Yanna nga maʼ naquiiñeʼ quixhe chaahuinu cani chigúninu
1. Xi zanda gúninu tiempu rietenaláʼdxinu guendaguti stiʼ Cristu.
1 Guiráʼ iza randa rusisácanu Dios ni nachaʼhuiʼ, tiempu rietenaláʼdxinu guendaguti stiʼ Cristu (Sal. 109:30). Zusihuínninu cudiʼnu xquíxepeʼ Dios pur bidii xiiñiʼ gati pur laanu pa gucheechenu diidxaʼ biaʼ gándatiʼ lu beeu marzo. Nga runi, yanna nga maʼ naquiiñeʼ quixhe chaahuinu cani chigúninu (Pro. 21:5).
2. Xi biʼniʼ sentir caadxi xpinni Cristu ora gúnnacaʼ zanda guni ca precursor auxiliar treinta hora lu beeu abril 2011 que. Lii yaʼ, xi biʼniʼ sentirluʼ.
2 Gácanu precursor auxiliar. Udubiza nabé biéchenu ora gúnnanu maʼ huaxiéʼ hora zuni ti precursor auxiliar lu beeu abril. Ne rihuinni zacá ni pur ni guníʼ ti hombrehuiiniʼ. Laa bicaa sicaríʼ: «Yanna cadi nácadiaʼ precursor regular, purtiʼ caʼruʼ gunduuxeʼ scuela. Peru zacaʼ precursor auxiliar lu beeu abril para guneʼ treinta hora, peru zaguixhe iqueʼ gusaaʼ cincuenta». Zaqueca bizaaca ti gunaa ni rucheecheʼ diidxaʼ ni runi dxiiñaʼ guidubi dxi, laa guníʼ: «¿Treinta hora la? ¡Zanda gusaa biaʼ ca!». Ti gunaa xpinni Cristu ni maʼ napa jma de ochenta iza ne maca guca precursora regular ante, guníʼ sicaríʼ ora binadiaga maʼ treinta si hora chiguni ca precursor auxiliar yanna: «¡Maʼ xadxí nga napaʼ gana gacaʼ precursora sti biaje! Jiobá nanna jma nayecheʼ bibaneʼ ca dxi gucaʼ precursora que». Laaca lu beeu ca, guyuu xpinni Cristu ni gudixhe ique gucheeche diidxaʼ jma, neca qué ñácacaʼ precursor auxiliar.
3. Xi razón nápanu para gácanu precursor auxiliar lu beeu marzo, abril ne mayo.
3 Galán quixhe íquenu gácanu precursor auxiliar lu beeu marzo, purtiʼ zanda cuinu panda hora gúninu pa treinta o pa cincuenta, cásica bíninu udubiza. Ne sábadu 17 stiʼ marzo maʼ zuzulú zuni invitarnu binni para checaʼ dxi chiguietenaláʼdxinu guendaguti stiʼ Cristu, ni chigaca 5 stiʼ abril. Pa maʼ gúcatu precursor auxiliar lu beeu marzo la? ribézadu quixhe íquetu gácatu precursor auxiliar lu beeu abril ne mayo para gusaatu cincuenta hora.
4. Xi zanda gúninu para gucheechenu diidxaʼ jma ne xi zabeendunu pa gúninu ni.
4 Ora guni adorarluʼ Dios ne binnilídxiluʼ galán guiniʼtu ximodo zanda gúnitu jma lu xhiiñaʼ Dios tiempu rietenaláʼdxinu guendaguti stiʼ Cristu (Pro. 15:22). Gunabaʼ Jiobá cuʼ ndaayaʼ stipa ni gúniluʼ (1 Juan 3:22). Ne cadi guiaandaʼ lii, pa gucheecheluʼ diidxaʼ jma, zusisácaluʼ Jiobá ne ziuuluʼ jma nayecheʼ (2 Cor. 9:6).