Ximodo iquiiñenu folletu cubi ni láʼ Tuu nga cani cayuni ni na Jiobá ca dxi riʼ
Gúcani para gacaneni ca binni ni cayúʼndanenu Biblia chuʼcaʼ ndaaniʼ xquidxi Dios
1. Xi para guca folletu ni láʼ Tuu nga cani cayuni ni na Jiobá ca dxi riʼ.
1 Cadi xadxí de gucuaanu folletu ni láʼ Tuu nga cani cayuni ni na Jiobá ca dxi riʼ. Ñee maʼ caquiiñeluʼ ni la? Folletu riʼ gúcani para gacanenu ca binni ni cadúʼndanenu Biblia: 1) gunibiaʼcaʼ xquidxi Dios, 2) gánnacaʼ xi guiráʼ dxiiñaʼ rúninu ne 3) gúʼyacaʼ ca dxiiñaʼ ni cayuni xquidxi Dios. Cada ndaa stiʼ folletu Tuu nga cani cayuni ni na Jiobá ca dxi riʼ de ti yaza si ni, ne zanda gúʼndanenu cani binni gaayuʼ o chii minutu si despué de guiluxe gúʼndanenu laacaʼ Biblia.
2. Bizeeteʼ ximodo guca folletu riʼ ne xi guiráʼ zeeda luni.
2 Modo guca folletu riʼ. Nápani chonna ndaa ni cusiene gadxé gadxé cosa de xquidxi Dios ne zacaneni binni guiene guionnaʼ cosa ni maca bizéʼtenu. Neni 28 tema, ne cada tobi de ca tema stini cá cani casi ti guendarinabadiidxaʼ, ne ca subtítulo, ni dieʼ jma nayaaseʼ, cacabi ca guendarinabadiidxaʼ ca. Lu guidubi naca folletu ca zeeda foto ni biree lu jma de cincuenta guidxi ne cá paraa bireecani, ndiʼ rusihuinni cayaca dxiiñaʼ riʼ lu guidubi naca Guidxilayú. Stale de ca ndaa ca nécani ti cuadru ni láʼ: «Para gannuʼ jma», ni cudii caadxi conseju galán para cani cadúʼndanenu Biblia.
3. Ximodo zanda gúʼndanenu binni folletu riʼ.
3 Ximodo iquiiñenu ni. Ora guzulú gúʼndaneluʼ laabe biʼniʼ guendarinabadiidxaʼ ni cá ra ruzulú cada ndaa stiʼ folletu ca. Ne laga cayuundaneluʼ laabe ca párrafo stini, bisiene laabe ca subtítulo zeeda luni. Ne para guilúxeluʼ biʼniʼ laabe ca guendarinabadiidxaʼ ni cá ra riluxe ca yaza stini. Zanda gúʼndatu guidubi ndaa ca tobi si tiru, o laaca zanda gúʼndatu ni ti ndaa ga ne maca zigusiéneluʼ ni. Gulí chaahuiʼ ca textu ni zanda gúʼndaneluʼ laabe ne cadi guiaandaʼ lii iquiiñeluʼ ca foto, ca dibuju ne ca cuadru ni láʼ «Para gannuʼ jma». Jma galán guiuundaʼ folletu ca de ra guzuluni hasta ra guilúxeni. Peru pa ruuyaluʼ caquiiñeʼ gánnabe de sti tema la? zanda gúʼndaneluʼ laabe ra zeedani lu folletu ca. Casi pa zeedayuba ti guendaridagulisaa roʼ la? zanda gúʼndatu ndaa 11 stini.
4. Xiñee nayecheʼ nuunu pur folletu cubi ni nápanu riʼ.
4 Ora ridúʼndanenu binni Biblia, racanenu laacaʼ gunibiaʼcaʼ Bixhózenu ni nuu guibáʼ. Peru laaca naquiiñeʼ gacanenu laacabe gunibiáʼcabe xquidxi Jiobá (Prov. 6:20). ¡Nabé nayecheʼ nuunu purtiʼ maʼ nápanu folletu riʼ para gacané binni gunibiáʼ Jiobá ne xquidxi!