Ngad Mon’oggad ko Machib​—Ngad Yoloyed nga But’ Boch Ban’en u Murung’agen Be’ ni Baadag e Machib

“Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’.” (1 Tim. 4:16) Re fonow ney ni kan thagthagnag nga laniyan’ apostal Paul ni nge pi’ ngak Timothy e be m’ug riy ni susun e ngad athamgilgad ni ngad mon’oggad ko machib ndemtrug ko ka gad ba beech ko ulung rok Got fa ke n’uw nap’dad riy. Ere, bochan e re n’ey ma aram fan ni kan ngongliy reb e article ni kenggin e “Ngad Mon’oggad ko Machib.” Re article ney e bay un tay nga gubin e Machib ko Gil’ilungun ni yima fal’eg u gubin e pul. Ra reb e pi article ney ma be weliy murung’agen boch ban’en nib ga’ fan, ma kub mom nrayog ni ngad mon’oggad riy, maku be weliy boch e kanawo’ nra ayuwegdad ni ngad mon’oggad ko re n’ey. Ra taw nga reb e pul ma yira pi’ e athamgil nga laniyan’ gubin e walag ni ngar folgad ko re n’ey u nap’an e machib. Ma nap’an nra m’ay reb e pul min pi’ reb e welthin u nap’an e Service Meeting ni ngan fith riy ko pi walag rogon ni ke yib angin e re n’ey ngorad. Biney e pul e yibe pi’ e athamgil nga lanin’dad ni ngad yoloyed fithingan nge boch ban’en u murung’agen be’ ni kad mada’naged ni baadag e machib nge n’en ni kad weliyed.

Fan nib Ga’ Fan: Ra ngad rin’ed e maruwel ni kan tay chilen ngodad, ma gathi kemus ni ngad machibgad, ya ku thingar da sulod ngak e piin ni yad baadag e machib ma gad fil e thin rok Got ngorad, ara ngad puoged e ran nga awochngin e tin riyul’ ni kad yunged. (Matt. 28:19, 20; 1 Kor. 3:6-9) Ra ngad rin’ed e re n’ey, mab t’uf ni ngad sulod ngak facha’ ni kad mada’naged, ma gad weliy murung’agen e pi n’en ni baadag ni nge nang e fulweg riy, mu kud ululgad ni ngad weliyed e n’en nda weliyed ngak ko som’on. Ere, aram fan nra kad mada’naged be’ ni baadag e machib, ma thingar da yoloyed boch ban’en u murung’agen nga but’.