Guendaridagulisaa de chonna gubidxa stiʼ ca Testigu stiʼ Jiobá «Sánenu Dios» 2004
1 Xiñee ndiʼ risaca ca guendaridagulisaa de chonna gubidxa ni raca guiráʼ iza ca para lii. Ñee pur ca libana ni nabé rusiidiʼ laanu ca ne ni bizaaca (drama) ni rudii «moso ni nuu xpiaaniʼ ne ni runi jneza» ca laanu la? (Mat. 24:45-47.) Ñee pur ca libru ne foyetu cubi ni zeeda gaca casi guendaró ni cacaanu xhiórapeʼ la? Pur ni riníʼ ca bíchinu ne bizánanu modo huayacané Biblia laacaʼ para ibánicaʼ jma galán la? Pur ni rábicabe laanu modo caniisi dxiiñaʼ de guendarucheeche diidxaʼ ca xcaadxi guidxi roʼ la? O pur ridxaaganu ca bíchinu ne bizánanu Testigu cásica ni nahuiiniʼ ne ni huaniisi la? Dxandíʼ, ndiʼ nga chupa chonna de ca rasón, pur nabé riuláʼdxinu chuunu ca guendaridagulisaa de chonna gubidxa ca.
2 Chuunu guionna gubidxa ca. Jiobá biquiiñeʼ Moisés para biʼniʼ mandar xi gaca: «Bicasaa guidxi ca, [...] ti ucaadiágacabe ne ti guiziidicabe» (Deu. 31:12). Jiobá biquiiñebe moso ni nuu xpiaaniʼ ne ni runi jneza ca para gudíxhebe xi guiráʼ nga guizíʼdinu lu guionnaʼ dxi stiʼ guendaridagulisaa roʼ ca. Cumu rusiidibe laanu ti cueendunu ni galán para laanu la? racaláʼdxinu chuunu ni ti icaanu guiráʼ ni rusiidibe (Isa. 48:17). Pa naquiiñeʼ inabuʼ permisu xpatronluʼ para guiaʼdxuʼ ra dxiiñaʼ la? guniʼne Jiobá ne gunabaʼ laabe gacanebe lii, cásica biʼniʼ Nehemiás dxiqué ne endanadxibalú (Neh. 1:11; 2:4). Laaca galán nga gábiluʼ ca binnilídxiluʼ ni cadi Testigu dede ante cani cá íqueluʼ gúniluʼ para cheluʼ guendaridagulisaa de chonna gubidxa ca.
3 Ra guiaanuʼ. Para chuʼluʼ galán la? maca biyúbidu ndaaniʼ ca guidxi ra chigaca ca guendaridagulisaa roʼ ca paraa zanda guiaana cani cheʼ. Guiluxe si Guendaridagulisaa stiʼ Dxiiñaʼ Stinu riʼ la? zacá lu tableru ti lista ra cá gunáʼ ndiʼ ca hotel ra zanda guiaanatu. Ca bíchinu ni cayacané Betel para guyúbicaʼ ra guiaanatu la? zanda guidxélacabe ra jma baratu purtiʼ zinándatu ni cayábicabe laatu. Nga runi, gunabaʼ cuartu ndaaniʼ ca hotel si ni cá lu lista ca ne gudixe biaʼ cá luni. Pa gúnitu zacá la? zacanetu laadu idxéladu cuartu ndaaniʼ ca hotel galán ni nuu gaxha de ra chigaca guendaridagulisaa roʼ ca ne pa ganda guiráʼ iza idxéladu cani stuudxi baratu. Ca hotel ni nuu zituhuiiniʼ ca laaca galán cani. Ante cuidxuʼ pur teléfono para guinabuʼ cuartu la? biindaʼ cani cá lu cuadru «Ximodo gacanenu cani ruyubi ra guiaananu», ni zeeda lu yaza 4. Ora cuidxuʼ la? yenanda cani cá lu sti cuadru ni láʼ «Ximodo ndiʼ jma jneza inabuʼ ti cuartu ndaaniʼ ti hotel».
4 Cani naquiiñeʼ gacanenu. Apóstol Pablu bisietenaláʼdxibe ca bíchinu de Galasia de que «acane[caʼ] binni [...], peru jma pe naquiiñe guni[cabe] ni lade ca hermanu» (Gál. 6:10). Ca bíchinu ne ca bizánanu ni maʼ nagola, ni huará, cani napa xiiñiʼ ne qué gapa xheelaʼ o cani runi xhiiñaʼ Reinu guidubi dxi la? zándaca cadi guinábacabe laanu gacanenu laacabe, peru cayaca nagana para laacabe chécabe guendaridagulisaa de chonna gubidxa ca. Ñee zanda gacaneluʼ laacabe la? Jma nga naquiiñeʼ guʼyaʼ ca binnilídxicabe ni naca Testigu ne ca binnigola xi caquiiñecabe.
5 Pa tuuxa ni rucheeche diidxaʼ guchá ti guiʼchiʼ ni láʼ Solicitud de alojamiento para los que tienen necesidades especiales la? Grupu ni ruuyaʼ Dxiiñaʼ sti ca Binni Ridagulisaa (Comité de Servicio) naquiiñeʼ guʼyachaahuicabe pa bidxá ni casi na lu guiʼchiʼ ca. Ne laaca naquiiñeʼ gúʼyacabe pa ra nuusicabe nga zanda gaca tender ni. Ndiʼ la? zanda iquiiñe cani rucheeche si diidxaʼ ni ne xiiñicaʼ pa nuucaʼ galán ne Jiobá. Ca bíchinu ni ruuyaʼ paraa guiaananu la? zaníʼnecabe secretariu stiʼ ca binni ridagulisaa ca pa nuucabe inabadiidxacabe xiixa de guiʼchiʼ ca.
6 Ora chuunu sti guendaridagulisaa roʼ. Zándaca pur modo nuuluʼ qué zanda cheluʼ guendaridagulisaa roʼ ra raca caber lii. Ne pa caquiiñeʼ gánnaluʼ padxí ne paraa chigaca stobi la? zanda guiníʼneluʼ secretariu ni nuu ra ridagulisaaluʼ. Deche guiʼchiʼ Solicitud de alojamiento para los que tienen necesidades especiales la? zadxélabe ti lista ra cá xi dxi gaca ca guendaridagulisaa de chonna gubidxa ca Méjicu ne Belise iza riʼ, ne laaca cá paraa chigaca cani. Biseendaʼ ni pur correu lugar ra cayábini lii ne guluu ndaaniʼ ni sti sobre ra maca cá (x)laluʼ, pa neza ra liʼdxuʼ ne timbre. Pa chigaca xcaadxi guendaridagulisaa roʼ ndaaniʼ guidxi ca la? bicaa lu guiʼchiʼ ni bichaluʼ ca padxí nga racaláʼdxiluʼ cheluʼ. Ca bíchinu ni ruuyacaʼ paraa guiaananu la? (Departamiento de Alojamiento) zuseendacabe ti lista ni jma nacubi ra cá gunáʼ ndiʼ ca hotel ra zanda guiaanuʼ.
7 Lu tobi de ca guendaridagulisaa roʼ ni gupa xquidxi Jiobá, maʼ raca chupa mil gaayuʼ gayuaa iza la? Esdras ne ca lebita biindacabe Stiidxaʼ Dios nezalú guiráʼ binni ni bidagulisaa que ne bisiénecabe ni laacaʼ. Xi guleendúcabe yaʼ. Nehemías 8:12 cayabi laanu «guidubi guidxi que zeʼ [...] para guiéchecabe stale, purtiʼ maʼ biénecabe ca diidxaʼ ni bisiidicabe laacaʼ». Ñee cadi dxandíʼ nga rudiinu xquíxepeʼ ni naca moso ni bibí ca, purtiʼ cásica Esdras ne ca lebita que caquiiñecabe Stiidxaʼ Dios, cusiénecabe ni ne culuíʼcabe modo iquiiñenu ni lu endanabani stinu la? Zacá nga culuíʼ moso ca guendarannaxhii ni napa Jiobá ca binni xquidxi ne de que racaláʼdxibe gacanebe laacaʼ. Gudixhe ique cadi guiaadxaluʼ nin ti dxi stiʼ Guendaridagulisaa de Chonna Gubidxa «Sánenu Dios».
[Box on page 3]
Hora
Biernes ne sábado
9.30 siadóʼ – 5.10 huadxí
Domingo
9.30 siadóʼ – 4.05 huadxí
[Box on page 4]
Ximodo gacanenu cani ruyubi ra guiaananu
◼ Biaana ndaaniʼ ca hotel ni cá si lu lista stiʼ iza riʼ. Cadi cuídxiluʼ stiʼ hotel para inabadiidxuʼ pa baratu cuquíxecabe cuartu para cani cheʼ guendaridagulisaa roʼ ca. Nuu hotel huaníʼ de que ya, neca cadi zeedacabe lu lista.
◼ Para guʼnuʼ cani maca nexheʼ gaca ora icaguiʼ xiixa yoo la? cadi guiaana diʼ jma de tapa binni ndaaniʼ ti cuartu, neca nahuiinicabe, peru pa gadxé ni cá lu lista ca, ra caníʼ de «Binni huaniisi» la? la chinanda ni nani.
◼ Pa qué guidxeʼluʼ cuartu ndaaniʼ guiráʼ ca hotel ni cá lu lista ca o cayapuʼ xiixa endanagana ne tobi de laacani la? gudxi ni secretariu ni nuu ra ridagulisaaluʼ. Laabe zaníʼnebe cani ruyubi ra guiaana cani cheʼ guendaridagulisaa ca, ne zinándabe cani cá ra ruzulú lista ca. Para cadi cuidxuʼ ndaaniʼ sti hotel ni cadi zeeda lu lista ca la? guleza gueeda sti lista ni jma nacubi.
◼ Gunabaʼ cuartu ni dxandíʼ zaquiiñeluʼ.
◼ Para gánnacabe de que dxandíʼ zaquiiñuʼ ni la? naquiiñeʼ guseenduʼ bueltu para cada cuartu ni guinabuʼ, ne pa qué guʼnuʼ ni zacá la? hotel ca napa derechu gudiini sti binni.
◼ Cadi guchaaluʼ ni maca gunabuʼ.
◼ Secretariu stiʼ ca binni ridagulisaa ca zanda cueebe copia lista ra cá guiráʼ hotel ra zanda guiaanatu ne gudiibe tobi cada binnigola ni rusiidiʼ ra riuundaʼ libru (superintendente de estudio de libro). Ne maʼ laacabe gúʼndanecabe ni grupuhuiiniʼ stícabe ora si raca caber gápacabe guendaridagulisaa de chupa gubidxa ca laaca semana guiuundaʼ carta ra cá padxí gaca guendaridagulisaa de chonna gubidxa. Nin tobi de cani rucheeche diidxaʼ qué zacaa diʼ ti copia stiʼ lista ca.
[Box on page]
Ximodo ndiʼ jma jneza para inabuʼ ti cuartu ndaaniʼ ti hotel
1. Gulidxi ndaaniʼ ca hotel ca hora dxiiñaʼ, ne biquiiñeʼ númeru ni cá lu lista stiʼ ca hotel ra zanda guiaanaluʼ.
2. Guníʼ de que zieluʼ guendaridagulisaa stiʼ ca testigu stiʼ Jiobá.
3. Guníʼ xi dxi nga chiguiaanuʼ ndaaniʼ hotel ca.
4. Pa gastiʼ cuartu nadachi la? gulidxi ndaaniʼ sti hotel ni zeeda lu lista ca.
5. Biiyaʼ pa cayuni cobrárcabe lii biaʼ cá lu lista ca. Cadi quíxediluʼ pa inábacabe jma.
6. Gunabaʼ xcuártuluʼ, ne gunabaʼ númeru ni rudiicabe para guʼyuʼ de que dxandíʼ guleecabe ni para lii.
7. Gudixené tarjeta de crédito, ne cheque, o ne ti jiro postal. Cadi chuʼ dxi guseenduʼ bueltu. Pa quixuʼ ne cheque o ne jiro postal la? bicaa neza deche ni númeru ni gudii hotel ca lii ne biseendaʼ ni ndaaniʼ chii gubidxa.