Revista para guiráʼ clase binni
1. Ximodo rusihuinni mozo ni nuu xpiaaniʼ ne ni runi jneza cayuni cásica biʼniʼ apóstol Pablu.
1 Apóstol Pablu biyubi modo guiniʼné guiráʼ clase binni ca diidxaʼ nacubi ne galán. Cásica biʼniʼ Pablu, mozo ni nuu xpiaaniʼ ne ni runi jneza laaca riquiiñeʼ revista Torre stiʼ ni rapa ne ¡Despertad! para gacané guiráʼ binni neca gadxé gadxé modo biniisicaʼ ne gadxé gadxé modo riníʼ íquecaʼ (1 Cor. 9:22, 23). Para ganda iquiiñenu ca revista riʼ jneza la? naquiiñeʼ gánnanu tu para gúcacani.
2. Tu para guca revista ¡Despertad!
2 ¡Despertad! Gúcani para gacaneni ca binni ni naca casi ca «binni Atenas», ni guyé apóstol Pablu ra nuucaʼ (Hech. 17:22). Ca binni que cadi xpinni Cristu laacaʼ ne qué liica gánnacaʼ xi rusiidiʼ Stiidxaʼ Dios. Revista ¡Despertad! laaca gúcani para ca binni ni qué ganna xi rusiidiʼ Biblia. Gucuani para ca binni ni zándaca qué liica ganna gastiʼ de cani bisiidiʼ Cristu, cani qué riuulaʼdxiʼ ganna de religión o cani qué liica ganna pabiáʼ racané ca conseju ni zeeda lu Biblia binni. Tobi de ca razón pur guca revista riʼ nga gacaneni ca binni ni ruundaʼ ni guni crecaʼ nuu ti Dios ni dxandíʼ. Laaca racaneni binni iguidxi fe stiʼ lu ca diidxaʼ ni zeeda lu Biblia ne para gusihuínnini gadxé ca testigu stiʼ Jiobá de xcaadxi religión.
3. Tu para guca cada tobi de ca revista Torre stiʼ ni rapa.
3 Torre stiʼ ni rapa. Revista Torre stiʼ ni rapa ni riree para guiráʼ binni, gúcani para cani runi cré Dios ne cani runi cré ni cá lu Stiidxabe, cani zeeda gaca casi ca binni ni gudxi Pablu: «Irá tu, cani ridxibi Dios» (Hech. 13:14-16). Cani ruundaʼ revista riʼ maʼ nánnacaʼ caadxi de ca cosa ni rusiidiʼ Biblia, peru huaxiéʼ riénecaʼ ni rusiidini. Revista Torre stiʼ ni rapa ni né ca tema ni chiguiuundaʼ, gúcani para si ca testigu stiʼ Jiobá. Pablu nanna riene ca binni ni ruundaʼ ca carta stiʼ que Stiidxaʼ Dios ne nanna chaahuicaʼ ni dxandíʼ de Dios (1 Cor. 1:1, 2). Zaqueca ca tema ni zeeda lu revista riʼ, gucuácani para ca binni ni rié ca guendaridagulisaa stinu ne para cani nanna cani rizíʼdinu ne para cani maʼ runibiáʼ ca diidxaʼ riquiiñenu.
4. Xiñee naquiiñeʼ guiduʼndaʼ chaahuinu cada tobi de ca revista ni riquiiñenu ora rucheechenu diidxaʼ.
4 Nécapeʼ rusaananenu binni revista Torre stiʼ ni rapa ne ¡Despertad! ora maʼ canagucheechenu diidxaʼ la? tobi si de laacani nga rusiénenu laacabe xiná. Nga runi, naquiiñeʼ quixhe íquenu guiduʼndaʼ chaahuinu cada tobi de laacani. Zacatiʼ zánnanu xi tema jma ziuulaʼdxiʼ binni gucaadiaga.