Амаҵзураҿы аамҭа ҟәыӷарыла шәхы иашәырхәала
2014 амаҵзуратә шықәсазы Иегова ишаҳаҭцәа ажәабжьҳәара 1 945 487 604 сааҭ азыркит — ари ибзиаҵәҟьаны ишьақәнарӷәӷәоит ҳара ҳаамҭа зегь Иегова имаҵзура азкра ҳшазхиоу! (Ԥс. 110:3; 1 Кор. 15:58). Иаанхаз аамҭа шмаҷу ахьаҳдыруа аҟынтә, иҳалшома ҳара амаҵзура иазаҳкыз зыхә ҳараку аамҭа иҵегь еиҳаны ауаа ажәабжь раҳәаразы ҳхы иаҳархәар? (1 Кор. 7:29).
Ажәабжьҳәараҿы иҳамоу аамҭа еиӷьны ахархәаразы иаҭахуп аҭагылазаашьа аҽақәыршәара. Иаҳҳәап, амаҵзура хкык уаналахәу, лассы-лассы сааҭк, ма еиҳаны аӡәгьы узимацәажәозар, иулшома уара акы аԥсахра? Ҳәарада аҭагылазаашьақәа еиԥшӡам, аха анаҩстәи алабжьарақәа уцхраауеит аамҭа ииашаны ахархәара «баша аҳауаҿ» унапы умҟьарц (1 Кор. 9:26).
Ҩнаҭацыԥхьаӡа ажәабжьҳәара. Абар жәашықәсала Иегова ишаҳаҭцәа амаҵзураҿы рымш, ишаԥу еиԥш ҩнаҭацыԥхьаӡа ажәабжьҳәарала иалагоит. Аха аӡәырҩы ауаа ҽынла аус руеит, убри аҟынтә ҩнаҭацыԥхьаӡа ажәабжьҳәара ахәылбыҽха уцар ҟалоит, усҟан еиҳаны ауаа аҩны иҟоуп, рыԥсы ршьоит. Ҽынла алҵшәа бзиа аанагоит амҩаду аҿы, ма ауаа русурҭа ҭыԥқәа рҿы ажәабжьҳәара.
Ауаарацәа ахьеизало аҭыԥқәа рҿы ажәабжьҳәара. Аишәақәеи астендқәеи ргылатәуп ауаарацәа ахьеизало аизара иаҵанакуа аҭыԥқәа рҿы. (Уахә. 2013 шықәса ииуль мзазы иҭыҵыз «Иԥшьоу ҳмаҵзура», ад. 5, аурыс.) Ус еиԥш иҟоу аҭыԥқәа рҿы ауаа маҷхазар, аизара амаҵзуратә комитет иаӡбар ҟалоит аишәақәеи астендқәеи риагара ауаа еиҳа иахьырацәо.
Аиҭанеира, насгьы Абиблиа аҵарақәа́. Иулшома уара аинтерес аазырԥшыз ауаа рахь еиҭа анеира, ма Абиблиа аҵара амҩаԥгара, егьырҭ амаҵзура ахкқәа рлҵшәа анмаҷу аамҭазы? Иаҳҳәап, асабшазы ҩнаҭацыԥхьаӡа ажәабжьҳәара шьыжьла еиҳа алҵшәа аанагозар, иулшома уара Абиблиа аҵара амҩаԥгара шьыбжьышьҭахь, ма ахәылбыҽха? Ирылшома ажәабжьҳәаҩцәа, ажәабжьҳәара еиҳаны рҽаладырхәларц азы, аиҭанеира аан амашьынақәа еиҳа рхы иадырхәалар, насгьы имаҷу агәыԥқәа рыла рҽыршалар?
Ажәабжьҳәара ззаҳкуа аамҭа ҳәарада аҳасабрбахь иаҳарбоит, аха ҳмаҵзура алҵшәа анаҳнаҭо ҳгәырӷьара еиҳахоит. Узлахәу амаҵзура ахкы иазалухыз аамҭа алҵшәа шунамҭо гәоуҭозар, иԥышәа даҽа хкык. Уиҳәала «абҵатәы Иақәиҭу» Иегова анапхгара уиҭаларц, амаҵзураҿы аамҭа ҟәыӷарыла ухы иаурхәаларц азы (Матф. 9:38).