Isambulo—Isihluthulelo Senjabulo Yeqiniso
1 Amazwi omphostoli uJohane kusAmbulo 1:3 ayizindaba ezinhle kithi ngoba asitshela ukuthi singayithola kanjani injabulo. Wabhala: “Uyajabula lowo ofunda ngokuzwakalayo nalabo abezwa amazwi alesisiprofetho, futhi abagcina izinto ezilotshwe kuso.” Incwadi ethi IsAmbulo—Umvuthwandaba Waso Omkhulu Useduze! iye yasiza abaningi ukuba bathole injabulo enkulu. Sinesizathu esihle sokuyinikeza abanye.
2 Ungase ukwazi ukuqala ingxoxo ngalombuzo:
◼“Ucabanga ukuthi incwadi yeBhayibheli yesAmbulo yayenzelwe ukuba iqondakale, noma ingabe kwakufanele ihlale iyimfihlakalo? [Lindela impendulo.] Abaningi banombono ofana nowakho. Phawula lokho iBhayibheli elikushoyo kusAmbulo 1:3. [Funda.] Ngakho isAmbulo singaqondakala, futhi ulwazi esiluqukethe lungasilethela injabulo. Kungenzeka kanjani lokhu?” Bukeza amaphuzu asesigabeni 2 esisekhasini 6, bese uthi: “Lencwadi inengxoxo echaza ivesi nevesi lencwadi yesAmbulo. Ngeke kube ukuchitha isikhathi sakho ukuyifunda. Ngingakujabulela ukukushiyela lencwadi ngomnikelo ka-R10,50.”
3 Njengoba abaningi bekhathalela ukuthola izidingo zezinto ezibonakalayo, lokhu kungase kwakhe isithakazelo:
◼“Ucabanga ukuthi isiphi isidingo sethu esikhulu? [Lindela impendulo.] Baningi abaqinisekayo ukuthi sidinga izinto ezibonakalayo eziningi.” Vula ikhasi 73 bese ubukeza amaphuzu ayinhloko asebhokisini elinesihloko esithi “Izinto Ezibonakalayo Ziqhathaniswa Nenhlakanipho.” Qhubeka uthi: “Lokhu kubonisa ukuthi izinto ezibonakalayo zigcizelelwa ngokweqile; kufanele sikhathalele kakhulu izidingo zethu ezingokomoya. Esikudingayo ngempela ulwazi lweqiniso. Kodwa ulwazi olumayelana nani?” Funda uJohane 17:3, bese uchaza indlela ulwazi ngoNkulunkulu olungaholela ngayo ekuphileni okumi phakade. Sikisela ukushiya incwadi bese ubuya uzombonisa indlela eyembula ngayo ukwaziswa okumangalisayo okuphathelene nenjongo kaNkulunkulu yokwanelisa zonke izidingo zesintu.
4 Njengoba abaningi bekhathazekile ngokuhlupheka okusemhlabeni, ungase uzame lokhu:
◼“Wonke umuntu engixoxa naye ukhathazekile ngesikhathi esizayo. Abanye abaholi bezwe banomuzwa wokuthi sisonqenqemeni lwenkathi entsha yokuthula. Uzizwa kanjani ngalokho? [Lindela impendulo.] Naphezu kwayo yonke imizamo yomuntu, ubudlova nokuhlupheka kuyaqhubeka kwanda emhlabeni wonke. IBhayibheli lembula okuwukuphela kwekhambi elihlala njalo lalezi zinkinga. [Funda eyesi-2 Petru 3:13. Vula umfanekiso osekhasini 302, bese uchaza indlela uMbuso kaNkulunkulu wasezulwini oyoletha ngayo ukuthula nokulondeka okuhlala njalo kulomhlaba.] Lencwadi izokusiza ukuba ubone indlela ongaba ngayo ingxenye yalomphakathi omusha wabantu abayojabulela ukuphila okuphakade ngaphansi kokubusa koMbuso kaNkulunkulu.”
5 Uma uthola othile omatasa futhi kufanele ufushanise, ungase usho lokhu:
◼“Njengoba unesikhathi esincane, ngingathanda ukukushiyela leli pheshana [noma umagazini onalesi sihloko] elinesihloko esithi [khetha ipheshana noma isihloko esifanelekile]. Ngiyakukhuthaza ukuba ulifunde. Esikhathini esizayo lapho ngidlula, ngingathanda ukwazi ukuthi uzizwa kanjani ngalo.”
6 Lapho uhambisa incwadi, unganqikazi ukusho umnikelo osikiselwe. Izincwadi zethu azibizi kakhulu uma ziqhathaniswa nalezo ezitholakala kwezentengiselwano. Lapho abantu beyikhokhela incwadi yabo kunezela enjabulweni abazoba nayo ngokubona incazelo yeziprofetho ezimangalisayo zesAmbulo.—IzAga 3:13.