Riquiiñepeʼ nga guidúʼndanu Biblia laasinu ne guidúʼndanenu binnilídxinu
1. Xiñee nabé rizaalaʼdxiʼ Grupu ni Zaniruʼ laanu ca dxi riʼ.
1 Cásica guca lu primé siglu que la? Grupu ni Zaniruʼ nabé rizaalaʼdxiʼ chuʼ xquidxi Jiobá galán (Hech. 15:6, 28). Cumu nabé maʼ gaxha nga nuu ca dxi jma nagana ca la? yanna nga jma caquiiñeʼ chuʼ guiráʼ cani rucheeche stiidxaʼ Reinu gaxha de Jiobá. Yanna, ximodo iquiiñenu tiempu ni cabeenu para Grupu ni Ruundaʼ Libru stiʼ ca Binni Ridagulisaa ora maʼ qué gácani yaʼ. Galán iquiiñenu tiempu ca jneza para guni adorarnu Dios ne binnilídxinu. Zacá jma ziénenu Stiidxaʼ Dios ne zacaneni laanu gápanu guendanabani ni qué zaluxe (Sal. 1:1-3; Rom. 11:33, 34).
2. Ximodo zanda quixhe chaahuinu tiempu stinu para guni adorarnu Dios ne binnilídxinu.
2 Ti gueelaʼ para guni adorarnu Dios ne binnilídxinu. Cayábidu guiráʼ ca bíʼchidu gúnicaʼ dxiiñaʼ ni bidii Jiobá laacaʼ ne quíxhecaʼ ti hora para gúʼndanecaʼ binnilídxicaʼ Biblia (Deu. 6:6, 7). Cani caruʼ guichaganáʼ ne qué gápacaʼ tuuxa binnilídxicaʼ ni naquiiñeʼ gúʼyacaʼ la? zanda iquiiñecaʼ tiempu ca para gúʼndacaʼ Biblia laasicaʼ ne guiénecaʼ ni. Nabé risaca nga iquiiñenu tiempu stinu para guidúʼndanu Biblia ne guiníʼ íquenu de laani ti gúninu «ni iree ndu laga zanda». Zacá zanda guzuhuaʼnu dxiichiʼ lu Stiidxaʼ Dios «purti nabé cayuni binni ni cadi jneza ca dxi riʼ» (Efe. 5:15, 16).
3, 4. Xi zanda guidúʼndanenu binnilídxinu, ne xiñee naquiiñeʼ gúninu ni.
3 Xi zanda guidúʼndanu. Zanda iquiiñenu Índice de las publicaciones Watch Tower ne CD-ROM Watchtower Library purtiʼ zacanécani laanu para guidxélanu xiixa ni guidúʼndanenu binnilídxinu, ne chuʼnu nayecheʼ ora gácani. Zanda guidúʼndanu ca tema ni reeda lu Torre stiʼ ni rapa, casi ra na «Ni zacané binnilídxiluʼ chuʼ nayecheʼ», «Ni gusiiditu ca xiiñitu» ne «Para ca hombrehuiiniʼ ne ca dxaapahuiiniʼ». Laaca zanda guidúʼndanu cani reeda lu ¡Despertad!, ra na «Los jóvenes preguntan» o ca tema ni caníʼ de cani bizáʼ Dios.
4 Ora guidúʼndanu Biblia chaahuidugá la? racaneni para guizíʼdinu xiixa ne chindá ca conseju stini ndaaniʼ ladxidoʼno (Heb. 4:12). Stobi de ca cosa ni zanda gúninu nga guidúʼyanu ca videu ni maʼ gulee xquidxi Dios ne guininu de ni cusiidicani laanu. Zanda guyúbiluʼ xcaadxi modo gácani. Xiñee qué guinabadiidxaluʼ ca binnilídxiluʼ xi ñuuláʼdxicaʼ ñuundatu yaʼ.
5. Xiñee nabé riquiiñeʼ guidúʼndanu Biblia laasinu ne guidúʼndanenu binnilídxinu.
5 Xiñee yánnapeʼ nga jma caquiiñeʼ gúninu ni. Pa gúninu stipa pur chuʼnu gaxha de Dios la? ziuʼnu listu ora gaca ni na ca diidxaʼ riʼ: «Laguzuhuaa dxiichiʼ ne laguuyaʼ modo chigulá Jiobá laatu» (Éxo. 14:13). Cani napa xiiñiʼ caquiiñecaʼ gacané Jiobá laacaʼ para gusiniisicaʼ laacabe jneza «ndaani guidxilayú ni nadxabaʼ» riʼ (Fili. 2:15). Ca xiiñicabe caquiiñeʼ chuʼ tu gacané laacaʼ para cadi guicá guiráʼ cosa dxabaʼ ni nabé rihuinni dede ndaaniʼ ca scuela ca (Pro. 22:3, 6). Ca binni ni maʼ bichaganáʼ caquiiñeʼ gudiicaʼ lugar gacané Jiobá laacaʼ para chuʼ xquendaxheelacaʼ naguidxi (Ecl. 4:12). Nga runi, riquiiñeʼ gánnanu iquiiñenu tiempu stinu jneza para guzuhuaa chaahuinu lu ni runi crenu (Jud. 20).