Shumayela Izindaba Ezinhle Kuyo Yonke Indawo
1 AmaKristu akuqala ayeshumayela izindaba ezinhle kuyo yonke indawo. Ayeshiseka kangangokuba eminyakeni engu-30 uJesu Kristu evusiwe, isigijimi soMbuso ‘sase sishunyayelwe kuyo yonke indalo engaphansi kwezulu.’—Kol. 1:23.
2 Izinceku zikaJehova zanamuhla ezishisekayo zinomgomo ofanayo—ukufinyelela bonke abantu ezingase zikwazi ukubafinyelela ngezindaba ezinhle zoMbuso. Yini engasisiza ukuba siwufinyelele lomgomo? Ezingxenyeni eziningi zensimu yethu, ikakhulukazi emaphandleni, sisabathola abantu emakhaya lapho sihamba indlu ngendlu. Nakuba lokhu okushiwo kulesi senezelo kungayithathi indawo yenkonzo yendlu ngendlu, abantu abengeziwe sebesebenza isikhathi esigcwele futhi ngokuvamile basuke bengekho emakhaya lapho sibahambele. Uma bengasebenzi, bathatha uhambo, baye ezitolo, noma benze uhlobo oluthile lokuzilibazisa. Bafinyelelwa kanjani ngesigijimi soMbuso labo abafanelekayo phakathi kwabo?—Math. 10:11.
3 Abanye batholakala emsebenzini. Ngisho namadolobha amancane anayo indawo yamabhizinisi lapho abantu abaningi bechitha khona ingxenye enkulu yosuku. Emadolobheni amakhulu, abantu abasebenza ezindaweni zezimboni noma ezakhiweni eziphakeme zamahhovisi nalabo abasezakhiweni okungangeneki kalula kuzo bayabuthola ubufakazi—abaningi ngokokuqala ngqá. Ngezimpelasonto, abanye okuye kwaxoxwa nabo lapho bephumule emapaki, ezindaweni zokuzilibazisa, zokumisa amatende, emakotishi noma lapho belinde ezindaweni zokupaka izimoto noma ezindaweni ezinoxhaxha lwezitolo baye batholakala bethambekele ezindabeni ezinhle.
4 Inani elandayo labamemezeli lenza umzamo okhethekile wokufakaza ezindaweni zomphakathi, noma kuphi lapho abantu bengatholakala khona. Ekuqaleni, laboFakazi babezizwa bemanqikanqika futhi besaba ngenxa yokujwayela ukushumayela ezimweni ezihleleke kakhudlwana, njengasendlini ngendlu. Bazizwa kanjani manje?
5 “Kuye kwayithuthukisa inkonzo yami!” kusho umzalwane onokuhlangenwe nakho. Omunye uyanezela: “Kungigcina ngigxile entweni eyodwa.” Iphayona eselikhulile liyaphawula: “Bekulokhu kuvuselela ingqondo, umzimba, nengokomoya, . . . futhi ngisathuthuka.” Omunye ummemezeli uphawula ukuthi manje ufinyelela abantu abaningi abangakaze baxoxe noFakazi BakaJehova. Nentsha inesasasa lalomsebenzi ojabulisayo. Omunye osemusha uthi: “Kumnandi ngoba ukwazi ukuxoxa nabantu abaningi.” Omunye uthi: “Sengihambisa izincwadi eziningi kunanini ngaphambili!” Konke lokhu kwenzeka ensimini esetshenzwa ngokuphindaphindiwe.
6 Ababonisi Abajikelezayo Bayahola: Iqaphela ukuthi “isimo salelizwe siyashintsha,” iNhlangano muva nje isikisele ukuba ababonisi abajikelezayo bashintshe isimiso sabo senkonzo yasensimini samasonto onke ukuze kufinyelelwe abantu abaningi ngangokunokwenzeka ngezindaba ezinhle. (1 Kor. 7:31) Iminyaka eminingi, ababonisi abajikelezayo babebekela eceleni izikhathi zasekuseni phakathi nesonto ukuze bahlanganyele emsebenzini wendlu ngendlu, kuyilapho izikhathi zantambama bezibekela izimpindelo nokuqhuba izifundo zeBhayibheli zasekhaya. Kwezinye izindawo, leso simiso sisengasebenza. Kwezinye, kuncane okungase kufezwe ngokusebenza indlu ngendlu ngezikhathi zasekuseni zaphakathi nesonto. Ezimweni ezinjalo, umbonisi ojikelezayo angase anqume ukuthi ekuseni kungaba kuhle ukusebenza ezitolo noma ukufakaza emgwaqweni. Noma angase ahlele ukuba amaqembu amancane afakaze ezakhiweni eziphakeme zamahhovisi, ezitolo, emapaki, noma kwezinye izindawo zomphakathi. Kuyotholakala abantu abaningi uma abamemezeli besisebenzisa ngokunenzuzo isikhathi abanaso enkonzweni yasensimini.
7 Imibiko ibonisa ukuthi lolu shintsho luye lwamukelwa kahle kakhulu ababonisi abajikelezayo kanye nabamemezeli. Izindikimba eziningi zabadala ziye zacela umbonisi ojikelezayo ukuba aqeqeshe abamemezeli abambalwa ezicini zomsebenzi ezidinga ukunakekelwa ebandleni. Kuye kwabasiza labamemezeli ukuhamba nombonisi ojikelezayo njengoba enza esinye salezi zici zenkonzo. Nabo baye bakwazi ukuqeqesha abanye abamemezeli. (2 Thim. 2:2) Ngenxa yalokho, manje kufinyelelwa abantu abaningi ngezindaba ezinhle.
8 Yiqiniso, akudingeki ukuba ulinde umbonisi wesifunda ngaphambi kokuba uzame ezinye zalezi zindlela zokushumayela. Nakhu ukusikisela okuhlukahlukene ongase ukuthole kuwusizo ensimini yenu:
9 Ukufakaza Emgwaqweni: ‘Baphi abantu?’ ngezinye izikhathi sizibuza lombuzo phakathi nesonto ekuseni lapho sihambele izindawo okukhala ibhungane kuzo. Abanye bangatholakala benza imisetshenzana ethile noma beyothenga. Ingabe wake wazama ukubafinyelela ngokufakaza emgwaqweni? Lapho senziwa kahle, lesi sici senkonzo singaba nezithelo ngempela. Kunokuma ndawonye nomagazini, kungcono kakhulu ukuya kubantu futhi uqale ingxoxo yobungane. Asikho isidingo sokunikeza ubufakazi kuwo wonke umuntu odlulayo. Khuluma nalabo abangajahile, njengalabo ababuka izinto emafasiteleni, abahleli ezimotweni ezipakile, noma abantu abalinde izinto zokuhamba zomphakathi. Ungase uqale ngokubingelela ngomusa bese ulindela impendulo. Uma umuntu efuna ukuxoxa, mbuze ukuthi uzizwa kanjani ngesihloko onomuzwa wokuthi singamthakazelisa.
10 Umbonisi ojikelezayo othile wamema abamemezeli abayisithupha ukuba bahambe naye nomkakhe bayofakaza emgwaqweni. Waba yini umphumela? Uyabika, “Saba nesikhathi esihle kakhulu! Sabathola abantu. Sahambisa omagazini abangu-80 namapheshana amaningi. Saba nezingxoxo ezithakazelisayo nabantu abaningi. Omunye wabamemezeli, owayeqala ukuhlanganyela emsebenzini wasemgwaqweni, wathi: ‘Sengineminyaka eminingi ngiseqinisweni futhi bengingaqapheli ukuthi yini engiphuthelayo!’ Ngasekupheleni kwesonto, base benciphile omagazini bebandla ababenqwabelene.”
11 Lapho ekhonza ibandla elilandelayo, yena lowo mbonisi ojikelezayo wezwa ukuthi abamemezeli abaningana babehlanganyele ekufakazeni emgwaqweni ngolunye usuku ekuseni kodwa impumelelo yabo yaba ncane kakhulu. Omunye udade wayexoxe nabantu ababili vó kuso sonke isikhathi asichitha efakaza, ngoba bonke abantu ayehlangana nabo babephuthuma emsebenzini. Umbonisi ojikelezayo wasikisela ukuba emini yasekuseni bonke baphindele emgwaqweni ofanayo. Baphindela, futhi bahlala kwaze kwaba semini. Udade owayexoxe nje nabantu ababili ekuseni wenza kangcono kakhulu lapho ephindela. Wahambisa omagazini abangu-31 nezincwajana ezingangomagazini ezingu-15, wathola amagama namakheli abantu abangu-7, futhi waqala izifundo zeBhayibheli zasekhaya ezimbili! Nabanye eqenjini bathola imiphumela efanayo ekhuthazayo.
12 Uma uthola othile obonisa isithakazelo, zama ukuthola igama lalowo muntu, ikheli, nenombolo yocingo. Kunokuba ucele lokho kwaziswa ngokushesha, ungase uthi: “Ngikujabulele ukuxoxa nawe. Singakwazi yini ukuyiqhuba ngesinye isikhathi lengxoxo?” Noma ubuze ukuthi: “Ikhona yini indlela engingaxhumana ngayo nawe ekhaya?” Abaningi okuxoxwa nabo ngalendlela bayavuma ukuba kuphindelwe kubo. Qikelela ukuthi unezimemo ezanele ozozisebenzisela ukumema labo abangase bathande ukuza emihlanganweni yethu.
13 Lapho ukhuluma nomuntu othakazelayo ohlala ensimini eyabelwe elinye ibandla, ukwaziswa kufanele ukudlulisele kulo ukuze abazalwane lapho basilandelele isithakazelo. Ingabe ukufakaza emgwaqweni kungaba indlela ephumelelayo yokusakaza izindaba ezinhle endaweni yakini? Uma kunjalo, bukeza isihloko esithi “Ukuthola Abathakazelayo Ngokufakaza Emgwaqweni Okuphumelelayo” esikuyi-Nkonzo Yethu YoMbuso ka-July 1994. Khona-ke hlela ukuhlanganyela ekufakazeni emgwaqweni ngesikhathi esifanele sosuku esiyokwenza ukuba ufinyelele abantu abaningi ngangokunokwenzeka.
14 Ukufakaza Ezintweni Zokuthutha Umphakathi: Ngolunye usuku ekuseni idlanzana lamaphayona lanquma ukufakaza kubantu ababelinde ibhasi eduze nekolishi lendawo. Nakuba babeba nezingxoxo ezinhle, kwakunenkinga. Lapho nje ingxoxo isishisa, lalivele lifike ibhasi, linqamule ingxoxo. Amaphayona axazulula lenkinga ngokugibela ibhasi abese eqhubeka nokufakaza kubagibeli njengoba linqamula idolobha. Lapho ibhasi lifika endaweni elalibabele kuyo, amaphayona ayebuya nalo, aqhubeke efakaza njengoba libuya. Ngemva kokuhamba kaningana ehla enyuka ngebhasi, ahlanganisa ingqikithi yalokho ayekufezile: Ayehambise omagazini abangaphezu kuka-200 futhi aqala izifundo zeBhayibheli eziyisithupha. Abanye abagibeli ngokuzithandela babewanikeza amakheli abo nezinombolo zocingo ukuze bahanjelwe emakhaya. Ngesonto elilandelayo, amaphayona aphindela esitobhini sebhasi futhi asebenzisa indlela efanayo neyasekuqaleni. Ahambisa omagazini abangu-164 aqala esinye isifundo seBhayibheli. Kwesinye isitobhi kwagibela othile futhi wahlala esihlalweni esase sisele—eduze kwephayona. Wabuka umzalwane ngokumoyizela wayesethi: “Ngiyazi, ungiphathele INqabayokulinda.”
15 Abamemezeli abaningi banikeza ubufakazi obuphumelelayo lapho behamba ngebhasi, isitimela, noma indiza. Ungayiqala kanjani ingxoxo nomgibeli ohleli eduze kwakho? Ummemezeli othile oneminyaka engu-12 waqala ukufunda umagazini i-Phaphama! ebhasini, enethemba lokuvusa isithakazelo sentombazane esanda kweva eshumini nambili eyayihleli eduze kwakhe. Kwasebenza. Lentombazane yambuza ukuthi ufundani, lona omusha waphendula ngokuthi ufunda ngekhambi lezinkinga intsha ebhekana nazo. Wanezela ngokuthi wayezuze kakhulu kulesi sihloko nanokuthi naye singamsiza. Yabamukela ngenjabulo omagazini. Ingxoxo yabo yezwiwa abanye ababili abasha nabo abacela amakhophi omagazini. Ngenxa yalokhu, umshayeli webhasi walimisa eceleni komgwaqo wabe esebuza ukuthi kungani benesithakazelo esingaka kulabomagazini. Lapho esizwa isizathu, naye wabamukela omagazini. Yiqiniso, akukho nokukodwa kwalokhu okwakuyokwenzeka ukube lommemezeli omusha wayengenabo omagazini abanele bokubanikeza wonke umuntu obonisa isithakazelo!
16 Ukufakaza Emapaki Nasezindaweni Zokupaka Izimoto: Ukufakaza emapaki nasezindaweni zokupaka izimoto kuyindlela enhle kakhulu yokufinyelela abantu. Wake wazama ukufakaza endaweni yokupaka izimoto esezitolo? Njalo qala ngokufunda isimo. Funa umuntu ongajahile noma olinde emotweni epakile bese uzama ukuqala ingxoxo yobungane. Uma ingxoxo iqhubeka, faka isigijimi soMbuso. Zama ukusebenza wedwa kodwa kube nomunye ummemezeli oseduze. Gwema ukuphatha isikhwama esikhulu, esiqumbile noma ukudonsela ukunakekela emsebenzini wakho nganoma iziphi ezinye izindlela. Hlakanipha. Kungaba ngcono ukuma isikhathi esifushane endaweni eyodwa yokupaka izimoto bese ugudlukela kwenye. Uma othile engafuni ukuxoxa nawe, hamba ngokuthula bese ufuna omunye ongaxoxa naye. Esebenzisa lezi zindlela, omunye umzalwane wahambisa omagazini abangu-90 ngenyanga eyodwa ngokushumayela endaweni yokupaka izimoto.
17 Abanye abantu baya epaki ukuze bayophumula; abanye bayela ukuyodlala noma ukuyochitha isikhathi benabantwana babo. Ngaphandle kokuphazamisa ngokungadingekile, gada ithuba lokunikeza ubufakazi. Umzalwane othile waqala ingxoxo nomuntu onakekela igceke lasepaki futhi wathola ukuthi wayekhathazekile ngezidakamizwa nangekusasa lezingane zakhe. Kwaqalwa isifundo seBhayibheli futhi njalo sasiqhutshelwa epaki.
18 Ukufakaza Ngokwethukela Endaweni Enoxhaxha Lwezitolo: Nakuba kungelula ngaso sonke isikhathi ukushumayela ngendlela ehleliwe endaweni enoxhaxha lwezitolo ngenxa yemithetho yendawo evimbela imisebenzi enjalo, abanye abamemezeli bakha amathuba okufakaza lapho ngokwethukela. Bavele bahlale ebhentshini bese beqala ingxoxo yobungane nabanye abahlalayo ukuze baphumule. Uma bebonisa isithakazelo, ngokuhlakanipha babanikeza ipheshana noma umagazini bese bezama ukwenza amalungiselelo okwenza impindelo. Ngemva kokuchitha imizuzu embalwa befakaza engxenyeni ethile yoxhaxha lwezitolo, badlulela kwenye bese behilela omunye engxoxweni. Yiqiniso, kufanele kuqashelisiswe ukuze kungadonswa amehlo abantu ngokungadingekile lapho nifakaza ngokwethukela ngalendlela.
19 Lapho ubingelela umuntu, qala ingxoxo ngobungane. Uma lowo okhuluma naye ephendula, mbuze umbuzo, bese umlalelisisa lapho ephendula. Yiba nesithakazelo somuntu siqu kulokho akushoyo. Mbonise ukuthi uyawazisa umbono wakhe. Uma kunokwenzeka, vumelana naye.
20 Udade othile waba nengxoxo enhle nesalukazi esithile ngokumane nje aphawule indlela izindleko zokuphila eseziphakeme ngayo. Lona wesifazane wavumela phezulu, yabe isiqalile njalo ingxoxo enhle. Lodade wakwazi ukuthola igama nekheli lalona wesifazane, waphindela kuye ngalo lelo sonto.
21 Ukusebenza Izitolo: Amanye amabandla anezindawo zamabhizinisi azisebenza njalo njengengxenye yensimu yawo ayabelwe. Umzalwane onakekela insimu angase alungiselele amakhadi akhethekile anamabalazwe alezi zingxenye ezinamabhizinisi amaningi. Noma imaphi amakhadi ensimu yemizi yabantu ehlangene nezingxenye zamabhizinisi, kufanele abonise ukuthi amabhizinisi kufanele asetshenzwe wodwa. Kwamanye amasimu, izindawo zamabhizinisi zingase zisetshenzwe nemizi yabantu. Abadala bangacela abamemezeli abafanelekayo ukuba njalo ngezikhathi ezithile basebenze amasimu amabhizinisi ukuze umsebenzi wokusebenza izitolo ungadebeselelwa.
22 Uma ucelwa ukuba uhlanganyele kulomsebenzi futhi ungakaze uwenze ngaphambili, indlela enhle ‘yokuqunga isibindi’ iwukuqale usebenze izitolo ezincane ezimbalwa; bese, uma usuzizwa unesibinjana, usebenze ezinkudlwana. (1 Thes. 2:2) Lapho usebenza izitolo, gqoka ngendlela obungagqoka ngayo lapho uya emhlanganweni eHholo LoMbuso. Uma kungenzeka, ngena esitolo lapho engekho amakhasimende alinde ukudayiselwa. Cela ukukhuluma nomphathi noma othile ophathisiwe. Yiba nemfudumalo, futhi ngaphezu kwakho konke, ufushanise. Asikho isizathu sokuxolisa sengathi wonile. Osomabhizinisi abaningi bathambekele ekubekeni izifiso zamakhasimende kuqala futhi bahlala bekulindele ukuphazanyiswa.
23 Ngemva kokubingelela umninisitolo, ungase uthi: “Abantu bamabhizinisi bahlala bematasa kangangokuba kuyethukela sibathole emakhaya, ngakho sikuvakashele lapha ebhizinisini lakho ukuze sikushiyele isihloko esithakazelisayo ongasifunda.” Yibe usuphawula iphuzu elilodwa noma amabili ngomagazini wamuva.
24 Noma ungase uzame lena lapho uxoxa nomphathi: “Siye saqaphela ukuthi abantu bamabhizinisi bayaqikelela ukuba bahlale benolwazi ngezinto. Umagazini wamuva INqabayokulinda (noma i-Phaphama! ) unesihloko esisithintayo sonke ngabanye.” Chaza ukuthi sithini, bese uphetha ngokuthi: “Siyaqiniseka ukuthi uzokujabulela ukuwufunda.”
25 Uma kunezisebenzi, futhi kubonakala kufaneleka, ungase unezele: “Bengicela ukunikeza izisebenzi zakho isigijimi esifanayo esifushane.” Uma evuma, khumbula ukuthi uthembise ukuthi uzofushanisa, futhi umphathi uzolindela ukuba ugcine izwi lakho. Uma noma iziphi izisebenzi zifisa ukuba nixoxe kabanzi, kungaba ngcono ukuzihambela emizini yazo.
26 Muva nje abamemezeli abambalwa edolobheni elithile elincane bahlanganyela nombonisi wesifunda emsebenzini wezitolo. Abanye abamemezeli babemadolo nzima ekuqaleni, ngoba babengakaze bawenze lomsebenzi ngaphambili; kodwa ngokushesha bakhululeka futhi baqala ukuwujabulela. Esikhathini esingaphansi kwehora, bakhuluma nabantu abangu-37 futhi bahambisa omagazini abangu-24 nezincwajana ezingangomagazini ezine. Omunye umzalwane waphawula ukuthi ngokuvamile lapho benza umsebenzi wendlu ngendlu inyanga yonke abakwazi ukuxoxa nabantu abaningi ngangalabo abaxoxa nabo lapho besebenza izitolo ngaleso sikhathi esifushane.
27 Ukwakha Amathuba Okushumayela: UJesu wayengashumayeli nje ngendlela ehleliwe kuphela. Wayesakaza izindaba ezinhle ngazo zonke izikhathi ezifanelekayo. (Math. 9:9; Luka 19:1-10; Joh. 4:6-15) Phawula indlela abanye abamemezeli abawakha ngayo amathuba okushumayela.
28 Abanye bakwenza umkhuba ukufakaza kubazali abalinde izingane zabo ngasesangweni lesikole. Njengoba abazali abaningi befika kusasele imizuzu engu-20, sikhona isikhathi sokubahilela engxoxweni ethakazelisayo yesihloko esingokomBhalo.
29 Amaphayona amaningi ayakuqikelela ukufinyelela abantu okungenzeka banesithakazelo esikhethekile esihlokweni esithile okukhulunywa ngaso komagazini bethu. Ngokwesibonelo, udade othile wathola ukusabela okuhle lapho ehambela izikole eziyisithupha ezisensimini yebandla lakubo ephethe umagazini i-Phaphama! ka-December 22, 1995, owawunochungechunge lwezihloko ezithi “Izikole Zisenkingeni.” Wahambela nochwepheshe bezokwelulekwa kwemikhaya ephethe omagazini abakhuluma ngokuphila komkhaya nokuhlukunyezwa kwezingane futhi wamenywa ukuba eze njalo nomagazini abalandelayo abakhuluma ngezihloko ezifanayo. Ukusabela akuthola lapho ehambele ihhovisi lokusiza abantu abangasebenzi ephethe i-Phaphama!ka-March 8, 1996 eyayikhuluma ngokungasebenzi wathi “kwakumangalisa.”
30 Umbonisi wesigodi ubika ukuthi yena nomkakhe njalo banikeza ubufakazi ngokwethukela lapho bethenga ezitolo. Baya kothenga ngesikhathi okungaminyene ngaso ezitolo, futhi amakhasimende asuke ezihambela nje esitolo engajahile. Babika ukuthi baba nezingxoxo eziningi ezinhle.
31 Abamemezeli abaningi babika ukuthi bathola imiphumela emihle lapho befakaza kubantu abasemalondolo omphakathi. Abamane nje bashiye omagazini lapho kungekho muntu. Umgomo wabo uwukufinyelela abantu ngezindaba ezinhle, ngakho bazama ukukhuluma ngokuqondile nalabo abasebenzisa lezo zindawo.
32 Kwezinye izindawo, abamemezeli abathile bagunyaziwe ukufakaza ezikhumulweni zezindiza. Ngezinye izikhathi baye bajabulela ukufakaza kubantu abaya kwamanye amazwe abahlala emazweni okunabantu bakaJehova abambalwa kuwo. Uma bebonisa isithakazelo, baye babanikeza ipheshana noma omagazini.
33 Uma bengavunyelwe ukufakaza kubantu abahlala ezakhiweni okungelula ukungena kuzo ezisensimini yebandla, abanye baye bakwenza umkhuba ukufakaza ngokuhlakanipha konogada abasuke besebenza noma abaphathi abasemahhovisi okukhokha intela. Kusetshenziswa indlela efanayo ezindaweni okungangeni uwonk’uwonke kuzo, nezihlala zivaliwe. Umbonisi wesifunda kanye nabamemezeli abambalwa bahambela izakhiwo ezingu-7 ngalendlela. Esakhiweni ngasinye, babetshela umphathi ukuthi nakuba bengavunyelwe ukungena ezakhiweni ngendlela esivame ukwenza ngayo, babengafuni ukuba aphuthelwe ukwaziswa okukomagazini bamuva. Abaphathi kuzo zonke izakhiwo eziyisikhombisa babamukela ngenjabulo omagazini base becela ukuba balethelwe nabalandelayo! Izakhamuzi zalezo zakhiwo zabe sezithintwa ngocingo.
34 Zikhandle Ukuze Ushumayele Kuyo Yonke Indawo: Ukuphila ngokuvumelana nokuzinikezela kwethu kuhlanganisa ukuba nomuzwa wokuphuthuma ngesabelo sethu sokushumayela isigijimi soMbuso. Ukuze sifinyelele abantu ngesikhathi esivumelana nabo, kudingeka sibekele eceleni izinto zomuntu siqu ukuze ‘ngazo zonke izindlela sisindise abathile.’ Zonke izinceku zikaJehova ezizinikezele zifuna ukukwazi ukusho, njengoba kwasho umphostoli uPawulu: “Ngenza zonke izinto ngenxa yezindaba ezinhle, ukuze ngibe umhlanganyeli wazo nabanye.”—1 Kor. 9:22, 23.
35 UPawulu waqhubeka ebhala: “Ngakho-ke, ngokuthokoza okukhulu ngingamane ngiziqhayise ngokuqondene nobuthakathaka bami, ukuze amandla kaKristu ahlale phezu kwami njengetende. . . . Ngoba lapho ngibuthakathaka, kulapho-ke nginamandla.” (2 Kor. 12:9, 10) Ngamanye amazwi, akekho kithi ongafeza lomsebenzi ngamandla akhe siqu. Kudingeka sithandaze kuJehova sicele umoya wakhe ongcwele onamandla. Uma sicela amandla kuNkulunkulu, singaqiniseka ukuthi uyoyiphendula imithandazo yethu. Khona-ke uthando lwethu ngabantu luyosishukumisela ukuba sifune amathuba okushumayela izindaba ezinhle kubo, noma kuphi lapho bengatholakala khona. Ngesonto elizayo, kungani ungazami okunye kokusikisela okunikezwe kulesi senezelo?