Àpótí Ìbéèrè

◼ Kí làwọn ọmọ gbọ́dọ̀ kọ́ kí ẹ̀kọ́ òtítọ́ lè jinlẹ̀ nínú wọn?

Ọ̀pọ̀ nǹkan làwọn òbí tó jẹ́ Kristẹni máa ń ṣe kí wọ́n lè tọ́ àwọn ọmọ wọn dàgbà “nínú ìbáwí àti ìlànà èrò orí Jèhófà.” (Éfé. 6:4) Bí àpẹẹrẹ, àwọn òbí ti rí i pé ó ṣàǹfààní káwọn máa jíròrò ẹsẹ ojúmọ́ pẹ̀lú àwọn ọmọ wọn láràárọ̀. Nígbà Ìjọsìn Ìdílé àti láwọn àkókò míì, ìdílé lè wo fídíò kan pa pọ̀ kí wọ́n sì jíròrò rẹ̀, wọ́n lè sọ̀rọ̀ nípa kókó kan pàtó nínú àpilẹ̀kọ Àwọn Ọ̀dọ́ Béèrè, wọ́n lè fi ìtàn Bíbélì kan ṣe àwòkẹ́kọ̀ọ́, tàbí kí wọ́n ṣe àwọn ìfidánrawò kan. Àmọ́, kí àwọn ọmọ lè “tẹ̀ síwájú sí ìdàgbàdénú,” a gbọ́dọ̀ kọ́ wọn ní àwọn ẹ̀kọ́ Bíbélì tó jinlẹ̀.—Héb. 6:1.

Ẹ jẹ́ ká ronú nípa ohun tá a máa ń kọ́ àwọn tá à ń pàdé ní ìpínlẹ̀ ìwàásù wa. Nígbà tá a bá kọ́kọ́ pàdé ẹnì kan tàbí nígbà tá a bá pa dà lọ sọ́dọ̀ ẹni tá a ti wàásù fún, a sábà máa ń gbìyànjú láti bẹ̀rẹ̀ ìkẹ́kọ̀ọ́ Bíbélì pẹ̀lú ẹni náà látinú ìwé Kí Ni Bíbélì Fi Kọ́ni Gan-an? Tá a bá parí ìwé yẹn, a máa ń lo ìwé ‘Ẹ Dúró Nínú Ìfẹ́ Ọlọ́run.’ Kí nìdí? Ìwé Bíbélì Fi Kọ́ni máa jẹ́ kí ẹni tó ń kẹ́kọ̀ọ́ Bíbélì mọ àwọn ìpìlẹ̀ ẹ̀kọ́ inú Bíbélì. Nígbà tó jẹ́ pé ìwé ‘Ìfẹ́ Ọlọ́run’ máa kọ́ wọn bí wọ́n á ṣe máa fi àwọn ìlànà Bíbélì ṣèwà hù lójoojúmọ́ nínú ìgbésí ayé wọn. Táwọn ẹni tuntun bá kẹ́kọ̀ọ́ àwọn ìwé méjèèjì yìí, ó máa jẹ́ kí wọ́n lè “ta gbòǹgbò” nínú Kristi kí wọ́n sì “fẹsẹ̀ múlẹ̀ nínú ìgbàgbọ́.” (Kól. 2:6, 7) Ǹjẹ́ àwọn ìwé yìí náà máa ṣe àwọn ọmọ wa láǹfààní? Ó yẹ ká kọ́ àwọn náà nípa ìràpadà, Ìjọba Ọlọ́run àti ipò tí àwọn òkú wà. Ó yẹ kí wọ́n mọ ìdí tí Ọlọ́run fi fàyè gba ìyà àti bá a ṣe mọ̀ pé àwọn ọjọ́ ìkẹyìn la wà yìí. Ó gbọ́dọ̀ dá wọn lọ́jú pé àwa Ẹlẹ́rìí Jèhófà là ń ṣe ẹ̀sìn tòótọ́. Ó tún yẹ kí àwọn ọ̀dọ́ lóye àwọn ìlànà Bíbélì, kí wọ́n sì mọ bí wọ́n ṣe lè kọ́ “agbára ìwòye wọn.” (Héb. 5:14) Àmọ́, ó ṣe pàtàkì pé kí àwọn òbí ronú nípa ọjọ́ orí àwọn ọmọ wọn àti ibi tí òye wọn dé. Síbẹ̀, ọ̀pọ̀ ọmọdé ló lè bẹ̀rẹ̀ sí í kẹ́kọ̀ọ́ nípa àwọn ẹ̀kọ́ Bíbélì tó jinlẹ̀ kódà nígbà tí wọ́n ṣì kéré gan-an.—Lúùkù 2:42, 46, 47.