Dumisa Igama LikaNkulunkulu Ngokugcwele
1 Yeka indlela esijabula ngayo ngezibusiso eziningi ezivela kuJehova! ENingizimu Afrika phakathi nalonyaka wenkonzo, kuye kwaba namanani amasha aphakeme abamemezeli nezifundo zeBhayibheli zasemakhaya. Futhi kwaba nenani elihle lababekhona eSikhumbuzweni abacishe babe u-125 000. Abantu abangaphezu kwabangu-128 000 babekhona eMihlanganweni Yesigodi ‘Yolimi Oluhlanzekile’ eNingizimu Afrika nasemazweni angomakhelwane. Siye sazuza ekudleni okungokomoya okuyinala okwakulungiselelwe emhlanganweni wethu omuhle wesifunda nasezimisweni zomhlangano okhethekile wosuku olulodwa. Siye sathola nezinye izibusiso eziningi.
2 Singakubonisa kanjani ukwazisa kwethu ngakho konke uJehova asenzela khona? Lokhu singakwenza ngokudumisa igama likaNkulunkulu ngokugcwele!—IHu. 145:21.
QHUBEKA UDUMISA IGAMA LIKANKULUNKULU
3 Singalidumisa kanjani ngokugcwele igama likaJehova phakathi noAugust? Sizoqhubeka siqokomisa izincwajana ezingangomagazini. Ngokulungiselela ngenkuthalo nangokuphatha izinhlobonhlobo zalezincwajana lapho siya enkonzweni yasensimini, siyokuhlomela ukudumisa uJehova futhi ngokunokwenzeka sisize abanye ukuba bafunde ukuthi nabo bangamdumisa kanjani.
4 ISihloko Sengxoxo sithi “Umhlaba Omusha—Uyolethwa Ubani?” Singalungiselela izingeniso ezifanelekayo ezisekelwe ekwazisweni okusemakhasini 9-15 encwadi ethi Ukubonisana. Abanye abaninikhaya bayoxoxa nawe kalula ngalokho abaholi bezwe abakushoyo ngamathemba akhona okwenza umhlaba ube ngcono. Nakuba abantu abaningi belangazela izimo ezinokuthula, uJeremiya 10:23 ubonisa ukuthi umuntu akanakuzixazululela izinkinga zakhe. Kusenza siqiniseke ukwazi ukuthi isithembiso sikaNkulunkulu sokwenza okuthile okungcono ngezimo zezwe namuhla siyogcwaliseka nakanjani. Lesithembiso sitholakala kweyesi-2 Petru 3:13. Hambisa incwajana efanelekile.
LUNGISELELA KAHLE
5 Kubalulekile ukulungiselela ukuze siphumelele ekufundiseni abanye. Kungani ungalungiseleli namanye amalungu omkhaya, nalowo owakufundisa iqiniso, noma nothile oseqenjini okulo lesifundo sencwadi? Ngokuprakthiza intshumayelo yakho, uyozizwa uzethemba ngokwengeziwe futhi ubonise ukuqiniseka kwakho siqu lapho ukhuluma nabantu ensimini.
6 Izintshumayelo zethu kufanele zibonise isithakazelo sethu kubantu. Gcizelela isithembiso seBhayibheli somhlaba omusha ukuze ubanikeze ithemba abantu abacindezelekile nabadumele. Lapho umninikhaya eyamukela incwajana, ungase umbonise indlela esisiqhuba ngayo isifundo seBhayibheli. Noma ungase unqume ukuthi kuyofaneleka ngokwengeziwe ukwenza lokho lapho sewenza impindelo.
7 Njengoba sesifinyelela ekupheleni kwalonyaka wenkonzo obalulekile, yeka injabulo okuyiyo ukwamukela izibusiso eziningi kangaka ezivela kuJehova! Uma ummemezeli ngamunye engaba nengxenye yasikhathi sonke enkonzweni isonto ngalinye futhi abike inkonzo yakhe ngesikhathi ekupheleni kuka-August, sinesizathu esigcwele sokukholelwa ukuthi siyophetha lonyaka wenkonzo ngelinye inani eliphakeme labamemezeli! Kwangathi sonke singasebenzisa lenyanga esasele kulonyaka wenkonzo ka-1991 ukuze sidumise igama likaJehova ngokugcwele njengoba sibheke phambili ngokulangazela ekukhonzeni uJehova phakade ezweni lakhe elisha.