Ndaa ra rinabadiidxaʼ

◼ Xi zanda gúninu ti gaca ca guendaridagulisaa ca hora ni maca nexheʼ gaca cani yaʼ.

Ora cayúninu xiixa ni galán ne ca xhamígunu la? nagueenda nga ridiʼdiʼ hora. Pur nga runi, pa nápanu ti libana lu guendaridagulisaa la? zándaca gaca nagana para laanu gúninu ni biaʼ tiempu stini. Peru xi zanda gacané laanu yaʼ.

Guzuluni hora stini. Ora riuu guiráʼ binni ridagulisaa ca la? galán gaca inbitar cani maʼ beeda ca para cuicaʼ ora maʼ cayaadxaʼ tobi o chupa minutu ante, ti ganda guzuluni hora stini ne gácani jneza (Ecl. 3:1). Ca guendaridagulisaa ra huaxiéʼ tu rie, casi ni raca ante de chigucheechenu diidxaʼ la? cadi guzulú diʼ ni maʼ huadxí pur cuézacabe cani qué riuu tempranu.

Guʼndachaahuinu dede ante. Ni zacané stale ti cadi tiidicabe de tiempu nga guʼndachaahuicabe dede ante. Pa lii chigudiiluʼ ti libana la? cadi guiaandaʼ lii xii nga maʼ gudixhe íqueluʼ guiniʼluʼ. Gulí xii nga cani jma naquiiñeʼ guiniʼluʼ ne bizeeteʼ cani jma. Cadi tan guiniʼluʼ ca diidxaʼ ni huaxiéʼ zaquiiñeʼ purtiʼ zuxhele si cani lii de ni maca naguíxheluʼ guiniʼluʼ. Cadi guʼnuʼ libana ca nagana. Pa luni chitiidiʼ modo gucheechecabe diidxaʼ o chinabadiidxaluʼ tuuxa luni la? dede ante biiyaʼ gúnicabe ni jneza. Pa ganda la? biquiiñeʼ ti reló ora maʼ cayuundaluʼ libana stiluʼ.

Guilaani pur ndaahuiniʼ. Pa icabi cani cucaadiaga o coʼ la? ni zaquiiñeʼ lii stale nga indaaluʼ libana ca pur ndaahuiiniʼ. Gudixhe panda minutu zaniʼluʼ cada tobi de laacani ne bicaa cani guriá guiʼchiʼ stiluʼ. Ora maʼ cudiiluʼ libana ca la? biiyaʼ pa zinándaluʼ biaʼ tiempu ni bicaaluʼ lu guiʼchiʼ ca. Ora icabi cani cucaadiaga la? cadi inabadiidxaluʼ laacabe stale lu ca primé parrafo ra ruzuluni, ti cadi gúʼndaneluʼ laacabe nagueenda xcaadxi párrafo ni jma risaca stini ca. Cani rutiidiʼ La Atalaya la? riquiiñeʼ gusaanacabe tiempu para ganda inabadiidxacabe cani cá ndaaniʼ cuadru ra rilúxeni. Ne laguuyaʼ, cadi iquiiñetu tiempu stiʼ diidxaʼ riuundaʼ ne orasión para guilúxetu libana stitu.

Guilúxeni hora stini. Pa lu guendaridagulisaa ca zadiʼdiʼ chupa chonna libana, casi Guendaridagulisaa stiʼ Dxiiñaʼ Stinu (Reunión de Servicio) la? guiráʼ cani gudii ca libana ca naquiiñeʼ gúʼyacaʼ pora guzulucaʼ ne pora guilúxecaʼ. Xi zanda gaca pa guendaridagulisaa ca maʼ cadiʼdiʼ ni de tiempu ni cá para gácani yaʼ. Tobi o jma de cani riaadxaruʼ gudii libana zanda gacanecaʼ guilúxeni hora stini, ra guiniʼcaʼ cani jma naquiiñeʼ si ni zeeda lu libana sticaʼ ne cueecaʼ cani huaxiéʼ zaquiiñeʼ. Gúnitu ni zacá la? zusihuínnitu de que nánnatu gusiiditu.

Cani cucaadiaga zanda gacanecaʼ bíchinu ni cudii libana ca ra icábicaʼ ne huaxiéʼ diidxaʼ ne guiniʼcaʼ ni naquiiñeʼ si. Dxandíʼ, guiranu nga zanda gacanenu para gatachaahuiʼ ca guendaridagulisaa ca ne «gaca cani jneza» (1 Cor. 14:40).