Basha—Ingabe Niyophumelela Ekuvivinyweni Kokwethembeka KobuKristu?
“AWUCABANGI ngokuziphatha okubi njengokuwukungathembeki. Umane uyazijabulisa nje. Yiqiniso, uyazi ukuthi uma abazali bakho noma abadala bebengezwa, bekuyobangela ukudabuka nezinkinga eziningi. Kodwa lapho uzijabulisa, umane uyivimbele yonke leyomicabango.”
Insizwa esanda kucashunwa yayihlanganyele ngokuyimfihlo emkhubeni wokuhlobonga. Yayiphila ukuphila okumbaxa-mbili, ikhohlisa abazali bayo nebandla lobuKristu. Ngalesosikhathi yayingaqapheli ukuthi yayihluleka ekuvivinyweni kokwethembeka kobuKristu.
Izinkulungwane zentsha engamaKristu ziye zahluleka ekuvivinyweni kokwethembeka okufanayo. Futhi akumangalisi! Phela, uSathane uDeveli ‘ulwa’ nabantu bakaNkulunkulu, wenza konke angakwenza ukuze ephule ubuqotho babo. (IsAmbulo 12:17) Ikakhulukazi uye wenza intsha izisulu ‘zamaqhinga’ akhe. (Efesu 6:11) Kanjalo kudinga umzamo wangempela nokuzimisela ukuhlala uthembekile.
Kuyini ngempela ukwethembeka? EmiBhalweni yesiHeberu, igama lolimi lwakuqala elisho “ukwethembeka” libonisa ukusondelana kothando nomuntu othile unombono wenjongo ethile. (IHubo 18:25) Alichazi isibopho esithile esibuthakathaka esingaphulwa kalula kodwa ukusondelana okungaphazanyiswa kuze kube yilapho injongo yako ngokuqondene nalowomuntu isigcwalisekile. EmiBhalweni yesiGreki, igama lolimi lwakuqala elisho “ukwethembeka” linomqondo wobungcwele, ukulunga, noma inhlonipho.
Kanjalo ukwethembeka kuhilela ubuhlobo obuhle noNkulunkulu. Eyabase-Efesu 4:24 isitshela ukuba ‘sembathe umuntu omusha owadalwa . . . ekulungeni nasebungcweleni beqiniso.’ Ingabe ufuna ukwethembeka kuJehova? Khona-ke kumelwe uhlakulele ukusondelana kokwethembeka naye, isibopho esingenakwephulwa, ukuzimisela ukumjabulisa kuzo zonke izindlela zakho. Kumelwe unamathele ezindinganisweni zokulunga zikaJehova—kungakhathaliseki ukuthi kungase kulinge kanjani ukwenza ngenye indlela!
Ukucindezela Kokungathembeki
Ngokuncomekayo, intsha eningi phakathi koFakazi BakaJehova ilwela ukuhlala ithembekile, futhi ngenxa yalokho ijabulela unembeza ohlanzekile. Nokho, umphostoli uPawulu waprofetha ukuthi “ezinsukwini zokugcina,” ukungathembeki kwakuyoba imfanelo yabaningi. (2 Thimothewu 3:1, 2) Ngokudabukisayo, enye intsha engamaKristu iye yavumela lelizwe elingathembekile ukuba ‘liyenze ifane nalo.’ (Roma 12:2, Phillips) USathane uye wakufeza kanjani lokhu?
Ukucindezela kontanga kungelinye ithuluzi eliphumelelayo likaSathane. Abantu abaningi bafuna ukuba nedumela elihle kwabanye, futhi uSathane uyayazi indlela yokusebenzisa lesifiso esingokwemvelo. Ifuna ukubhekwa njengevamile, intsha ethile iye yahlanganyela engxoxweni engcolile, ekuziphatheni okubi, ekubhemeni, ekudakweni—ngisho nasekusebenziseni kabi izidakamizwa—konke ikwenzela ukuba yamukeleke kontanga.
USathane ufuna ukuba ‘sihambe ezinkanukweni zenyama yethu, senze intando yenyama.’ (Efesu 2:3) Wazi kahle ukuthi kungaba namandla kangakanani ukucindezela kwesifiso sobulili ngesikhathi ‘sokuqhuma kwenkanuko yobusha.’ (1 Korinte 7:36, NW) Futhi ufuna uvumele lezozifiso. Enye intsha engamaKristu izifaka engozini ingaqaphele ngokubuka izincwadi ezinezithombe ezingcolile, amabhayisikobho, namavideo noma ngokushaya indlwabu. Lezizinto, ngokuvamile ziholela ezenzweni ezingathi sína zokungathembeki. Ingabe izwe likaSathane seliye ‘lakwenza wafana nalo’ kwezinye zalezizinto?
Ukuphila Ukuphila Okumbaxa-mbili
Nakuba ukwenza ububi obukhulu njengokuhlobonga khona ngokwakho kuyindaba engathi sína, enye intsha iyabunezela ubunzima bayo. Ifana “nabantu bamanga,” okukhulunywe ngabo kumaHubo 26:4, ‘abayizimbulu [“abafihla lokho abayikho,” NW].’ Intsha enjalo iphila ukuphila okumbaxa-mbili, yenza okunye lapho inabazali bayo noma inomunye umKristu ovuthiwe ibuye yenze okunye lapho inontanga.
Nokho, ukuphila ukuphila okumbaxa-mbili, kuwukuzikhungathekisa futhi kuyingozi. Izenzo ezimbi ezingathitshiwe cishe ngokuvamile ziholela kwezinye izenzo ezimbi. Futhi nakuba unembeza womuntu ungase ukhathazeke ekuqaleni, lapho umuntu ephikelela isikhathi eside ekwenzeni okubi, yilapho unembeza wakhe usabela kancane khona ekwenzeni okubi. Lowomuntu angase ‘ayeke [ngokoqobo] ukuzwa ubuhlungu’ bokwenza okubi.—Efesu 4:19, Kingdom Interlinear.
Kulelizinga kuba nzima kakhulu ukuvuma ububi bakhe umuntu futhi athole usizo. Lokhu kuba njalo ikakhulukazi uma enye intsha engamaKristu ihilelekile kulobobubi. Ngokuvamile kubusa umuzwa wokwethembeka odukile. Omusha ocashunwe ekuqaleni wachaza: “Uyakuqaphela okwenzayo, futhi uyazi ukuthi akulungile. Ukuze abanye abahilelekile bangangeni enkathazweni, uyavuma ukungatsheli-muntu.”
Nakuba umuntu ‘engakufihla lokho ayikho’ kubazali bakhe noma ebandleni, akanakumfihlela uJehova. “Akukho-nto edaliweyo engabonakali phambi kwakhe, kepha konke kwambuliwe kusobala emehlweni akhe esiyakuzilanda kuye.” (Heberu 4:13) IBhayibheli liyasiqinisekisa: “Ofihla iziphambeko zakhe akayikuphumelela.” (IzAga 28:13) Ngokuhamba kwesikhathi ububi buyodalulwa. Umuntu akanakumphamba uJehova. IzAga 3:7 zithi: “Ungabi-ngohlakaniphileyo emehlweni akho; mesabe uJehova, udede ebubini.” Khumbula, futhi, ukuthi “amehlo kaJehova asezindaweni zonke; aqaphela ababi nabahle.”—IzAga 15:3.
Omusha okukhulunywe ngaye ngaphambili, kanye nabaningi abanye abahileleka ekwenzeni okubi ngokuyimfihlo, babanjwa, futhi yena nabangane bakhe kwadingeka baxoshwe ebandleni lobuKristu. Kamuva basimama ngokomoya futhi babuyiselwa. Noma kunjalo, yeka indlela enzima yokufunda okushiwo ukwethembeka!
‘Ukulungisa Izindaba’ NoNkulunkulu
Kuthiwani uma umuntu eye wazibonakalisa engathembekile ngendlela ethile, mhlawumbe ngokwenza isenzo esibi? Kulula ukuzikhohlisa nokwenqaba isidingo sokulungisa izindaba. Omunye osemusha owahlanganyela ekuhlobongeni ngokuyimfihlo wathi: “Ngandisa inkonzo yami yasensimini, ngicabanga ukuthi lokhu kwakuyosibekela lobububi ngandlela-thile.” Isizwe esihlubukayo sakwaIsrayeli naso ngokufanayo sazama ukushweleza kuJehova ngemihlatshelo. Kodwa uJehova wakwenqaba ukuzinikela okunjalo kokuzenzisa. Wabanxusa: “Gezani, nihlanzeke, nisuse ububi bezenzo zenu phambi kwamehlo ami, niyeke ukwenza okubi.” UJehova wayeyokwamukela imihlatshelo yabo kuphela ngemva kokuba ‘sebezilungisile izindaba naye.’ Kusenjalo nanamuhla nganoma ubani ongase ahileleke ekwenzeni okubi.—Isaya 1:11, 15-18, qhathanisa neNW.
Umuntu akanakuzilungisa izindaba noJehova ngokumane athulule isifuba kuntanga. Phakathi kokunye, ontanga ngokuvamile abalunikezi usizo oluhle, ngoba ezikhathini eziningi banokuhlangenwe nakho okulinganiselwe ngokulinganayo ekuphileni. Okubaluleke nangaphezulu, abanakusithethelela isono sakho. UNkulunkulu kuphela ongenza lokho. Ngakho ‘thulula inhliziyo yakho’ kuye ngokuvuma. (IHubo 62:8) Nakuba ungase ube namahloni ngokujulile ngokuziphatha kwakho, qiniseka ukuthi uJehova “uyokwenza ukuthethelela kube-kukhulu.”—Isaya 55:7.
Uyodinga usizo olwengeziwe. “Yazisa abazali bakho, yazisa abadala ngaso lesosikhathi—ekuqaleni nje,” kunxusa omunye umKristu osemusha owazuza osizweni olunjalo. Yebo, abazali bakho cishe basesimweni esihle sokukusiza. ‘Baphe inhliziyo yakho,’ ubazise zonke izinkinga zakho. (IzAga 23:26) Bangakuhlelela ukuba uthole usizo olwengeziwe kwabadala bebandla lapho kudingekile.—Jakobe 5:14, 15.
Ukubonisa Ukwethembeka Kweqiniso—Kanjani?
Yebo, kungaba ngcono kakhulu ukuba ungalokothi uwele enkambweni yokungathembeki kwasekuqaleni. IHubo 18:25 liyasitshela: “Kothembekileyo [Jehova] uyazibonakalisa uthembekile; kumuntu oqotho uzibonakalisa uqotho.” UJehova ubabusisa ngokucebile labo abalondoloza ngokwethembeka izindinganiso eziphakeme zokuziphatha.
Nokho, kunezinye izindlela, ukwethembeka kwakho okungase kuvivinywe ngazo. Ngokwesibonelo, ake sithi umngane wakho useye waqalisa inkambo yokuduka. Ingabe uyovumela ukwethembeka okudukile kulowomngane kunqobe ukwethembeka kwakho kuJehova? Isenzo sothando bekungaba ukuya kulowomngane futhi umnxuse ukuba abike leyondaba kubazali bakhe noma kubadala. Tshela umngane wakho ukuthi uma engenzi kanjalo ngesikhathi esifanelekile, uyokwenza kanjalo wena. IzAga 27:5 zithi: “Ukusola okusobala kungcono kunothando olufihliweyo.” Ngokusiza umngane wakho ngalendlela, awubonisi ubuqotho bobungane bakho nje kuphela kodwa nokujula kokwethembeka kwakho kuJehova.
Kungakhathaliseki uhlobo lokuvivinywa, amandla okubonisa ukwethembeka atholakala ngokuba nobuhlobo obuqinile bomuntu siqu noJehova. Umthandazo onengqondo nesifundo somuntu siqu senkuthalo kubalulekile uma sifuna ukujabulela ubuhlobo obunjalo. Ngokuthakazelisayo, yonke intsha eyaphambuka okukhulunywe ngayo ngaphambili yavuma ukuthi imithandazo yayo nemikhuba yesifundo sayo somuntu siqu yayisiwukugcina icala nje—futhi ngokuhamba kwesikhathi yaphela. UJehova akabange esaba ongokoqobo kuyo, futhi ngokushesha kwalandela ukuziphatha okungahlanzekile. Ingabe, ngomthandazo nangesifundo somuntu siqu, uyabuqinisa ubuhlobo bakho noJehova ukuze uhlale uthembekile?
Yiqiniso, ngezinye izikhathi ungase uzibuze noma uphuthelwa isikhathi sokuzijabulisa. “Ngezinye izikhathi kubonakala sengathi abantu bezwe bayajabula,” kusho omunye owesifazane osemusha. “Kodwa lapho ubambeka esimweni esithile, uyabona ukuthi akukhona neze ukujabula.” Wayekhuluma ngokuhlangenwe nakho, njengowahlanganyela ekuziphatheni okubi kobulili, kwaphumela ekukhulelweni nasekukhipheni isisu. “Ukuba seqinisweni kuyisivikelo,” manje uyasho—isifundo asifunda kanzima. IHubo 119:165 liyasikhumbuza ukuthi “abathanda umthetho [kaNkulunkulu] banokuthula okukhulu.”
Ngakho-ke, yenza konke okusemandleni ukuze uhlale uthembekile. Sebenzela ukwakha ubuhlobo obuhlala njalo noJehova. Zonda okubi unamathele kokuhle. (Roma 12:9) IHubo 97:10 liyasitshela: “Nina enithanda uJehova zondani okubi; uyagcina imiphefumulo yabamkhonzayo; uyabasindisa ezandleni zababi.” Yebo, njengomusha ongumKristu, uyozuza esivikelweni sikaJehova futhi ujabulele ukuphila okuphakade uma uphumelela ekuvivinyweni kokwethembeka kobuKristu.