Àpéjọ Àgbègbè “Ẹ Fi Ògo fún Ọlọ́run” tí Àwa Ẹlẹ́rìí Jèhófà Yóò Ṣe ní Ọdún 2003

¹ Jèhófà tipasẹ̀ Aísáyà, wòlíì olóòótọ́, pàṣẹ pé: “Ẹ fetí sí mi, ẹ̀yin ènìyàn mi; àti ìwọ àwùjọ orílẹ̀-èdè mi, fi etí sí mi.” (Aísá. 51:4) Ní àkókò òpin tó túbọ̀ ń le koko sí i yìí, ǹjẹ́ a ò gbà pé fífetí sí àṣẹ Jèhófà ṣe pàtàkì púpọ̀ ju ti ìgbàkígbà rí lọ? Ọ̀kan lára àwọn ọ̀nà tá a gbà ń “fi etí” sí Jèhófà ni nípa ṣíṣègbọràn sí àṣẹ rẹ̀ pé ká kóra jọ fún ìjọsìn. Ẹ ò rí i bí ara wa ṣe máa ń wà lọ́nà láti rí àǹfààní àkànṣe táwọn àpéjọ àgbègbè wa ọdọọdún máa ń mú wá! Ẹgbẹ́ Olùṣàkóso ti Àwọn Ẹlẹ́rìí Jèhófà tún ti ṣètò ọ̀pọ̀lọpọ̀ àpéjọ àgbègbè ní Nàìjíríà lọ́dún 2003.

² Gẹ́gẹ́ bí ìtẹ̀jáde Ilé Ìṣọ́ ti July 1, 2002 ṣe sọ, a ó ṣe àpéjọ àgbáyé láwọn orílẹ̀-èdè kan tá a ti yàn, àwọn èèyàn yóò sì pésẹ̀ síbẹ̀ láti igun mẹ́rẹ̀ẹ̀rin àgbáyé. Gánà ni a yàn pé kí àwa ará Nàìjíríà lọ. Níwọ̀n bó ti jẹ́ pé ìwọ̀nba orílẹ̀-èdè díẹ̀ ni àpéjọ àgbáyé wọ̀nyí á ti wáyé, kìkì àwọn tá a bá yàn sí àwọn àpéjọ náà ló máa láǹfààní láti lọ. Àmọ́, a ò ní ṣàì gbádùn àwọn apá tó ní í ṣe pẹ̀lú àpéjọ àgbáyé náà ní gbogbo àwọn àpéjọ àgbègbè tí a ó ṣe. Àwọn míṣọ́nnárì máa wá sí àpéjọ àgbègbè láwọn ibi mélòó kan, a ó sì láǹfààní láti gbọ́ ìrírí látẹnu wọn. Kí la lè ṣe láti jàǹfààní ní kíkún látinú ètò tó ń lọ lọ́wọ́ báyìí fún àwọn àpéjọ wa?

³ Má Ṣe Pa Ọjọ́ Kankan Jẹ: Ká lè jàǹfààní ní kíkún látinú ìtọ́ni tí ẹrú olóòótọ́ àti olóye ń pèsè, ó yẹ ká rí i dájú pé a wà níbẹ̀ jálẹ̀ gbogbo ìtòlẹ́sẹẹsẹ náà. (Mát. 24:45) Ṣé ó máa béèrè pé kó o tọrọ àyè lọ́wọ́ ọ̀gá rẹ kó o bàa lè lọ sí àpéjọ náà lọ́jọ́ kọ̀ọ̀kan? Kí Nehemáyà tó tọrọ àyè lọ́wọ́ Atasásítà Ọba láti lọ sí Jerúsálẹ́mù kí ó bàa lè lọ tún àwọn odi rẹ̀ kọ́, ó “gbàdúrà sí Ọlọ́run ọ̀run.” (Neh. 2:4) Bákan náà, ó yẹ kó o gbàdúrà sí Jèhófà pé kó fún ọ nígboyà láti tọrọ àyè lọ́wọ́ ọ̀gá rẹ kó lè ṣeé ṣe fún ọ láti pésẹ̀ sí àpéjọ náà lọ́jọ́ mẹ́tẹ̀ẹ̀ta. Bí ọ̀gá rẹ kò bá fẹ́ fún ọ láyè ńkọ́? Bóyá tó o bá jẹ́ kó mọ̀ pé àwọn ìtọ́ni tá à ń rí gbà láwọn àpéjọ wọ̀nyí ń ràn wá lọ́wọ́ láti jẹ́ òṣìṣẹ́ aláìlábòsí, òṣìṣẹ́ aláápọn, àti òṣìṣẹ́ tó ṣe é gbọ́kàn lé, èyí lè mú kó fún ọ láyè. Láfikún sí i, bí àwọn kan nínú ìdílé wa bá jẹ́ aláìgbàgbọ́, á fi hàn pé a nífẹ̀ẹ́ wọn bí a bá tètè sọ fún wọn nípa àwọn ètò tá à ń ṣe láti lọ sí àpéjọ àgbègbè.

⁴ Máa Fi Owó Tí Wà Á Lò fún Àpéjọ Náà Pa Mọ́: Láfikún sí àwọn ètò tó kù, ÌSINSÌNYÍ gan-an ni àkókò láti bẹ̀rẹ̀ sí í fowó pa mọ́ fún lílò ní àpéjọ àgbègbè náà. Ibi táwọn kan ń gbé jìnnà gan-an síbi tí àpéjọ náà tí máa wáyé. Bákan náà, onídìílé ńlá làwọn kan. Àwọn ẹni yìí, àti gbogbo wa lápapọ̀, nílò owó tá a máa fi ṣètọrẹ, èyí tá a máa fi wọkọ̀, èyí tá a máa fi ra oúnjẹ nígbà àpéjọ àgbègbè, àti èyí tá a máa fi ṣe àwọn ohun mìíràn tí a kò ronú tẹ́lẹ̀. Ó yẹ kí púpọ̀ lára àwọn tó ní ìdílé ńlá wéwèé ṣáájú, kí wọ́n sì bẹ̀rẹ̀ sí tọ́jú owó tí ó máa tó wọn, kó bàa lè ṣeé ṣe fún gbogbo ìdílé wọn láti lọ sí àpéjọ náà. Ohun kan tẹ́ ẹ lè ṣe ni pé kẹ́ ẹ kọ́kọ́ fojú díwọ̀n àròpọ̀ iye owó tẹ́ ẹ máa ná. Nígbà tẹ́ ẹ bá ń ṣe ìṣírò yìí, á dáa kẹ́ ẹ ro ti pé owó àwọn nǹkan lè lọ sókè mọ́ ọn. Lẹ́yìn náà, kẹ́ ẹ wá pín iye owó náà sí iye oṣù tó wà láàárín ìsinsìnyí àtìgbà tẹ́ ẹ máa ṣe àpéjọ àgbègbè yín. Iye owó yẹn ni kí ẹ máa fi pa mọ́ lóṣooṣù. Ní oṣù kọ̀ọ̀kan, ẹ má gbàgbé láti kọ́kọ́ yọ iye yìí sọ́tọ̀ gẹ́gẹ́ bí owó àpéjọ àgbègbè. Ẹ lè máa fi sínú àpótí kan tàbí sínú àpòòwé. Síbẹ̀, ẹ tún lè pín owó tẹ́ ẹ̀ ń fi pa mọ́ lóṣooṣù yìí sọ́nà mẹ́rin kẹ́ ẹ sì máa yọ ọ́ sọ́tọ̀ lọ́sọ̀ọ̀sẹ̀. Kókó tó wà níbẹ̀ ni pé, má ṣe jẹ́ kó dìgbà tó bá ku oṣù kan tàbí oṣù méjì kí àpéjọ náà dé kó o tó bẹ̀rẹ̀ sí í wá owó láti lọ sí ìrìn-àjò ọdọọdún tá a máa ń lọ déédéé yìí.—Òwe 21:5.

⁵ Ìtọ́ni fún Gbígba Ilé Gbígbé: A ó sapá láti pèsè iye fọ́ọ̀mù Ìbéèrè fún Ilé Gbígbé tó pọ̀ tó fún ìjọ kọ̀ọ̀kan. Kí gbogbo àwọn tó bá fẹ́ gba ilé nípasẹ̀ ìṣètò ilé gbígbé ti àpéjọ kọ ìsọfúnni sínú fọ́ọ̀mù náà lọ́nà tó hàn ketekete, kí wọ́n sì fi lé akọ̀wé ìjọ lọ́wọ́. Kí akọ̀wé ìjọ rí i dájú pé a kọ ìsọfúnni tó yẹ sínú fọ́ọ̀mù Ìbéèrè fún Ilé Gbígbé kọ̀ọ̀kan táwọn ará bá fi sílẹ̀. MÁ ṢE kọ kìkì iye àwọn akéde tí wọ́n nílò ilé gbígbé, irú bíi “50 akéde,” sí àlàfo tó yẹ ká kọ orúkọ àwọn wọ̀nyí sí. Gbogbo ìsọfúnni ni kí a kọ nigín-nigín lọ́nà tó máa ṣeé kà. Jọ̀wọ́ rí i dájú pé o pèsè ìsọfúnni kíkún ní ti orúkọ, ọjọ́ orí, bóyá ọkùnrin tàbí obìnrin, àti bóyá ẹni tó ń béèrè fún ilé gbígbé jẹ́ aṣáájú ọ̀nà tàbí akéde ìjọ. Kọ orúkọ àwọn ọmọ síbẹ̀ pẹ̀lú. Nígbà kan rí, kìkì orúkọ àwọn àgbàlagbà làwọn ìjọ kan kọ sílẹ̀. Èyí mú kó ṣòro láti ṣètò ilé gbígbé tí ó tó. Bí ẹ bá nílò àyè sí i ju àlàfo tó wà lórí fọ́ọ̀mù náà, ẹ lo abala ìwé mìíràn. Bí ẹ bá kọ ju orúkọ ẹnì kan lọ sórí fọ́ọ̀mù náà, ẹ jọ̀wọ́, ẹ kọ bí wọ́n ṣe bára wọn tan sí àlàfo tí a pèsè fún ìyẹn. Kí akọ̀wé ìjọ rí i dájú pé a kọ ọ̀rọ̀ sínú fọ́ọ̀mù Ìbéèrè fún Ilé Gbígbé lọ́nà pípéye ṣáájú kó tó fi ránṣẹ́ sí Ẹ̀ka Tí Ń Bójú Tó Ilé Gbígbé nígbà àpéjọ àgbègbè. Kí akọ̀wé tètè fi fọ́ọ̀mù náà ránṣẹ́ tipẹ́tipẹ́ ṣáájú ìgbà àpéjọ. JỌ̀WỌ́ MÁ ṢE fi fọ́ọ̀mù Ìbéèrè fún Ilé Gbígbé ránṣẹ́ sí Society. Àdírẹ́sì ilẹ̀ àpéjọ tá a yan ìjọ yín sí, èyí tá a fi hàn ní òdìkejì fọ́ọ̀mù náà ni kí ẹ fi ránṣẹ́ sí.

⁶ Lọ́dọọdún, a máa ń rọ àwọn ará láti fọwọ́ sowọ́ pọ̀ pẹ̀lú Ẹ̀ka Tí Ń Bójú Tó Ilé Gbígbé nígbà àpéjọ àgbègbè. Ó kéré tán, ohun méjì ni èyí ń mú kó ṣeé ṣe nígbà tá a bá kọbi ara sí ìtọ́sọ́nà yìí, àwọn nìyí:

⁷ À ń dín ìnáwó àwọn arákùnrin àti arábìnrin wa kù: Nígbà tá a bá fọwọ́ sowọ́ pọ̀ pẹ̀lú ìṣètò Society, ó máa ń dín owó ilé tí àwọn ará wa ń san kù. Dípò kí àṣẹ́kù owó wa máa bọ́ sápò àwọn onílé, a lè lò ó lọ́nà tó sàn jù láti ṣètìlẹ́yìn fún ìdílé àwọn arákùnrin àti arábìnrin wa àti fún iṣẹ́ wa kárí ayé. Kódà bí àwa fúnra wa bá tiẹ̀ lágbára àtigba àwọn ilé tó gbówó lórí pàápàá, ńṣe ló yẹ ká gbárùkù ti ìsapá Ẹ̀ka Tí Ń Bójú Tó Ilé Gbígbé. Ẹ̀mí níní àníyàn fún àwọn ẹlòmíràn yìí ni 1 Jòhánù 3:17 sọ̀rọ̀ nípa rẹ̀, kókó yẹn náà sì ni 1 Kọ́ríńtì 10:24 ń sọ.

⁸ À ń ṣègbọràn sí àwọn ìtọ́sọ́nà Society: Ó yẹ kí kókó yìí jẹ́ ọ̀kan lára àwọn ìlànà pàtàkì tó yẹ ká máa fi sọ́kàn nígbà gbogbo. Hébérù 13:17 sọ pé: “Ẹ jẹ́ onígbọràn sí àwọn tí ń mú ipò iwájú láàárín yín, kí ẹ sì jẹ́ ẹni tí ń tẹrí ba, nítorí wọ́n ń ṣọ́ ẹ̀ṣọ́ lórí ọkàn yín bí àwọn tí yóò ṣe ìjíhìn; kí wọ́n lè ṣe èyí pẹ̀lú ìdùnnú, kì í sì í ṣe pẹ̀lú ìmí ẹ̀dùn, nítorí èyí yóò ṣe ìpalára fún yín.” Bí àwọn arákùnrin wa ti ń ṣètò ní ọ̀kan-kò-jọ̀kan fún àpéjọ àgbègbè wa, a fẹ́ kí wọ́n mọ̀ pé à ń tì wọ́n lẹ́yìn ní kíkún. Níwọ̀n bó ti jẹ́ pé kìkì ọjọ́ méjì tàbí mẹ́ta péré lọ́dọọdún la máa ń béèrè fún ìfọwọ́sowọ́pọ̀ wa lórí ọ̀ràn yìí, ọ̀nà dáadáa kan lèyí jẹ́ láti ti ìsapá wọn lẹ́yìn. Àní bí kì í bá tiẹ̀ ṣe ohun tá a fẹ́ ni wọ́n pèsè fún wa, àpẹẹrẹ rere wa, tí àwọn arákùnrin wa àtàwọn èèyàn ayé ń rí, ń gbé ẹ̀mí ìfẹ́, ìṣọ̀kan àti ìtìlẹ́yìn lárugẹ.—Fílí. 2:1-4.

⁹ Àwọn Tó Nílò Àkànṣe Àbójútó: Kìkì àwọn tó ń fẹ́ àkànṣe ìrànlọ́wọ́ látọ̀dọ̀ àwọn ẹlòmíràn láti múra sílẹ̀ fún àpéjọ àgbègbè nìkan ni ìṣètò yìí wà fún, pàápàá jù lọ ètò ilé gbígbé. Wọ́n tún lè nílò ìrànwọ́ láwọn ọ̀nà mìíràn, ó sinmi lórí bí ipò kálukú wọn bá ṣe rí. Àwọn akéde àtàwọn aṣáájú ọ̀nà àwòfiṣàpẹẹrẹ tí wọ́n nílò àkànṣe àbójútó nìkan ni ìṣètò Àwọn Tó Nílò Àkànṣe Àbójútó wà fún, títí kan àwọn ọmọ wọn tó mọ̀wàá hù. Ìgbìmọ̀ Iṣẹ́ Ìsìn Ìjọ ní láti fọwọ́ sí i kí wọ́n tó lè rí ìrànwọ́ náà gbà. Ìjọ tí àwọn tó nílò àkànṣe àbójútó ń dara pọ̀ mọ́ ni kó ṣe àwọn ètò yòókù láti fi bójú tó wọn dípò tí wọ́n á fi ti ojúṣe yìí sí àwọn tí ń ṣètò àpéjọ àgbègbè. Àwọn alàgbà àtàwọn mìíràn tí wọ́n mọ̀ nípa ipò ẹni náà lè ṣèrànwọ́ tìfẹ́tìfẹ́. Èyí sábà máa ń béèrè pé kí àwọn akéde mọ ohun tí àwọn tí wọ́n wà nínú iṣẹ́ ìsìn alákòókò kíkún, àwọn àgbàlagbà, àwọn aláìlera àti bóyá àwọn mìíràn nílò. Àwọn akéde lè ṣèrànwọ́ nípa mímú irú àwọn ẹni bẹ́ẹ̀ dání pẹ̀lú wọn tàbí nípa bíbójútó àwọn ohun tí wọ́n nílò láwọn ọ̀nà mìíràn.—Ják. 2:15-17; 1 Jòh. 3:17, 18.

¹⁰ Láìsí àní-àní, Ẹ̀ka Tí Ǹ Bójú Tó Ilé Gbígbé yóò sapá láti pèsè àwọn yàrá tó bójú mu fún àwọn akéde tí wọ́n nílò àkànṣe àbójútó bí àwọn tó wà nínú ìjọ kò bá lè ṣèrànwọ́ fún wọn. Àwọn akéde wọ̀nyí lè bá akọ̀wé ìjọ sọ̀rọ̀ nípa ipò wọn. Kí akọ̀wé bá Ìgbìmọ̀ Iṣẹ́ Ìsìn Ìjọ sọ̀rọ̀ láti mọ̀ bó bá ṣeé ṣe fún ìjọ láti ṣèrànwọ́ fún àwọn ẹni wọ̀nyí láti bá wọn wá yàrá. Bí ìjọ kò bá lè pèsè ìrànlọ́wọ́ tí wọ́n nílò, akọ̀wé lè fún irú àwọn ẹni bẹ́ẹ̀ ní ẹ̀dà kan fọ́ọ̀mù Ìbéèrè fún Ilé Gbígbé, kí ó wá fi lẹ́tà gàdàgbà kọ ọ̀rọ̀ náà, “ÀWỌN TÓ NÍLÒ ÀKÀNṢE ÀBÓJÚTÓ” sí apá òkè ojú ìwé àkọ́kọ́ fọ́ọ̀mù náà. Àwọn tó nílò àkànṣe àbójútó nìkan ni kó kọ ìsọfúnni sínú fọ́ọ̀mù tí a sàmì sí lọ́nà àkànṣe yìí o. Fúnra ẹni tó ń fẹ́ ìrànlọ́wọ́ náà ni kó kọ ìsọfúnni sínú rẹ̀. Kí ó dá a padà fún akọ̀wé, ẹni tí yóò rí sí i pé a ti kọ ẹ̀kúnrẹ́rẹ́ ìsọfúnni sínú rẹ̀, àti pé ìsọfúnni náà péye, tí yóò sì rí ẹ̀rí àrídájú nípa àwọn ipò tó mú ẹni náà tóótun fún irú ìṣètò bẹ́ẹ̀. Akọ̀wé ní láti ṢE KÚLẸ̀KÚLẸ̀ ÀLÀYÉ nípa àwọn ipò náà sínú àlàfo tó wà ní òdìkejì fọ́ọ̀mù náà. Gbogbo èyí la ní láti ṣe tipẹ́tipẹ́ ṣáájú àpéjọ àgbègbè náà. Lẹ́yìn èyí ni akọ̀wé yóò fi fọ́ọ̀mù náà ránṣẹ́ sí Ẹ̀ka Tí Ń Bójú Tó Ilé Gbígbé. Ẹ̀ka yìí á wá dá èsì nípa ọ̀ràn ilé gbígbé náà padà ní tààràtà fún ẹni tó ń fẹ́ ìrànlọ́wọ́ náà.

¹¹ Àwọn tó nílò àkànṣe àbójútó KÒ GBỌ́DỌ̀ lọ béèrè fún yàrá nígbà tí wọ́n bá dé gbọ̀ngàn àpéjọ, nítorí pé Ẹ̀ka Tí Ń Bójú Tó Ilé Gbígbé gbọ́dọ̀ rí ẹ̀rí àrídájú látọ̀dọ̀ Ìgbìmọ̀ Iṣẹ́ Ìsìn Ìjọ.

¹² Ọ̀pọ̀ ti sọ pé àwọn mọrírì ètò tí a máa ń ṣe fún ilé gbígbé nígbà àpéjọ àgbègbè. Ṣé ìwọ náà mọrírì ọ̀pọ̀ ètò tá à ń ṣe nítorí rẹ? Ó jẹ́ ayọ̀ Society láti máa pèsè àwọn ilé gbígbé tó ń tuni lára, tí kò sì fi bẹ́ẹ̀ gbówó lórí nígbà àpéjọ àgbègbè, èyí tó ń mú kó ṣeé ṣe fún gbogbo wa láti pọkàn pọ̀ sórí àwọn àǹfààní tẹ̀mí tí àpéjọ àti ìtòlẹ́sẹẹsẹ náà ní.

¹³ Lílọ sí Àpéjọ Mìíràn: Àpéjọ tó sún mọ́ ìjọ kọ̀ọ̀kan jù lọ la yàn wọ́n sí. Iye àwọn akéde tí a yàn sí àpéjọ àgbègbè kọ̀ọ̀kan ni Society fi ń díwọ̀n iye èèyàn tó máa wá kí wọ́n lè ṣètò àwọn nǹkan bí ìjókòó, ilé gbígbé, àwọn ìwé ìkẹ́kọ̀ọ́ àtàwọn nǹkan mìíràn, tó máa pọ̀ tó. Àmọ́ ṣá o, bí o bá nídìí tó lẹ́sẹ̀ nílẹ̀ láti lọ sí àpéjọ kan tó yàtọ̀ sí èyí tí a yàn ọ́ sí, tí o sì ń fẹ́ ilé gbígbé, akọ̀wé ìjọ lè fún ọ ní ẹ̀dà kan fọ́ọ̀mù Ìbéèrè fún Ilé Gbígbé. O lè kọ ìsọfúnni sínú rẹ̀, kí o sì jẹ́ kí akọ̀wé fọwọ́ sí i kí o tó fi ránṣẹ́ sí àpéjọ àgbègbè tí o fẹ́ láti lọ.

¹⁴ Fi Tinútinú Yọ̀ǹda Ara Rẹ: Nígbà àpéjọ, ọgọ́rọ̀ọ̀rún àwọn olùyọ̀ǹda ara ẹni máa ń ṣèrànwọ́ lóríṣiríṣi ẹ̀ka kí gbogbo nǹkan lè lọ bó ṣe yẹ. Àwọn olùtọ́jú èrò tó máa ń wà ní gbọ̀ngàn àpéjọ àti láwọn ibi ìgbọ́kọ̀sí máa ń pèsè ìtọ́sọ́nà fún wa nípa ọ̀ràn ìjókòó, wọ́n sì máa ń bá wa ṣọ́ àwọn ọkọ̀ wa nígbà tí ìpàdé bá ń lọ lọ́wọ́. Àǹfààní ló jẹ́ fún Ẹ̀ka Tí Ń Bójú Tó Ìmọ́tótó láti rí sí i pé ìmọ́tótó táwọn èèyàn mọ̀ wá mọ́ kò yingin, nípa jíjẹ́ kí ibi ìjọsìn wa wà ní mímọ́ ju bó ṣe rí ká tó lò ó lọ. Ǹjẹ́ a lè ṣèrànwọ́ fún àwọn ẹ̀ka wọ̀nyí tàbí àwọn mìíràn tí wọ́n á nílò ìrànlọ́wọ́ wa? Ṣé wàá yọ̀ǹda ara rẹ láti sìn “ní ìfẹ̀gbẹ́kẹ̀gbẹ́” pẹ̀lú àwọn arákùnrin rẹ?—Sef. 3:9.

¹⁵ Ìran Àpéwò ní Gbọ̀ngàn Ìwòran La Jẹ́: Ǹjẹ́ àwọn ẹlòmíràn máa ń rí ìyàtọ̀ tó wà láàárín àwa Ẹlẹ́rìí Jèhófà àtàwọn èèyàn ayé? Wọ́n kúkú ń rí i! Kíyè sí díẹ̀ lára àwọn ohun tí àwọn mọ́níjà òtẹ́ẹ̀lì ní ìlú kan sọ, wọ́n ní: “Kì í ṣòní kì í ṣàná tí àwọn tó ń ṣe àpéjọ ti máa ń gbalé lọ́dọ̀ wa, àmọ́ ẹ̀yin lẹ ṣì fọwọ́ sowọ́ pọ̀ pẹ̀lú wa jù, tẹ́ ẹ sì jẹ́ onínúure jù lọ.” “Lọ́sẹ̀ tó kọjá, àwọn ẹlẹ́sìn míì wá gbalé lọ́dọ̀ wa. Kò ṣòro rárá láti rí ìyàtọ̀ tó wà láàárín ẹ̀yin méjèèjì.” “A mọ̀ pé ẹ ò ní ṣàì fọwọ́ sowọ́ pọ̀ pẹ̀lú wa kẹ́ ẹ sì tún múṣẹ́ wa rọrùn sí i.” Ǹjẹ́ irú àwọn ọ̀rọ̀ báwọ̀nyí kì í jẹ́ ká mọrírì bí “ọgbọ́n tí ó wá láti òkè” ṣe ń nípa tó dára lórí ìwà wa? (Ják. 3:17) Níwọ̀n bí a ti jẹ́ “ìran àpéwò ní gbọ̀ngàn ìwòran fún ayé,” ẹ jẹ́ kí ìwà wa máa gbé iyì àti ọlá ńlá Ọlọ́run wa, Jèhófà yọ ní gbogbo ìgbà.—1 Kọ́r. 4:9.

¹⁶ Níwọ̀n bí “ìrísí ìran ayé yìí [ti] ń yí padà,” a nílò àwọn àpéjọ àgbègbè wa láti lè máa pọkàn pọ̀ sórí àwọn nǹkan tẹ̀mí. (1 Kọ́r. 7:31) Ṣíṣètò bí a ó ṣe pésẹ̀ lọ́jọ́ mẹ́tẹ̀ẹ̀ta yóò gba ìsapá, àmọ́ ìsapá náà tó bẹ́ẹ̀, ó jù bẹ́ẹ̀ lọ. A ti ṣètò Àpéjọ Àgbègbè “Ẹ Fi Ògo fún Ọlọ́run” ti ọdún yìí láti ràn wá lọ́wọ́ kí a lè dúró ṣinṣin bá a ṣe ń dúró de ìgbà tí Jèhófà yóò ṣèdájọ́ ayé Sátánì. Ǹjẹ́ kí a má ṣe jẹ́ ki ohunkóhun dí wa lọ́wọ́ gbígba ìtọ́ni tí Jèhófà ti pèsè sílẹ̀ dè wá.—Aísá. 51:4, 5.

[Àpótí tó wà ní ojú ìwé 3]

Àwọn Àkókò Ìtòlẹ́sẹẹsẹ

Friday

9:20 òwúrọ̀ sí 4:40 ìrọ̀lẹ́

Saturday

9:00 òwúrọ̀ sí 4:20 ìrọ̀lẹ́

Sunday

9:00 òwúrọ̀ sí 3:20 ìrọ̀lẹ́