Isaías
40 A Dioseʼexeʼ ku yaʼalik: «Líiʼseʼex u yóol, líiʼseʼex u yóol in kaajal.+
2 Ilawil a kʼuchleʼex tu puksiʼikʼal* Jerusalén,
aʼaleʼextiʼ tsʼoʼok le yaayaj meyaj yaan kaʼach tu yóokʼoloʼ,
tsʼoʼok u láaj boʼotik le baʼaxoʼob maʼ maʼalob u beetmoʼ.+
Tu kʼab Jéeoba taal tuláakal le castigo unaj u kʼamik tu yoʼolal tuláakal u kʼebanoʼoboʼ».+
3 Yaan máax ku yawat teʼ desiertooʼ, letiʼeʼ táan u yaʼalik:
«¡Maʼalobkíinteʼex u beel Jéeoba!+
Beeteʼex junpʼéel bej teʼ desiertooʼ,+ junpʼéel toj+ bej utiaʼal k-Dios.
4 Tuláakal tuʼux kʼóom taameʼ kʼaʼabéet u buʼutʼul,
tuláakal montaña yéetel tuláakal puʼukeʼ unaj u yéemsaʼal.
Le tuʼux kʼoʼlemakoʼ unaj u táaxkuntaʼal,
unaj u táaxkuntaʼal le tuʼux jóojom kaʼanaloʼ.+
5 Yaan u yeʼesaʼal u kiʼichkelmil Jéeoba.+
6 ¡Uʼuy a wuʼuye! Yaan máax táan u yaʼalik: «¡Kʼaʼam aʼale!».
Uláakʼ máakeʼ ku kʼáatik: «¿Baʼax le unaj in kʼaʼam aʼalikoʼ?».
«Tuláakal wíinikeʼ* bey yaʼax xíiweʼ.
Tuláakal u nojoch yaabilajeʼ bey jeʼex le looloʼob ku jóokʼol teʼ kʼáaxoʼ.+
7 Le yaʼax xíiwoʼ ku tijil,
le looloʼ ku chuchultal,+
tumen ku máan u múus iikʼ Jéeoba tu yóokʼoloʼob.+
Jach tu jaajileʼ wíinikeʼ chéen bey yaʼax xíiweʼ.
8 Le yaʼax xíiwoʼ ku tijil,
le looloʼ ku chuchultal,
chéen baʼaleʼ u tʼaan k-Dioseʼ ku pʼáatal utiaʼal mantatsʼ».+
9 Koʼolel, naʼakakech tiʼ junpʼéel kaʼanal montaña,
tumen yaan baʼaloʼob maʼalobtak ken a tsʼáa u yojéelt Sión.+
Koʼolel, kʼaʼam tʼaanakech,
tumen yaan baʼaloʼob maʼalobtak ken a tsʼáa u yojéelt Jerusalén.
Kʼaʼam tʼaanen, maʼ a chʼaʼik saajkil.
Aʼal tiʼ u kaajiloʼob Judá: «Way yaan a Dioseʼexeʼ».+
10 ¡Uʼuy a wuʼuy lelaʼ! Jéeoba, le máax yaan tuláakal autoridad tiʼoʼ, yaan u taal yéetel tuláakal u poder,
u x-noʼoj kʼab kun gobernar.+
¡Ilawile! Le baʼax tu chʼaʼaj Diosoʼ tiaʼan tu yiknaleʼ,
le boʼol ku tsʼáaikoʼ tiaʼan tu táaneʼ.+
11 Letiʼeʼ yaan u kanáantik u yalakʼ tamanoʼob jeʼex u beetik juntúul j-kanan tamaneʼ.+
Yéetel u kʼabeʼ yaan u muchʼkíintik le mejen tamanoʼoboʼ
yéetel yaan u méekʼikoʼob.
Chaambelil ken u bis le tamanoʼob yaan u mejniloʼoboʼ.+
12 ¿Máax tsʼoʼok u lóochʼik tuláakal le jaʼ yaan teʼ kʼáaʼnáab utiaʼal u pʼisikoʼ?+
¿Máax tsʼoʼok u pʼisik le kaʼan chéen yéetel junpʼéel náaboʼ?*
¿Máax tsʼoʼok u pʼisik tiʼ junpʼéel chan nuʼukul tuláakal le polvo yaan way luʼumeʼ?+
¿Máax tsʼoʼok u pʼisik le montañaʼob tiʼ junpʼéel báscula
yéetel tiʼ junpʼéel balanza* le puʼukoʼoboʼ?
13 ¿Máax tsʼoʼok u pʼisik le* bukaʼaj poder yaan tiʼ Jéeobaoʼ?
¿Máax jeʼel u páajtal u tsolik u nuʼuk tiʼeʼ?+
14 ¿Tiʼ máax kaanbalnaj utiaʼal u yantal u naʼat?
¿Máax nuʼuktik utiaʼal u bin tu bejil le justiciaoʼ?
¿Máax kaʼansik utiaʼal u yojéeltik u maasil baʼaloʼob?
¿Máax eʼesiktiʼ le bej tuʼux yaan u jaajil naʼatoʼ?+
15 ¡Uʼuy a wuʼuy lelaʼ! Le kaajoʼoboʼ ku yilaʼaloʼob chéen jeʼex u chʼáaj jaʼ tiʼ junpʼéel chʼóoyeʼ,
yéetel jeʼex junpʼíit polvo yaan yóokʼol junpʼéel balanzaeʼ.+
¡Uʼuy a wuʼuy lelaʼ! Letiʼeʼ ku chʼúuyik le islaʼob jeʼex u chʼúuyaʼal maʼay luʼumeʼ.
16 Mix u cheʼiloʼob le Líbano suficiente utiaʼal u pʼáatal tʼaablil junpʼéel kʼáakʼoʼ,
le baʼalcheʼob yanoʼob teʼ Líbanooʼ maʼ suficiente utiaʼal u beetaʼal junpʼéel tóokbil ofrendaiʼ.
17 Tu táan letiʼeʼ tuláakal le kaajoʼoboʼ bey minaʼanoʼobeʼ.+
Letiʼeʼ ku yilik bey mix baʼaloʼobeʼ, bey mix juntéen yanchajoʼobeʼ.+
18 ¿Máax yéetel jeʼel u páajtal a compararkeʼex Dioseʼ?+
¿Baʼax imagenil jeʼel a beetkeʼex utiaʼal a weʼeskeʼex bix letiʼeʼ?+
19 Juntúul máakeʼ ku beetik junpʼéel imagen,
tsʼoʼoleʼ juntúul máax ku meyajtik metaleʼ ku yibik oro tu baʼpach+
yéetel ku beetik cadenaʼob de plata utiaʼal u adornartik.
20 Juntúul máakeʼ ku yéeyik junpʼéel cheʼ utiaʼal u beetik junpʼéel imagen,+
junpʼéel cheʼ maʼatech u laʼabal.
Letiʼeʼ ku kaxtik juntúul máak jach u yojel póol cheʼ utiaʼal u beetik junpʼéel imagen,
junpʼéel imagen maʼ tu séeb lúubul tumen maʼalob beetaʼanil.+
21 ¿Maʼ wa a wojleʼexiʼ?
¿Maʼ wa a wuʼuymeʼexiʼ?
¿Maʼ wa desde úuch aʼalaʼakteʼexiʼ?
¿Maʼ wa a naʼateʼex le baʼax chíikaʼan u yilaʼal desde ka tsʼaʼab u cimientoil le luʼumoʼ?+
22 Dioseʼ tiaʼan tiʼ junpʼéel lugar maas kaʼanal yanil tiʼ le wóolis luʼumoʼ,+
u kajnáaliloʼobeʼ beyoʼob jeʼex le grilloʼoboʼ.*
Letiʼeʼ ku jayik le kaʼan jeʼex u jaʼayal junpʼéel jáaytsileʼen nookʼeʼ,
ku sinik jeʼex u siʼinil junpʼéel naj de nookʼ utiaʼal u kajtal máakeʼ.+
23 Letiʼeʼ ku mixbaʼalkúuntik le máaxoʼob yaan autoridad tiʼoboʼ
yéetel ku beetik u pʼáatal mix baʼal u biilal le juezoʼob* yaan way luʼumoʼ.
24 Letiʼobeʼ beyoʼob mejen paakʼaloʼob táant u xaʼabaloʼobeʼ,
bey táant u paʼakʼloʼobeʼ,
maʼ jach táabak tubeel u mootsoʼob teʼ luʼumoʼ,
le kéen ustaʼakoʼobeʼ ku tijloʼob
yéetel ku bisaʼaloʼob tumen iikʼ jeʼex u bisaʼal sojoleʼ.+
25 Le Máax Santooʼ ku yaʼalik: «¿Máax yéetel jeʼel u páajtal a compararkeneʼex utiaʼal a waʼalikeʼex igual tin wéeteleʼ?
26 Líiʼs a wicheʼex utiaʼal a paktikeʼex le kaʼanoʼ.
¿Máax beetmil le baʼaloʼoboʼ?+
Letiʼe Máax nuʼuktikoʼob jeʼex u nuʼuktaʼal junpʼéel ejércitooʼ, letiʼeʼ u yojel bukaʼajoʼob.
Letiʼeʼ ku tʼankoʼob tu kʼaabaʼob.+
Letiʼeʼ jach táaj yaan u poder yéetel jach yaan u muukʼ,+
le oʼolal mix juntúul tiʼ letiʼob ku bineltikiʼ.
27 Jacob, ¿baʼaxten ka waʼalik? Israel, ¿baʼaxten ka waʼalik?:
‹Le bej tuʼux kin máanoʼ maʼ chíikaʼan u yilaʼal tumen Jéeobaiʼ,
Dioseʼ maʼatech u beetikten justicia›.+
28 ¿Maʼ wa a wojel lelaʼ? ¿Maʼ wa a wuʼuymaj lelaʼ?
Jéeoba le máax beetmil tuláakal baʼal yaan way luʼumeʼ, juntúul Dios mix bikʼin u xuʼulultiʼ.+
Letiʼeʼ mix juntéen ku kaʼanal mix juntéen ku yuʼubik minaʼan u muukʼ.+
Maʼ tu páajtal u yojéeltaʼal bukaʼaj u naʼat.+
29 Letiʼeʼ ku tsʼáaik u muukʼ máax kaʼanaʼan,
yéetel ku tsʼáaik páajtalil tiʼ le máaxoʼob minaʼan u muukʼoʼoboʼ.+
30 Le paalaloʼoboʼ yaan u kaʼanaloʼob yéetel yaan u pʼáatal minaʼan u muukʼoʼob,
le táankelmoʼoboʼ yaan u tʼóochpajloʼob yéetel yaan u lúubloʼob,
31 chéen baʼaleʼ le máaxoʼob ku kʼubik u yóoloʼob tiʼ Jéeobaoʼ yaan u kaʼa antal u muukʼoʼob,
yaan u líikʼloʼob kaʼanal jeʼex u beetik le águilaʼoboʼ.+
Yaan u yáalkaboʼob, chéen baʼaleʼ maʼ kun xuʼupul u muukʼoʼob,
yaan u xíimbaloʼob, chéen baʼaleʼ maʼ kun kaʼanaloʼob».+