Ohun Tó Jẹ́ Òtítọ́ Nípa Ọjọ́ Iwájú

Jésù sọ àwọn nǹkan tó máa jẹ́ ká “mọ̀ pé Ìjọba Ọlọ́run ti sún mọ́lé.” (Lúùkù 21:31) Lára àwọn nǹkan tó sọ tẹ́lẹ̀ pé ó máa ṣẹlẹ̀ ni, àwọn ogun ńlá, ìmìtìtì ilẹ̀ tó lágbára, àìtó oúnjẹ àti àjàkálẹ̀ àrùn. Àwọn nǹkan yìí sì ń ṣẹlẹ̀ lónìí lóòótọ́.​—Lúùkù 21:10-17.

Bíbélì tún sọ ìwà táwọn èèyàn á máa hù nígbà tí ìṣàkóso èèyàn bá ti wà ní “àwọn ọjọ́ ìkẹyìn,” ó ní àwọn èèyàn á máa hùwàkíwà. O lè ka àsọtẹ́lẹ̀ yìí ní 2 Tímótì 3:1-5. Tó o bá kíyè sí ìwà àti ìṣe àwọn èèyàn lónìí, ó dájú pé wàá gbà pé àwọn nǹkan tó ń ṣẹlẹ̀ lákòókò yìí bá àsọtẹ́lẹ̀ Bíbélì yẹn mu.

Kí ni èyí túmọ̀ sí? Ó túmọ̀ sí pé kò ní pẹ́ mọ́ tí Ìjọba Ọlọ́run máa ṣe àwọn àyípadà ńlá tó máa tún ayé yìí ṣe lọ́nà tó dára gan-an. (Lúùkù 21:36) Ọlọ́run ṣèlérí àwọn ohun rere fún aráyé nínú Bíbélì. Àpẹẹrẹ díẹ̀ lára wọn nìyí.

ÌJỌBA RERE

“A sì fún [Jésù] ní àkóso, ọlá àti ìjọba, pé kí gbogbo àwọn èèyàn, orílẹ̀-èdè àti ẹ̀yà máa sìn ín. Àkóso rẹ̀ jẹ́ àkóso tó máa wà títí láé, tí kò ní kọjá lọ, ìjọba rẹ̀ ò sì ní pa run.”​—DÁNÍẸ́LÌ 7:14.

Ohun tó túmọ̀ sí: O lè gbádun ayé rẹ lábẹ́ ìjọba gidi tó máa kárí ayé, èyí tí Ọlọ́run gbé kalẹ̀ tó sì fi Ọmọ rẹ̀ ṣe Ọba.

ÌLERA TÓ DÁA

“Kò sí ẹnì kankan tó ń gbé ibẹ̀ tó máa sọ pé: ‘Ara mi ò yá.’”​—ÀÌSÁYÀ 33:24.

Ohun tó túmọ̀ sí: Àìsàn ò ní ṣe ẹ́ mọ́ láé, o ò sì ní di aláàbọ̀ ara; wàá tún ní àǹfààní láti wà láàyè láìní kú.

ÀLÀÁFÍÀ KÁRÍ AYÉ

Ọlọ́run máa “fòpin sí ogun kárí ayé.”​—SÁÀMÙ 46:9.

Ohun tó túmọ̀ sí: A ò ní gbúròó ogun mọ́ àtàwọn nǹkan burúkú tó máa ń ṣẹlẹ̀ lẹ́yìn ogun.

ÈÈYÀN RERE NÌKAN LÓ MÁA WÀ LÁYÉ

“Àwọn ẹni burúkú ò ní sí mọ́ . . . Àwọn oníwà pẹ̀lẹ́ ni yóò jogún ayé.”​—SÁÀMÙ 37:10, 11.

Ohun tó túmọ̀ sí: Kò ní sí àwọn ẹni burúkú mọ́, àwọn tó ń gbọ́ràn sí Ọlọ́run lẹ́nu nìkan ló máa ṣẹ́ kù.

GBOGBO AYÉ MÁA DI PÁRÁDÍSÈ

“Wọ́n á kọ́ ilé, wọ́n sì máa gbé inú wọn, wọ́n á gbin ọgbà àjàrà, wọ́n sì máa jẹ èso wọn.”​—ÀÌSÁYÀ 65:21, 22.

Ohun tó túmọ̀ sí: Gbogbo ayé máa lẹ́wà gan-an. Ọlọ́run máa dáhùn àdúrà tá a máa ń gbà pé kí ìfẹ́ rẹ̀ ṣẹ “ní ayé.”​—Mátíù 6:10.