵ Ma ra yog Jehovah e pi thin ni baaray ko pi girdi’ ney ni yad e tapigpig rok ni gaar: ‘I gag e Got rorad, ma yad e girdi’ rog’? Arrogon. “Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad.” (Revelation 21:3) Yad ra par ko “gin ni ke par girdien Got riy,” mi yad owchen fare “binaw nib t’uf rok Got” u fayleng ni aram e ppin ku Jesus Kristus u tharmiy. (Revelation 14:1; 20:9; 21:2) Rayog urngin e pi n’ey ya ke michan’rad ko “racha’ ko fare m’ag [rok Jesus]” ma yad ma par u tan pa’ e pi pilung nge prist nu tharmiy, ni ur moyed faram u fayleng ni yad fare Israel rok Got.​—Revelation 5:10.

16. (a) Ra uw rarogon e piin ni ran fasegrad u fayleng? (b) Mang boch e flaab ni ra yib u tungun fare biyu’ e duw?

¹⁶ Ma ra diin e piin ni kar m’ad ni kan fasegrad u fayleng? (John 5:28, 29) Yira piningrad ni ngar “uned ko flaab” u daken Jesus ni ir Owchen Abraham. (Genesis 22:18) Ku thingara t’ufeged e ngochol rok Jehovah mi yad pigpig ngak, ma yad pi’ e maligach ngak, ma yad pigpig ngak u tafen e meybil rok. Piin ni ma yodorom e ra un ngak Got ko toffan. (Isaiah 56:6, 7) Ma nap’an ni ke chugur nga tungun fare biyu’ e duw, ma ra flont urngin e girdi’ nib yul’yul’ u daken Jesus Kristus nge fapi prist ni yad 144,000. Ma aram ma yad ra par ni yad ba mat’aw ma gathi ke mus ni kan pining e mat’aw ngorad ni yad e pi fager rok Got. Yad ra “fos” ya kan pithigrad ko denen nge yam’ ni af rok Adam. (Revelation 20:5; 22:2) Aram e flaab ni rib fel’! Sana gad be lemnag ni aram e ngiyal’ ni ra m’ay e maruwel ku Jesus nge fare 144,000 ni yad e prist. Ya flaab ko fa bin ni baga’ e Rorran ko Biyul’ e ra yib nib mus rogon. Maku, ra ‘pi’ Kristus urngin ban’en ni be gagiyegnag ngak e Got rok ma Chitamangin.’ (1 Korinth 15:24) Ran skengnag e girdi’ ko yay ntomur, nge mu’ ma ran thang mit Satan nge pi moonyan’ rok.​—Revelation 20:7, 10.

17. Mang e susun ni nge mudugilan’dad ngay ni ngad rin’ed ni bochan e falfalan’ ni bay nga m’on rodad?

¹⁷ Ere mang e yira rin’ u daken fare “m’ag ni dabi m’ay biid” ko ngiyal’ u tomren e re n’em? Dab dogned. Ya n’en ni ke dag Jehovah ngodad e chiney e ba gaman. Ri gad ma ngat ngay. Mu lemnag​—yafas ni manemus u lan e “tharmiy nib biech nge fayleng nib biech”! (2 Peter 3:13) Dabda paged ban’en nge n’igin nge war rogon ni gad ba adag ni ngad uned ko re flaab nem ni kan micheg. De mom ni ngan par nib mudugil. I gaar Paul: “Ya thingari gum’an’med, ni fan e nge yog ni mu ngongliyed e tin nib m’agan’ Got ngay me yog ngomed e tin ni ke yog nra pi’ ngomed.” (Hebrews 10:36) Machane dab mu pag talin ni demtrug e magawon ara togopuluw ma thingarda gelgad riy ma ri dariy fan nfaanra ngad lemnaged e falfalan’ ni bay nga m’on rodad. (2 Korinth 4:17) Ere dabda boded e “piin ni kar pied keru’rad ngak Got kar maloggad.” Ya ngad athamgilgad ni ngad manged e piin ni ke “michan’dad ngak Kristus kad thapgad ngak Got.” (Hebrews 10:39) Ngad pagedan’dad ku Jehovah, ni fare Got ko pi m’ag, ma aram e ra yib e flaab ngodad ndariy n’umngin nap’an ni gad gubin.

[Boch e Thin nra Tamilangnag Murung’agen]

Kam Nang Fan?

◻ Mini’ e yibe flaabnag u daken Owchen Abraham ni gathi ke mus ni pi Kristiano ni kan dugliyrad?

◻ Uw rogon ma girdien yugu boch e saf ni yibe flaabnagrad u daken e bin nib biech e m’ag e taareb rogon ko piin proselyte ni yad bay u tan fa bin kakrom e m’ag?

◻ Uw rogon ni kan flaabnag girdien yugu boch e saf u daken fa bin nib baga’ e Rorran ko Biyul’?

◻ Mang fan ni pining Paul fare “m’ag ndabi m’ay biid” ko fa bin nib biech e m’ag?

[Sasing ko page 31]

Bochan e falfalan’ ni bay nga m’on rodad ma ngad pared ni “ke michan’dad ngak Kristus kad thapgad ngak Got.”