Mm’oneg E Tin Nthingari M’on!

Bay e muulung ko balayal’, machane bay e maruwel ni ngam rin’. Mang e ga ra m’oneg?

GUR be’ ni figirngiy nge matam. Ma ke chugur nga tungun reb e rran ni kam maruwel nib elmirin, ma ga be lemnag fare muulung ko ulung ni bay ko balayal’. Faanra ga ra chuw ko maruwel nib pay ma ra gaman e tayim ni ngam maluk, ngam thiliyeg e mad rom, ma ngam koy ban’en u m’on ko fare muulung. Machane yib fa ani ga’ ko maruwel me fithem ko rayog ni ngam par boch ngam maruwel nib overtime. Ma be yog ni ra pi’ puluwom. Ma ba t’uf e salpiy rom.

Ara gur be’ ni leengiy nge matin. Nap’an ni ga be fl’eg rogon e abich ko balayal’, ma kam guy e mad ni boor ni dawor mu ironnag, ma boch e ba t’uf ni ngan fanay gabul. Ga ma fithem, ‘Faanra gu ra un ko muulung ko balayal’ ma wuin e bay e tayim rog ni nggu ironnag e mad?’ Ya ka fin mu un ko reb e maruwel nib full-time, ma mmo’maw rom ni ngam rin’ urngin e maruwel rom u tabinaw maku ngam un ko maruwel ni nge yog e salpiy ngomed.

Ara gur be’ ni ga be un ko skul. U lan e singgil rom ma boor e homework ni bay ko tebel rom. Boor e homework rom e kan pi’ boch kafram, machane dawor mu fl’eg, me ere chiney e bay boch e pi n’em ni thingar mu pi’ ntaab yay. Ere ga ba adag ni ngam mog ko gallabthir rom ni faanra rayog ni ngam pag e muulung ngam par u tabinaw ni ngam mu’nag e homework.

Me gur, bin ngan e ga ra m’oneg: fare maruwel nib overtime, fa ngan ironnag e mad, fa ngan fl’eg e homework, fa ngan un ko muulung? Uw rogon ni ngan m’oneg e tin th’abi ga’ fan ban’en ni fan ko tirok Got ban’en? Uw rogon e re n’em u wan’ Jehovah?

Mang e Susun ni Nge Par ni ir e Ba M’on?

Boch nga tomren ni kan pi’ fa Ragag i Motochiyel ngak piyu Israel ma kan pirieg be’ nib moon ni be mogo l’ud ko rofen ni Sabbath. Aram ban’en nib togopuluw ko fare Motochiyel. (Numbers 15:32-34; Deuteronomy 5:12-15) Gur, uw rogon ni ngam pufthinnag e re moon nem? Ga ra yog ni dabni gechignag ya gathi be maruwel ni fan ni nge yog e par nib fel’ rogon ngak ya be maruwel ni nge pi’ e tin nib t’uf ko tabinaw rok fa? Ga ra yog ni ka bay boor e rran nga m’on ni ran fol ko Sabbath me ere rayog ni ngan n’ag fan e n’en ni rin’ e re moon nem ya sana de tafinaynag u m’on riy?

Gathi arrogon e re n’em u wan’ Jehovah. Be weliy e Bible ni gaar, “Munmun, me yog Jehovah ku Moses: ‘Rib mudugil ni ngan li’ e re moon nem ngem’.’” (Numbers 15:35) Mang fan ni kari mudugilan’ Jehovah ko n’en ni rin’ e re moon nem?

Bay nel’ e rran ni rayog ko pi girdi’ nem ni ngar t’ared e l’ud ma ngar fl’eged rogorad ni fan ko ggan, nge mad, nge naun. Bin medlip e rran e susun ni ngar ted ni fan ko tirok Got ban’en. Dariy e kireb riy ni ngan mogo l’ud, machane ba kireb ni ngan fanay e tayim ni kan fal nga bang ni fan ni ngan liyor ku Jehovah ni ngan rin’ e re n’em. Pi Kristiano e gathi yad bay u tan fare Motochiyel rok Moses, machane gathi gad be fil ban’en ko re n’ey ni susun ni ngad dugliyed ko mang e n’en nth’abi ga’ fan ko ngiyal’ ney fa?​—Filippi 1:10.

Tomren ni kar pared 40 e duw u daken e ted, ma ke fl’eg yu Israel rogorad ni nga ranod nga lan fare Binaw ni Kan Micheg ngorad. Boch i yad e kar derdergad ko fare manna ni kar ked u daken e ted ma dabi siy ni yad be athapeg ni ngar ked yugu ban’en nib thil. Ma ke ayuwegrad Jehovah ni ngar pared nib mudugil e lem rorad u nap’an ni yad ra yan nga lan fare binaw nib “sug ko milik nge t’ay e ngul,” me gaar: “gathi goo ggan e ma tay e girdi’ nib fos, ya girdi’ dabi siy ni nge yog ngorad urngin bugithin ni [Jehovah] e yib rok.”​—Exodus 3:8; Deuteronomy 8:3.

Thingari maruwel yu Israel nib elmirin ni nge yog e “milik nge t’ay e ngul” ngorad. Ya boor e toogor ni thingara gelgad ngorad, ma thingara toyed e naun rorad, mar ngongliyed e milay’ rorad. Ma yug demtrug, ma ke tay Jehovah chilen ngak e girdi’ ni ngar dugliyed boch e tayim u gubin e rran ni ngar fl’eged i lemnag e tirok Got ban’en. Ku thingara filed e kanawo’ rok Got ngak e bitir rorad. Gaar Jehovah: “Thingar mu filed [e pi motochiyel rog] ngak pi fakam ngam weliyed ngorad u nap’an ni gimed be par u tabinaw, nge nap’an ni gimed be yan u kanawo’, nge nap’an ni gimed be toffan, nge nap’an ni gimed ba od.”​—Deuteronomy 11:19.

Dalip yay u gubin e duw ma urngin e pumoon nu Israel nge girdi’ ni be par rorad ni gathi yad yu Israel e thingari sak’iy nga p’eowchen Jehovah. Machane boor e pumoon e ke yarmiy ni ku ra un e ppin rorad nge bitir rorad ngorad ya kar nanged ni ra yib angin e tirok Got ban’en ko tabinaw rorad. Machane mini’ e ra ayuweg e naun rorad nge milay’ rorad ni faanra yib e toogor rorad u nap’an ni goo kar chuwgad? I micheg Jehovah ni gaar: “Dariy be’ nra guy rogon ni nge yib i mahl ngom nge fek e but’ rom ko ngiyal’ ni baaram nra reb e duw ma dalip yay ni nga mub nga p’eowchen [Jehovah] ni Got rom.” (Exodus 34:24) Ba t’uf e michan’ nib gel ni nge mudugilan’ yu Israel ni faanra yad ra m’oneg e tirok Got ban’en, ma aram dabi mul u pa’rad e tirorad ban’en. Ke micheg Jehovah nib riyul’ e thin rok fa? Ri arrogon!

Ngan M’oneg e Gagiyeg rok Got

I fil Jesus ngak pi gachalpen ni ngar m’oneged e tirok Got ban’en u m’on ko urngin ban’en. Nap’an ni pi’ fare welthin u daken e Burey me yog ko girdi’ ni gaar: “Dabi magafan’ be’ nge gaar: U uw e bay yib e ggan rog riy?’ ara, ‘n’en ni nggu garbod ngay?’ ara, ‘mad ni nggon’?’ Ngam m’oneged u wun’med e gagiyeg rok Got nge tin nib mat’aw ban’en, ma aram me pi’ urngin e pi n’ey [tin nib t’uf] ngomed.” (Matthew 6:31, 33) De n’uw nap’an u tomren ni yim’ Jesus ma pi Kristiano ni ka fin ra uned ko taufe e kar folgad ko re thin nem. Boor iyad e yad e girdi’ nu Jew ara piin ni ma un ko teliw ko Jew ni kar milekaggad nga Jerusalem ni fan ko fare madenom ko Pentekost ko 33 C.E. Ma nap’an ni yad bay u rom, me buch ban’en nib lingagil. Kar rung’aged fare thin nib fel’ u morngaagen Jesus Kristus me felan’rad ngay. Kar adaged ni nguur filed boch morngaagen e re machib nem ni ke michan’rad ngay, me ere kar pared u Jerusalem. Ma ke buch uw e chugum rorad, machane de ga’ fan e pi n’em u wan’rad. Ya kar pirieged fare Messiah! Pi walagrad ni Kristiano e ur pied boch ban’en ngorad ni aram e “ur pired ni be machibnagrad e pi apostal, ma . . . yad be meybil.”​—Acts 2:42.

Munmun ma boch e Kristiano e daki ga’ fan u wan’rad ni ngar uned ko pi muulung u gubin ngiyal’ ngar chaggad pi walagrad u taabang. (Hebrews 10:23-25) Sana kar manged e piin ta chogownag e chugum ma kar n’aged e tirok Got ban’en ya yad be guy rogon ni ngar pared nib fel’ rogorad ko salpiy. Tomren ni ke yog ko pi walag ni ndabra paged e muulung, me yoloy apostal Paul ni gaar: “Dabi m’on e salpiy u lanin’med, ma ngam pired ni nge fel’ u wun’med e tin ni ba’ romed ban’en. Ya ke yog Got ni ke gaar, ‘Ri dab gu pagem; ma ri dab gu n’igem.’”​—Hebrews 13:5.

Rib puluw e re fonow nem ni pi’ Paul. Ya lal e duw nga tomren ni ke yoloy Paul e babyor ngak piyu Hebrew ma ke longobiy e pi salthaw nu Roma Jerusalem ni Cestius Gallus e ga’ rorad. Ma pi Kristiano nib yul’yul’ e dar paged talin e n’en ni yog Jesus ni gaar: “Bay mu guyed [e re n’ey] . . . , ma en ni bay u daken e chigiy ko naun rok e ra luw nga but’ e dakuriy nap’an ni ngki chuw nga naun rok nge fek ban’en nge yan. Ma en ni bay u milay’ e thingari dabi sul ko naun rok nge fek wuru’ e mad rok.” (Mark 13:14-16) Kar nanged ni yafas rorad e be tor nga daken e fol ko n’en ni yog Jesus ma gathi maruwel rorad ara chugum rorad. Piin ni ur folgad ko n’en ni yog Paul mar m’oneged e tirok Got ban’en e dabi siy nib mom rorad ni ngar digeyed e naun rorad, nge maruwel rorad, nge mad rorad, nge chugum rorad ni kar chaariyed mara milgad nga daken e burey ma gathi arrogon e piin nib t’uf e salpiy rorad.

Rogon ni ma M’oneg Boch e Girdi’ ko Ngiyal’ Ney e Tin Th’abi Ga’ Fan Ban’en

Pi Kristiano nib yul’yul’ ko ngiyal’ ney e yad ma chaariy e muulung rorad, ma boor i yad e yad ma pag farad ni fan ni ngar uned ko pi muulung. U boch e binaw ma ke mus e maruwel ni ba’ e ka nog shift work ngay. Reb e walag e ke yog ni ra fek luwan e girdi’ ni yad ma maruwel ko rofen ni Sabado ko balayal’, ni aram e rofen ni ba adag e girdi’ ni ngar uned ko fafel, ma yad e thingar ranod nga luwan’ e re walag nem ko pi rran ni bay e muulung ko balayal’. Ma yugu boch e walag ni ku yad ma un ko maruwel ni shift work e yad ma un ko muulung ko yugu reb e ulung nib chugur nfaanra dabiyog ni ngar uned ko birorad e muulung ni bochan e maruwel. Aram rogon, ma dabra paged e muulung. Be’ ni ka fini un ko machib u Canada e ke nang fene ga’ fan fare muulung ni Theocratic Ministry Skul nge Service Meeting, machane de yog ni nge un ni bochan e schedule rok ko maruwel. Ere ke pi’ puluwon be’ ni yow ma maruwel ni nge yan nga luwan’ ko maruwel ni aram e rayog ni nge un ko pi muulung nem ni baga’ fan.

Boor e girdi’ nib m’ar nib ubchiya e dar ma pag’ed e muulung. Yad ma motoyil ko welthin u tabinaw rorad ko telefon ara kan recordnag fare muulung u nap’an ni de yog ni ngar bad nga Kingdom Hall. Yad ma tay fan e tin ni ma pi’ Jehovah u daken fare “tapigpig nib yul’yul’ mab gonop”! (Matthew 24:45) Pi Kristiano ni yad be ayuweg e gallabthir rorad ni kar pillibthirgad e ri yad ma pining e magar ko pi walag ni ma par boch ko gallabthir rorad ni nge yog ni nge un ko reb e muulung.

Mu Tafinaynag U M’on Riy!

Piin gallabthir ni yad manang nib t’uf rorad e tirok Got ban’en e ku yad ma ayuweg e bitir rorad ni ngar ted fan e pi muulung ko Kristiano. Yad ma yog ko bitir rorad ni ngar fl’eged e homework rorad ko ngiyal’ ni ka nog ma gathi ngan pag me munmun me yoor. Nap’an e rofen ni bay e muulung ko balayal’ ma ra fl’eg e bitir e homework rorad ko chi ngiyal’ nem ni kar sulod u skul. Ma dabni pag ni ngan rin’ yugu boch ban’en me magawonnag i un ko muulung.

Gur be’ ni figirngiy nge matam, ga ma m’oneg e muulung fa? Ma gur be’ ni leengiy nge matin, ga ma athamgil ni ngam yarmiy e tin nib mil fan ngom nge yog ni ngam un ko pi muulung fa? Gur be’ ni fel’ yangaren, ga ma fl’eg e schedule ni ngam rin’ e homework rom ni rayog ni ngam un ko muulung fa mm’on e homework rom ko muulung?

Pi muulung ko ulung aram ba taw’ath rok Jehovah. Susun ni ngan athamgil nib elmirin ni ngan un ko re yaram nem. Ra flaabnagem Jehovah nfaanra ga ra m’oneg e tin th’abi ga’ fan ban’en!