Qué chuʼ dxi gusaananu ca bíʼchinu ne ca bizáʼnanu

«PUR chii iza guníʼ íquedu galán ngue nabánidu pur guiráʼ ni cayuni ganardu ne ca negocio stidu ne gunda gúpadu stale bidxichi. Neca guirópadu biniisidu ndaaniʼ xquidxi Dios, bixéledu ne maʼ qué ñápadu gana nibiguétadu», zacá bisiene Jarosław ne Beata xheelabe.a

Sti hombre Testigu ni láʼ Marek guníʼ sicaríʼ: «Pur ca guendanagana gupa binni ndaaniʼ guidxi Polonia ne pur ni biʼniʼ ca políticu, biniteʼ ca dxiiñaʼ stinneʼ deche ca deche. Bedandá ti ora bireeʼ gana ne maʼ qué nuquiinde naa niguixheʼ ti negocio stinneʼ purtiʼ qué ñaleniáʼ gracia para guneʼ ni. Peru despué gudixheʼ negocio stinneʼ purtiʼ guníʼ iqueʼ zaquetiʼ nga zanda gudieeʼ binnilidxeʼ guiráʼ ni caquiiñecaʼ sin gusaanaʼ de gusiideʼ laacaʼ de Dios. ¡Peru cadi jneza ngue modo caníʼ iqueʼ!».

Cumu zeʼ dxi jma nagana cayaca para binni guyaanaʼ binnilidxi ne gapa ti dxiiñaʼ la? nga runi nuu xpinni Cristu qué ridxélacaʼ xi gúnicaʼ dede nuu tiru rúnicaʼ xiixa ni ruxheleʼ laacaʼ de Dios. Nuu tu laa riníʼ ique pa guni ganar neca xcaadxi si, zanda gudii cani caquiiñeʼ binnilídxicaʼ sin guixélecaʼ de Dios. Nga runi nuu tu laa riaanaruʼ jma tiempu para guni jma dxiiñaʼ, ruyubi gapa chupa dxiiñaʼ ne nuu tu laa riguixhe ti negocio neca qué ganna ximodo guni ni. Neca guiníʼ íquecabe zabeendúcabe ni galán pur ni quixhe íquecabe gúnicabe ne racaláʼdxicabe gacanécabe binnilídxicabe la? nuu tiru qué riree diʼ guiráʼ ni guiníʼ íquecabe cásipeʼ racaláʼdxicabe. Xiñee yaʼ. Purtiʼ zándaca guizaacacabe xiixa, quibaʼ lu ca cosa ca o pur xcaadxi razón. Nga runi, nuu tu laa jma rachelú gapa bueltu ne maʼ qué ricá íquecaʼ gúnicaʼ xhiiñaʼ Dios (Ecl. 9:11, 12).

Nuu caadxi bíʼchinu ne bizáʼnanu jma ricá íquecaʼ gápacaʼ bidxiichi dede qué rápacaʼ tiempu para gúʼndacaʼ Biblia stúbicaʼ, checaʼ ca guendaridagulisaa ne maʼ qué rucheechecaʼ diidxaʼ. Cumu rúnicabe zacá la? rixélecabe de Jiobá ne maʼ qué raca xhamígucabe laa. Peru nuu sti cosa nabé risaca ni maʼ qué rúnicabe: rusaana de gaca xhamígucabe ca xpinni Cristu (Gál. 6:10). Nuu tu laa chaahuidugá maʼ qué ridxaaga ca binni ridagulisaa, ne nga nga ti cosa ni naquiiñeʼ guidúʼyanu.

Ni naquiiñeʼ gúninu pur ca bíʼchinu ne ca bizáʼnanu

Pa hombre o pa gunaa laanu, nuu stale modo para gusihuínninu nadxiinu ca xpinni Cristu (Rom. 13:8). Zándaca huadúʼyanu tuuxa lade ca binni ridagulisaa ni cayacaná ne canabaʼ gacanécabe laa (Job 29:12). Casi pa nuu tu qué gapa guiráʼ ca cosa ni caquiiñeʼ para guibaniné. Apóstol Juan culuíʼ naquiiñeʼ gúninu xiixa pur laacabe ora bicaa ca diidxaʼ riʼ: «Pa nuu tuuxa napa ni caquiiñe ne guʼya qué gapa stobi gastiʼ, ne qué guiá laabe la? ximodo na nadxii Dios» (1 Juan 3:17).

Zándaca huadíʼnanu ca xpinni Cristu de guidubi ladxidoʼno, peru naquiiñeʼ gánnanu cadi caquiiñeʼ si gudiʼnu laacabe ni caquiiñecabe. Nuu tu laa canabaʼ gacanécabe laa purtiʼ runi sentir nuu stubi o nabé nuu triste. Zándaca nabé huarácabe, biníticabe tuuxa binni ni nadxiicabe o riníʼ íquecabe maʼ qué zanda gúnicabe ni na Jiobá pur modo nuucabe. Ti modo gacanenu laacabe nga güínenu laacabe diidxaʼ ne gucaadiaga chaahuinu laacabe ti gánnanu xi cayuni sentírcabe ne xi caquiiñeʼ gúnicabe para chúʼcabe jma gaxha de Dios (1 Tes. 5:14). Pa gúninu zacá jma zannaxhiisaanu.

Ca binnigola ni nuu ndaaniʼ ca jneza binni ridagulisaa nga jma naquiiñeʼ gucaadiágacaʼ ne gúnicaʼ stipa pur guni sentircaʼ ni cayuni sentir binni, guiénecaʼ laacabe ne gudiicaʼ laacabe conseju ni zeeda lu Biblia (Hech. 20:28). Zacá zinándacabe ejemplu stiʼ apóstol Pablu, tobi hombre ni nabé binibiáʼcabe laa pur modo gunnaxhii ca biʼchiʼ ne ca bizaʼnaʼ (1 Tes. 2:7, 8).

Peru xi rizaaca ora quixhe ique ti xpinni Cristu gapa jma bidxiichi ne guixeleʼ de xquidxi Dios yaʼ. Rusaana de gacanebe ca bíʼchibe ne ca bizáʼnabe. Guiráʼ xixenu, dede né ca binnigola ca, zanda guiábacaʼ lu trampa riʼ. Ximodo yaʼ.

Zadxáganu pa chúʼpenu xizaa pur gápanu ni guibaninenu

Casi maʼ bizéʼtenu, ora nabé cuʼ xaíque binni gudii ni iquiiñeʼ binnilidxi zándaca gusidxágani laa ne maʼ qué zuuyaʼ ca cosa ca casi modo ruuyaʼ Dios cani (Mat. 13:22). Marek, hombre ni maca bizéʼtenu que bisiene xiruʼ bizaaca: «Biree guniteʼ lu negocio stinneʼ, ngue runi biyubeʼ ti dxiiñaʼ ndaaniʼ sti guidxi zitu ra guneʼ ganar jma. Chonna beeu si guyaaʼ, despué maʼ guyaaʼ xhonna beeu, de raqué maʼ guyaaʼ xhonna beeu... ne zaqué guzayaʼ. Cada guiluxe chonna beeu ca huaxiéʼ tiempu riuaaʼ ralidxeʼ. Ngue runi nabé triste guyuu xheelaʼ ni cadi naca Testigu».

Peru cadi gudiʼdiʼ si binnilidxi Marek ra nagana, laabe guníʼrube ca diidxaʼ riʼ: «Cumu nabé stale ora nga maʼ cayuneʼ dxiiñaʼ lu Gubidxa ndáʼ la? runeʼ sentir rirá bi stinneʼ. Ne laaca bidxaagaʼ binni ni riníʼ diidxaʼ guidxa ne nisi ruyubi guquiichináʼ stobi ne ca binni ni napa xpiaʼ casi ca binni ni ruuti. Bineʼ sentir casi ora cuquiichinácabe naa, pur ngue gucaʼ deprimir. Pa qué ñapaʼ tiempu para ñuneʼ xiixa ni ñacané naa ñuaaʼ gaxha de Dios, ximodo nga gacaniáʼ xcaadxi chuʼ gaxha de laabe».

Ora guidúʼyanu cadi galán ni ribeendú binni casi Marek, naquiiñeʼ guiníʼ ique chaahuinu ante chindézanu ndaaniʼ sti guidxi. Zándaca guiníʼ íquenu zacatiʼ nga zanda gápanu jma bidxiichi ti gacané laanu lu cani caquiiñenu, peru lugar de nga zándaca gueeda gápanu jma guendanagana. Nga runi naquiiñeʼ guinabadiidxanu laca laanu: «Ñee ziuaaʼ galán né binnilidxeʼ ne zanda gacaniáʼ laacabe chúʼcabe gaxha de Dios pa guiníʼ iqueʼ chiguneʼ dxiiñaʼ sti ladu la? Ñee zuxheleʼ ni naa de xquidxi Dios la? Ñee zucueeza ni naa de gacaniáʼ ca xpinni Cristu ni ridagualisaaniáʼ la?» (1 Tim. 3:2-5).

Dxandíʼ nga zanda guininu cadi ora si chiguni binni dxiiñaʼ sti guidxi nga zanda guixeleʼ de Jiobá. Guidúʼyanu ni bizaaca Jarosław ne Beata. Jarosław guníʼ: «Dxi bizuludu qué niníʼ íquedu niguíxhedu ti negocio naroʼbaʼ. Dxi nacubi bichaganadu gudíxhedu ti puestu huiiniʼ para gutoʼdo guendaró lu ti calle ra nabé ridiʼdiʼ binni. Cumu nabé bitoʼdo la? bisiróʼbadu negocio stidu. Ngue runi maʼ huaxiéʼ tiempu gúpadu ne bizulú biáʼdxadu ca guendaridagulisaa ca, nin qué nindaa maʼ qué ñacaʼ precursor nin siervu ministerial. Nabé nayecheʼ guyuudu ne guiráʼ cani cayuni ganardu que ne pur ngue guláʼquidu sti negocio jma naroʼbaʼ ne gúcadu socio né sti binni ni cadi naca xpinni Cristu. Málasi bidieeʼ cuenta maʼ riaaʼ ndaaniʼ xcaadxi guidxi para guneʼ firmar ca contratu ni guneniáʼ xcaadxi empresa para guneʼ ganar millón de dólar. Cumu huaxiéʼ riuaaʼ yoo la? maʼ qué ñuaaʼ galán ne xheelaʼ ne dxaapahuiiniʼ stidu. Jma gucuá íquedu gúnidu xhiiñadu ne chaahuidugá maʼ bisaanadu de gúnidu xhiiñaʼ Jiobá. Bixéledu de ca binni ridagulisaa, ne maʼ qué liica ñánnadu pa nuu ca bíʼchidu ne ca bizáʼnadu ni ridagulisaanedu».

Xi rizíʼdinu de cani maʼ guninu ca yaʼ. Pa qué gapa binni laa zanda guiaba lu trampa de guicá ique gapa jma ti guibani galán ne pur nga maʼ cadi quixhe ique guni xhiiñaʼ Reinu ne guzulú guni ni cadi jneza. Zacá zahuinni maʼ cadi xpinni Cristu laa, ne nga zeeda gaca casi ora nuniti «lari» ni nacu (Apo. 16:15). Pa gúninu zacá la? zándaca guixélenu de ca xpinni Cristu ne maʼ qué zacanenu laacaʼ.

Guidúʼyanu xipeʼ caquiiñenu

Zándaca guininu: «Qué ziuu dxi guizaacaʼ nga». Peru guiranu caquiiñeʼ guiníʼ íquenu xipeʼ nga cani dxandíʼ caquiiñenu para guibáninu. Cadi guiaandaʼ laanu ca diidxaʼ ni guníʼ Pablu riʼ: «Gasti qué ñedané nu ndaani guidxilayú ne gasti qué ziné nu ra chuu nu. Nga runi, zaa naca gapa nu bidxichi, inque si napa nu ni idóʼ no ne ni gacu nu, nga si guieche né nu» (1 Tim. 6:7, 8). Naquiiñeʼ gánnanu gadxé gadxé nga modo ribani binni ndaaniʼ cada guidxi. Ca cosa ni risaca para binni ndaaniʼ ti guidxi ra nabánicaʼ galán la? zándaca para binni de sti guidxi jma pobre ti luju si cani.

Intiica modo nabani binni ndaaniʼ xquídxinu, caquiiñeʼ guietenaláʼdxinu ca diidxaʼ ni guníʼ Pablu riʼ: «Cani ruyubi gapa bidxichi la? riaba ndaani náʼ binidxabaʼ, ne rizabilaʼdxi ni qué iquiiñeʼ, ni runiná si binni. Rusiuʼdxu ni xpida cabe ne runitilú ni laacabe» (1 Tim. 6:9). Ca diidxaʼ «riaba ndaani náʼ», lu diidxaʼ griegu bitiixhicabe cani, guiaba binni lu ti doo ni riguíxhecabe casi ti trampa para guinaazecabe tuuxa maniʼ sin gudii cuenta. Xi zanda gúninu para cadi guiábanu lu ca cosa ni zanda guniná laanu yaʼ.

Ora gánnanu xipeʼ nga cani jma caquiiñeʼ gúninu lu xquendanabáninu la? racanécani laanu cueenu jma tiempu para gúninu xhiiñaʼ Dios, casi guidúʼndanu Biblia stúbinu ne guni orarnu. Cani bizéʼtenu ca racanécani ti xpinni Cristu «iziidi chaahui [...] para ganda guni irá ni riree ndu» ne gacané xcaadxi (2 Tim. 2:15; 3:17).

Stale binnigola qué nusaana de nigánnacaʼ Jarosław lu ca iza ra gudíʼdibe ra nagana ne gucanecaʼ laabe iguidxi fe stibe. Pur ngue bichaabe stale cosa lu xquendanabánibe. Laabe guniʼbe: «Tobi de ca biaje cayuiʼné ca binnigola que naa diidxaʼ, bizéʼtecabe ti ejemplu ni zeeda lu Biblia. Ejemplu que nga stiʼ hombrehuiiniʼ ni racalaʼdxiʼ guibani sin qué chuʼ dxi gati, peru qué náʼ gusaana ca cosa risaca ni napa. Ca binnigola que biyúbicaʼ modo gunabadiidxacaʼ naa pa cadiideʼ ra gudiʼdiʼ hombrehuiiniʼ que. Ora gunabadiidxacabe ngue naa casi ora bixeleʼ xpiaaneʼ» (Pro. 11:28; Mar. 10:17-22).

Biiyaʼ chaahuiʼ Jarosław xipeʼ nga cani caquiiñeʼ ne gudixhe ique gusaana ca negocio naroʼbaʼ ni gupa que. Gudiʼdiʼ si chupa iza, Jarosław ne binnilidxi maʼ guyuucaʼ gaxha de Jiobá sti biaje. Yanna laabe maʼ nácabe binnigola ndaaniʼ ti neza binni ridagulisaa. Laabe guniʼbe: «Ora guuyaʼ jma guni tender ca xpinni Cristu ca negocio sticaʼ dede maʼ qué gúnicaʼ xhiiñaʼ Dios la? rusieneʼ laacaʼ ni bizaacaʼ ne rabeʼ laacaʼ cadi jneza nga gácanu socio né sti binni ni cadi naca xpinni Cristu. Nuu tiru zándaca gábicabe laanu gúninu xiixa ra zanda guni ganarnu stale bidxiichi o gucaa laanu cuánanu ti guni ganarnu jma, ne nagana zaca para laanu gábinu laacabe coʼ» (2 Cor. 6:14).

Marek laaca gudiʼdiʼ ra nagana para biziidiʼ xi naquiiñeʼ guni. Neca biʼniʼ ganar Marek stale bidxiichi ora yeguni dxiiñaʼ sti guidxi para gudii ni caquiiñeʼ binnilidxi la? bixélebe de Dios ne de ca xpinni Cristu. Despué biiyabe xii nga ni jma risaca gúnibe lu xquendanabánibe. Laabe guniʼbe: «Stale iza biyubeʼ stale cosa risaca para naa cásica biʼniʼ Baruc, hombre ni ruzeeteʼ Biblia. Despué gudxeʼ Jiobá guiráʼ ni nuu ndaaniʼ ladxiduáʼ ne guiráʼ ni naguaaʼ xaíqueʼ, ne yanna zuluaʼsiaʼ maʼ nuaaʼ gaxha de laabe sti biaje» (Jer. 45:1-5). Marek cayuni stipa pur guni ni «jneza» ti ganda ugaanda ti guenda sicarú ndaaniʼ xquidxi Dios: gaca binnigola ndaaniʼ neza binni ridagulisaa stiʼ (1 Tim. 3:1).

Marek guníʼ ca diidxaʼ riʼ para quixhená cani racalaʼdxiʼ chiyubi ti dxiiñaʼ ndaaniʼ sti guidxi ra guni ganar jma: «Ora maʼ nuunu ndaaniʼ xquidxi binni jma nagueenda ziábanu lu ca trampa stiʼ binni guidxilayú. Ne pa qué gánnanu diidxaʼ ni riníʼcabe ndaaniʼ guidxi ca la? zaca nagana para laanu guinínenu laacabe. Zándaca guibiguetanenu bidxichi ralídxinu, peru zacananu stale pur bixélenu de Dios, ne zándaca zadiʼdiʼ stale iza para guibiguetaʼ chuʼnu galán né Dios sti biaje».

Zusiéchenu ladxidóʼ Jiobá pa cadi gusaana de gápanu ca bíʼchinu ne bizáʼnanu pur dxiiñaʼ stinu. Ne laaca zanda gácanu ti ejemplu galán para xcaadxi ti quixhe íquecaʼ gúnicaʼ ni jneza. Cani qué guidxela xi guni pur ni cadíʼdicaʼ caquiiñeʼ guianu ne gudíʼnanu laacaʼ, ne gácanu ti ejemplu sicarú para laacaʼ. Ca binnigola ni nuu ndaaniʼ ca neza binni ridagulisaa ne xcaadxi xpinni Cristu ni zuhuaa dxiichiʼ lu stiidxaʼ Dios, naquiiñeʼ gacanecaʼ ca bíʼchicaʼ ne ca bizáʼnacaʼ para cadi guixélecaʼ de Dios pur guicá íquecaʼ gápacaʼ jma cosa (Heb. 13:7).

Qué chuʼ dxi guixélenu de ca bíʼchinu ne ca bizáʼnanu pur xhiiñanu (Fili. 1:10). Lugar de nga, cada tobi de laanu naquiiñeʼ guni ca cosa «risaca nezalú Dios», casi quixhe ique guni xhiiñaʼ Reinu primé lu xquendanabani (Luc. 12:21).

[Cani cá ñee yaza]

[Dibuju/foto ni zeeda lu yaza 21]

Ñee maʼ qué riuunu ca guendaridagulisaa ca pur dxiiñaʼ stinu la?

[Dibuju/foto ni zeeda lu yaza 23]

Ñee risaca para laanu gacanenu ca bíʼchinu ne ca bizáʼnanu ora zanda gúninu ni la?