Bibiguetaʼ ra nuu cani ruluíʼ napa gana guiziidiʼ
1 Stale de laanu nuunu ndaaniʼ xquidxi Dios purtiʼ guyuu tu biiyaʼ nápanu gana guizíʼdinu jma de Reinu stiʼ Dios, ne zándaca bibiguétabe chupa chonna tiru para bisiidibe laanu. Zacaca naquiiñeʼ gúninu pa guidúʼyanu nuu tuuxa racalaʼdxiʼ guiziidiʼ jma. Jesús biʼniʼ mandar chigucheechenu diidxaʼ para gacanenu binni gaca xpínnibe. Nga runi, naquiiñeʼ chigánnanu laacabe sti biaje (Mat. 28:19, 20).
2 Biiyaʼ pa riuuláʼdxibe. Neca cadi guicaa binni ni caninenu ca nin ti guiʼchiʼ o libru la? ni guiniʼbe ne modo gábibe ni laanu zudiʼnu cuenta pa dxandíʼ rusisácabe cani caninu. Pa guidúʼyanu rusisácabe ni caninu la? zanda guibiguétanu ra nuube sti biaje. Ti ni rucheeche diidxaʼ yeganna ti hombre gaayuʼ semana seguidu ne qué nusaananebe laa nin ti revista. Ne sti semana guyebe que bisaananebe hombre que ti guiʼchiʼ ne qué nindaa de ngue bizulú biindanebe laa Biblia.
3 Pa gúʼyaluʼ ruluíʼ napa binni ca gana guiziidiʼ la? yegánnaca laabe pa ganda lu guiropa o lu guionna gubidxa. Cadi gudiiluʼ lugar cuee «binidxaba» gana binni ca (Mat. 13:19). Biʼniʼ stipa pur guibiguétaluʼ dxi gúdxiluʼ laabe (Mat. 5:37).
4 Ora gucheecheluʼ diidxaʼ lu calle. Ñee rúniluʼ stipa pur chigánnaluʼ binni ni guníʼneluʼ lu calle o ni guníʼneluʼ sti lugar la? Zanda gaʼbuʼ binni sicaríʼ maʼ para guiluxe guiníʼneluʼ laa: «Guyuuladxeʼ ni guninu riʼ. Paraa ñanda ñuuyaʼ lii para nininu diidxaʼ sti biaje yaʼ». Nuu de cani rucheeche diidxaʼ rudiicaʼ númeru de teléfono sticaʼ ne nuu tiru laaca rábicabe binni gudii númeru stiʼ laacabe. Pa guʼyaʼ binni gatigá rucheecheluʼ diidxaʼ ti lugar si la? jma zunibiaʼcaʼ lii ne zándaca zudiicaʼ lii númeru de teléfono sticaʼ o zábicaʼ lii pa neza ra lídxicaʼ. Peru pa qué gabi binni ca lii pa neza ra lidxi la? zanda gacaneluʼ laabe guiziidirube pa guiníʼneluʼ laabe ora guidxaagaluʼ laabe lu calle.
5 Ñee cadi dxandíʼ riéchenu ora guidúʼyanu cuee ti yagahuiiniʼ ni bizuhuaʼnu guieʼ la? Zacaca ziéchenu ne ziuʼnu galán pa chigánnanu binni ne gacanenu laa guiziidiʼ jma de Stiidxaʼ Dios (1 Cor. 3:6). Nga runi, gudixhe ique guibiguétaluʼ ra nuu ca binni ni ruluíʼ napa gana guiziidiʼ.