Àwọn Olùpòkìkí Ìjọba Ròyìn

“Ọ̀rọ̀ Ọlọrun Ń Bá A Lọ Ní Gbígbilẹ̀”

ÌJỌ Kristian gbilẹ̀ láti nǹkan bí 120 mẹ́ḿbà sí èyí tí ó lé ní 3,000 ní kìkì wákàtí díẹ̀ lẹ́yìn tí a dá a sílẹ̀. (Ìṣe 1:15; 2:41) Bibeli ṣàlàyé pé “ọ̀rọ̀ Ọlọrun ń bá a lọ ní gbígbilẹ̀, iye awọn ọmọ-ẹ̀yìn sì ń di púpọ̀ sí i ṣáá ní Jerusalemu.” (Ìṣe 6:7) Lẹ́yìn kìkì ọdún díẹ̀ péré, ìjọ tí a ṣẹ̀ṣẹ̀ dá sílẹ̀ náà di ètò àjọ tí ó kárí àgbáálá ilẹ̀, tí àwọn Kristian sì wà ní Africa, Asia àti Europe.

Ìjọ Kristian lónìí bákan náà ń nírìírí ìbísí kánmọ́kánmọ́ bẹ́ẹ̀. Fún àpẹẹrẹ, ní Mexico, àwọn olùpòkìkí Ìjọba ti fi iye tí ó lé ní 130,000 pọ̀ sí i ní kìkì ọdún márùn-ún sí 443,640! Ní 1995, ẹni 1 nínú 59 àwọn ènìyàn Mexico ni ó pésẹ̀ síbi ayẹyẹ Ìṣe Ìrántí ikú Kristi tí àwọn Ẹlẹ́rìí Jehofa ṣe. Síbẹ̀, ìkórè nípa tẹ̀mí kò tí ì parí ní orílẹ̀-èdè náà, gẹ́gẹ́ bí ìrírí tí ó tẹ̀ lé e yìí ti ṣàpèjúwe.—Matteu 9:37, 38.

Ní ìlú kan ní ìpínlẹ̀ Chiapas, kò sí ẹni tí ó tẹ́wọ́ gba ìkẹ́kọ̀ọ́ Bibeli inú ilé pẹ̀lú àwọn Ẹlẹ́rìí Jehofa, àní lẹ́yìn tí wọ́n ti wàásù ìhìn rere náà fún nǹkan bí 20 ọdún ní àgbègbè náà. Ó hàn gbangba pé, ọkùnrin kan tí gbogbo ènìyàn mọ̀ sí oníwà ipá, ti mú àyà àwọn ènìyàn ilú náà pami. Wọ́n bẹ̀rù bí yóò ṣe hùwà padà bí ó bá mọ̀ pé wọ́n ń kẹ́kọ̀ọ́ Bibeli pẹ̀lú àwọn Ẹlẹ́rìí.

Àwọn Ẹlẹ́rìí onígboyà méjì tí wọ́n ṣí lọ sí àdúgbò náà, pinnu láti yanjú ìṣòro náà nípa títọ ọkùnrin náà gan-an lọ ní tààràtà. Nígbà tí wọ́n dé ilé rẹ̀, ìyàwó rẹ̀ ni ó dá wọn lóhùn ní ẹnu ọ̀nà, ó sì fetí sílẹ̀ dáradára sí ìhìn iṣẹ́ wọn. Ní pàtàkì, ó ní ọkàn-ìfẹ́ sí ohun tí Bibeli sọ nípa gbígbé nínú Paradise orí ilẹ̀ ayé. Ṣùgbọ́n ó jẹ́wọ́ pé ọkọ òun yóò mú nǹkan nira fún òun gan-an bí òun bá ní láti kẹ́kọ̀ọ́ Bibeli. Àwọn Ẹlẹ́rìí náà ṣàlàyé fún un pé, kò lè mọ bí ó ṣe yẹ kí ó sìn Ọlọrun, kí ó sì gbádùn ìgbésí ayé lórí ilẹ̀ ayé títí láé, àyàfi bí ó bá fara balẹ̀ yẹ ohun tí Bibeli sọ wò. Ó tẹ́wọ́ gba ìkẹ́kọ̀ọ́ Bibeli.

Gẹ́gẹ́ bí a ti retí, inú ọkọ rẹ̀ kò dùn sí ìpinnu rẹ̀. Ó fòfin dè é láti lo ohun ìrìnnà rẹ̀ ní lílọ sí àwọn ìpàdé Kristian, bí ó tilẹ̀ jẹ́ pé ó yọ̀ọ̀da fún un láti lò ó fún ète mìíràn. Láìka àtakò rẹ̀ sí, ó ń rìn lọ sí Gbọ̀ngàn Ìjọba Àwọn Ẹlẹ́rìí Jehofa tí ó sún mọ́ ọ jù lọ déédéé, èyí tí ó jẹ́ kìlómítà mẹ́wàá sí ibẹ̀. Láìpẹ́, àwọn yòókù ní ìlú ṣàkíyèsí ìgboyà àti ìpinnu rẹ̀. Àwọn ènìyàn bẹ̀rẹ̀ sí i tẹ́tí sílẹ̀ nígbà tí àwọn Ẹlẹ́rìí bá bẹ̀ wọ́n wò ní ilé wọn. Àwọn kan tilẹ̀ bẹ̀rẹ̀ sí bá obìnrin náà lọ sí ìpàdé. Lẹ́yìn àkókò díẹ̀, àwọn Ẹlẹ́rìí ń darí nǹkan bí 20 ìkẹ́kọ̀ọ́ Bibeli nínú ìlú náà!

Ọ̀rẹ́ obìnrin yìí pẹ̀lú pinnu láti kẹ́kọ̀ọ́ Bibeli, láìka àtakò ọkọ rẹ̀ sí. Ìyàlẹ́nu ni ó jẹ́ pé, ọkọ obìnrin àkọ́kọ́ ni ó fún un ní ìṣírí láti ṣe bẹ́ẹ̀. Lẹ́yìn tí ọkùnrin yìí ti bá ọkọ obìnrin náà sọ̀rọ̀, àtakò náà dáwọ́ dúró. Nítorí náà, ní paríparí rẹ̀, lẹ́yìn 20 ọdún ni èso òtítọ́ Bibeli tóó ṣẹ̀ṣẹ̀ hù, tí iye tí ó lé ní ènìyàn 15 ń kẹ́kọ̀ọ́ Bibeli, tí wọ́n sì ń lọ sí ìpàdé Kristian, àwọn obìnrin méjì wọ̀nyí wà lára àwọn tí ń kéde ìhìn rere náà nísinsìnyí.