Pawan—Édé Ich Ou Pou Enmen Jéhova

1-2. Pouki adan pwensip Bib sa vini pli enpòtan pou nou, lè sitiwasyon nou chanjé?

ASOU jou-a dé moun ka mayé, yo pé kouté on diskou ki bazé asou Bib-la konsèné mawiyaj. Èk sé pwensip-la an diskou sala, menm si yo té konnèt yo avan, kay ni plis enpòtans pou yo atjwèlman. Pouki? Paskè kon dé moun ki mayé, yo ni pou koumansé apliké sé pwensip sala an lavi yo ansanm.

² Lè dé moun ki mayé vini pawan, sé sijé-a yo té tann plizyé lanné avan konsèné mannyè pou lévé manmay, ka vini pli enpòtan pou yo apwézan. Wi, yo ni pou lévé ich yo menm. Sa sé on gwo wèskonsabilité. Sé pou sa, lè bagay chanjé an lavi nou, sèten pwensip Bib ka vini pli enpòtan pou nou. Sa sé yon wézon sèvant Jéhova ka li èk mèdité asou Bib-la touléjou.​—Dito. 17:19.

3. Kisa nou kay diskité an atik sala?

³ Pawan, ou ni on gwo pwivilaj pou enstwi ich ou konsèné Jéhova. Mé ou pa vlé anni ba yo enfòmasyon tousèl. Ou vlé édé yo pou enmen Jéhova. Kisa ou sa fè, pou édé manmay ou pou enmen Jéhova? An atik sala, nou kay diskité kat (4) pwensip Bib ki sa édé’w kon on pawan. (2 Tim. 3:16) Nou kay osi wè, mannyè adan pawan ja twapé bennéfis lè yo apliké sé pwensip sala.

KAT PWENSIP KI SA ÉDÉ PAWAN

4. Kisa ki yonn an sé pwensip-la kisa édé pawan édé ich yo pou enmen Jéhova? (Jémz 1:5)

⁴ Pwensip limowo 1: Mandé Jéhova pou lasajès. Mandé Jéhova pou ba’w lasajès-la ou bizwen pou édé ich ou dévlopé lanmityé pou li. (Li Jémz 1:5.) Bon. Sé Jéhova ki ka bay pli bon konsèy-la. La ni an pil wézon nou ka di sa. Annou konsidiwé dé an sé wézon sala. Pwèmyé wézon: Sé Jéhova ki ni pli èspéyans kon on pawan. (Sam 36:9) Dézyenm wézon: Nou toujou ka twapé an chay bennéfis an sé konsèy-la i ka ban nou.​—Izay. 48:17.

5. (a) Kisa ògannizasyon Jéhova ja potjiwé pou édé sé pawan-an? (b) An vidiyo-a, Jéhova Moutwé Nou Mannyè Pou Lévé Ich Nou, kisa ou té apwann an ègzanp Fwè èk Sè Amorim?

⁵ Pa pawòl li èk pa ògannizasyon’y, Jéhova ka ba pawan tout enfòmasyon yo bizwen pou édé manmay yo enmen’y. (Maf. 24:45) Pou ègzanp, ou sa twouvé bon konsèy an sé atik-la “Help for the Family.” Sé atik sala ka pawèt an magazin Awake!-la èk ou sa osi twouvé yo asou wèbsayt nou jw.org. Osi, jw.org ni plizyè vidiyo, dranma èk antwévi, ki sa édé pawan apliké konsèy Jéhova lè i vini pou mannyè yo ka lévé ich yo.b​—Pwov. 2:4-6.

6. Ki mannyè Joe èk madanm li ka santi lè yo wisivwè èd hòd ògannizasyon Jéhova?

⁶ An chay pawan ja di yo byen apwésyé èd-la Jéhova té potjiwé pa ògannizasyon’y. Yonn papa, non’y sé Joe, di: “Pou lévé twa manmay an lavéwité-a pa ézé. Mwen èk madanm mwen ka toujou pwédyé ba Jéhova pou édé nou. Byen souvan, nou ka santi ki, on atik èben on vidiyo wivé a lè pou édé nou épi sitiwasyon-an nou té ka aji épi. Nou toujou ka dépan asou konsèy Jéhova.” Joe épi madanm li ja wè sé atik-la èk sé vidiyo-a ka édé ich yo vini pli pwé Jéhova.

7. Pouki i enpòtan pou pawan fè asiwé yo sé on bon ègzanp pou ich yo? (Ronm 2:21)

⁷ Pwensip limowo 2: Sé pou ou on bon ègzanp. Ès i pa vwé manmay ka òbzòvé pawan yo byen pwé? Èk byen souvan yo ka imité yo? Mé wi! Mé pyès pawan pa pawfé. (Ronm 3:23) Kanmenm pawan ki savan ka fè tout sa yo pé pou fè asiwé yo sé on bon ègzanp pou ich yo. Sa sé yon mannyè yo sa enstwi ich yo. (Li Ronm 2:21.) Yon papa di: “Sé manmay-la ka òbzòvé ègzanp pawan yo. Épi yo ka di nou si ègzanp nou a ling épi sé bagay-la nou ka enstwi yo-a.” Konsa, si nou vlé manmay nou enmen Jéhova, nou ni pou moutwé yo nou enmen Jéhova épi tout tjè nou.

8-9. Kisa ou apwann an sa Andrew èk Emma té di?

⁸ La ni diféwan mannyè pawan sa enstwi ich yo pou enmen Jéhova. Andrew, yon fwè ki disèt (17) nanné di: “Pawan mwen té ka toujou enstwi mwen ki, i byen enpòtan pou pwédyé. Toulé swè, papa mwen té ka toujou pwédyé épi mwen, menm si mwen té ja pwédyé. Pawan mwen té ka toujou fè mwen épi ti sésé mwen chonjé ki, la pa ni on limit asou konmen fwa nou sa palé épi Jéhova. Sa té ni on bon éfé asou mwen. Èk apwézan, mon byen konfòtab pou pwédyé ba Jéhova, èk pou gadé’y kon Papa mwen ki enmen mwen an chay.” Alò pawan, toujou chonjé, lanmityé’w pou Jéhova sa édé ich ou enmen Jéhova.

⁹ Apwézan, annou konsidiwé ègzanp Emma. Papa Emma abandonnen fanmi’y. Èk i kité manman Emma épi on gwo dèt. Emma di: “La té ni lè, lè manman mwen pa té ni asé lajan. Mé manman mwen té ka toujou palé épi mwen konsèné mannyè Jéhova ka otjipé sèvant li. Mwen té ka wè an mannyè manman mwen té ka viv lavi’y, i té vwéman kwè sa i té ka enstwi mwen. Manman mwen pa té kon lot pawan ki ka di: ‘Fè sa mwen di; Pa sa mwen fè.’” Kisa ki lison-an? Pawan sa enstwi ich yo pa ègzanp yo menm si sitiwasyon-an difisil.​—Gal. 6:9.

10. Ki lokazyon pawan an Izwayèl té ni pou palé épi ich yo konsèné Jéhova? (Ditonronnonmi 6:6, 7)

¹⁰ Pwensip limowo 3: Toujou palé épi ich ou. Jéhova té koumandé sé jan Izwayèl-la pou toujou palé épi ich yo konsèné’y. (Li Ditonronnonmi 6:6, 7.) Sé pawan sala té ni an chay lokazyon pou palé épi sé ich yo-a, èk pou édé yo dévlopé on lanmityé pou Jéhova an tjè yo. Pou ègzanp, on jenn tibway pé pasé an chay tan épi papa’y an jaden’y. On jenn fi osi, sa pasé an chay tan an kay-la épi manman’y. Sé pawan sala sa pwan sé lokazyon sala, pou palé épi ich yo konsèné an chay diféwan sijé. Pou ègzanp, yo té sa diskité bon kawaktè Jéhova èk mannyè i ka édé fanmi-a.

11. Ki lokazyon pawan jòdi ni pou palé épi ich yo?

¹¹ Jòdi jou bagay diféwan. An an chay péyi, i pa toujou ézé pou pawan pasé tan épi ich yo diwan jounen-an. Pitèt yon wézon pou sa sé, sé pawan-an an twavay épi ich yo an lékòl. Konsa, pawan sipozé éséyé pou twouvé tan pou palé épi ich yo. (Èfés. 5:15, 16; Filip. 1:10) Pawan, létid fanmi zò, sé on bon lokazyon zò sa sèvi pou palé épi ich zò. On jenn fwè, non’y sé Alexander, di: “Papa mwen toujou ka fè awanjman pou létid fanmi nou. I pa ka kité anyen anpéché létid fanmi nou. Apwé étid nou, nou ka pasé tan ka palé.”

12. Kisa yon tèt fanmi vlé fè diwan létid fanmi’y? Èk kisa i pa vlé fè?

¹² Si ou sé an tèt fanmi, kisa ou sa fè pou fè sé manmay-la enjwi létid fanmi-a? La ni an chay diféwan bagay ou sa fè. Pou ègzanp, ou sa sèvi liv-la Ou Sa Ni On Bon Lavi Pou Tout Tan! pou étidyé épi ich ou. Liv sala ka fè’y pli ézé pou ni on bon konmézasyon épi ich ou. San dout, ou kay vlé ich ou ouvè tjè yo ba’w, èk pou yo di’w tout sa ki asou tjè yo èk mannyè yo ka santi. Mé si yo di’w on bagay ki pa a ling épi Bib-la, sé pa pou ou lévé faché. Non; pa sèvi létid fanmi-a pou kowijé èben kwititjé ich ou. Mé pito, ou sipozé kontan yo té onnèt épi’w paski ou kay sa sav kisa ki asou tjè yo pou ou sa édé yo. Alò, fè’y pli ézé pou yo sa kontiné palé épi’w fèplé.

13. Kisa pawan sa fè pou édé ich yo vini pwé Jéhova?

¹³ Pawan sa gadé pou diféwan òpòtyounité diwan lajouné-a pou édé manmay yo vini pli pwé Jéhova. Ou pa ni pou èspéwé pou lè ou ni on létid Bib épi yo, pou enstwi yo konsèné Jéhova. On manman, non’y sé Lisa, di: “Nou ka sèvi sé bagay-la ki oliwon nou pou enstwi ich nou konsèné Jéhova. Pou ègzanp, lè chyen nou fè on bagay ki ka fè sé manmay nou-a wi, nou ka di yo: ‘Sa ka moutwé Jéhova sé on Dyé ki ni djèwté. Èk i fè’y posib pou nou osi ni djèwté èk pou nou enjwi bèl bagay.’”

14. Pouki i enpòtan pou pawan édé ich yo pou chwazi bon jan? (Pwovèb 13:20)

¹⁴ Pwensip limowo 4: Édé ich ou pou chwazi bon jan. Pawòl Bondyé ka fè’y a klè ki, jan nou sa enflouwansé nou pou fè sa ki bon èben sa ki mové. (Li Pwovèb 13:20.) Pawan, ès ou konnèt ki moun ki jan ich ou? Èvèk, ès ou ja pasé tan épi yo? Wi, sa sé bon kèstyon pou mandé kò’w. Pawan, ou vlé ich ou chwazi bon jan. Konsa, kisa ou sa fè pou édé ich ou fè jan épi moun ki enmen Jéhova? (1 Kòr. 15:33) Ou sa envité moun ki enmen Jéhova pou pasé tan épi fanmi’w.​—Sam 119:63.

15. Kisa Tony èk madanm li té fè pou édé ich yo chwazi bon jan? Konsa, kisa pawan sa fè?

¹⁵ Annou konsidiwé èspéyans yon papa. Non’y sé Tony. I di: “Mi sé sa mwen èk madanm mwen fè pou édé ich nou chwazi bon jan. Nou toujou té ka envité diféwan fwè èk sè an kay nou, ni sa ki jenn ni sa ki an laj. Délè nou té ka enjwi on wipa ansanm. Èk délè yo té ka asid épi nou asou létid fanmi nou. Sa sé on bon mannyè pou konnèt moun ki enmen Jéhova èk ki ka sèvi’y épi djèwté. Nou sa di, sa sé on bennédiksyon pou nou, paski nou ja ni an kay nou ansyen pou sékyout-la, misyonnè èk lézòt fwè èk sè. Nou té wè mannyè yo zélé. Yo té ka di nou konsèné sé sakwifis-la yo fè ba Jéhova, èk konsèné sé èspéyans yo-a. Tout sé bagay sala édé sé ich nou-a vini pli pwé Jéhova.” Konsa, pawan, sé pou zòt détèminé pou édé ich zòt chwazi bon jan.

PA PÈD ÈSPWA!

16. Si ich ou di i pa vlé sèvi Jéhova, ès sa vlé di ou pa on bon pawan?

¹⁶ Pawan ki kwityen ka twavay wèd pou édé ich yo sèvi Jéhova. Mé délè, magwé yo mété tout sé èfò sala, ich yo pé désidé pou pa sèvi Jéhova. Si sa sé sitiwasyon’w, pwan tjè! Pa katjilé ou sé on mové pawan. Èk pa janmen pèd èspwa ki, yon jou ich ou kay witounen. Chonjé sé manmay-la ni chwa yo pou fè. Jéhova ban nou tout léchanlib-la pou chwazi si nou vlé sèvi’y opa. Osi, pa obliyé pawabòl-la konsèné gason-an ki té pèd-la. (Louk 15:11-19, 22-24) Jenn nonm-la an pawabòl-la té fè an chay bagay ki té mové. Mé i witounen; i viwé an kay papa’y. Adan moun pé di: “Sa sé annex on pawabòl.” Mé sa sa fèt pou vwé! Ich ou sa witounen pou Jéhova! Anfen, sa sété èspéyans on jenn nonm, non’y sé Elie.

17. Koumannyè èspéyans Elie ka ankouwajé’w?

¹⁷ Elie di: “Pawan mwen fè tout sa yo pé pou édé mwen enmen Jéhova èk pou enmen Pawòl li, Bib-la. Kanmenm, lè mwen té kenz (15) lanné, mwen lévé wévòt.” Elie koumansé fè bagay ki pa té bon an sigwé. Pawan’y té fè tout sa yo pé pou édé’y wèsté pwé Jéhova, mé i pa té kouté yo. Apwé on tan, i kité kay pawan’y, épi i kontiné fè bagay ki pa té bon. Kanmenm, tanzantan, i té ka palé konsèné Bib-la épi yon jan’y. Elie di: “Mon obzòvé, pli mwen palé épi jan mwen konsèné Jéhova, sé pli mwen menm, té ka katjilé konsèné’y. Piti a piti, sé gwenn lavéwité-a ki té an tjè mwen, sa vlé di, sé gwenn-lan pawan mwen té planté-a, koumansé pwofité.” Apwé on tan, Elie viwé an lavéwité-a.c Imajiné djèwté-a pawan’y té ni lè yo wè i witounen an lavéwité-a. Pa dé kontan yo té kontan yo té enswti’y pou enmen Jéhova dépi i té tou piti!​—2 Tim. 3:14, 15.

18. Kouman ou ka santi konsèné pawan ki ka twavay wèd pou enstwi ich yo pou enmen Jéhova?

¹⁸ Pawan ni on gwan pwivilaj pou lévé manmay yo pou adowé Jéhova. (Sam 78:4-6) Sa pa anyen ki ézé! Mé nou ka aplodi tout sé pawan-an ki ka twavay wèd pou lévé ich yo pou enmen Jéhova. Si zòt kontiné pou fè tout sa zòt pé pou édé ich zò enmen Jéhova èk pou obéyi’y, zòt sa asiwé, Papa nou ki an syèl Jéhova, kay byen plè épi èfò zò.​—Èfés. 6:4.