Báwo La Ṣe Lè Ran Àwọn Tó Bá Wá Síbi Ìrántí Ikú Kristi Lọ́wọ́?
1. Ẹ̀rí tó kàmàmà wo la máa jẹ́ fáwọn èèyàn ní March 22, ọdún 2008?
1 A máa jẹ́rìí fún àràádọ́ta ọ̀kẹ́ èèyàn kárí ayé lọ́nà tó kàmàmà ní March 22, ọdún 2008. Gbogbo àwọn tó bá wá síbi Ìrántí Ikú Kristi ló máa gbọ́ nípa ìfẹ́ aláìlẹ́gbẹ́ tí Jèhófà fi hàn nípasẹ̀ ìràpadà tó pèsè fún ẹ̀dá èèyàn. (Jòh. 3:16) Wọ́n á kọ́ nípa Ìjọba Ọlọ́run àti bí Jèhófà yóò ṣe mú ìfẹ́ rẹ̀ fún ilẹ̀ ayé ṣẹ nípasẹ̀ ìjọba náà. (Mát. 6:9, 10) Wọ́n á fojú ara wọn rí ìfẹ́ àti ìṣọ̀kan tó wà láàárín àwa èèyàn Ọlọ́run, wọ́n á sì tún rí bá a ṣe máa fi ọ̀yàyà tẹ́wọ́ gbà wọ́n.—Sm. 133:1.
2. Báwo la ṣe lè ran àwọn tá à ń kọ́ lẹ́kọ̀ọ́ Bíbélì tó bá wá síbi Ìrántí Ikú Kristi lọ́wọ́?
2 Àwọn Tá À Ń Kọ́ Lẹ́kọ̀ọ́ Bíbélì: Àwọn kan tá a ṣẹ̀ṣẹ̀ ń kọ́ lẹ́kọ̀ọ́ Bíbélì máa wá lọ́jọ́ yẹn. Fi wọ́n mọ àwọn arákùnrin àtàwọn arábìnrin. Ṣàlàyé ìtòlẹ́sẹẹsẹ àwọn ìpàdé tá a máa ń ṣe lọ́sọ̀ọ̀sẹ̀ fún wọn, kó o sì mú wọn mọ àyíká Gbọ̀ngàn Ìjọba. Nígbà tí àsọyé bá ń lọ lọ́wọ́, olùbánisọ̀rọ̀ máa gba àwọn tá a ṣẹ̀ṣẹ̀ ń kọ́ lẹ́kọ̀ọ́ Bíbélì níyànjú pé kí wọ́n máa bá a lọ láti ní àjọṣe tó dán mọ́rán pẹ̀lú Jèhófà. O lè lo ọ̀rọ̀ olùbánisọ̀rọ̀ yẹn láti fún àwọn tó ò ń kọ́ lẹ́kọ̀ọ́ Bíbélì níṣìírí pé kí wọ́n jára mọ́ ẹ̀kọ́ wọn.
3. Báwo la ṣe lè fún àwọn akéde aláìṣiṣẹ́mọ́ tó bá wá síbi Ìrántí Ikú Kristi níṣìírí?
3 Àwọn Akéde Aláìṣiṣẹ́mọ́: Àwọn akéde aláìṣiṣẹ́mọ́ kan máa wá lọ́jọ́ yẹn. Lo ìdánúṣe láti kí wọn tọ̀yàyàtọ̀yàyà. Má ṣe béèrè àwọn ìbéèrè tàbí kó o sọ̀rọ̀ tó lè kó ìtìjú bá wọn. Káwọn alàgbà ṣèbẹ̀wò sọ́dọ̀ wọn ní ọjọ́ mélòó kan lẹ́yìn ọjọ́ Ìrántí Ikú Kristi, kí wọ́n yìn wọ́n fún ìsapá tí wọ́n ṣe láti wá, kí wọ́n sì fi tìfẹ́tìfẹ́ pè wọ́n wá sí ìpàdé ìjọ tó máa wáyé lẹ́yìn ìgbà náà.
4. Báwo lẹnì kọ̀ọ̀kan wa ṣe lè ran àwọn àlejò tó bá wá síbi Ìrántí Ikú Kristi lọ́wọ́?
4 Àwọn Àlejò: Àwọn ojúlùmọ̀ wa tàbí àwọn kan lára àwọn mọ̀lẹ́bí wa tá a ké sí lè wà lára àwọn tó máa wá lọ́jọ́ yẹn. Àwọn míì sì lè wá nítorí pé wọ́n gba ìwé ìkésíni nígbà tá à ń kéde ìṣẹ̀lẹ̀ pàtàkì yìí. Tó o bá ráwọn tó ò mọ̀ tẹ́lẹ̀, lo ìdánúṣe láti lọ bá wọn, sọ orúkọ rẹ fún wọn kó o sì kí wọn káàbọ̀. Ó lè jẹ́ ìgbà àkọ́kọ́ tí wọ́n máa wá sí ìpàdé wa nìyẹn. Bó o ṣe ń fọ̀rọ̀wérọ̀ pẹ̀lú wọn, ó ṣeé ṣe kó o mọ bó o ṣe lè ṣèbẹ̀wò sọ́dọ̀ wọn. A lè ru ìfẹ́ wọn láti mọ púpọ̀ sí i sókè tá a bá tètè lọ ṣèbẹ̀wò sọ́dọ̀ wọn tàbí ká pè wọ́n lórí tẹlifóònù lọ́jọ́ mélòó kan lẹ́yìn Ìrántí Ikú Kristi, ká sì fi ìkẹ́kọ̀ọ́ Bíbélì lọ̀ wọ́n.
5. Kí la lè sọ láti bẹ̀rẹ̀ ìkẹ́kọ̀ọ́ Bíbélì?
5 Nígbà tá a bá ń padà bẹ àwọn tó wá síbi Ìrántí Ikú Kristi wò, a lè lo àwọn kókó tó wà nínú àsọyé tá a gbọ́ lọ́jọ́ yẹn láti nasẹ̀ ìwé Bíbélì Fi Kọ́ni. Bí àpẹẹrẹ, lọ́jọ́ yẹn olùbánisọ̀rọ̀ máa ka ìwé Aísáyà 65:21-23. Tó o bá ń ṣe ìpadàbẹ̀wò, o lè mẹ́nu ba kókó kan látinú àsọyé yẹn, kó o wá fi kún un pé, “Jẹ́ kí n fàwọn ìbùkún míì tí ìràpadà mú kó ṣeé ṣe hàn ẹ́.” Lẹ́yìn náà, kó o wá jíròrò ohun tó wà lójú ìwé 4 àti 5 nínú ìwé Bíbélì Fi Kọ́ni pẹ̀lú wọn. O tún lè sọ pé, “Ọ̀pọ̀ ló ń ṣe kàyéfì nípa ìgbà tá a máa gbádùn ìmúṣẹ àwọn àsọtẹ́lẹ̀ tó wà nínú ìwé Aísáyà.” Lẹ́yìn náà, jíròrò orí kẹsàn-án ìpínrọ̀ 1 sí 3 pẹ̀lú wọn. Ohun tó o tún lè ṣe ni pé, kó o sọ̀rọ̀ nípa àlàyé tí olùbánisọ̀rọ̀ ṣe lọ́jọ́ yẹn, kó o wá fi bá a ṣe ń fi ìwé Bíbélì Fi Kọ́ni kọ́ àwọn èèyàn lẹ́kọ̀ọ́ hàn án.
6. Bá a ti ń ṣègbọràn sí àṣẹ tí Jésù pa, pé ká máa ṣèrántí ikú òun, àǹfààní wo ló ṣí sílẹ̀ fún wa?
6 Ẹ jẹ́ kí gbogbo wa múra tán láti lo àǹfààní èyíkéyìí tó bá ṣí sílẹ̀ láti ran àwọn tá à ń kọ́ lẹ́kọ̀ọ́ Bíbélì, àwọn akéde aláìṣiṣẹ́mọ́ àtàwọn àlejò tó bá wá síbi Ìrántí Ikú Kristi lọ́wọ́. (Lúùkù 22:19) Ó dájú pé Jèhófà máa bù kún ìsapá èyíkéyìí tá a bá ṣe láti ṣe púpọ̀ sí i lẹ́nu iṣẹ́ ìsìn wa.