Ìwà Àpọ́nlé Ti Dàwátì Nínú Ọ̀pọ̀ Ìdílé!
ÌDÍ TÓ FI YẸ KÁWỌN TÓ WÀ NÍNÚ ÌDÍLÉ MÁA BỌ̀WỌ̀ FÚN ARA WỌN
Táwọn tó wà nínú ìdílé bá ń bọ̀wọ̀ fún ara wọn, àlàáfíà á jọba, ọkàn wọn á balẹ̀, ara á sì tù wọ́n.
Ìwé The Seven Principles for Making Marriage Work sọ pé tí tọkọtaya bá ń bọ̀wọ̀ fún ara wọn, wọ́n á túbọ̀ mọyì ara wọn, wọ́n á sì máa fìfẹ́ hàn síra wọn “nínú gbogbo nǹkan tí wọ́n bá ń ṣe lójoojúmọ́, kódà nínú àwọn ohun tó dà bíi pé kò tó nǹkan.”
Ìwádìí fi hàn pé àwọn ọmọdé tó bá ń bọ̀wọ̀ fúnni máa ń níyì lójú ara wọn, wọ́n máa ń ní àjọṣe tó dáa pẹ̀lú àwọn òbí wọn, wọn kì í sì í fi bẹ́ẹ̀ ní àárẹ̀ ọpọlọ.
OHUN TÓ O LÈ ṢE
Ẹ jọ sọ̀rọ̀ nípa ohun tẹ́ ẹ máa ṣe nínú ìdílé yín. Lákọ̀ọ́kọ́, ẹ rí i pé gbogbo àwọn tó wà nínú ìdílé yín ló mọ ohun tó túmọ̀ sí láti máa “bọ̀wọ̀” fúnni. Ìkejì, ẹ kọ àwọn ìwà tẹ́ ẹ fẹ́ káwọn tó wà nínú ìdílé yín máa hù àtàwọn tẹ́ ọ̀ fẹ́ kí wọ́n máa hù. Ìkẹta, ẹ jọ jíròrò àwọn nǹkan yìí nínú ìdílé yín kí gbogbo yín lè mọ bẹ́ ẹ ṣe lè máa bọ̀wọ̀ fún ara yín.
Fi àpẹẹrẹ tó dáa lélẹ̀. Ṣé o máa ń ṣàríwísí àwọn tó wà nínú ìdílé ẹ tí wọ́n bá ṣàṣìṣe? Ṣé o máa ń fi wọ́n ṣe yẹ̀yẹ́ tí wọ́n bá sọ èrò wọn? Tí wọ́n bá ń sọ̀rọ̀, ṣé o kì í já ọ̀rọ̀ gbà mọ́ wọn lẹ́nu tàbí kó o mọ̀ọ́mọ̀ ṣe bíi pé o ò gbọ́ ohun tí wọ́n sọ? Fi sọ́kàn pé tó o bá ń bọ̀wọ̀ fáwọn èèyàn á rọrùn fún wọn láti máa bọ̀wọ̀ fún ẹ.
Ohun tó o lè ṣe: Má retí pé ohun tí ẹnì kejì ẹ tàbí àwọn ọmọ ẹ bá ṣe láá mú kó o máa bọ̀wọ̀ fún wọn. Kàkà bẹ́ẹ̀, múra tán láti máa bọ̀wọ̀ fún wọn ní gbogbo ìgbà.
Máa bọ̀wọ̀ fáwọn èèyàn tó ò bá tiẹ̀ fara mọ́ èrò wọn. Tó o bá ń sọ bí nǹkan ṣe rí lára ẹ, má ṣe máa lo àwọn ọ̀rọ̀ bíi “gbogbo ìgbà lo máa ń” tàbí “kò sígbà tó o.” Ńṣe nirú ọ̀rọ̀ bẹ́ẹ̀ máa ń buni kù, ó lè kó ẹ̀dùn ọkàn bá àwọn tó wà nínú ìdílé ẹ, ó sì lè sọ ọ̀rọ̀ tí kò tó nǹkan di bàbàrà.
OHUN TÍ ÀWA ẸLẸ́RÌÍ JÈHÓFÀ Ń ṢE
Àwa Ẹlẹ́rìí Jèhófà máa ń rọ àwọn tó wà nínú ìdílé pé kí wọ́n máa bọ̀wọ̀ fún ara wọn. A sábà máa ń sọ̀rọ̀ nípa ẹ̀ nínú àwọn àpilẹ̀kọ, ìwé àtàwọn fídíò tá à ń gbé jáde, ọ̀fẹ́ sì ni gbogbo ẹ̀.
ÀWỌN TỌKỌTAYA: Ọ̀wọ́ àpilẹ̀kọ náà Ìrànlọ́wọ́ fún Ìdílé lè ran tọkọtaya lọ́wọ́ kí wọ́n lè mọ . . .
bí wọ́n ṣe lè máa fetí sílẹ̀ dáadáa
bí wọ́n ṣe lè jáwọ́ nínú bíbá ara wọn yan odì
bí wọ́n ṣe lè jáwọ́ nínú bíbá ara wọn jiyàn
(Wá “Ìrànlọ́wọ́ fún Ìdílé” lórí jw.org)
ÀWỌN ÒBÍ: Ọ̀wọ́ àpilẹ̀kọ náà Ìrànlọ́wọ́ fún Ìdílé lè ran àwọn òbí lọ́wọ́ kí wọ́n lè kọ́ àwọn ọmọ wọn . . .
bí wọ́n ṣe lè jẹ́ onígbọràn
bí wọ́n ṣe lè máa ṣe iṣẹ́ pẹ́ẹ́pẹ̀ẹ̀pẹ́ nínú ilé
bí wọ́n ṣe lè máa sọ “ẹ jọ̀wọ́” àti “ẹ ṣeun”
(Wá “Ọmọ Títọ́” àti “Bó O Ṣe Lè Tọ́ Àwọn Ọ̀dọ́” lórí jw.org)
Tún wo àfikún náà “Àwọn Ìbéèrè Tí Àwọn Òbí Ń Béèrè,” nínú ìwé Àwọn Ìbéèrè Tí Àwọn Ọ̀dọ́ Ń Béèrè—Àwọn Ìdáhùn Tí Ó Gbéṣẹ́, Apá Kìíní. (Wá “Àwọn Ìbéèrè Tí Àwọn Òbí Ń Béèrè” lórí jw.org)
ÀWỌN Ọ̀DỌ́: Ní abala Ọ̀dọ́ lórí jw.org, wàá rí àwọn àpilẹ̀kọ, àwọn fídíò àtàwọn ìwé àjákọ tó lè ran àwọn ọ̀dọ́ lọ́wọ́ kí wọ́n lè mọ . . .
bí wọ́n ṣe lè lájọṣe tó dáa pẹ̀lú àwọn òbí, ẹ̀gbọ́n tàbí àbúrò wọn
bí wọ́n ṣe lè fi tọ̀wọ̀tọ̀wọ̀ bá àwọn òbí wọn sọ̀rọ̀ nípa àwọn òfin tí wọ́n ṣe
bí wọ́n ṣe lè jẹ́ káwọn òbí wọn fọkàn tán wọn
(Wá “Ọ̀dọ́” lórí jw.org)
O ò ní sanwó tó o bá fẹ́ lo jw.org. Kò sí pé ò ń san owó sílẹ̀ kó o tó lè lo ìkànnì náà, o ò sì nílò láti forúkọ sílẹ̀ tàbí kó o sọ ìsọfúnni nípa ara ẹ.