Јаан изӱ ай

Иисустыҥ айткан сӧстӧри, эткен керектери, ол тоодо кайкалдары, ӱзе Иегова Кудайдыҥ санаазын ла сезимдерин кӧргӱзет (Иоанн 14:9). Иисустыҥ кайкалдарынаҥ бис кандый ӱч ӱредӱ алар аргалу? Темдектезе, Иисус ла оныҥ Адазы бисти сӱреен тыҥ сӱӱп јадылар деп билип аладыс. Иисус улусты кыйын-шыразынаҥ јайымдаарга, кайкал эдер ийде-кӱчин тузаланган. Бир катап, кӧзи кӧрбӧй турган эки кижи јайнап туруп, Иисустаҥ болуш сураган (Матф. 20:30— 34). Иисус олорды килейле, јазып ийген. Грек глаголдоҥ кӧчӱрилген «буурзак» деген сӧс акту јӱрегинеҥ килегенин темдектейт. Иисустыҥ сӱӱжи улуска килеҥкей болгонынаҥ кӧрӱнет. Шак ла мынаҥ улам Иисус аштап калган улусты азыраган ла капкаш балулу кижини јаскан (Матф. 15:32; Марк 1:41). Иегова — «сӱреен килемкей» (ЈТ) Кудай. Ол до, оныҥ Уулы да бисти тыҥ сӱӱп јадылар. Олорго бистердиҥ кыйын-шырабысты кӧрӧргӧ коркышту ачу (Лука 1:78; 1 Пётр 5:7). Оныҥ учун олор бисти кандый ла тӱбектеҥ јайымдайтан ӧйди тыҥ сакыйдылар! w23.04 3, абз. 4, 5

Санаабысты бу телекейдиҥ јастыра кӧрӱминеҥ корулаарга, тыҥ албаданар керек. Је мыны канайып эдер? Агару Бичикти кычырып, ӱренип јада, санаабысты јакшы ла тузалу шӱӱлтелерле толтырып турзаас, анайда ок јуунныҥ туштажуларына ла јарлаар ишке туружып турзаас, корулайдыс. Иегова дезе, биске ӧдӱп болбойтон ченелтени качан да болдыртпас деп сӧзин берет (1 Кор. 10:12, 13). Бу калганчы кӱч ӧйлӧрдӧ, Иеговага чындык артарга, алдындагызына кӧрӧ, оноҥ кӧп мӱргӱӱр керек. Иегова бисти јӱрегисте не барын чыгара айдып турзын деп кӱӱнзеп јат (Сар. 62:8). Оны мактап туругар ла оныҥ ончо эдип турган керектери учун быйаныгарды айдып туругар. Анайда ок јарлаар ишке јалтанбай туружарга, Иегованаҥ болуш сурагар. Бого коштой ченелтелерге тӱшпеске ле уур-кӱчтерди ӧдӧргӧ, база болуш сурагар. Иеговага јаантайын мӱргӱп турарга биске кем де, не де чаптыгын јетирбезин. w23.05 7, абз. 17, 18

Бис јуунныҥ туштажуларына нениҥ учун јӱредис? Бистиҥ тӧс амадубыс — Иегова Кудайысты мактаары (Сар. 26:12; 111:1). Анайда ок калганчы ӧйлӧрдиҥ кӱчтерин ӧдӧргӧ, бой-бойыбыстыҥ кӱӱнисти кӧдӱрери (1 Фес. 5:11). Оныҥ учун колдорысты кӧдӱрип, каруулар берип турзаас, бу эки амадуга јединедис. Је кезикте кӱчтер болордоҥ айабас. Темдектезе, кезик улус јартамалдар берерге коркып турган. А кезик улус кӧп јартамалдар берер кӱӱндӱ де болзо, ака олорды кӧп сурабай јат. Бу айалгаларда бис канайдарыс? Апостол Павел еврейлерге самара бичип, јуунныҥ туштажулары сӱреен јаан учурлу деп айдып, биске «бой-бойыбысты... сергиде[р]» керек деп кӱӱнзеткен. Айдарда, бистиҥ бӱткенисти кӧргӱзип турган тегин де јартамалдарыс ака-эјелердиҥ кӱӱнин кӧдӱрип турган деп оҥдоп турзаас, колысты кӧптӧдӧ кӧдӱрерис. Је бисти ас сурап турган болзо, карын ӧскӧ ака-эјелер каруулар берер аргалу болгонына сӱӱнерис (1 Пётр 3:8). w23.04 20, абз. 1—3

Каанныҥ јакарузы чыкты! Вавилондо олјодо 70 јыл кире јӱрген еврей албаты эмди Израильдӧӧн кайра јанар аргалу (Езд. 1:2—4). Мындый кайкалды Иегова эткен эмей. Не дезе, Вавилон олјого алган улузын качан да божотпойтон (Иса. 14:4, 17). Је бу учуралда, Вавилонныҥ империязы аҥтарыларда, јаҥга ӧскӧ каан келген. А бу каан еврейлерге тӧрӧл јериндӧӧн јанарга јараду берген. Кажы ла еврей кижиге, анчада ла билениҥ бажына, јеҥил эмес суракты шӱӱп сананар керек болгон: Вавилонноҥ јӱретен бе, јок по деп. Мындый тӱп-шӱӱлте эдерге, јеҥил эмес болгон болор. Вавилонноҥ чыгып јӱрерге, јажы јаанап калган улуска кӱч болгон. Анайда ок кӧп еврейлердиҥ балдары Вавилондо чыкканынаҥ улам Израиль олорго таныш эмес, јӱк ле ада-ӧбӧкӧлӧриниҥ јери болгон. Бого коштой Вавилондо кезик еврейлер байып та калган. Оныҥ учун олорго эптӱ тураларын ла јакшы ижин артыргызып, јӱре берерге јеҥил эмес болгон болор. w23.05 14, абз. 1, 2

Агару Бичик бистерди сӱӱшти, килемјини ле турумкай болорын тыҥытсын деп кӱӱнзедет. Лука 21:19-та (ЈТ): «Турумкай болуп, јӱрӱмигерди аргадап алыгар» — деп айдылат. А Колоссыдагыларга 3:12-де (ЈТ): «Килеерин... кийимди чилеп кийип алыгар» — деп айдылган. Анайда ок 1 Фессалоникадагыларга 4:9, 10-до: «Кудай бой-бойыгарды сӱӱрге ӱредип койгон ине. [...] Је слерди кычырып турубыс, карындаштар: бой-бойыгарды оноҥ тыҥ сӱӱгер» — деп бичилген. Бу сӧстӧр бу ӱч кылык-јаҥды јӱрӱминде кӧргӱскен чындык христиандарга айдылган. Је андый да болзо, олорго бу кылык-јаҥдарды оноҥ ло ары тыҥыдар керек болгон. Биске база анайып ла эдерге не болужар? Баштапкы чактыҥ христиандары бу ӱч кылык-јаҥныҥ кажызын ла канайып кӧргӱскенин шиҥдеп, бис олордоҥ кандый тем аларысты сананып кӧрӧр керек. Анайып, улу тӱбекке бис белен бе деп кӧрӱп ийерис. Ол тушта улу тӱбек башталар алдында, слерде ченелтелерди ӧдӧтӧн ченемел болор ло оноҥ ло ары турумкай артар аргалу болороор. w23.07 2, абз. 4; 3, абз. 8

Бис майлаткандардыҥ да, «ӧскӧ койлордыҥ» да тоозына кирип турган болзоос, бастырагыска бу «Агару јолдо» артар керек (Иоанн 10:16). Эм тургуза бу јол кӧгӱс райла барып јат. А келер ӧйдӧ бу јолло бис Каандыктыҥ ӧскӧ дӧ алкыштарына једип барарыс. 1919 јылдаҥ ала канча миллион эр де, ӱй де улус, балдар да Улу Вавилонноҥ, тӧгӱн кудай-јаҥныҥ телекейлик империязынаҥ, чыгып, бу «Агару јолго» туруп алган. Израильтяндар Вавилонноҥ чыгарда, Иегова олордыҥ јолын ончо буудактардаҥ арутап салган (Иса. 57:14). Је бӱгӱнги «Агару јол» керегинде нени айдарга јараар? Иегова 1919 јылга јетире оноҥ айап турган бир канча эр улусты тузаланган. (Исайя 40:3 тӱҥдештиригер.) Бу улус Улу Вавилонноҥ чыккан улуска ару бажырыш орныктырылып калган кӧгӱс райга киретен јол белетеген. w23.05 15—16, абз. 8, 9

Иегова бисти ого сӱӱнчилӱ ле акту јӱректеҥ иштезин деп кӱӱнзеп јат (2 Кор. 9:7). Амадубыска јединер кӱӱнис келбей турза, нени де этпей отурарыс па? Апостол Павел мынайып айткан: «Эди-канымды согуп, оны бойыма кул эдип јадым» (1 Кор. 9:25—27, сноска). Бу сӧстӧрлӧ болзо, Павелге јакшыны эдерге јеҥил эмес те болгон болзо, ол бастыра ийде-кӱчинеҥ албаданган. Иегова оныҥ эткен ижин јараткан ба? Эйе! Ол оны албаданганы учун кайрал јок артыргыспаган (2 Тим. 4:7, 8). Павелдиҥ темиле болзо, кӱӱнис јок то болзо, амадубыска јединерге албаданып турзаас, Иегова сӱӱнип јат. Бисти бого, эдип турган ижисти сӱӱгенис эмес, је оны сӱӱп турганыс кӱӱнзедип турза, ого јарап јат. Канайып Иегова Павелди алкыш јок артыргыспаган, анайып ла биске де алкыжын берер (Сар. 126:5). Мынаҥ бистиҥ кӱӱнис кӧдӱрилер. w23.05 29, абз. 9, 10

Апостол Павел Иегованыҥ кӱнинде аргадалбайтан улусты уйуктап јаткан улусла тӱҥдештирген. Андый улус айландыра не болуп турганын да, ӧйдиҥ ӧдӱжин де билбейдилер. Оныҥ учун чочыдылу не-не боло берзе де, олор керекке албайдылар. Анайып ла бӱгӱнги кӱнде кӧп саба улусты кӧгӱс јанынаҥ уйуктап јаткан деп айдарга јараар (Рим. 11:8). Олор бис калганчы кӱндерде јадып турганыс ла удабас ла улу тӱбек болор деп керелерди керекке албайдылар (2 Пётр 3:3, 4). Је бистерге кӱннеҥ кӱнге, алдындагызына кӧрӧ, оноҥ тыҥ сергелеҥ болор керек деп оҥдоп јадыс (1 Фес. 5:6). Оныҥ учун биске токуналу болуп, бу телекейдиҥ керектерине киришпес керек. Бу телекей бисти бойыныҥ керектерине кийдирерге албадаар болор эмезе политиканыҥ ла эл-јонныҥ сурактарына киришсин деп, јайа тартардаҥ да айабас. Иегованыҥ кӱни јууктаган сайын бисти там ла кыспактар. Је биске нени айдарына тыҥ санааркабас керек. Нениҥ учун дезе Кудайдыҥ агару тыны токуналу артарга ла ойгор болорго болужар (Лука 12:11, 12). w23.06 9—10, абз. 6, 7

Самсон деп атты уксаар, слер не керегинде сананадаар? Озо ло баштап, санаарда Иегованыҥ коркышту кӱчтӱ ишчизи јуралып турган болор. Эйе, Самсон андый ла болгон. Је бир катап ол јастыра јӧп чыгарганынаҥ улам јаан тӱбекке тӱшкен. Је андый да болзо, Иегова оны бойыныҥ чындык ишчизи деп кӧргӧн. Оныҥ учун ол керегинде Агару Бичикте бичилип калган. Иегова Самсон ажыра бойыныҥ албатызына, Израильге, болужарга, сӱреен кайкамчылу керектер эткен. Самсонныҥ божогоныныҥ кийнинеҥ, канча јӱс јылдар ӧдӱп каларда, Иегова апостол Павелди Самсонныҥ адын бӱдӱмјизи тыҥ улустыҥ тоозына кожуп салзын деген (Евр. 11:32—34). Самсон кӱч те ӧйлӧрдӧ Иеговага иженген. Кудайдыҥ бу ишчизинеҥ бис кӧп немеге ӱренип аларыс. w23.09 2, абз. 1, 2

Слер јаантайын јӱрегерде не барын ӱзе Кудайга ачып, мӱргӱп турзаар, оноҥ турумкай болуп калараар (1 Фес. 5:17). Је слерде эм тура кӱчтер болбой до турган болзо, бойоордоҥ мынайып сурагар: «Мен нени эдерин билбей де турган айалгада, санааркап турган тужымда, Иегова Кудайдаҥ болуш сурайдым ба?» Кандый да кӱчтер болуп турза, Кудайдаҥ болуш сурап ӱренип калган болзоор, слердиҥ јӱрӱмеерде тыҥ ченелтелер башталза, слерге Кудайга баштанарга јеҥил болор. Ол тушта Иегова качан ла канай болужарын билер деп, слер бир де алаҥзыбазаар (Сар. 27:1, 3). Нениҥ учун мынай айдарга јараар? Кӧп акалар мындый немени ајаруга алган: качан олор ченелте тужында турумкай артарда, база бир келген ченелтени ӧдӧргӧ олорго јеҥил болгон. А бу Иегова олордыҥ јанында ла ол олорго болужарга белен деп бӱдӱмјизин тыҥыткан. А бӱдӱмји болотон ченелтелерде турумкай артарга болушкан (Иак. 1:2—4). w23.07 3, абз. 7, 8

Иегованы керсӱ болорго, килемкей ле јобош болоры кӱӱнзедет. Темдектезе, Иегованыҥ јобош болгоны Содомды јоголтор тушта кӧрӱнген. Иегова ангелдер ажыра Лотты ла оныҥ билезин кырлардӧӧн качсын деп јакарган. А Лот коркый береле, јанындагы јаан эмес Цоар деп каладӧӧн качайын деп, Иегованы јайнай берген. А Иегова Цоарды база јоголторго сананган болгон. Иегова Лоттоҥ оныҥ айтканын чике бӱдӱрзин деп некеер аргалу болгон, је ол оной этпеген. Ол Цоарды јоголтпой, Лоттыҥ сураганын бӱдӱрип салган (Баш. 19:18—22). Канча јӱс јылдар ӧткӧн кийнинде Иегова Ниневияныҥ албатызын база килеген. Ол судурчы Ионаны, Ниневия ла оныҥ албатызы јоголтылар деп, јар айтсын деп ийген. Је Ниневияныҥ албатызы кинчегин алынып ийерде, Иегова олорды тирӱ артыргызып салган (Иона 3:1, 10; 4:10, 11). w23.07 21, абз. 5

Бис Иоастыҥ теминеҥ неге ӱренедис? Иоас тӱрткӱшле тӱркӱштеп салган тазылы тереҥ эмес агашка тӱҥей болгон. Тӱрткӱш болгон Иодай јок болуп каларда ла, Кудайдаҥ јана баскандардаҥ «салкын» келерде, Иоас аҥтарылып калган. Бу темле болзо, Кудайдаҥ айап јӱрери јӱк ле ака-эјелердиҥ ол эмезе билениҥ болужынаҥ камаанду болбос учурлу. Оныҥ учун кӧгӱс јанынаҥ бек болорго, кажы ла кижи бойы Кудайга чындык болуп, оноҥ айап јӱрер учурлу. Анайда эдерге јаантайын Агару Бичикти шиҥдеп, шӱӱп сананып мӱргӱӱр керек (Иер. 17:7, 8; Кол. 2:6, 7). Иегова бистеҥ ӧткӱре кӧпти некебей јат. Оныҥ некелтелери Экклезиаст 12:13-те јарт айдылып калган: «Чындык Кудайдаҥ айап, оныҥ јакылталарын бӱдӱрип јӱр. Кижиниҥ јӱрӱминде бу эҥ ле керектӱзи». Кудайдаҥ айап јӱрзеес, келер ӧйдӧги ченелтелерди ӧдӱп чыгарыс ла Кудайга чындык артарыс. Ол тушта Иеговала бистиҥ колбуларысты кем де, не де бузып болбос. w23.06 19, абз. 17—19

Бу ӱлгер мынайып башталат: «Ширееде Отурганы айткан» (Ачыл. 21:5а). Ачылта деп бичикте Иегова та кем де ажыра эмес, је бойы айткан јӱк ле ӱч учурал бичилген. Бу олордыҥ бирӱзи болот. Андый болордо, бу сӧстӧрди ангел де, тирилип келген Иисус та эмес, је Иегова бойы айткан. Айдарда, оноҥ ары бичилген сӧстӧргӧ бӱдерге јараар. Нениҥ учун? Нениҥ учун дезе Иегова «тӧгӱндебес Кудай» (Тит. 1:2). 5-чи ӱлгердиҥ бажы Ачылта 21:5, 6-да бичилген сӧстӧргӧ бӱдерге јараар деп кӧргӱзет. Оригиналда бу сӧстӧрдӧҥ озо «кӧр» ол эмезе «ук» деп кӧчӱрилген сӧс турат. Бу сӧс Ачылтада кӧп катап туштайт. Оноҥ ары кандый сӧстӧр кычырадыс? Ајарзаар да, Иегова мында «јайаарым» эмес, је «јайап јадым» деп айткан. Мында Кудай келер ӧйдӧ эдетен немелерди бӱгӱнги ле кӱнде эдип турган этире айдат. Айдарда, ол бойыныҥ берген сӧзин бӱдӱреринде бир де алаҥзыбай турганын кӧрӧдис (Иса. 46:10). w23.11 3, абз. 7, 8

Апостол Пётр бойыныҥ једикпестеринеҥ улам шыралап туратан. Бир канча учуралдар кӧрӱп ийектер. Темдектезе, Иисус ого Агару Бичикте айдылганыла, шыралап ӧлӧр учурлу деп айдарда, Пётр оныла ондый неме болбос деген (Марк 8:31—33). Анайда ок ол до, ӧскӧ дӧ апостолдор олордыҥ ортозында кем эҥ ле јаан деп, кӧп катап сӧс блаажып туратан (Марк 9:33, 34). А бир катап, Иисус божоор тӱнде, Пётр баш билинип, колына кылышты алала, бир кижиниҥ кулагын кезе чабып ийген (Иоанн 18:10). Ол ло тӱнде, Пётр Иисустыҥ јуук најызы да болгон болзо, коркыйла, ӱч катап оны билбезим деп айткан (Марк 14:66—72). Мынаҥ улам ол ачу ыйлаган. Је Иисус бойыныҥ апостолынаҥ чӧкӧбӧгӧн. Пётр оны сӱӱген деп, ол билген. Анайда ок ого сӱӱжин кӧргӱзер арга берген. Тирилген кийнинеҥ, Иисус Пётрга јолугып: «Койлорымды кабыр» — деп айткан. Пётр Иисустыҥ айтканын бӱдӱрерге белен болгон (Иоанн 21:15—17). Иерусалимде, Беженинчи кӱнинде, баштапкы катап агару тын ӱренчиктерге урулып турарда, Пётр олордыҥ ортозында болгон. w23.09 22, абз. 6, 7

Апостол Пётр аксагалдарды Кудайдыҥ ӱӱрин кабырзын деп айткан (1 Пётр 5:1—4, ЈТ). Кару аксагал, сен ака-эјелериҥди сӱӱп тургаҥ ла олорды кичеерге кӱӱнзеп тургаҥ деп алаҥзыбай јадыс. Је кезикте керектердиҥ кӧбинеҥ улам эмезе арыганыҥнаҥ улам сеге бойыҥныҥ молјуларыҥды бӱдӱрерге келишпей турган деп билдирердеҥ айабас. Мындый айалгада нени эдер? Бойыҥныҥ санааркаштарыҥды Иеговага куучында. Пётр бичиген: Ӧскӧ улуска иштеп турган кижи «Кудай берип турган кӱчле иштезин» (1 Пётр 4:11). Бӱгӱнги кӱнде ака-эјелердиҥ туштап турган кезик кӱчтери јӱк ле јаҥы телекейде јоголор. Је ундыба, Иисус, «эҥ јаан кӱдӱчи», олорго сениҥ эдип болбос немеҥди эдип ийер аргалу. Та нени де ол эмди эдип ийер, а та нени де — келер ӧйдӧ. А Иегова аксагалдардаҥ, олор ака-эјелерди сӱӱп турзын, кичееп турзын ла олорго тем болзын деп сакып јат. w23.09 30, абз. 13, 14

Биске улустыҥ кӧрӱм-санаазыла јӱрбес керек. Оноҥ башка Иегованыҥ ла оныҥ нормаларын араайынаҥ ундып саларыс (1 Кор. 3:19, ЈТ). «Бу телекейдиҥ ойгоры» улусты Кудайга удура барзын деп кӱӱнзедет. Пергамдагы ла Фиатирдеги кезик христиандар кирлӱ јӱрӱм јӱрӱп турган ла чалуларга бажырып турган улустыҥ кӧрӱмине кирип калган. Оныҥ учун Иисус бу эки јуунга кирлӱ, балыр јӱрӱмин токтотсын деп јӧп берген (Ачыл. 2:14, 20). Бӱгӱнги кӱнде бу телекей бистиҥ санаабысты база булгаарга албаданат. Тӧрӧӧндӧрис эмезе кӧрӱш-таныштарыс бисти уйадыска удура кандый бир кинчек эдип ийзин деп кӱӱнзедердеҥ айабас. Темдектезе, олор биске: «Агару Бичиктиҥ нормалары туку качан эскирип калган. Сен оны кайдарга туруҥ. Бойыҥныҥ јӱрегиҥди ук» — деп айдыжат. А кезикте бис Иегованыҥ јакарулары јарт эмес деп сананардаҥ айабазыс. Оныҥ учун бичилгениниҥ ӱстине кожуп ийер кӱӱнис келер болор (1 Кор. 4:6). w23.07 16, абз. 10, 11

Марияга, Иисустыҥ энезине, Иегованыҥ кӱӱн-табын бӱдӱрерге ийде-кӱч керек болгон. Гавриил деп ангелдеҥ ол кижиге баргалакта табынып алар деп билип ийген. Марияда балдар таскадар ченемел де јок болгон. А эмди ого Мессия болор баланы чыдадар керек. Бого коштой, Иосифке ӱзе мыны јартаар керек болгон. Ол эр кижиле конголокто табынып алганын канайып јартады не? (Лука 1:26—33). Мария ийде-кӱчти кайдаҥ алды? Ол болушты ӧскӧ улустаҥ бедиреген. Озо баштап Мария Гавриилди бу јакылтаны кӧптӧдӧ јартап берзин деп сурады (Лука 1:34). Оныҥ кийнинде, ол «Иудеяныҥ кырларындагы каладӧӧн» Елизавета тӧрӧӧнине барды. Нениҥ учун дезе Елизавета Марияны мактайла, агару тынга баштадып, оныҥ келер ӧйдӧ чыгатан уулы керегинде судур айткан (Лука 1:39—45). Мария ого Иегова «бойыныҥ колыла улу неме этти» деп айтты (Лука 1:46—51). Гавриил ле Елизавета ажыра Иегова Марияга ийде-кӱч берди. w23.10 15, абз. 11, 12

Агару тынла майлаткан 144 000 Христосло кожо теҥериде абыстар болуп иштеер (Ачыл. 14:1). Иегова олорды јерде јаткан тужында майлап, бойыныҥ балдары эдип алат. Агару байканныҥ агару кыбы олордыҥ Иеговала аҥылу колбуларын темдектейт (Рим. 8:15—17). Агарудаҥ агару кып Иегованыҥ теҥериде јадып турган јерин темдектейт. «Кӧжӧгӧ» дезе Иисус Христостыҥ эди-каны болот. Качан Иисус јерде болордо, ондо теҥери барар аргазы јок болгон. Је Иисус Христос эди-канын албаты учун тайылгага берип, теҥериге барган кийнинде бастыра майлаткандарга јол ачкан. Майлаткандарга теҥеридеги кайралын аларга, эди-канынаҥ база айрылар керек (Евр. 10:19, 20; 1 Кор. 15:50). w23.10 28, абз. 13

Ефремляндар Гедеонды јамандап турарда, ол олорго ачынбай, јымжак каруу берген (Јарг. 8:1—3). Гедеон олордыҥ комыдалын угуп, олорды токунадып салган. Ойгор христиандар Гедеонноҥ тем алып, ака-эјелердиҥ комыдалын угуп, јымжак каруу берер аргалу (Иак. 3:13). Анайып, јуунныҥ амыры бузылбас. Улус Гедеонды мадиандарды јеҥип алганы учун мактаарда, ол бастыра макты Иеговага јетирген (Јарг. 8:22, 23). Аксагалдар мынаҥ неге ӱренер аргалу? Слерге нени-нени эдерге јакшы келижип турган болзо, бастыра макты Иеговага јетиригер (1 Кор. 4:6, 7). Темдектезе, улус аксагалды јакшы ӱредӱчи деп мактап турза, ол: «Бис ончобыс Кудайыҥ Сӧзинеҥ ӱренедис, ончобысты Иегованыҥ организациязы ӱредет» — деп айдар аргалу. Аксагалга кезикте: «Мен бойыма ӧйинеҥ ӧткӱре ајару этпей тургам ба?» — деп сананып турар керек. w23.06 4, абз. 7, 8

Бис мӱргӱӱлдериске каруулар албай турган болзоос, бойыска мындый сурак берерге јараар: «Меге керектӱ немени мен чын этире сурап тургам ба?» Кӧп сабада биске не јакшы болорын билерис деп сананадыс. Је чынынча болзо, биске эҥ ле јакшы не болорын Иегова билер. А кезикте бистиҥ сураганыс Иегованыҥ табынаҥ чек башка болот (1 Иоанн 5:14). Темдектезе, ада-эне Иегованы балазы чындыкта артып калзын деп сурагылап јат. Бир јанынаҥ кӧрзӧ, мынайып сураганында јастыра неме јок ошкош. Је Иегова кемди де ого иштезин деп албадабай јат. Ол бистиҥ ончобысты, ол тоодо балдарды, ого бажырарын бойы талдазын деп кӱӱнзейт (Јаҥ. т. 10:12, 13; 30:19, 20). Оныҥ учун ада-энелерге Иегованаҥ балазыныҥ јӱрегин томултарга болушсын деп сураар керек. Анайып, олор бойыныҥ кызына эмезе уулына Иегованы сӱӱрге ле оныҥ најызы болуп каларга болужып берер (Укаа 22:6; Эф. 6:4). w23.11 21, абз. 5; 23, абз. 12

Нениҥ учун токунадары — сӱӱжисти кӧргӱзетен сӱреен јакшы арга болот? Бир библиялык справочникте айдылганыла болзо, «токунадары» деп кӧчӱрилген сӧс, тӱбекке тӱшкен кижиниҥ јанында болорын темдектейт. Айдарда, кӱч айалгага туштаган кижини токунадып турзаас, оныҥ кӱӱнин кӧдӱредис ле Кудайга чындык артарга болужадыс. Санааркап јӱрген ака-эјелеристи кажы ла катап токунадып турзаас, олорго сӱӱжисти кӧргӱзедис (2 Кор. 7:6, 7, 13). Килемји ле токунал бой-бойыла јуук колбулу болот. Ачу-коронго тӱшкен кижини бис килеп, токунадарга албаданадыс. Ӧскӧртӧ айтса, озо килеп јадыс, оноҥ токунададыс. Мынайып ла ок Кудай шыралап јӱрген улусты сергидип, токунадып јат. Оныҥ учун апостол Павел Иегованы «буурзак Ада» ла «кандый ла токунал береечи Кудай» деп бичийт (2 Кор. 1:3, ЈТ). w23.11 9—10, абз. 8—10

Кажы ла христиан кижиниҥ јӱрӱминде кыйын-шыра болор. Павелдиҥ темин кӧрӱп ийектер. Ол Фессалоникадагы акаларга мындый сӧстӧр бичиген: «Слерде болорыста, шыралаарыс деп, слерге озолондыра айтканыс. Андый ла болуп калды, оны билеригер» (1 Фес. 3:4). А Коринфтеги христиандарга мындый сӧстӧр бичиген: «Карындаштар... бисле болгон уур-кӱчтеристи билигер дейдис... Тирӱ артарыска иженбегенис» (2 Кор. 1:8; 11:23—27). Христиан кижиниҥ јолында коркышту кӧп кӱчтер болот (2 Тим. 3:12). Иисустыҥ кийнинеҥ барарга шӱӱп алганаардаҥ улам слерге најылараар, тӧрӧӧндӧрӧӧр каткырышкан болор. Керек дезе кату да баштанган болор. Эмезе иште тӧгӱндебей турараарда, кӱчтер башталган болор (Евр. 13:18). Ол эмезе ижемјигерди куучындап турараарда, ороонныҥ јаҥдары слерди истежип турган болор. Павелдиҥ айтканыла, кандый да кӱчтер болуп турган болзо, биске сӱӱнер керек. w23.12 10, абз. 9, 10

Иаковто кӱчтер ас эмес болгон. Оныҥ Симеон ло Левий деп уулдары билезиниҥ јаман адын чыгарган ла Иегова Кудайдыҥ адын уйатка тӱжӱрген. Бого коштой оныҥ сӱӱген ӱйи Рахиль, экинчи бала чыгарып јадала божоп калды. Оныҥ ӱстине, јадып турган јеринде торо башталарда, карып калган Иаковко Египеттӧӧн кӧчӧргӧ келишкен (Баш. 35:16—19; 37:28; 45:9—11, 28). Мындый кӱчтер де болгон болзо, Иаков Иеговага ла оныҥ берген сӧзине бӱткен. А Иегова дезе, ого јарадузын кӧргӱзип туратан. Темдектезе, Иегова оны кӧп јӧӧжӧлӧ алкаган. А узак јылдардыҥ туркунына божоп калган деп бодогон Иосифке јолыкканы учун Иеговага ол јаан быйанду болгон болор. Бу ончо ченелтелерди ӧдӧргӧ Иаковко не болушкан? Иеговага јуук најы болгоны болушкан (Баш. 30:43; 32:9, 10; 46:28—30). Бис те Иегованыҥ јуук најызы болзоос, јӱрӱмисте сакыбаган јанынаҥ болуп турган кӱчтерди ӧдӱп чыгарыс. w23.04 15, абз. 6, 7

23-чи Сарын — ол кожоҥ. Бу кожоҥныҥ кажы ла сӧзинеҥ Давидтиҥ Иегованыҥ сӱӱжине ле болужына алаҥзыбай турганы кӧрӱнет. Давид Иегованы мениҥ Кӱдӱчим деп айдат. Мынаҥ Давидтиҥ Иеговала јуук колбулары кӧрӱнет. Давид Иеговага бир де алаҥзыбай бӱткен. Оныҥ учун оныҥ јолыла барарга бир де коркыбаган. Иегова Давидти јажын-чакка сӱӱр, оныҥ сӱӱжи бир де ӧтпӧс деп, Давид билген. Нениҥ учун Давид Иегованыҥ сӱӱжине бир де алаҥзыбаган? Давид, Иегова ого сӱреен кӧп болужып турган деп ле не керектӱзин кажы ла кӱн берип турган деп кӧрӱп туратан. Анайда ок ол Иеговала кожо јуук колбуларлу болгонын ла оны сӱӱндирип турганын билер болгон. Мынаҥ улам Давид, не де болотон болзо, Иегова оны бир де артыргыспас, оноҥ ло ары сӱӱр деп алаҥзыбаган. Оныҥ учун ол неге де санааркабай, токуналу јӱретен (Сар. 16:11). w24.01 29, абз. 12, 13

Экинчи телекейлик јуу-согуш токтой берерде, Иегованыҥ Керечилери кӧп-кӧп јерлерде јайым јарлап баштагандар. Оноҥ улам кӧп улус Иегова керегинде билип алган. Анайып, Каандык керегинде јар бӱгӱнги кӱнде бастыра јердиҥ ӱстинде јарлалат. Бӱгӱнги кӱнде Башкару јӧп оноҥ ло ары Христоско багынат. Оныҥ учун олордыҥ ака-эјелерге берип турган башкартулары Иегованыҥ ла Христостыҥ кӧрӱмине чике келижип турзын деп албаданат. А аймак кӧрӧӧчилер ле аксагалдар јуундарга башкартулар берет. Майлаткан аксагалдар дезе — ол тоодо јуундардагы ончо аксагалдар — Христостыҥ «оҥ колында» болот (Ачыл. 2:1). Бу акалардыҥ кемизи де толо кеминде эмес, кезикте олор јастырып јат. Моисей де, Иисус Навин де, апостолдор до јастырып туратан (Тоол. 20:12; Иис. Н. 9:14, 15; Рим. 3:23). Је андый да болзо, Иисус бӱдӱмјилӱ кулды ла аксагалдарды тузаланып турган. Ол олорды оноҥ ло ары тузаланар. Оныҥ учун кӧстӧлгӧн акалардыҥ башкартуларына бӱтпес аргабыс јок. w24.02 23—24, абз. 13, 14

Иегова керегинде куучыныс јылу, быйанду, сӱӱжисти кӧргӱзип турган болзо, Кудайысты сӱӱндирип јадыс. Јарлаар иштиҥ эҥ ле јаан амадузы — улусты Кудайга јууктадары деп ундыбай јадыс (Иак. 4:8). Бис улусты Иеговага бис ле чилеп јуук болзын деп кӱӱнзеп јадыс. Биске Агару Бичиктеҥ Иегованыҥ сӱӱжин, справедливый болгонын, ойгорын, ийде-кӱчин ле оноҥ до ӧскӧ кылык-јаҥдарын улуска кӧргӱзерге сӱреен јарап јат. Анайда ок кажы ла кӱн Иегованыҥ темиле јӱрӱп турзаас, Кудайысты сӱӱндирип јадыс. Мынаҥ улам улус бисти бу телекейдеҥ башка болгонысты кӧрӱп, шылтагын билерге сураар болор (Матф. 5:14—16). Ол тушта бисте олорго бу суракты јартап беретен арга ачылар. Анайып акту јӱректӱ улус Иеговага најы болуп калар. Бис јарлаар ижисле, кылык-јаҥысла Иегованы мактап турзаас, Кудайыс сӱӱнер (1 Тим. 2:3, 4). w24.02 10, абз. 7

Кӧгӱзи тереҥ болорго, сеге јӱрӱмге керектӱ немелерге ӱренип алар керек. Олор сеге јуунда берилген јакылталарды бӱдӱрерге ле бойыҥды ла билеҥди јеткилдейтен иш табып аларга, анайда ок улусла јакшы колбуларлу болорго болужар. Темдектезе, јакшы кычырып ла бичип ӱрен. Агару Бичикте Кудайдыҥ Сӧзин кажы ла кӱн кычырып, шӱӱп сананып турган кижи ырысту ла једимдӱ болор деп айдылат (Сар. 1:1—3). Ол бичикти кажы ла кӱн кычырып турганыҥ сеге Иегованыҥ кӧрӱмин алынарга болужар. Анайып сен кандый бир јӧп чыгарар тушта бойыҥныҥ кӧрӱмиҥле эмес, је Агару Бичиктиҥ принциптериле башкарынарыҥ (Укаа 1:3, 4). Јуундагы ака-эјелерди ӱредер ле Агару Бичикле таскадар керек болуп јат. Сен јакшы кычырып ла бичип билер болзоҥ, кӧдӱриҥилӱ куучын-эрмектериҥ ле јартамалдарыҥ олордыҥ бӱдӱмјизин тыҥыдар аргалу. Анайда ок сен тузалу шӱӱлтелерди кыскарта бичип алар аргалу. Бу бойыҥныҥ бӱдӱмјиҥди тыҥыдар ла улуска болужарга керектӱ болор. w23.12 26—27, абз. 9—11

Коркып турзаар, Иегова слерге келер ӧйдӧ нени эдерин шӱӱп сананыгар. Райда јӱрӱм сӱреен јакшы болор, Сатана јок деп сананып ийзеер. 2014 јылдыҥ регион курултайында болгон инсценировкада, адазы бойыныҥ билезиле 2 Тимофейге 3:1—5-теги сӧстӧрди райдагы јӱрӱм керегинде айдылганы этире кычыргандар: «Билип јӱр келер ӧйдӧ сӱӱнчилӱ ӧйлӧр келер. Улус бой-бойын сӱӱр, Кудайды сӱӱр, бойыныҥ кемин билер болор, јобош болор, Кудайды мактаар, ада-энезиниҥ сӧзин угар, быйанду болор, бойыныҥ сӧзине турар, јалакай болор, улусты сӱӱп, олорло эптӱ-јӧптӱ јӱрер, улусты јамандабас, бойын тудунып билер болор, јымжак болор, јакшыны сӱӱр, бӱдӱмјилӱ болор, ӧчӧшпӧс, бийиркенбес, Кудайды соот-јыргалдаҥ артык сӱӱр, акту јӱрегинеҥ Кудайга чындык болор. Андый улусла најылаш». А слер билегерле эмезе најылараарла кожо райдагы јӱрӱм керегинде куучындажып турганаар ба? w24.01 6, абз. 13, 14

Иегова бойыныҥ чындык ишчилерин сӱреен баалап турган деп, бир де алаҥзыбай јадыс. Агару Бичикте айдылганыла, «Иегова бойыныҥ албатызын кӧрӱп сӱӱнет» (Сар. 149:4). Андый да болзо, кем-кем Иегова мени сӱӱбей турган деп айдардаҥ айабас. Мындый санаалар јебрен ӧйдӧ Кудайдыҥ чындык ишчилеринде де болгон (1 Сам. 1:6—10; Иов 29:2, 4; Сар. 51:11). Је Агару Бичиктеҥ толо кемдӱ эмес улус Иегованыҥ јарадузын алар аргалу деп јарт кӧрӱнет. Је Кудайдыҥ јарадузын аларга нени эдер керек? Иисус Христоско бӱдер керек ле сууга чӧҥӱрилер керек (Иоанн 3:16). Слер бу алтамдарды эткенеерле кинчектереерди алынганаарды ла оныҥ табын бӱдӱрерге белен болгоноорды кӧргӱскенеер (Ап. ижи 2:38; 3:19). Иегова андый керектереерди кӧрӱп, сӱреен тыҥ сӱӱнип јат. Анайда ок слер учурланганаар аайынча јӱрӱп турзаар, ол слерди баалап, бойыныҥ јуук најылары деп кӧрӧт (Сар. 25:14). w24.03 26, абз. 1, 2

Бис Иисустыҥ ӱренчиктери ле чилеп, јарлаар иш токтодуда да болзо, оноҥ ло ары јалтанбай јарлаар аргалу. Иегованаҥ јалтанбас ла ойгор болорго болуш сурап турзаас, ол биске оныҥ јакылтазын бӱдӱрерге болужар деп, бис бир де алаҥзыбас аргалу. Анайда ок кӱчтерди ӧдӧргӧ, Иегованаҥ болуш сурагар. Бистиҥ кӧп сабагыс эмоциональный ла физический јанынаҥ ооруп јат, јууктарын јылыйтат, эмезе истежӱлерге табартат ла оноҥ до ӧскӧ кӱчтерге туштайт. Мыныҥ ӱстине ар-бӱткенниҥ тӱбеги, пандемия ла јуу-чак болзо, бу кӱчтерди ӧдӧргӧ оноҥ кӱч боло берет. Мындый айалгаларда санааркаардыҥ эмезе бойоорго иженердиҥ ордына, карын Иеговага, јуук најыгарга чылап, сезимдереерди ачыгынча куучындагар. Бир де алаҥзыбагар: Иегова слерге болужар (Сар. 37:3, 5). Бис Иеговага јаантайын мӱргӱп турзаас, ол биске «ачу-корондо чыдамкай бол[орго]» болужар (Рим. 12:12). Иегова ишчилериниҥ кӱчтерин билер. Агару Бичикте айдылганыла, Иегова олордыҥ «болуш сураган кыйгызын угат» (Сар. 145:18, 19). w23.05 5—6, абз. 12—15

Јаан учурлу тӱп-шӱӱлте эдердеҥ озо, «Кудайга не јарап турганын» билип алар керек, оноҥ анайып ла эдер керек (Эф. 5:17). А Кудайдыҥ кӧрӱмин канайып билип алар? Озо баштап, бистиҥ айалгага келижип турган библиялык принциптер табып алар керек. Оноҥ бу принциптер аайынча этсеес, бисте јакшы једимдер болор аргалу. Нениҥ учун дезе бистиҥ ӧштӱбис, Дьявол, Кудайга иштеерине ле оныла колбуларысты тыҥыдарга ӧй артпазын деп, бу телекейдиҥ керектерине бажысты сугуп салзын деп кӱӱнзейт (1 Иоанн 5:19). Темдектезе, христиан кижи акча-манат иштеерин, ӱредӱ аларын, ол эмезе карьераны баштапкы јерге тургузып ийердеҥ айабас. Је андый кижи бу телекейдиҥ кӧрӱм-санаазыла корондолып калган деп кӧрӱнер. Ӧрӧги айдылган немелерде јаман неме јок то болзо, андый керектер бойыныҥ јеринде турар учурлу. w24.03 24, абз. 16, 17