Guiníʼ íquenu casi guníʼ ique Jesús
1. Xii nga bisihuinni Jesús pur modo guníʼ ique.
1 Nécapeʼ qué liica huayuuyanu Xiiñiʼ Dios, maʼ beeda ganaxhiinu laabe pur guiráʼ ca historia ni rúʼndanu de guendanabani stibe ne de dxiiñaʼ bíʼnibe (1 Ped.1:8). Para gunda bíʼnibe ni na Bixhózebe la? bisaanabe puestu ni jma risaca ni gúpabe guibáʼ ne beedabe Guidxilayú riʼ casi tobi hombre. Gucanebe binni ne qué nibézabe nudiicabe laabe xiixa ne gútibe pur binni guidxilayú (Mat. 20:28). Stiidxaʼ Dios cayabi laanu: «Laguietenalaʼdxi [...] Jesús dxi uzá ndaani guidxilayú, ne lachinanda ejemplu stiʼ[be]». Ximodo zanda gúninu casi bíʼnibe neca gacananu yaʼ. (Fili. 2:5-8).
2. Xi endanagana ridxagalú stale de laanu, ne xi zanda gacané laanu gudxiilunu ni.
2 Ora maʼ cadxáganu. Nécaxa Jesús xiiñiʼ Dios laa la? laaca bidxaga. Ti dxi neca «ma bidxaga be tantu ma guzá be» la? bisiidibe ti gunaa de Samaria de lu Stiidxaʼ Dios guizáʼ xadxí (Juan 4:6). Yanna riʼ laaca stale de laanu riuʼnu zacá ga. Despué de ti semana dxiiñaʼ la? raca nagana para laanu nga gúninu stipa para chigucheechenu diidxaʼ. Peru, pa guireʼnu stale biaje la? zadúʼyanu de que dxiiñaʼ riʼ zudiini stipa laanu para guzuhuadxiichinu lu stiidxaʼ Dios (Juan 4:32-34).
3. Jesús nabé guyulaʼdxiʼ gusiidiʼ binni, ximodo zanda gúninu casi bíʼnibe yaʼ.
3 Sti biaje la? Jesús ne ca disípulo stiʼ zecaʼ ti lugar ra gastiʼ binni para iziiláʼdxicaʼ caadxi. Peru stale de ca binni que gúnnacaʼ paraa zécabe ne guzanírucaʼ lúcabe ti idxagalucaʼ laacabe raqué. Lugar de nidxiichi Jesús la? «biá laacabe». Ne «bizulú bisiidi laacabe stale cosa» (Mar. 6:30-34). Para ganda guzulunu gúʼndanenu binni Biblia ne cadi guiaanadxinu la? riquiiñeʼ gúninu casi biʼniʼ Jesús. Cadi ireʼnu gana ne dxandipeʼ ganaxhiinu binni. Pa yanna riʼ cadi cayuundanenu nin ti binni la? cadi guiníʼ íquenu qué zanda gúninu ni ne gúninu stipa pur idxélanu tobi ni gúʼndanenu.
4. Pa gácanu precursor ausiliar, ximodo zanda gacané ni laanu guiníʼ íquenu casi guníʼ ique Jesús yaʼ.
4 Gúninu primeru dxiiñaʼ ni bidii Jiobá laanu. Gácanu precursor ausiliar la? zacané ni laanu icá íquenu gúninu jma xhiiñaʼ Jiobá. Ti dxaapahuiiniʼ Testigu bicaa sicaríʼ: «Jñaa tobi de ca xhamigaʼ gúdxibe laadu gácadu precursora ausiliar ne laabe ti beeu. Nayéchepeʼ nga nuaa pur bineʼ ni. Ne sicarupeʼ nga guca para naa purtiʼ jma binebiaʼyaʼ ca bizanaʼ ne ca bendaʼ, ne qué nindaadiʼ maʼ biiyaʼ laacabe casi ñácacabe binnilidxeʼ. Laaca biecheʼ purtiʼ bidxelaʼ stale modo inieniaʼ binni de Jiobá ratiica nuu, ne gusiideʼ laacabe ca guendaridxagayaa chiguedané Reinu. Guiráʼ ndiʼ gucané naa para bidxiñaʼ jma gaxha de Jiobá ne de xquidxi» (Sal. 34:8).
5. Xiñee riquiiñeruʼ gúninu stipa pur guiníʼ íquenu casi guníʼ ique Jesús.
5 Guiranu cucaalunu guiráʼ ni riulaʼdxiʼ beela ládinu purtiʼ racaláʼdxinu gúninu ni na Jiobá (Rom. 7:21-23). Nápanu xidé gucaananu modo riníʼ ique binni guidxilayú de guyubi puru para laa si (Mat. 16:22, 23). Jiobá zanda gacané laanu ne espíritu santu stiʼ para gúninu ni (Gál. 5:16, 17). Laga cabézanu dxi ireʼnu de ca endanagana riʼ para chuʼnuʼ lu guidxilayú cubi stiʼ Dios la? guiníʼ íquenu casi guníʼ ique Jesús: gúninu primeru dxiiñaʼ ni bidii Jiobá laanu ne gacanenu binni, oracaruʼ gúninu ni riuláʼdxinu (Mat. 6:33; Rom. 15:1-3).