Шәиҿыԥшла наӡаӡатәи аԥсҭазаара шәақәзыргәыӷуа

1. Иарбан лшароу иҳацхраауа Анцәа иҟазшьақәа рҿыԥшра?

ИЕГОВА ауаа рҭыԥан ҳхы аргылара алшара ҳаиҭеит. Иаҳҳәап, ҳара ҳхаҿы иааганы, ахаангьы ҳазқәымшәац аҭагылазаашьа «ҳхаҳгар» ҳалшоит. (Шәаԥхьа Ефесаа рахь 5:1, 2.) Ишԥаҳахәҭоу ари алшара ииашаны ҳхы иаҳархәалар, насгьы иҟаҵатәузеи уи аԥырхага ҳнамҭарц азы?

2. Иарбан цәаныррақәоу изцәырҵуа Иегова ҳара ҳангәаҟуа, насгьы игәы зызҭанаҵозеи уи?

² Анцәа имаҵзуҩцәа аԥеиԥш бзиа иақәиргәыӷуеит. Доуҳала иалху ақьырсианцәа ажәҩан аҿы ԥсра зқәым аԥсҭазаара роуеит, «егьырҭ ауасақәа» — адгьыл аҿы наӡаӡатәи аԥсҭазаара (Иоан. 10:16; 17:3; 1 Кор. 15:53). Ҳәарада, ажәҩан аҿгьы, адгьыл аҿгьы ҳара иахьа ҳзықәшәо ауадаҩрақәа ҟалаӡом. Иегова идыруеит иарбан хьаау ҳара иҳамоу, израильаа Мысра атәра ианҭаз рхьаақәа шидыруаз еиԥш. Ииашаҵәҟьаны «дара ангәаҟуаз, уи иара ахьаа инаҭон» (Ис. 63:9). Ашәышықәсақәа рышьҭахь, ауриацәа ауахәама анеиҭашьақәдыргылоз, урҭ даара ишәон, избанзар раӷацәа рҿагылон. Усҟан Анцәа иҳәеит: «Шәара ишәылакьысуа, сара сылаҷац далакьысуеит» (Зах. 2:8). Ан лхәыҷы бзиа дшылбо, дышихӡыӡаауа еиԥш, Иеговагьы ижәлар бзиа ибоит. Уи Анцәа игәазҭанаҵоит бзиабарала ииашоу имаҵзуҩцәа рзыҟазаара (Ис. 49:15). Иегова илшоит егьырҭ рҭыԥан ихы аргылара, уи аҩыза алшара ҳаргьы иҳаиҭеит (Ԥс. 103:13, 14).

ИИСУС АНЦӘА ИБЗИАБАРА ШААИРԤШУАЗ

3. Излоубарҭоузеи Иисус дшыгәрыцҳашьаҩыз?

³ Иисус егьырҭ рхьаақәа еиликаауан, урҭ рҭагылазаашьақәа ахаангьы дрықәымшәахьацзаргьы. Иаҳҳәап, усҟантәи аамҭазы анхаҩцәа адиннапхгаҩцәа ирыцәшәон, избанзар амц иржьон, насгьы рхала иаԥырҵаз аԥҟарақәа рыла рыԥсҭазаашьа дырудаҩуан (Матф. 23:4; Мар. 7:1—5; Иоан. 7:13). Иисус адиннапхгаҩцәа дшырцәымшәозгьы, ирҳәоз амц шхаимҵозгьы, иара ажәлар рхьаа еиликаауан. Убри аҟынтә Иисус ауаа рацәа аниба, «ирыцҳаишьеит иибаз ажәлар рацәа, урҭ уаҳа нарылымшо иааԥсаны, икараханы, ахьча-ԥыза дызмамкәа зҽыԥсаҟьаны идәықәу ауасақәа иахьреиԥшыз азы» (Матф. 9:36). Иисус, Иаб иеиԥш, дыгәрыцҳашьаҩын, насгьы ауаа бзиа ибон (Ԥс. 103:8).

4. Иарбан цәаныррақәоу изцәырҵуаз Иисус ауаа ргәаҟрақәа анибоз, насгьы игәы зызҭанаҵози уи?

⁴ Иисус ауаа ргәаҟрақәа анибоз, уи дара рахь абзиабара аарԥшра игәазҭанаҵон. Убасала Иаб ибзиабара нагӡаны иааирԥшуан. Зны акраамҭа ажәабжьҳәара ианыҟаз ашьҭахь, Иисус иапостолцәеи иареи аӡәгьы дахьыҟамыз аҭыԥ ахь ицаны, рыԥсы ршьарц рҭахын. Аха Иисус ажәлар шизыԥшыз аниба, ирыцҳаишьеит, насгьы «акыр дырҵара... далагеит» (Мар. 6:30, 31, 34).

ИЕГОВА ИБЗИАБАРА ҲАҾЫԤШЛАР ШҲАЛШО

5, 6. Ишԥаҳалшо ҳара иаҳзааигәоу ҳарзыҟазарц, Анцәа ибзиабара ҳаҿыԥшуа? Иаажәга аҿырԥшы. (Шәахәаԥш астатиа алагамҭаҿы иаагоу асахьа.)

⁵ Иаҳзааигәоу ҳарзыҟалар шҳахәҭоу аганахь ала Иегова ибзиабара ҳаҿыԥшлар ҳалшоит. Иаҳҳәап, уазхәыц иқьырсиану рԥыс қәыԥшк, ихьӡаҳҵап Максим, зықәрахь инеихьоу згәабзиара иахҟьаны аԥхьашьа зцәыцәгьоу иашьак дизхәыцуеит. Уи адагьы, уи аиашьа ҩнаҭацыԥхьаӡа ажәабжь аҳәара ицәыцәгьоуп. Максим ихахьы иааиуеит Иисус иажәақәа: «Ауаа шәызныҟәаларц шышәҭаху аиԥш шәаргьы шәрызныҟәала» (Лука 6:31). «Иарбану сара ауаа исзыҟарҵарц исҭаху? — дхәыцуеит Максим.— Аиаша уҳәозар, ампыл исыцасыр сҭахуп!» Аха илшома зықәрахь инеихьоу аиашьа уи аҿы дицхраар? Иисус иажәақәа иаанагоит ҳхы ҳазҵаалар шҳахәҭоу: «Ишԥасҭаххарыз исзааигәоу дысзыҟазарц, иара иҭыԥан сара сыҟазҭгьы?»

⁶ Максим макьана дқәыԥшуп, аха иара ихаҿы иааганы дазхәыцыр илшоит иқәрахь даннеилак ихы шибало. Иара зықәрахь инеихьоу аиашьа дицклаԥшуеит, насгьы дизыӡырҩуеит. Хәыҷы-хәыҷла иара еиликаауа далагоит ари аиашьа Абиблиа аԥхьареи ҩнаҭацыԥхьаӡа ажәабжьҳәара аҽалархәреи шицәыцәгьоу. Максим зықәрахь инеихьоу ақьырсиан дзықәшәо ауадаҩрақәа анеиликаауа, иара ибоит уи ацхыраара ахьиҭаху, насгьы иара иҭахуп уи дицхраарц. Ус аҟаҵара ҳаргьы иҳалшоит. Анцәа ибзиабара ҳаҿыԥшларц азы, ҳара егьырҭ рҭыԥ аҿы ҳхы ҳаргылозар ауп (1 Кор. 12:26).

7. Ишԥаҳалшо егьырҭ рхьаа аилкаара?

⁷ Аӡәы ихьаа аилкаара еснагь имариам. Аӡәырҩы ҳара зынӡа иаҳзымдыруа ауадаҩрақәа ирықәшәоит. Шьоукы цәеижьлатәи атравмақәа, ачымазарақәа, ма иахьажәуа иахҟьаны игәаҟуеит. Егьырҭ адепрессиеи, ашәара ӷәӷәеи, ақәымчра алҵшәеи ирыдҳәалоу аемоциатә уадаҩрақәа ирҿагылоуп. Даҽа шьоукы рдинхаҵара рыцеиҩызымшо ирыцынхоит, ма рхала ахәыҷқәа рааӡоит. Досу лассы-лассы ҳара иаҳзымдыруа ихатәы уадаҩрақәа имоуп. Ишԥаҳалшо нас ҳара усҟан Иегова ибзиабара аҿыԥшра? Ихадоуп ауаа ибзианы ҳарзыӡырҩлар, урҭ рцәаныррақәа маҷк иадамхаргьы еилаҳкаарц азы. Уи ҳгәазҭанаҵоит Иегова ибзиабара ҳаҿыԥшуа иаҭаху ацхыраара рыҭара. Ауаа зегьы рҭахрақәа еиԥшӡам, аха ауаҩы игәы шьҭаҳхыр, насгьы аус аҿы ҳицхраар ҳалшоит. (Шәрыԥхьа Римаа рахь 12:15; 1 Пиотр 3:8.)

ИЕГОВА ИҚЬИАРА ШӘАҾЫԤШЛА

8. Ицхраауази Иисус қьиарала ауаа рзыҟазаара?

⁸ Иисус иҳәеит Зегьирхаку «иҭабуп ҳәа уазымҳәауа рызгьы, ицәгьақәоу рызгьы дразуп» ҳәа (Лука 6:35). Анцәа иԥа уи аҿы Иаб диҿыԥшуан. Ицхраауази иара егьырҭ қьиарала рзыҟазаара? Иисус дазхәыцуан иажәақәеи иусқәеи егьырҭ ишырныруаз. Иаҳҳәап, иара ҽнак зны гәнаҳада ак ҟазымҵо ҳәа ахьӡ зхыз аԥҳәыс днаидгылт. Лара лылаӷырӡ лҿаҳәҳәы дҵәыуон, насгьы ишьапқәа лабжышла илкәабон. Иисус уи гәыкала дшахьхәыз ибеит, насгьы еиликааит шаҟа лхы лцәымыӷхоз, лара лахь ақьиара ааимырԥшызҭгьы. Иисус уи дирҽхәеит, лыгәнаҳагьы ланаижьит. Афарисеицәа руаӡәкгьы агәынамӡара анааирԥш, Иисус уи хаала дизнеит (Лука 7:36—48).

9. Иҳацхраауазеи ҳара Анцәа иқьиара аҿыԥшра? Иаажәга аҿырԥшы.

⁹ Ишԥаҳалшо Анцәа иқьиара ҳаҿыԥшлар? Апостол Павел иҩуан: «Иҳақәиҭу имаҵ зуа аиҿагыларақәа дрыламзароуп, зегьы гәҭыӷьӷьала дырзыҟазароуп» (2 Тим. 2:24). Ауаҩы ҟәымшәышә, ауаҩ тата еиликаауеит змаршәа ктәу ауаа данрацәажәо урҭ имыргәаарц ихы шымҩаԥигаша. Шәазхәыц анаҩстәи аҭагылазаашьақәа рҿы ақьиара аарԥшра шалшо. Шәусураҿы шәеиҳабы идҵақәа уиаҟара ибзианы изынагӡаӡом. Шәышԥазнеиуеи уи шәара? Мызқәак аизарахь имныҟәоз аиашьа аизарахь дааит. Иашәҳәозеи уи шәара? Амаҵзураҿы ауаҩы ус шәеиҳәоит: «Саҭамыз, аха аамҭа сымаӡам». Иаашәырԥшуама шәара ататара? Аԥҳәыс лхаҵа диазҵаауеит: «Изсоумҳәазеи заа иарбан планқәоу асабшазы иумаз?» Илышәҭома аҭак қьиарала? Егьырҭ рҭыԥ аҿы ҳхы ҳаргылозар, насгьы ҳажәақәа шрыдыркыло ҳазхәыцуазар, ҳара еилаҳкаауеит ҳхы шымҩаԥаҳгаша, насгьы иаҳҳәаша, Иегова иқьиара ҳаҿыԥшларц азы. (Шәаԥхьа Ажәамаанақәа 15:28.)

ИЕГОВА ИҞӘЫӶАРА ШӘАҾЫԤШЛА

10, 11. Ишԥаҳалшо ҳара Анцәа иҟәыӷара аҿыԥшра? Иаажәга аҿырԥшы.

¹⁰ Ҳара ҳазқәымшәац ахҭысқәа ҳхаҿы аагара иҳамоу алшара Иегова иҟәыӷара аҿыԥшреи ҳхымҩаԥгашьа иаиур алшо алҵшәақәа рбареи рҿы иҳацхраар алшоит. Аҟәыӷара — ари Иегова ихадоу иҟазшьақәа ируакуп. Иара иҭаххар, аусқәа аԥхьаҟа ирылҵшәахо зегьы заа идырыр илшоит. Ҳара хара анаԥшышьа уиаҟара иахьҳалымшо иахҟьаны, ак ҟаҳҵаанӡа иҟәыӷарахон уи ҳахькылнаго заа ҳазхәыцызҭгьы. Ажәытәан израильаа Иегова изымӡырҩра иахьнанаго иазхәыцӡомызт. Убри аҟынтә Моисеи еиликаауан, Анцәа израильаа абриаҟара шырзыҟаиҵазгьы, ацәгьа шыҟарҵало. Израиль аизара зегь аҿаԥхьа Моисеи абри аҩыза ажәақәа иҳәеит: «Арҭ хшыҩ змам жәларуп, урҭ аилкаара рымам. О, дара аҟәыӷара рымазҭгьы! Усҟан дара уи иазхәыцуан, иазхәыцуан иарбан ҵыхәтәоу ирзыԥшу» (Ҩынтә. 31:29, 30; 32:28, 29).

¹¹ Анцәа иҟәыӷара ҳаҿыԥшларц азы, иҟаҳҵо иалҵшәахо заа ҳазхәыцлар ауп, мамзаргьы ҳхаҿы иааганы исахьарклатәуп. Иаҳҳәап, аӡәи ҳареи ҳаиқәшәозар, насгьы бзиа ҳаибабозар, еилаҳкаауама ҳара шаҟа иӷәӷәахар алшо ацәеижьтә гәеизцара? Ихадоуп иҟәыӷоу абиблиатә лабжьара иаҳәо ақәныҟәара: «Хара иԥшуа арыцҳара ибоит, насгьы иҽацәихьчоит, аԥышәа змам ԥхьаҟа ицоит, насгьы иахьырхәхоит» (Ажәам. 22:3). Иеговеи ҳареи зыхә ҳараку ҳаизыҟазаашьақәа ашәарҭара иҭагылар алҳаршом!

ШӘҼЫРЦӘЫШӘЫХЬЧАЛА УҚӘЫЗХУА АФАНТАЗИАҚӘА

12. Ишԥарылшо ҳфантазиақәа ҳақәырхыр?

¹² Згәеилых бзиоу ауаҩы еиликаауеит афантазиақәа амца иаҿурԥшыр шалшо. Уи ииашаны ухы иаурхәозар, ахәарҭа аанагоит: уи афатә алаҟауҵар ҟалоит. Аха амца нкылашьа амамкәа ианыҟала, аԥсра аанагоит. Амца аҩны ықәццышәаа иагар ауеит, уа инхогьы алаблыр алшоит. Убас еиԥш, Иегова изкны еилаҳкаауа ҳаназхәыцуа, уи ахәарҭа ҳзаанагоит. Аха ахаҿаагара алшара ҳԥырхагахар алшоит, иҽеим агәаҳәарақәа еизнарҳауазар. Иаҳҳәап, ҳара игәнаҳау акы азхәыцра ҳашьцылазар, аамҭа цацыԥхьаӡа уи агәнаҳа ҟаҳҵар ҟалоит. Ииашаҵәҟьаны, игәаԥхашәадоу афантазиақәа ҳдоуҳара ықәырхыр алшоит! (Шәаԥхьа Иаков 1:14, 15.)

13. Иарбан ԥеиԥшу Ева лхаҿы иааганы дзызхәыцлар алшоз?

¹³ Иаҳгәалаҳаршәап раԥхьаӡатәи аԥҳәыс Ева «ацәгьеи абзиеи уеилзыркаауа аҵла» аҟынтә ззин лымамыз ашәыр афара шылҭаххаз (Аҟаз. 2:16, 17). Амаҭ иланаҳәеит: «Мап, иԥсӡом. Аха идыруеит Анцәа уи ашәыр анышәфо аҽны шәыблақәа шыхтуа, насгьы Анцәа иеиԥш ацәгьеи абзиеи здыруа шәакәны шәшыҟало». Ева «илбеит аҵла афатә азы ишыбзиоу, насгьы лылаԥш шыхнакуа». Иабананагеи уи? Абиблиаҿы иҳәоуп: «Уи иаҿаз ашәыр ааҿылхын, афара далагеит. Нас лхаҵа лааигәара даныҟаз илҭан, иаргьы ифеит» (Аҟаз. 3:1—6). Иубаратәы иҟоуп Ева ишылгәаԥхаз Аҩсҭаа ииҳәаз: аӡәымзар-аӡәы илеиҳәалаӡом ацәгьеи абзиеи закәу, уи лара лхала илыӡбалар лылшоит. Шаҟа ԥырхага лзаанагазеи лара ари аҩыза ахәыцшьа! Адамгьы агәнаҳа ҟиҵеит. Убас «адунеи агәнаҳа аҭааит, агәнаҳа — аԥсра ахылҿиааит» (Рим. 5:12).

14. Ишԥаҳнаҭо Абиблиа агәҽанҵара игәаԥхашәадоу ахымҩаԥгашьа аганахь ала?

¹⁴ Ева едемтәи абаҳчаҿы иҟалҵаз агәнаҳа асексуалтә гәаԥхашәадара иадҳәаламызт. Аха Иисус иҳәон ицқьам афантазиақәа рыҽрыҭара шшәарҭоу: «Згәы хыҭ-хыҭуа аԥҳәыс илыхәаԥшуа дарбанзаалакь, гәыла-ԥсыла уи лҿы дкалҭшьҭаныҟәеит» (Матф. 5:28). Уи адагьы, апостол Павел заа ргәырҽаниҵон: «Агәнаҳарақәа рымҩа шьҭыхны уаҳа ус шәымамшәа иара хҭашәымкын» (Рим. 13:14).

15. Иарбан малу ҳара еизаҳгалар ҳахәҭоу, насгьы избан?

¹⁵ Уи адагьы, ауаҩы ашәарҭара изыԥшуп, амал ду дазхьуазар, Анцәа игәы иахәо шыҟаиҵаша уиаҟара дазымхәыцуазар. «Ауаҩ беиа имал — иқалақь ду ауп, уи ихаҿы иааиго аҭӡамц ҳарак иеиԥшуп» (Ажәам. 18:11). Иисус еиҭеиҳәеит зхазы мацара амал еизызгоз, аха Анцәа иҿаԥхьа амал змамыз, зҭагылазаашьа бааԥсыз ауаҩы иҿырԥшы (Лука 12:16—21). Ҳара Иегова игәы иахәо ҟаҳҵозар, уи иара агәырӷьара изаанагоит (Ажәам. 27:11). Ҳара насыԥ ҳамоуп, иара дшаҳзыразу анаҳдыруа, избанзар ус ала «амазара ажәҩан аҿы» еизаҳгоит (Матф. 6:20). Иеговеи ҳареи иҳабжьоу ибзиоу аизыҟазаашьақәа — уи, ҳәарада, зегь реиҳа зыхә ҳараку мазароуп!

АГӘҬЫНЧЫМРАҚӘА ИШЫРИААИЛАТӘУ

16. Ишԥаҳалшо агәҭынчымра ҳаиааир?

¹⁶ Шәазхәыц ҳаԥсҭазаараҿы шаҟа агәҭынчымра ҳауаз, адгьыл аҿы амалеизгара ҳахшыҩ азышьҭны ҳаҿызҭгьы (Матф. 6:19). Лабҿабатә ҿырԥшык ала Иисус иааирԥшит ари асистема иадҳәалоу агәҭынчымрақәеи узжьо амали Аҳра иазку ажәа ахәаҽыр шалшо (Матф. 13:18, 19, 22). Шьоукы аԥара, ма изакәызаалак даҽакы ианазхәыцуа, еснагь рхаҿы иааиуеит арыцҳарақәа ишрықәшәо. Аха агәҭынчымрақәа ҳдыргәаҟуазар, уи ҳара цәеижьла адагьы, доуҳала иаҳԥырхагахар алшоит. Шәааи Иегова ҳиқәгәыӷлап, «агәҭынчымра ауаҩы игәы шканажьуа, ажәа хаа игәы агәырӷьара шазаанаго» ҳгәаларшәо (Ажәам. 12:25). Ҳара аӡәы ҳанеиликаауа, насгьы жәа хаала ҳгәы анышьҭихуа, уи ҳаргәырӷьоит. Убри аҟынтә ҳара Анцәа изиашаны имаҵ зуа, насгьы ибзианы ҳаздыруа иаҳҳәап ҳҭаацәа, ҳхатә ҩыза, ма зыгәра ҳго ҳҩыза ҳагәҭыхақәа раҳҳәар, уи ҳагәҭынчымра арԥсыҽыр ауеит.

17. Дышԥаҳацхраауеи Иегова агәҭынчымра аиааира?

¹⁷ Ҳара ҳгәы иҭыхо Иегова иеиԥш аӡәгьы изеилкааӡом. Павел иҩуан: «Ак гәырҩажәымган, ак хьаашәымган, аха гәҭыхас ишәымоу, шәзыргәамҵуа шәныҳәарақәа раан Анцәа инапы ианышәҵала, шәиаҭабуны,— Убасҟан ҳара иҳамоу адыррақәа ираԥызго, урҭ рыла иаҳзеилымкаауа Анцәа идунеи шәгәы-шәыԥсы Христос Иисус иҿы иеиқәдырхоит» (Флп. 4:6, 7). Убри аҟынтә агәҭынчымра шәиааиуашәа жәбозар, шәазхәыц Иеговеи шәареи шәеиҩызара арӷәӷәара дышшәыцхраауа. Иара дшәыцхраауеит шәхаҵара шәыцеиҩызшо, аизара аиҳабацәа, игәрагоу, иҟәышу атәы, амаалықьцәеи Иисуси рыла.

18. Иабаҳацхраауеи ҳхаҿы иааганы акы азхәыцра?

¹⁸ Ишаҳбаз еиԥш, ҳхаҿаагара Анцәа иҟазшьақәа еиҳа еиӷьны раарԥшра иҳацхраауеит (1 Тим. 1:11; 1 Иоан. 4:8). Ҳара анасыԥҵәҟьа ҳауеит, егьырҭ бзиабарала ҳрызнеиуазар, ҳхымҩаԥгашьа иалҵшәахо ҳазхәыцуазар, насгьы иҳақәыӷәӷәо агәҭынчымра ҳаҿагылозар. Шәааи ҳхаҿы иааҳгалап Аҳра анапхгара аҵаҟа иҟало ԥхьаҟатәи аԥеиԥш, насгьы насыԥ змоу Ҳанцәа, Иегова, ҳаиҿыԥшлап, абзиабареи, ақьиареи, аҟәыӷареи аарԥшуа (Рим. 12:12).