Ñee maʼ naguíxheluʼ ti hora para gúʼndaluʼ Biblia la?

IZA gudiʼdiʼ ca bizeeteʼ Grupu Ni Zaniruʼ zadxaa modo gaca ca guendaridagulisaa stinu, ne zacá gápanu jma tiempu para guidúʼndanenu binnilídxinu Stiidxaʼ Dios. Pa lii nga xaíque ndaaniʼ lídxiluʼ, cadi guiaandaʼ lii gúʼndaneluʼ xheelaluʼ ne ca xiiñiluʼ guiráʼ semana xiixa ni gacané laacaʼ. Ne ca guendaxheelaʼ ni qué gapa xiiñiʼ la? zanda iquiiñecaʼ tiempu ca para gúʼndacaʼ Biblia guirópacaʼ. Ne pa caʼruʼ guichaganaluʼ ne cadi lii nga cudiiluʼ ni iquiiñeʼ binnilídxiluʼ la? zanda iquiiñeluʼ tiempu stiluʼ para gúʼndaluʼ Stiidxaʼ Dios ne guiníʼ íqueluʼ cani rusiidiʼ ni.

Stale xpinni Cristu maʼ guniʼcaʼ nabé rudiicaʼ xquíxepeʼ xquidxi Dios purtiʼ yanna maʼ zanda cueecaʼ ti gueelaʼ para guni adorarcaʼ Dios ne binnilídxicaʼ. Ti xpinni Cristu ni láʼ Kevina ni naca binnigola guníʼ sicaríʼ: «Guiráʼ ca xpinni Cristu ni ridagulisaanedu, nabé rudiʼdu xquíxepeʼ Jiobá pur ni guca ca. Cani nácadu binnigola nabé riníʼsaadu ximodo riquiiñedu gueelaʼ nápadu para guni adorardu Dios ne binnilídxidu, zacá rúnidu ni na Grupu ni Zaniruʼ».

Sti xpinni Cristu ni láʼ Jenny, xheelaʼ ti binnigola sti binni ridagulisaa, guníʼ sicaríʼ: «Nápadu chonna dxaapahuiiniʼ: tobi de 15 iza, stobi de 11 ne stobi de 2 iza. Cadi xadxí diʼ de bidxaʼdu lade ti neza binni ridagulisaa de seña ne stale tiempu riquiiñedu para chuʼdu listu para ca guendaridagulisaa ca. Peru yanna cumu maʼ bidxaa modo gaca ca guendaridagulisaa ca la? maʼ nápadu sti gueelaʼ para guni adorardu Jiobá ne binnilídxidu».

John ne JoAnn, ti guendaxheelaʼ ni nácacaʼ precursor regular, bicaacaʼ sicaríʼ: «Dxiqué nabé nagana guca para laadu guidúʼndadu Biblia guiráʼ semana, purtiʼ rúnidu ti stipa pur cueedu ti tiempu huiiniʼ para guidúʼndadu Biblia lade guiráʼ dxiiñaʼ ni nápadu casi binni ridagulisaa. Ni biʼniʼ xquidxi Dios ca zeeda gácani casi xiixa ni bisigaʼdeʼ Jiobá laadu ne riguuni gana laadu; peru nápadu xidé iquiiñedu tiempu ca jneza».

Tony, ti hombrehuiiniʼ ni napa 25 iza ne caʼruʼ guichaganáʼ, riquiiñebe ca martes huaxhinni para gúʼndabe Biblia ne guiníʼ íquebe cani cusiidiʼ ni ne riquiiñebe xcaadxi dxi ndaaniʼ semana para gúʼndabe ni chiguiuundaʼ lu ca guendaridagulisaa. Laabe guniʼbe sicaríʼ: «Nisi maʼ cabezaʼ ganda martes. Gueelaʼ ca nabé risácani para naa, purtiʼ riquiiñeʼ ni para Jiobá. Biaʼ chupa hora riquiiñeʼ para guundaʼ ca tema ni zeeda lu Biblia ni gacané naa chuaaʼ jma gaxha de Jiobá, ne cumu napaʼ jma tiempu la? randa riníʼ iqueʼ de ca historia ni zeeda lu Biblia». Xi huabeendú Tony pur nga yaʼ. Laabe guniʼbe: «Guiráʼ ca conseju stiʼ Jiobá ni ruundaʼ lu Biblia jma rindácani ndaaniʼ ladxiduáʼ que dxiqué», ne bidiibe ti ejemplu: «Lu libru Perspicacia biindaʼ nabé guca xhamigu David ne Jonatán ne biziideʼ ximodo zanda guizaalaʼdxeʼ binni casi biʼniʼ Jonatán. Zacá jma bieneʼ ximodo nga rusihuinni binni dxandíʼ xhamigu tuuxa. Nga runi, nisi cabezaʼ ganda martes para guiziideruaʼ xcaadxi cosa sicarú ni zeeda gaca casi perla ni risaca».

Rihuinni dxíchica, guiráʼ ca xpinni Jiobá zabeenducaʼ ni galán pa iquiiñecaʼ tiempu ni nápacaʼ yanna para gúʼndacaʼ Stiidxabe ne guni adorarcaʼ Dios ne binnilídxicaʼ.

[Cani cá ñee yaza]