Даҽа тәылак ахь ииасыз аҭаацәа, шәхәыҷқәа шәрыцхраала

1, 2. а) Иарбан уадаҩрақәоу изықәшәо даҽа тәылак ахь ииасыз рхәыҷқәа аӡәырҩы? б) Иарбан зҵаарақәоу еилҳарго ари астатиаҿы?

«САРА саныхәыҷыз аҩнгьы аизараҿгьы сҭаацәа-аиммигрантцәа рбызшәала сцәажәон,— игәалашәоит Џьошьуа.— Аха ашкол ахь санца, аҭыԥантәи абызшәа еиҳа исзааигәахо иалагеит. Шықәсқәак рышьҭахь сара уи абызшәа мацарала сцәажәон. Аизарақәа рҿы ирҳәоз сзеилкаауамызт, насгьы сҭаацәа ркультура сара сзы итәымхеит». Џьошьуа дзықәшәаз аҩыза егьырҭ ахәыҷқәагьы ақәшәахьеит.

² Иахьа 240 миллионҩык инареиҳаны ауаа атәым тәылаҿы инхоит. Шәара урҭ рахь шәаҵанакуазар, насгьы ахәыҷқәа шәымазар, ишԥашәылшо урҭ Иегова деилыркаарц азы еиӷьу алшара рыҭара, насгьы «аиаша ҵабырг гәык-ԥсык ала» иазыҟоу ракәны иҟаларц шәрыцхраар? (3 Иоанн 4). Иҟарҵар рылшозеи уи аганахь ала егьырҭ?

АҬААЦӘА РҾЫРԤШЫ ШАҞА ИХАДОУ

3, 4. а) Ишԥарылшо аҭаацәа рхәыҷқәа аҿырԥш бзиа рыҭара? б) Иззыԥшымзар акәзеи аҭаацәа рхәыҷқәа рҟынтә?

³ Аҭаацәа, ишәхашәмыршҭлан шәхәыҷқәа ирышәҭо аҿырԥшы шаҟа ихадоу,— уи дара аԥсҭазааратә мҩа алхра ирыцхраауеит. Аҳра аусқәа зегь раԥхьа ишшәыргыло анырбо, дара Иегова рҭахрақәа шынаигӡо агәра ганы, иқәгәыӷшьа рҵоит (Матф. 6:33, 34). Убри аҟынтә мыцхәы шәашьҭамлалан. Амал арҳара аасҭа, Иегова иус анагӡара раԥхьаӡа ишәыргылала. Ауалқәа рыҟаҵара шәҽацәышәыхьчала. Еизыжәгала «ажәҩан аҿы ахазына» — Иегова иразра. «Ауааԥсыра рыбзырӡы» шәашьҭамлан. (Уаԥхьа Марк 10:21, 22; Иоанн 12:43.)

⁴ Шәхәыҷқәа аамҭа рзалхра еснагь шәазхиаз. Дара рхазы, ма шәара шәзы амали хьӡи-ԥшеи иашьҭамлакәа, рыԥсҭазаара Иегова имаҵ аура иазыркырц рыӡбозар, урҭ шәышдыргәырӷьо рашәҳәала. Ари адунеи аҿы аӡәырҩы ргәы иаанагоит аҭаацәа рықәрахь ианнеиуа аԥсҭазаара бзиа роурц азы рхәыҷқәа амал дырҳароуп ҳәа. Шәҽацәышәыхьчала ус еиԥш иҟоу агәаанагара. Ишәхашәмыршҭлан, «ахшара змоу рзы амазара еидызкылаша ахшара ракәым, дара зхылҵыз роуп» (2 Кор. 12:14).

АБЫЗШӘА ИАДҲӘАЛОУ АУАДАҨРАҚӘА ШӘЫРИААИР ШШӘЫЛШО

5. Избан аҭаацәа рхәыҷқәа Иегова иӡбахә лассы-лассы ирзеиҭарҳәалар зрыхәҭоу?

⁵ Абиблиаҿы заа ишҳәаз еиԥш, «ажәларқәа зегьы рҟынтә еиуеиԥшым абызшәақәа рыла ицәажәо» ауаа Анцәа иорганизациахь иаауеит (Зах. 8:23). Аха абызшәа иадҳәалоу ауадаҩрақәа шәхәыҷқәа аҵабырг дырҵара ишәԥырхагахар алшоит. Ишәымаз ма ишәоураны иҟоу абиблиатә ҵарақәа рҟынтә зегь реиҳа ихадоу,— уи шәхәыҷқәа ирзымҩаԥыжәго ауп. Наӡаӡатәи аԥсҭазаара роурц азы, дара ирыхәҭоуп Иегова изку адыррақәа риура (Иоанн 17:3). Шхәыҷқәа абиблиатә ҵабыргқәа рдыруазарц шәҭахызар, алшара шаашәоулак урҭ ирызкны шәрацәажәала. (Уаԥхьа Ҩынтәзакәан 6:6, 7.)

6. Иарбан хәарҭоу ирзаанагар алшо, шәхәыҷқәа шәхатәы бызшәа еилыркаауазар? (Шәахәаԥш астатиа алагамҭаҿы иаагоу асахьа.)

⁶ Аҭыԥантәи абызшәа шәхәыҷқәа ирҵар рылшоит, иаҳҳәап, ашкол аҿы. Аха шәхатәы бызшәа аҵара еиҳа ирзымариахоит, шәара шәхаҭа лассы-лассы уи абызшәала шәрацәажәалар. Усҟан шәхәыҷқәа рхәыцрақәеи рцәаныррақәеи шәзеиҭарҳәалартә алшара роуеит. Уи адагьы, ахәыҷқәа ҩ-бызшәак рдыруазар, уи рыхшыҩи рцәажәаратә лшарақәеи еиӷьнатәуеит. Иара убас раԥхьаҟа рмаҵзура арҭбаара алшара роуеит. «Даҽа бызшәак ала иҟоу аизараҿы амаҵ аура даара ибзиоуп! — лҳәоит Каролина, уи лҭаацәеи лареи даҽа тәылак ахь ииасит.— Даара агәахәара узаанагоит ажәабжьҳәаҩцәа ахьазымхо аҭыԥ аҿы амаҵ аура!»

7. Ишԥашәылшо шәхәыҷқәа рацәажәара, абызшәа иадҳәалоу ауадаҩрақәа шәымазар?

⁷ Зны-зынла даҽа тәылак ахь ииасыз рхәыҷқәа аҭыԥантәи акультура иашьцылоит, абызшәа рҵоит, убри аҟынтә рхатәы бызшәала рҭаацәа рацәажәара рҭаххаӡом. Уи инеиҳангьы, дара уи абызшәа зынӡа ирхашҭуеит. Аҭаацәа, шәара уи аҩыза шәақәшәазар, ишәылшарызма аҭыԥантәи абызшәа маҷк ишәҵар? Усҟан шәара ишәзеилкаалоит шәхәыҷқәа ирҳәо, иарбан гәырҿыхагақәоу дара иргәаԥхо, ашкол аҿы дҵас ирырҭо. Иара убас шәара ишәылшоит урҭ рырҵаҩцәа рацәажәара. Уи зегьы шәхәыҷқәа аҵабырг рылааӡара ишәыцхраауеит. Ҳәарада, абызшәа ҿыц аҵаразы аамҭеи, аҽазышәарақәеи, ахынраалареи аҭахуп. Аха шәазхәыц: шәхәыҷы ддагәахазҭгьы, ишәымҵаӡози абыжьҭыгарадатә бызшәа, уи анаҩсгьы шәиацәажәаларц азы? Даҽа бызшәак ала ацәажәара еиҳа иззымариоу ахәыҷгьы убас изнеилатәупa.

8. Ишԥашәылшо шәхәыҷқәа рацәажәара, урҭ злацәажәо абызшәа уиаҟара ишәзымдыруазар?

⁸ Иазгәаҭатәуп аҭаацәа зегьы ишрылымшо рхәыҷқәа ирҳәо ибзианы еилыркаалартә еиԥш абызшәа ҿыц аҵара. Убри аҟынтә дара рхәыҷқәа Иԥшьоу Аҩыра аҟынтә аҵак ду змоу азхәыцрақәа деилыркаара рцәыцәгьоуп (2 Тим. 3:15). Шәҭагылазаашьаҿгьы ус иҟазар, шәара уеизгьы шәхәыҷқәа Иегова идырреи бзиа ибареи шәрыцхраар шәылшоит. Абар Шан зыхьӡу аизара аиҳабы ииҳәо: «Ҳан еиҳа еиӷьны еилаҳкаауаз абызшәа уиаҟара илыздыруамызт, саҳәшьцәеи сареи лара лхатәы бызшәа цқьа иаҳзеилкаауамызт». Иара иҳәоит: «Аха лара лыҽшазыҟалҵоз, Анцәа дышиҳәоз, насгьы аҭаацәаратә мҵахырхәара амҩаԥгаразы илылшоз зегь шыҟалҵоз анаҳба, ҳара еилаҳкааит Иегова изкны адыррақәа риура шаҟа ихадаз».

9. Иҟарҵар рылшозеи аҭаацәа, рхәыҷқәа Абиблиа ҩ-бызшәак рыла дырҵара шаҭаху рбозар?

⁹ Ахәыҷқәа шьоукы Иегова изку аҵабырг ҩ-бызшәак рыла дырҵара еиҳа еиӷьуп — аҭыԥантәи абызшәеи рҭаацәа рбызшәеи рыла. Уи азы аҭаацәа шьоукы арҵараҿы рхы иадырхәоит икьыԥхьу апубликациақәеи, аудионҵамҭақәеи, афильмқәеи рыҩбызшәак рыла. Ишаҳбо еиԥш, даҽа тәылак ахь ииасыз аҭаацәа рхәыҷқәа Иегова иахь абзиабара рыларааӡарц азы еиҳаны раамҭеи рымчи азырклароуп.

ИАРБАН ЕИЗАРОУ ИАЛХТӘУ?

10. а) Издыда аҭаацәараҿы аҭакԥхықәра иарбан еизароу иалхтәу аганахь ала? б) Иҟаиҵар ихәҭоузеи аҭаацәара ахада аӡбара идикылаанӡа?

¹⁰ Даҽа тәылак ахь ииасыз дара рбызшәала ицәажәо Иегова ишаҳаҭцәа рзааигәара инымхозар, аҭыԥантәи абызшәала иҟоу аизарақәа ирҭаалар ауп (Аԥсал. 145:9, [146:9, АдҾ]). Аха рааигәара дара рбызшәала аизарақәа мҩаԥысуазар, аҭаацәара ахада иӡбар ауп иарбан еизароу иҭаацәара рзы еиҳа еиӷьхо. Аӡбара идикылаанӡа, иара ибзианы дазхәыцроуп, насгьы Анцәа диҳәар ауп. Иара убас иԥҳәыси ихәыҷқәеи ргәаанагарагьы еиликаар ихәҭоуп (1 Кор. 11:3). Дзызхәыцыр акәзеи иара? Иарбан библиатә принципқәоу ииашоу аӡбара адкылара ицхраауа? Еилҳаргап ҿырԥштәқәак.

11, 12. а) Илшома ахәыҷы аизараҿы иаҳауа ахәарҭа изаанагар, абызшәа ибзианы изымдыруазар? Иҳаилшәыркаа. б) Избан ахәыҷқәа шьоукы рҭаацәа рбызшәа аҵара зырҭахым?

¹¹ Аҭаацәа азхәыцлар ауп рхәыҷқәа ирҭахыҵәҟьоу. Ахәыҷы абиблиатә ҵабырг ибзианы еиликааларц азы аизараҿы мчыбжьык ахь сааҭқәак ирылагӡаны иоуа абиблиатә рҵара мацара изхом, уи зламҩаԥысуа иарбан бызшәазаалакгьы. Аха шәазхәыц: ахәыҷы ибзианы иидыруа абызшәала апрограмма даназыӡырҩуа, баша дахьтәоу мацарагьы иаҳауа аинформациа ахәарҭа изаанагоит, зны-зынла иҭаацәа ахәыҷы зегьыҵәҟьа изеилкаауам ҳәа ргәы иаанагозаргьы. Аха ахәыҷы абызшәа ибзианы изеилымкаауазар, зынӡа даҽакуп. (Уаԥхьа 1 Коринфаа рахь 14:9, 11.) Иара убас ахәыҷы ихатәы бызшәа дызлахәыцуа, насгьы игәаҵанӡа инеиуа бызшәаны иҟамлар алшоит. Ахәыҷқәа шьоукы рҭаацәа рбызшәала аизараҿы аҭакқәеи адҵақәеи рыҟаҵара шрылшогьы, ирҳәо ргәаҵанӡа инеиӡом.

¹² Аха ахәыҷы анырра изҭо абызшәа мацара акәӡам. Уи зажәақәа хыхь иаагаз Џьошьуа ишьақәирӷәӷәар илшоит. Иаҳәшьа Естер илҳәоит: «Ахәыҷқәа рзы рҭаацәа рбызшәеи, ркультуреи, рдинхаҵареи даараӡа еидҳәалоуп». Аҭаацәа ркультура ахәыҷқәа ирзааигәамзар, дара абызшәа адагьы, рҭаацәа рыгәрахаҵарагьы мап ацәыркыр ауеит. Иҟарҵар рылшозеи аҭаацәа?

13, 14. а) Избан даҽа тәылак ахь ииасыз ҭаацәарак аҭыԥантәи абызшәала имҩаԥысуаз аизарахь аиасра зырыӡбаз? б) Ишԥадырӷәӷәоз дара рыгәрахаҵара?

¹³ Иқьырсиану аҭаацәа рзы рхәыҷқәа рдоуҳатә ҭахрақәа рхатә гәаҳәарақәа раасҭа ихадоуп (1 Кор. 10:24). Џьошьуа, насгьы Естер раб Самиуел иҳәоит: «Сыԥҳәыси сареи ҳахәаԥшуан ҳхәыҷқәа доуҳала еизҳаларц иарбан бызшәоу ирыцхраауа, насгьы Анцәа аҟәыӷара ҳаиҭарц ҳиҳәон. Иҳауз аҭак иаҳҭахыз акәмызт, аха ҳбызшәала иҟаз аизара ҳхәыҷқәа уиаҟара ахәарҭа шырзаанамгоз анаҳба, даҽа еизарак ахь аиасра ҳаӡбеит. Ҳара зегьы иааиԥмырҟьаӡакәа аизарақәа ҳарҭаауан, насгьы амаҵзурахьы ҳцон. Иара убас ҳаизара аҟынтә аишьцәеи аиаҳәшьцәеи сасра иааҳаԥхьон акреицаҳфарц, мамзаргьы џьара ҳаиццарц еибаҳҳәон. Уи иабзоураны ҳхәыҷқәа ирылшеит урҭ иааигәаны рабадырра, насгьы Иегова Абык иеиԥш дырдырит, иара убас Ҩызас дырзыҟалеит. Ҳара ҳгәы иаанагоит уи еиҳа ихадан, ҳбызшәа дырҵара аасҭа».

¹⁴ Самиуел иациҵоит: «Доуҳала ҳмыԥсыҽхарц азы, сыԥҳәыси сареи ҳбызшәала иҟаз аизара ҳаҭаауан. Ҳусқәа даара ирацәан аҟынтә, даара ҳааԥсон. Аха Иегова иҭабуп идуӡӡаны ҳәа иаҳҳәоит ҳҽазышәарақәеи иааҳарԥшуаз ахамеигӡареи дахьырзылԥхаз азы. Ҳхәыҷқәа рыхҩыкгьы уажәы раамҭа зегь амаҵзура иазыркуеит».

АХӘЫҶҚӘА ИҞАРҴАР РЫЛШО

15. Избан Кристина зыхьӡу аиаҳәшьа даҽа еизарак ахь аиасра зылыӡбаз?

¹⁵ Ахәыҷқәа аӡәырҩы ианрызҳауа, еиӷьны еилыркаауа абызшәала иҟоу аизарахь аиасра рыӡбоит. Усҟан аҭаацәа ргәы иаанагоит рхәыҷқәа бзиа ирымбозшәа. Кристина зыхьӡу аиаҳәшьа илгәалашәоит: «Сҭаацәа рбызшәа маҷк ишеилыскаауазгьы, аизараҿы ирҳәоз уиаҟара исзеилкаауамызт. 12 шықәса ансхыҵуаз, сара ашкол аҿы сызлацәажәоз абызшәала имҩаԥысуаз аконгресс аҿы сыҟан. Раԥхьаӡакәны сара еилыскааит: исаҳаз — аҵабырг акәын! Иара убас уи абызшәала Иегова иҳәара салагеит. Сара Иегова сгәы иҭаз зегь изеиҭасҳәон» (Аус. 2:11, 41). Кристина ианлызҳа лҭаацәа драцәажәан, даҽа еизарак ахь аиасра лыӡбеит. Лара илҳәоит: «Ашкол аҿы сызлацәажәоз абызшәала Иегова иеилкаара саналага, уи анаҩстәи ашьаҿақәа рыҟаҵара сгәазҭанаҵеит». Иаарласны Кристина пионерс амаҵ аура далагеит.

16. Избан аиаҳәшьа Надиа даҽа еизарак ахь дахьмиасыз дзеигәырӷьо?

¹⁶ Иқәыԥшу ақьырсианцәа, ишәҭахума шәара аҭыԥантәи абызшәала имҩаԥысуа аизарахь аиасра? Ааи акәзар, шәхы шәазҵаа уи зышәҭаху. Ишәыцхраауама уи Иегова изааигәахара? (Иак. 4:8). Мамзаргьы шәҭаацәа рылаԥш шәакәымшәаларц, насгьы уиаҟара аџьабаа шәымбаларц шәҭахуу? «Сашьеи, саҳәшьцәеи, сареи ҳанхбыџқәаз аҭыԥантәи абызшәала имҩаԥысуаз аизарахь аиасра ҳҭаххеит»,— еиҭалҳәоит уажәы Вефиль амаҵ зуа Надиа. Аха лҭаацәа ирдыруан уи ахәыҷқәа доуҳала реизҳара ишаԥырхагахо. Надиа иацылҵоит: «Уажәы ҳара ҳҭаацәа даара иҭабуп ҳәа раҳҳәоит даҽа еизарак ахь ҳмиасырц азы рбызшәа ҳдырҵарц аџьабаа рацәаны иахьырбаз. Уи ҳаԥсҭазаара еиӷьнатәит, насгьы егьырҭ Иегова иабаҳардырырц азы еиҳаны алшарақәа ҳауит».

ЕГЬЫРҬ ИҞАРЦАР РЫЛШО

17. а) Издиҵада Иегова ахәыҷқәа рааӡара? б) Иабарылшо аҭаацәа рхәыҷқәа аҵабырг дырҵаразы ацхыраара аԥшаара?

¹⁷ Иегова аҭаацәа роуп издиҵаз ахәыҷқәа аҵабырг дырҵара, андуцәеи абдуцәеи, ма даҽа шьоукы ракәымкәа. (Уаԥхьа Ажәамаанақәа 1:8; 31:10, 27, 28.) Аха уеизгьы, аҭыԥантәи абызшәа ззымдыруа аҭаацәа рхәыҷқәа аҵабырг ргәаҵанӡа анагаразы ацхыраара рҭаххар алшоит. Аҭаацәа ацхыраара иаҳәозар, уи иаанагаӡом ирыду аҭакԥхықәра егьырҭ ирыдырҵоит ҳәа. Аха ацхыраара анроуа, дара ирылшоит ахәыҷқәа «Иҳақәиҭу игәаҳәаратә реилыркаауа» рааӡара (Еф. 6:4). Иаҳҳәап, аҭаацәа аҭаацәаратә мҵахырхәара шымҩаԥгалатәу ма ахәыҷқәа рзы аҩызцәа бзиақәа шыԥшаалатәу аганахь ала аизара аиҳабацәа рҿы ацхыраара иаҳәар ауеит.

18, 19. а) Ишԥарылшо доуҳала ишәу аишьцәеи аиаҳәшьцәеи иқәыԥшу ирыцхраар? б) Иҟарҵалар рыхәҭоузеи аҭаацәа анаҩсгьы?

¹⁸ Иаҳҳәап, аҭаацәа ирылшоит аҭаацәаратә мҵахырхәарахь зны-зынла егьырҭ аҭаацәара ааԥхьара рыҭара. Уи адагьы, ихбыџу аӡәырҩы доуҳала ишәу ақьырсианцәа ианрыҿцәажәо, адоуҳатә қәҿиарақәа ҟарҵоит. Урҭ ақьырсианцәа ирылшоит ақәыԥшцәа амаҵ аура иргар, мамзаргьы аамҭа рыцеихыргалар (Ажәам. 27:17). Хыхь зажәақәа аагаз Шан иҳәоит: «Сара даара ибзианы исгәалашәоит исывагылаз аишьцәа. Аизараҿы адҵақәа рҽырзыҟаҵара иансыцхраауаз, сара еснагь иҿыцу ак сҵон. Иара убас исгәаԥхон аамҭа анеицаҳхаҳгоз».

¹⁹ Иаҳҳәап, аҭаацәа рхәыҷқәа ацхыраара роурц азы аизараҿы аӡәы иҳәеит. Даара ихадоуп ацхыраара ҟазҵо ақьырсианцәа изыцхраауа ахәыҷқәа рҭаацәа патуқәҵарала ирзыҟазарц ргәазҭарҵалар. Дара рхаҭа аҭаацәа ибзианы ирыхцәажәалар ауп, насгьы урҭ рроль рхахьы ирымгалароуп. Иара убас ацхыраара ҟазҵо ақьырсиан аизараҿы ма даҽаџьара урҭ реизыҟазаашьақәа цқьам ҳәа аӡәы игәы иаанагартә еиԥш ихы мҩаԥимгалароуп (1 Пиотр 2:12). Убри аамҭазгьы аҭаацәа ирыхәҭам рхәыҷқәа аиаша дырҵаразы ирыду аҭакԥхықәра егьырҭ рыдҵара. Дара ирдыруазар ауп егьырҭ рхәыҷқәа ишрыцхраауа, насгьы рхаҭагьы рхәыҷқәа азыҟарҵалароуп.

20. Ишԥарылшо аҭаацәа рхәыҷқәа Иегова изиашаны имаҵ аура ирыцхраалар?

²⁰ Аҭаацәа, Иегова ацхыраара шәиҭарц шәиҳәала, насгьы ишәылшо зегь ҟашәҵала. (Уаԥхьа 2 Ашықәсынҵа 15:7.) Шәхәыҷқәа Иеговеи дареи реизыҟазаашьақәа дырӷәӷәарц азы шәхатәы интересқәа мап рыцәкра шәазхиаз. Анцәа Иажәа ргәаҵанӡа анагаразы ишәылшо зегь ҟашәҵала. Агәра ганы шәыҟаз ҽнак зны шәхәыҷқәа игәырӷьаҵәа Иегова имаҵ шыруло. Урҭ абиблиатә принципқәа инарықәыршәаны анхара ианалаго, насгьы шәҿырԥштәы ианықәныҟәало, шәара апостол Иоанн аҵабырг зирҵоз рзы ииҳәаз еилышәкаауеит: «Схәыҷқәа аиаша-ҵабырг гәык-ԥсыкала иахьазыҟоу иснаҭо агәырӷьара еиҳау даҽа гәырӷьарак сԥылом» (3 Иоанн 4).