Tuu nga cani cayuni ni na Jiobá ca dxi riʼ
1. Padxí guiuundaʼ folletu Tuu nga cani cayuni ni na Jiobá ca dxi riʼ, ne ximodo zacaneni laanu.
1 Ra guiuʼnu semana 11 stiʼ noviembre 2013 ziuundaʼ folletu Tuu nga cani cayuni ni na Jiobá ca dxi riʼ lu Guendaridagulisaa ra Riuundaʼ Biblia. Gucuaanu folletu riʼ lu guendaridagulisaa de chonna gubidxa «Gápanu ladxidoʼno», ne gúcani para gacaneni ca binni rúʼndanenu Biblia chuuláʼdxicaʼ chuʼcaʼ ndaaniʼ xquidxi Jiobá. Ora guidúʼndanu folletu riʼ zacaneni laanu guiníʼ íquenu pabiáʼ risaca guiaananu ndaaniʼ xquidxi Dios ne zazíʼdinu ximodo iquiiñenu folletu riʼ ora gucheechenu diidxaʼ (Sal. 48:13).
2. Ximodo chiguiuundaʼ folletu riʼ ra ridagulisaanu.
2 Ximodo chiguiuundaʼ ni. Cani chitiidiʼ para guʼndané laanu folletu riʼ naquiiñeʼ quixhe chaahuicaʼ pabiáʼ tiempu zaquiiñecaʼ para cada ndaa stini. Napa folletu riʼ 28 ndaa ne cada biaje guzulú tobi de laacani naquiiñeʼ gúʼndabe guendarinabadiidxaʼ ni ruzuluné tema stini. Laaca zadiʼdiʼ ti xpinni Cristu para guʼndaʼ ca párrafo stini, ne ora maʼ biuundaʼ primé párrafo ni ruzuluné cada tema, ni cayuundané laanu folletu riʼ nga quixhe xi guinabadiidxaʼ laanu. De racá, guiráʼ ca párrafo ni ruzuluné caadxi letra yaaseʼ, ziuundaʼ cani tobi pur tobi ne zaníʼcabe xi cusiidicani laanu. Ni cutiidiʼ guendaridagulisaa riʼ zanabadiidxaʼ ximodo ricabi cada tobi de ca párrafo riʼ ni canabadiidxaʼ tema stini. Ne zanábabe guiuundaʼ ca textu ni jma cusiene de tema stini pa gudii tiempu. Laaca napa folletu riʼ stale dibuju ni zanda iquiiñeʼ para guicabi cani cucaadiaga. Ante tiidibe lu sti tema, zanabadiidxabe cani zeeda ñee yaza para guietenaláʼdxinu xi bizíʼdinu. Pa nuu ti cuadru ra na «Para gannuʼ jma», zanábabe ni cayuundaʼ ca párrafo stini guʼndaʼ ni ne zanabadiidxabe cani cucaadiaga gusiénecaʼ xi zabeendú ti binni cayuundanecaʼ Biblia pa chinanda conseju zeeda racá. Pa nuuruʼ tiempu ora maʼ biuundaʼ biaʼ nexheʼ guiuundaʼ dxi ca la? zanda gúnibe ca guendarinabadiidxaʼ ni zeeda ra ruzulú cada tema para gacanebe laanu guietenaláʼdxinu xi bizíʼdinu. Cadi guiaandaʼ ndiʼ laanu: lu Guendaridagulisaa ra Riuundaʼ Biblia si nga chigácani sicaríʼ, cadi naquiiñepeʼ gúninu zacá ora guidúʼndanenu ca binni ni cusíʼdinu.
3. Xi naquiiñeʼ gúninu para cueendunu stale cosa ora guiuundaʼ folletu riʼ.
3 Para ganda cueendunu stale cosa ora guiuundaʼ folletu riʼ, naquiiñeʼ gúʼndanu ni dede ante ne guicábinu ora guiuundaʼ ni ra Yoo stiʼ Reinu. Ora maʼ cayuundaʼ ni, galán guiníʼ íquenu ximodo zanda gacaneni ca binni ridúʼndanenu Biblia. Ora guidúʼndanu folletu cubi riʼ zazíʼdinu ximodo gacanenu xcaadxi binni guni ni na Dios ti ganda guicaacaʼ guendanabani ni qué zaluxe (1 Juan 2:17).