АҚЬЫРСИАНТӘ ԤСҬАЗААРА
Бызшәа рацәала иахьцәажәо атерриториаҿы аизарақәа аус еицыруеит
Ауаа Аҳра иазку ажәабжь рхатәы бызшәала ианраҳауа еиҳа иазыӡырҩуеит. Иҟалап убри азы акәзар Иегова 33 шықәсазы ҳ. ҳ. аан Аҩынҩажәижәаба мшы азгәаҭаразы Иерусалим еиуеиԥшым атәылақәа рҟынтә еизаны иҟаз, анцәахаҵара злаз аиудеиаа рхатәы бызшәала ажәабжь бзиа раҳартә изыҟаиҵаз, дара еицырзеиԥшыз абызшәа шрымазгьы — ауриатә, мамзаргьы абырзен (Аус. 2:5, 8). Иахьатәи ҳаамҭазы бызшәа рацәала иахьцәажәо атерриториақәа рҿы, бызшәала еиԥшым аизарақәа рҟынтә аишьцәеи аиаҳәшьцәеи лассы-лассы территориак аҿы ажәабжь рҳәоит. Ишԥарылшо урҭ аизарақәа рҟынтә ажәабжьҳәаҩцәа ртерриториаҿы инхо ауаа ргәы ԥымҵәакәа, зегь рҟынӡа ажәабжь анагара?
Заа еибышәҳәала (Ажәам. 15:22). Амаҵзуратә хылаԥшыҩцәа алҵшәа бзиа змоу азнеишьа алырхыр ауп, бызшәа рацәала иахьцәажәо аҭыԥ аҿы ажәабжьҳәаразы. Иаҳҳәап, даҽа бызшәак ала иҟоу аизарақәа ртерриториа дуумзар, урҭ аҳәара ҟарҵар ауеит даҽа бызшәак ала ицәажәо ауаа ахьынхо рыҩнқәа рахь ажәабжьҳәаразы имнеиларц. Аха урҭ ртерриториа ахьдуу иахҟьаны ажәабжьҳәара иахьымӡозар, усҟан дара ақәшаҳаҭхар ауеит шәеизара ртерриториаҿы инхо ауаа зегьы ирҭааларц, аха даҽа бызшәак ала ицәажәо, насгьы аинтерс аазырԥшыз рыӡбахә рарҳәаларц (od-U 93, абз. 37). Мамзаргьы дара шәеизарахь аҳәара ҟарҵар рылшоит рбызшәала ицәажәо ауаа рыԥшааларц, насгьы рҭыӡҭыԥ анҵаны дара ирырҭаларц (km-U 7/12 5, арамка). Иаҳхаҳмыршҭлароуп зны-зынла ҩнык аҿы еиуеиԥшым абызшәақәа рыла ицәажәо ауаа ҳақәшәар шыҟало. Иалху азнеишьа ауаҩы ихаҭара зыхьчо азакәанқәа еиланамгозар ауп.
Аусеицура (Еф. 4:16). Ибзианы инагӡала амаҵзуратә хылаԥшҩы иуиҭо анапхгара. Уара уеизара зламҩаԥысуа абызшәа Абиблиа зурҵо ауаҩы ихатәы бызшәа акәымзар, еиҳа еиӷьуп иара дызлацәажәо абызшәала иҟоу аизара, ма агәыԥ аҟынтә ажәабжьҳәаҩ Абиблиа аҵара изымҩаԥигалар. Убасҟан иара еиҳа ирласны доуҳала деизҳауеит.
Уҽазыҟаҵала (Ажәам. 15:28; 16:1). Ҩнаҭацыԥхьаӡа ажәабжь ануҳәо, даҽа бызшәак ала ицәажәо ауаҩы дуқәшәар, иулшо зегь ҟаҵа Аҳра иазку ажәабжь бзиа иаҳәаразы. Убри азы, уҽаназыҟауҵо уазхәыц иарбан бызшәақәоу излацәажәо уахьынхо аҭыԥ аҿы, насгьы Абиблиеи авидеонҵамҭақәеи урҭ абызшәақәа рыла ихҩылаа. Иара убас иулшоит урҭ абызшәақәа рыла аԥсшәаҳәашьа уҵар, ацхыраагӡа JW Language аҟынтә.