Nabé zareeche diidxaʼ lu beeu agosto
Zaguíʼzinu ti tratadu cubi lu guidubi naca Guidxilayú
1. Xi campaña chigaca lu guidubi naca Guidxilayú ra chigusaa Reinu stiʼ Dios ti gayuaa iza de cayuni mandar.
1 Ra chigusaa Reinu stiʼ Dios ti gayuaa iza de cayuni mandar, ¡jnézapeʼ nga gusisácanu Jiobá né ti campaña risaca! Lu beeu agosto zaguíʼzinu ti tratadu cubi lu guidubi naca Guidxilayú ni láʼ Tu zanda guicabi cani jma racalaʼdxiʼ binni ganna. Tratadu riʼ zacaneni binni para guyúbicaʼ lu Biblia guiráʼ cani rinabadiidxacaʼ ne cusiéneni ximodo zanda gacané sitiu jw.org ni nuu lu Internet laacaʼ.
2. Ximodo zanda gacanenu ti dede né laanu gucaʼnu ti «ridxi nadipaʼ [para] gusisácanu Jiobá» lu beeu agosto.
2 Ti ridxi nadipaʼ ni cusisaca Dios. Para ganda gucheeche ca publicador diidxaʼ jma la? maʼ nexheʼ biaje riʼ si zanda gaca ca publicador ni maʼ guyuunisa precursor auxiliar pa gacaláʼdxicaʼ ne gúnicaʼ treinta hora lu beeu agosto. Cumu napa beeu riʼ gaayuʼ viernes, sábadu ne domingu la? stale publicador ni runi dxiiñaʼ o rié scuela ndaaniʼ semana, zanda gácacaʼ precursor auxiliar beeu riʼ. Pa tobi de cani ruundaneluʼ Biblia o tobi de ca xiiñiluʼ maʼ zanda gaca publicador la? nagueendaca guniʼné binnigola ni naca coordinador stiʼ congregación stiluʼ. ¡Nabé ziéchecabe gácacabe publicador lu beeu ra chigaca stale dxiiñaʼ riʼ! Stale precursor regular riziiláʼdxicaʼ lu beeu agosto purtiʼ maʼ bisaacaʼ hora nexheʼ gúnicaʼ lu ti iza, peru zanda guchaacaʼ modo naguíxhecaʼ gúnicaʼ dxiiñaʼ ti ganda gucheechecaʼ diidxaʼ lu campaña risaca riʼ. Dede ca yanna naquiiñeʼ guʼyaʼ ca familia ca xi zanda gúnicaʼ ti dede né laacaʼ gucaacaʼ ti «ridxi nadipaʼ [para] gusisácanu Jiobá» lu beeu agosto (Esd. 3:11; Prov. 15:22).
3. Xi cabézanu gaca lu campaña risaca riʼ yaʼ.
3 Nécapeʼ maʼ huayacanenu lu xcaadxi campaña ni huayaca, peru ribézanu lu campaña riʼ gaca jma dxiiñaʼ de ni huayaca. Ñee zanda gucheechenu diidxaʼ jma stale hora, gacanenu chuʼ jma stale publicador ne precursor auxiliar lu beeu agosto la? Ra ziluxe iza dxiiñaʼ 2014, ¡rinábanu uguu Jiobá ndaayaʼ ca dxiiñaʼ gúninu lu guidubi naca Guidxilayú para gaca beeu agosto ca beeu ni jma guireeche diidxaʼ! (Mat. 24:14.)