Dwi mir 4

Kepenjiri kumae: ‘Ka jubemiyo ira juk, nyo abed ajolo jukne? Nyo abed ayiyo kosa para pio pio kunoke abed apimo nicero bang’a? Nyo aloko lembene iwi jumange?’ Kan ibesomo lembe iwi jumange ma co ku ma mon ma jukiewo pigi i Biblia, nen kite ma ginyego ko ku kit peko mir ayi maeno. Kan ibesomo lembe iwi ng’atuman, penjiri kumae: ‘Acopo bedo ve jaratic pa Yehova maeni nenedi?’ Wacopo nwang’u bende ponji ka wabeneno lapor mi juyic wadwa m’aradu ku judongo ceke. Ku lapor, nyo ng’atu moko nuti i cokiri peri, m’ubeciro abidhe mir awiya wadi, ragedo ma jubenyayu i kume i pacu, kunoke nyo remo kumi? Nyo ibeneno kite ma beco m’ebenyutho, ma in de icopo maru ilubi? Kan iketho wii i kum lapor ma ber m’ebenyutho, icopo nwang’u ponji ma romo konyi niciro peko peri de. Wabedwoko foyofoc lee pilembe watie kud umego ku nyimego maeno ma gibenyutho iwa lapor ma ber mi yiyoyic!—Ebr. 13:7. w22.04 mba. 13 udu. 13-14

Tek wabenwang’ara ku peko moko i kwo mwa, wafoyo ka jadit cokiri moko ubewinjowa man ubejuko cwinywa kinde ma wabekoro ire lembene. Ka watie ku yeny mi kony iwi ayi mi telo wi ponji mi Biblia, wamaru ka jayab yo moko ma jabodho uyiyo nitelo wi ponji karacelo kudwa man ninyutho iwa kaka ma wacopo yiko. Umego ku nyimego eno ceke anyong’a negogi ka gibekonyowa. Wacopo nwang’u anyong’a ka wabemiyara nitimo ni umego mwa. Kan ibemito imed tic peri i ayi ma kumeno kunoke i ayi mange, ang’o ma copo konyi nitundo i kum lembakecane? Bed ku weng’i, kud icok lembakeca ng’aa i weng’i. Ku lapor, icopo maru nia itim lee i cokiri peri. Re kan icoko lembakeca ng’aa, ebibedo iri tek ning’eyo ayi m’itund ko i kumgi, man ning’eyo nia idaru tundo i kumgi de copo bedo iri tek. Pieno, ng’ii lembakeca ma tap m’imito tundo i kume. Icopo kiewo lembakecane akiewa man ipangu kite m’icopo tundo ko i kume. w22.04 mba. 25 udu. 12-13

Tin Yehova ubecoko “udul ma dit” man ebeponjogi nibedo lwak mi Ker pare. (Nyu. 7:9, 10) Kadok tin ng’om upokere nikum adegi man lwiny, re “udul ma dit” maeno gibetimo tego nivoyo akoyakoya mi thek, mi suru, man adegi ceke. Timo migi ubenyutho nia gidaru thiedho palamularu migi ni kwejdhiang’. (Mik. 4:3) Kakare nidikiri i lwiny m’ubenego dhanu dupa, gin gibeponjo dhanu ning’eyo Mungu mandha ku lembakeca pare, kara ginwang’ “kwo mandha.” (1 Tim. 6:19) Jumoko nyo wedi migi ubenyayu ragedo i kumgi kunoke gikoso sente pilembe gibediko cing’gi i kum Ker pa Mungu, re Yehova ubewekogi ngo, eketho gibenwang’u gin ma gitie ku yenyne. (Mat. 6:25, 30-33; Luka 18:29, 30) Lembe maeno ubenyutho nia Ker pa Mungu utie gin m’unuti andha, man nia ebimedere nipong’o lembakeca pa Yehova. w22.12 mba. 5 udu. 13

I thum mi oro 1000, dhanu ceke ma gibekwo iwi ng’om gibidoko ku kum ma leng’ m’umbe dubo. Dubo ma walagu i bang’ Adamu bibedo mbe ku tego iwi ng’atu moko acel de. (Rum. 5:12) Jubikabu peko ceke ma dubo p’Adamu unyayu. Eno ubenyutho nia ju ma gibikwo iwi ng’om ‘gibicer,’ niwacu gibidoko ku kum ma leng’ i thum mi oro 1000. (Nyu. 20:5) Wang’eyo nia Yesu ugam ugwoko bedoleng’ pare ni Mungu kadok kinde ma Sitani ukethe i amulaic ma tek de. Nyo dhanu ceke m’udaru doko ku kum ma leng’ bitimo lembe ma rom kinde ma Sitani bikethogi i amulaici? Ng’atuman bidwoko wang’ penji eno gire i thum mi oro 1000 kinde ma jubigonyo Sitani kud i longoro ma there mbe. (Nyu. 20:7) Ju ma gibigwoko bedoleng’ migi i amulaic ma tokcen eno, gibinwang’u kwo ma rondo ku rondo man bedagonya mandha. (Rum. 8:21) Ju ma gibijai ni Yehova, jubinyothogi mi magwei.—Nyu. 20:8-10. w22.05 mba. 19 udu. 18-19

Lembila maeno upong’o kinde ma Sitani utiyo ku Juyahudi man Juroma pi ninego Wod Mungu. (Luka 23:13, 20-24) Tap calu ma ka ng’atini unwang’u ret ebedo ire tek niwotho pi nindo moko, kumeno bende Yesu de ubino mbe ku copo mi timo lembe moko ci kinde m’ebino i liel pi nindo adek. (Mat. 16:21) Lembila mi Thangambere 3:15 unyutho nia Yesu bibedo ngo magwei i liel. Pirang’o? Pilembe nimakere ku lembilane, kodhi pa dhaku binyono kunoke bing’enyo wi thwol. Eno ubenyutho nia ret ma Yesu unwang’u ucikere nikey, niwacu ebicer kud i liel. De andha ecer! Kinde m’etho, i nindo mir adege ecer ni giracwiya mi tipo ma tho ngo. Yesu bing’enyo wi Sitani cen pi ninyothe i nindo ma Mungu uketho. (Ebr. 2:14) Kristu karacelo ku dhanu m’ebibimo kugi, gibinyotho judegi pa Mungu ceke kum gi nyikway thwol.—Nyu. 17:14; 20:4, 10. w22.07 mba. 16 udu. 11-12

Junyodo, wukony awiya mwu ginwang’ jurimo ma beco. Lembe pa Mungu unyutho kamaleng’ nia jurimbwa romo bedo ku matoke ma ber kunoke ma rac i wiwa. Nyo wung’eyo jurimb awiya mwu? Wucopo timo ang’o pi nikonyo awiya mwu kara ginwang’ jurimo i kind dhanu m’umaru Yehova? (1 Kor. 15:33) Wuromo konyogi ninwang’u jurimo ma beco nwang’u wucuku lwong’o dhanu ma gitie ku winjiri ma ceng’ini ku Yehova nidikiri kudwu i lembe ma tung’ tung’. (Zab. 119:63) Wego moko ma nyinge Tony ukoro kumae: “Pi oro ma dupa, waku min ot para wabed walwong’o umego ku nyimego m’aradu ku m’uteng’ini ceke i bang’wa. Wacamu cam karacelo kugi man wadikara kugi i thier mwa mi juruot. Eno tie yo ma ber mandha ma jung’eyo ko dhanu m’umaru Yehova man m’ubetimo ire kud anyong’a. . . . Amora migi man tic ma tek ma gitimo ni Yehova ma gikoro pire, ukonyo awiya mwa nicoro ceng’ini ku Yehova.” w22.05 mba. 29-30 udu. 14-15

Kinde ma judong cokiri gibeweco ku jadubo moko, lembakeca migi utie nitundo i kum yub ma rom ku m’udaru makere i polo. Lembuno miyo bero ma kani ni cokiri? Eno ketho jukoyo cen jadubo m’uloko ngo cwinye kud i cokiri kara kud enyoth rombe pa Yehova ma pigi tek. (1 Kor. 5:6, 7, 11-13; Tito 3:10, 11) Yub maeno copo konyo bende jadubo niloko cwinye kara enwang’ kisa pa Yehova. (Luka 5:32) Judong cokiri girwo pi jadubo m’uloko cwinye man gikwayu Yehova ukonye eyik kindgi m’unyothere kude. (Yak. 5:15) Wakemak nia judong cokiri ginwang’u nia jadubo moko uloko ngo cwinye. Saa maeno jubikoye cen kud i cokiri. Re i ng’eye, tek ng’atune unwang’u nia gin m’etimo utie rac man ewilo paru ku timo pare, Yehova tie ayika niweko ire. (Luka 15:17-24) Yehova copo timo ire kisa kadok nwang’u etimo dubo ma pek lee de.—2 Kei. 33:9, 12, 13; 1 Tim. 1:15. w22.06 mba. 9 udu. 5-6

Ku kony pa Yehova, jurutic pare i wang’ ng’om zoo givoyo peko ma ginwang’iri ko i kwo migi man gicungo ma tek i wang’ jai pa Sitani. (1 Pet. 5:9) In de icopo timo kumeno. Ceng’ini eni, Yehova bimiyo telowic ni Yesu karacelo ku dhanu m’ebibimo kugi “pi nirungo tic pa Wonabali.” (1 Yoh. 3:8) I ng’eye, dhanu ma gibetimo ni Mungu iwi ng’om, ‘lworo binegogi ngo; [kadok] ndiri.’ (Isa. 54:14; Mik. 4:4) Ento pi kawoni, mito watim kero nivoyo lworo mwa. Ukwayu wamedara nibedo ku genogen ma tek nia Yehova umaru jurutic pare man ebegwokogi. Gin ma bikonyowa nitimo lembuno, utie ninyamu i lembe iwi kite ma Yehova ugwoko ko jurutic pare con man niweco pi lembene. Bende, kud wawil ku kite m’ekonyo kowa ninyego ku lembe moko ma pek. Ku kony pa Yehova, wacopo voyo lworo mwa!—Zab. 34:4. w22.06 mba. 19 udu. 19-20

Bimobim ma dit mi ng’om zoo ma junyutho ku “tielo ma gi mi nyunyu kud ulobo” dong’ ubebimo. Ecaku bimo i saa mi lwiny ma kwong’a mi ng’om zoo, kinde ma Grande-Bretagne kud États-Unis gidikiri pi nidoko ker ma dit mir Angleterre kud Amerika. Ayi gin m’acwiya ma Nebukadnezar uneno i lek pare unyutho bende lembe m’uketho ekoc ku bimobim mange ma dongo mi ng’om zoo m’ubimo i wang’e. Tung’ ku bimobim ma dongo ma juweco pigi i ginmawokiwang’, en jupore ngo ku cuma ma tek, calu ve mola ma kwar kunoke ma tar, ento ku cuma m’ujebere kud ulobo. Ulobo ubenyutho ‘kodhidhanu’ kunoke lwak dhanu. (Dan. 2:43) Calu m’ubenen kamaleng’ i nindo ma tin, atelatela mi dhanu i lembe mi bolo kwir, twero migi, nyutho cwircwiny man dikiri migi, uketho etie tek ni jutela mi ker maeno nitimo lembe ma nwang’u gimito gitim. w22.07 mba. 4-5 udu. 9-10

Nyo itie ku jiji iwi limo batizo? Ecopo bedo ber nia ikepenjiri kumae: ‘Ang’o m’ubecera?’ (Tic. 8:36) Poy nia Yesu uporo timo yeny pa Won ku cam. Pirang’o? Cam tie ber iwa. Yesu ng’eyo nia gin ceke ma Yehova kwayu i bang’wa nia watim, utie ber iwa. Yehova maru ngo watim gin moko ci ma romo timowa rac. Nyo yeny pa Yehova yor i beng’i utie nilimo batizo? Eyo. (Tic. 2:38) Pieno, cwinyi copo bedo tek nia niworo lembang’ola mi limo batizo bimiyo iri bero. Kan icopo bedo ngo ku jiji mi camu cam ma mit niloyo zoo, dong’ pirang’o itie ku jiji iwi limo batizo ke? Dong’ ang’o m’ubeceri ke? Ju ma dupa romo dwoko wang’ penji maeno nia “an fodi atie ngo ayika.” I andha, yub m’ibemaku mi thieriri ni Yehova man mi limo batizo utie yub ma pire tek nisagu zoo i kwo peri. Pieno etie lembe ma ting’o nindo, ekwayu paru i lembe kilili mandha, man kero ma lee pi nibedo ayika. w23.03 mba. 7 udu. 18-20

Kinde ma Yesu udoko ku oro ma romo 30, juwire ku tipo ma leng’. Saa maeno edoko thenge ma kwong’a ma pire tek mi kodhi pa dhaku. I ng’eye kinde m’etho man ecer, Mungu ‘uronye ku dwong’ man yung” man emiyo ire “dito ceke . . . i polo kud i ng’om,” uketho i iye dito mi ‘rungo tic pa Wonabali.’ (Ebr. 2:7; Mat. 28:18; 1 Yoh. 3:8) Ento thenge mir ario mi kodhine de unuti. Jakwenda Paulo unyutho pi theng kodhi maeno kinde m’ebino weco pi Jukristu ma Juyahudi man mi thek dhanu mange ma juwirogi ku tipo. Ewacu kumae: “Tek wu pa Kristu, nwang’u andha wutie kodhi pa Abraham, jucampacu calku lembang’ola.” (Gal. 3:28, 29) Ka Yehova uwiro Jakristu moko ku tipo ma leng’, Jakristune doko thenge mi kodhi pa dhaku. Pieno, kodhi pa dhaku uketho i iye Yesu Kristu ku dhanu 144000 ma gibibimo karacelo kude. (Nyu. 14:1) Ju maeno ceke gibeii niparu man nitimo lembe calu Weggi ma Yehova Mungu. w22.07 mba. 16 udu. 8-9

Wang’eyo nia wabinwang’ara ku peko i nindo maeni mi kajik ceng’. (2 Tim. 3:1) I saa mi pekone cwinywa copo ng’abere man lembene copo nurowa, asagane kan ubenen nia pekone gibebino wi wadi wi wadi kunoke gicoriri i wiwa ceke wang’ acel. Kadok kumeno de, mito wapoy nia wang’ Yehova n’i wiwa, eng’eyo peko mwa man ku kony pare wacopo ciro peko moko ci, ke ku tegocwinywa. Wakewec iwi lapor pa won bedopwe ma Yob. Enwang’ere ku peko ma tung’ tung’ ma ng’abu cwinyjo, ke thiri thiri. I nindo acel kende ci, Yob uwinjo nia jukwo uyaku man unego lim pare ceke, ginego jurutic pare, man kadok awiya pare de githo. (Yob 1:13-19) Nyanok i ng’eye kinde ma fodi ebecur ku can mi lembene i cwinye, twoyo ma pek upodho i wiye m’unyotho dend kume. (Yob 2:7) Wang’ Yehova ubino iwi Yob. Calu ma Yehova umare, emiyo ire piny m’ebino ku yenyne kara ecir peko man egwok bedoleng’ pare. w22.08 mba. 11 udu. 8-10

Twiny copo miyo can i cwinywa. Wacopo paru nia twinyne umaku kaka ngo, kunoke nia jumiye rac. Lembuno copo ketho wawil ku lembe ma pire tek nisagu, ma nia Yehova re m’ubetwinyowa pilembe emaruwa (Ebr. 12:5, 11) Pieno, jol twiny man tim alokaloka. Yesu ujuko Pethro ngbeng’ i wang’ jukwenda mange, wang’ acel kende ngo ento wang’ dupa. (Mark. 8:33; Luka 22:31-34) Copere nia Pethro unwang’u lewic moko re kokoro! Ento emoko asu i kum Yesu. Ejolo twiny man enwang’u ponji i kum kosa pare. Yehova umiyo ire mugisa pi gwoko bedoleng’ pare man eketho ebedo ku rwom ma dit i cokiri. (Yoh. 21:15-17; Tic. 10:24-33; 1 Pet. 1:1) Wan man jumange de wanwang’u bero tek waketho ngo wiwa i kum litho ma wabewinjo pi twiny ma wanwang’u, ento wajolo twinyne man watimo alokaloka m’ukwayere. Ka watimo kumeno, wabibedo ng’atu ma pire tek i Yehova man bende i umego mwa. w22.11 mba. 21-22 udu. 6-7

Abraham ugam ung’eyo nia Yehova bitimo ngo nyanok de gin ma pwe ngo kadi m’ukoso mer. Nimakere ku lembe ma Paulo uyero, Abraham unwang’u nia Yehova copo cero Isak ma wode m’emaru kud i tho. (Ebr. 11:17-19) Yehova ugam ung’olo nia Isak bibedo wego mi thek, ento saa maeno nwang’u fodi Isak unyolo ngo awiya. Abraham umaru Yehova man ebino ku genogen nia Won bitimo gin ma pwe. Ku yiyoyic eworo gin ma juyero ire kadok ebino ire lembe ma tek de. (Tha. 22:1-12) Wacopo lubo lapor p’Abraham nenedi? Calu en, wan de mito wamedara ning’eyo Yehova. Ka wabetimo kumeno, wabicoro ceng’ini kude man wabimare lee kadok nisagu. (Zab. 73:28) Wabiponjo pidocwinywa kara etim nimakere ku paru pa Mungu. (Ebr. 5:14) Eno biketho ka ng’atu moko ubebidhowa nitimo lembe ma rac, wabikwero. Wabiparu ngo kadok apara de nitimo lembe moko ma copo nyayu can i Wegwa man ma nyotho kidwa kude. w22.08 mba. 28-29 udu. 11-12

Kinde ma jakwenda Paulo giku Barnaba gidok kendo pi niliewo Lustra, Ikonio, man Antiokia, giwok “giketho judongo igi i cokiriman.” (Tic. 14:21-23) M’umbe jiji, judongo maeno gibino ni ukungu mi jukocwiny ni cokiri, tap calu judong cokiri ma tin bende. Wu judong cokiri, wubed ayika nikonyo ju ma gitie ku yeny mi “[wec] ma ber” mi tielocwiny. Paulo upoyo wi juyic wadi nia ‘afuru ma dit mi jumulembe’ giciro peko nikum tego ma Yehova umiyo igi. (Ebr. 12:1) Paulo ung’eyo nia kpawa mi dhanu maeno ma giciro kwond peko ceke, copo miyo tegocwiny ni umego ku nyimego pare man eromo konyogi niketho wigi zoo i kum “adhura pa Mungu ma kwo.” (Ebr. 12:22) Tin bende kumeno. Ng’a m’udaru nwang’u ngo tielocwiny kinde m’ebesomo kite ma Yehova ukonyo ko Gideon, Barak, Daudi, Samwel, man jumange?—Ebr. 11:32-35. w22.08 mba. 21-22 udu. 5-6

Jubipoko lembe iwi ju m’ucer calku “tic” ma kani? Nyo ebibedo tic ma gitimo i wang’ tho migi? Ungo! Poy nia juweko dubo migi ma gilar gitimo i wang’ tho migi. Pieno, “tic migi” maeni ma gitimo copo bedo ngo tic ma gitimo ma fodi githo ngo. Ento ecikere nibedo tic ma gitimo nimakere ku ponji ma juponjo kogi i ng’om ma nyen. Kadok weg bedopwe ma calu ve Noa, Samwel, Daudi man Daniel, de jubiponjogi pi ning’eyo Yesu Kristu man nibedo ku yiyoyic i lam m’ethiero. Ka fodi jugini de bibedo ku lembe dupa m’umito juponj kogi, ka dong’ ju m’utie ngo weg bedopwe ke! Lembang’o ma binwang’u ju m’ukwero lembe ma jubeponjo kogi? Lembanyutha 20:15 uwacu nia “ng’atu moko ci ma junwang’u nyinge ugorere ngo i buku mi kwo jubole i nammac.” Eyo, jubinyothogi mi magwei. Dong’ pire tie tek nia waketh nyingwa ukiewere i buku mi kwo man ebed asu i iye! w22.09 mba. 19 udu. 17-19

Yub dupa ma wamaku pi leng’kum mwa man pi yath, lembene ujengere iwi pidocwinywa ma Biblia uponjo. (1 Tim. 3:9) Kinde ma wabemaku yub man wabeweco iwi lembene ku jumange, watimo kero watiyo ku cik mir ukungu mi Jufilipi 4:5 m’uwacu: “Wuwek dhanu ceke ung’ey nia wutie dhanu ma i lembe mwu tek ungo.” Ka watie dhanu ma i lembe migi tek ungo, wabidieng’ ungo nikadhu mukero pi leng’kum mwa. Kadok umego ku nyimego gimaku yub m’ukoc ku mwa de, re eno cerowa ngo nimarugi. (Rum. 14:10-12) Wanyutho foyofoc mwa ni Yehova ma tie acaki mi kwo, nwang’u wabegwoko kwo mwa man nwang’u wabeii nitimo ire ku copo mwa ceke. (Nyu. 4:11) Ento pi kawoni, wacikara asu ninyego ku remokum man peko ma wok rek. Re eno tie ngo kit kwo ma Jacwic mwa ukeco nia wakwo ko. Ceng’ini eni, ebimiyo iwa kwo ma rondo ku rondo m’umbe remo man tho. (Nyu. 21:4) Ento ma fodi nindone romo ngo, etie ber nia wabed kwo man watim ni Yehova Wegwa m’i polo ma jamer! w23.02 mba. 25 udu. 17-18

Yehova unyutho kamaleng’ nia dito pare tie malu hai nisagu mi “jubim mi ng’om.” (Rum. 13:1) Wakenen lapor moko adek. Farao ubimo mi Misiri ugam udwoko dhanu pa Yehova ni ng’eca man ekwero wang’ udul niweko giwok kud i ng’om pare. Ento Mungu ugonyogi man eketho Farao umwony i Nam ma kwar. (Ai 14:26-28; Zab. 136:15) Ubimo Belcazar mi Babeli utimo foc man ‘etingre gire i kum Rwoth m’i polo’ man ‘epaku mungu mi mola ma tar ku mola ma kwar’ kakare nipaku Yehova. (Dan. 5:30, 31) Ento Mungu ujwigo ubimo Belcazar. “I diewor nica,” junege man jumiyo ker pare ni Jumedi ku Juperse. (Dan. 5:30, 31) Ubimo Herod Agripa mi 1 mi ng’om mi Palestin unego jakwenda Yakobo man i ng’eye edok etwiyo Pethro i kol, m’ebino ku paru m’enege ko bende cen. Ento Yehova ucero Herod ku timo gin m’epangu. “Malaika pa Yehova ugoye,” e etho.—Tic. 12:1-5, 21-23. w22.10 mba. 15 udu. 12

Ka wasomo pi kite ma con Yehova ugam ugwoko ko ju m’ugwoko bedoleng’ migi ire, e genogen mwa bidoko tek nisagu. Lembe ceke ma nwang’ere i Lembe pa Mungu “ukiewere pi ponji mwa, kara ni kum cirocir mwa man jukojuk ma wanwang’u i Lembagora, wabed ku genogen.” (Rum. 15:4) Nyam lembe iwi kite ma Yehova upong’o ko lembang’ola pare. Kenen gin ma Mungu utimo ni Abraham giku Sara. Nwang’u dong’ gidaru tii ma gicopo nyolo ngo nyodo. Re Mungu ung’olo igi nia gibinyolo nyathin. (Tha. 18:10) Abraham utimo ang’o? Biblia uyero kumae: “Eyiyo nia ebidoko wego mi thek dupa.” (Rum. 4:18) Kadok nwang’u i nen pa dhanu juromo geno ngo lembuno de, re cwiny Abraham ubino tek nia Yehova bipong’o lembang’ola pare. Cwinye utur ngo zoo de. (Rum. 4:19-21) Lembe maeno ubeponjowa nia mito saa ceke wajengara iwi Yehova nia ebipong’o lembang’ola pare. w22.10 mba. 27 udu. 13-14

Lembuno upong’o kinde ma jugonyo Juyahudi kud i Babeli. Yehova unyutho kamaleng’ nia etie Japonji migi ma Dit, man i the telowic pare, gidwoko thier pare ma leng’ kendo kakare. Watie jumutoro ma lee tin, pilembe Yehova utie Japonji mwa ma Dit. Isaya uyero nia watie ve awiya mi somo ma Yehova ubeponjo, ewacu kumae: ‘Weng’i bineno japonji peri [ma dit].’ I lapor maeni, japonji ucungo i wang’ awiya m’ebeponjo. Watie ku rwom kum Yehova ubeponjowa tin. Nenedi? Nikadhu kud i dilo pare. Watie ku foyofoc lee pi ponji ma wabenwang’u i dilo pa Yehova! Ponji ma wabenwang’u i coko, i girasoma mwa, i televizio JW, man kud i yo mange de dupa, ubekonyowa niciro ku mutoro i nindo mi can. w22.11 mba. 10 udu. 8-9

Pi saa ma nyoth mi Yeruzalem kud hekalu bitundo i iye man pi “kajik mi ng’om” ma tin wabekwo i iye, Yesu uwacu kumae: “Ng’atu moko mbe m’ung’eyo nindo kadok saa maeno, nik’ebed jumalaika mi polo, kadi Wod, ndhu Wego kende.” I ng’eye edok emiyo cimowang’ ni julub pare ceke, ewacu kumae: “Wubed ku weng’wu man wumeduru nikiyo.” (Mark. 13:32-37) Ugam ukwayere nia Juyahudi ma Jukristu mi rundi ma kwong’a gibed ma gikiyo kara gibothi. Yesu wacu ni julubne kumae: “Ka wuneno juaskari gitieko Yeruzalem, e wung’ey nia nyoth pare udhingo ceng’ini.” Saa maeno ugam ukwayere nia giwor cimowang’ ma Yesu umiyo igi man “gicak ringo iwi got.” (Luka 21:20, 21) Ju m’uworo cimowang’ maeno giboth kud i nyoth ma Juroma ukelo iwi Yeruzalem. Tin wabekwo i dhug ajiki mi ng’om ma rac maeni. Pieno, wan de wacikara nibedo ku wang’wa man wakii. w23.02 mba. 14 udu. 1-2; mba. 16 udu. 3

Yehova ubeponjo jurutic pare kara gibed dhanu m’atira man ma pwe. Eno konyogi nibedo dhanu ma woriri man ma tie ku kwiyocwiny mir adunde. (Rie. 13:5, 6) Nyo edaru timo lembuno iri de kinde m’ibeponjo Biblia? Iponjo nia yo pa Yehova utie ber ma sagu ni kwond dhanu ceke man iri bende. (Zab. 77:13) Pieno, ibemito itim gin ma Mungu beyero nia utie atira. (Mat. 6:33) Ibemito icer bang’ lemandha, man imito inyuth nia lembe ma Sitani uyero iwi Mungu mwa Yehova utie vupo. Iromo timo lembuno nenedi? Kit kwo peri copo nyutho nia ve i ayi moko ibeyero kumae: “Akwero vupo pa Sitani, abediko para cinga i kum lemandha. Abemito Yehova ubed Jabim para man amito nitimo lembe m’eyero nia utie atira.” Icopo nyutho cungo nging’ nging’ maeno nenedi? Cor i vut Yehova nikadhu kud i rwo, thieriri ire, man i ng’eye nyuth thieriri perine kamaleng’ nikadhu kud i batizo. Mer mi lemandha man mi lembe ma pwe re m’utie thelembe ma tek ma ketho jutimo ng’iyong’ic mi limo batizo. w23.03 mba. 3 udu. 4-5

Kwiyocwiny moko nuti ma dhanu m’i ng’om maeni ging’eyo pire ngo. Etie “kwiyocwiny pa Mungu,” niwacu bedomoth ma wanwang’u i cwinywa ka watie ku winjiri ma ceng’ini ku Wegwa m’i polo. Wabedo museme ka watie ku kwiyocwinyne. (Filip. 4:6, 7) Wabedo ku winjiri ma ber ku jumange m’umaru Mungu. Bende, wabedo ku winjiri ma ceng’ini ku “Mungu mi kwiyocwiny.” (1 Thes. 5:23) Ka wang’eyo Wegwa m’i polo, wagene, man wabewore, kwiyocwiny pare juko adundewa kinde ma wabenwang’ara i lembe mir ang’abacwiny. Nyo ecopere andha nibedo ku kwiyocwiny pa Mungu ka wabenwang’ara ku peko ma calu ve thong’om, lembe ma wok rek, yakini mi lwak dhanu kunoke ragedo? Lembe maenogi ceke copo piko lworo i iwa. Lembe mi mutoro utie nia, umego ku nyimego dupa gigam gitiyo ku juk pa Yesu ma nwang’ere i giragora ma tin. Ku kony pa Yehova, ginwang’u kwiyocwiny saa ma gibino nyego ku peko dupa ma dongo. w22.12 mba. 16 udu. 1-2

Wambe ku copo iwi lembe moko ci ma wok i kwo mwa. Pieno, pire tie tek nia kud wapar ya valer ma watie ko i wang’ Yehova utie nikum rwom mi tic mwa, man kud wapor rwom mi tic ma watie ko ku mi jumange. (Gal. 6:4) Pire tie tek nia wasay yo ma wakony ko jumange man ma watim ko ni Yehova. Ebibedo iri yot nitimo lee ni Yehova kan ibekwo ngo ku giki mi kum dupa man kan ibekoc i kum gamu deni swa. Keth lembakeca ma thindho ma copo konyi nitundo i kum lembakeca peri ma dit. Ku lapor, kan imito itim tic pa jayab yo ma nja, nyo ecibedo ber ungo nia ilar icak nitimo tic pa jayab yo ma jakony kubang’ dwi niai kawoni? Ka lembakeca peri utie nidoko jakony tic, nyo ecibedo ber ungo nia ibed itim saa ma lee i lembanyong’a? Lembe m’ibetimo kawoni copo yabu iri yo mi timo tic mange de dupa ma bibino. Pieno, bed ayika nitimo ku copo peri ceke tic moko ci ma jumiyo i kori. w22.04 mba. 26 udu. 16-17

Yehova romo konyowa ninyego ku peko ma wabekadhu i iye i kwo mwa, man ninwang’u anyong’a i tic ma leng’ ma wabetimo ire. Ka warwo i bang’ Mungu mwa pi lembe moko m’ubedieng’o cwinywa, jibu ma pio m’ecopo miyo, utie nimiyo iwa kero ma wacir ko peko mwa. Ka pekone ubethum ungo pio pio calu ma nwang’u wageno, mito wakway Yehova thiri thiri kara emii iwa tego ma wacire ko. Ebekwayu watim kumeno. Lembe maeno urombo ku wec ma e ma Isaya uwacu: “Kud wumi yom [ni Yehova].” (Isa. 62:7) Eno thelembene tie ang’o? Wacikara nirwo thiri thiri i bang’ Yehova ma ve wabeweko ngo ire saa m’eyom ko de. Wec pa Isaya ubepoyo wiwa i kum lapor ma Yesu umaku pi rwo, ma nwang’ere i Luka 11:8-10, 13. I laporne, Yesu ukwayuwa nia ‘wamedara nikwayu’ tipo ma leng’. Wacopo kwayu bende Yehova utel wiwa kara wamak yub ma cuu. w22.11 mba. 8 udu. 1; mba. 9 udu. 6-7

Icopo yikiri ku juruot peri niai kawoni pi ragedo. Kud iketh wii i kum lembe ma rac ma copo timere saa maeca. Ento keth mer peri ku Yehova ubed ma tek, man kony awiya peri de gitim lembe ma rom. Tek saa moko ibenwang’u nia cwinyi ung’abere, rwo i bang’ Yehova kud adundeni ceke. (Zab. 62:7, 8) Wuwec i ot mwu iwi thelembe ceke m’uketho wugene. Calu ma yikiri pi peko ma wok rek konyojo, yikiri peri man genogen peri iwi Yehova de bikonyo awiya mwu nibedo ku tegocwiny man kwiyocwiny i saa mi ragedo. Kwiyocwiny pa Mungu ketho wabedo agwoka. (Filip. 4:6, 7) Yehova tiyo kude pi nijuko adundewa kadok i saa mi thong’om, i saa mi peko ma wok rek, man i saa mi ragedo ma romo nwang’uwa tin. Ebetiyo ku judong cokiri ma gibetimo tic ma tek pi nitelo wiwa. Bende, wan ceke emiyo iwa rwom mi konyara i kindwa. Kwiyocwiny ma wabenwang’u tin, bikonyowa i ragedo ma dit m’ubebino, kadok i saa mi “masendi ma dit.”—Mat. 24:21. w22.12 mba. 27 udu. 17-18

Ukwayu watim kero wawodh adieng’acwiny cen kud i cwinywa pi dubo ma pek ma con watimo. I andha, wacikara ngo niketho lam mi jamgony ubed iwa ni thelembe mi timo “dubo akakaka.” (Ebr. 10:26-31) Re cwinywa ubed tek nia kan andha wayewo dubo ma pek ma watimo, wakwayu kisa i bang’ Yehova, wasayu kony i bang’ judong cokiri, man waloko kura mwa, e nang’ eweko dubo mwa mi magwei. (Isa. 55:7; Tic. 3:19) Lam mi jamgony utie ku tego mi ruco dubo mwa ceke, man nikum lamne, paradizo bibedo nuti andha; kwo m’i iye bende bibadhu ngo cwinywa nyanok de. Saa ceke wabiberombo ku dhanu ma pigi ber man wabitimo tic ma nyayu anyong’a. M’usagu zoo, kubang’ ceng’ wabibeng’eyo lembe ma nyen iwi Wegwa m’i polo man anyong’a bibenegowa i kum gin m’emiyo iwa. Wabibedo ku lembe dupa ma wabing’eyo i wiye man iwi giracwiya pare. w22.12 mba. 13 udu. 17, 19

“Dhaku” eno copo bedo ngo Eva. Lembila uwacu nia kodhi pa dhaku “bicanyu” wi thwol. Thwol utie Sitani m’utie giracwiya mi tipo, man ng’atu moko mbe m’uai i Eva ma copo bedo ku copo mi canyu wi Sitani. Ka dong’ jucopo nyotho Sitanine ke nenedi? Buku ma tokcen mi Biblia unyutho nia dhaku ma juweco pire i Thangambere 3:15 utie ng’a. (Nyu. 12:1, 2, 5, 10) Eno tie dhaku mi lapor! Dwi ni the tiende man ekendo nyikaluku 12 i wiye ni jamkermiwic. Enyolo nyathin moko ma segi, nyathin ne tie Ker pa Mungu. Calu ma Kerne n’i polo, pieno dhakune de ucikere nibedo i polo. Dhakune ubenyutho thenge mi polo mi dilo pa Yehova, m’uketho i iye jumalaika ma gigwoko bedoleng’ migi. (Gal. 4:26) Lembe pa Mungu ubekonyowa ning’eyo bende kodhi pa dhaku. Kodhine ucikere nibedo nyakwar Abraham.—Tha. 22:15-18. w22.07 mba. 15-16 udu. 6-8

Biblia ma tie giramiya pa Yehova upong’ ku rieko. Juk m’i iye utie kud adwogi ma beco iwi dhanu. Biblia loko kwo mijo. Kinde ma Musa ukiewo buku abic ma kwong’a mi Biblia, ewacu ni Israel ma thek pa Mungu kumae: “En e gin mananu ngo iwu; kum en e kwo mu.” (Poi. 32:47) Dhanu ma gibeworo lembe m’i Lembagora, gicopo bedo ku kwo ma ber man kud anyong’a. (Zab. 1:2, 3) Kadok jukiewo Lembe pa Mungu rundi dupa ukadhu de, re eno ujwigo ngo tego m’etie ko mi loko kwo mijo. Juk mi rieko ma nwang’ere i Biblia bedo mi nja, man gitie ku kony ni dhanu m’ubekwo i rundi ceke. Kinde ma wabesomo buku maeno ma leng’ man wabenyamu i lembe iwi gin ma wabeponjo, Won bukune konyowa ku tego mi tipo pare ma leng’ kara wanen kite ma waromo tiyo ko ku juk m’i iye i kwo mwa. (Zab. 119:27; Mal. 3:16; Ebr. 4:12) Eyo, etie kud ava mi konyowa. Nyo lembuno ubecwaluwa ngo nibesomo Biblia nja? w23.02 mba. 3 udu. 5-6

Lembanyutha thek 13 uyero nia wic maeno mir abiro, niwacu bimobim ma dit mir Angleterre kud Amerika, ubetimo calu yedi ma kwiny ma “tunge ario calu pa nyathi rombo, ento ecaku niweco calu ng’ec.” Yedi maeno ‘ubetimo giranyutha ma dongo, eketho kadok cil mac uai i polo uloro iwi ng’om ma dhanu ubeneno.’ (Nyu. 13:11-15) Lembanyutha thek 16 kud 19 ulwong’o yedi maeno nia “jabila mi ndra.” (Nyu. 16:13; 19:20) Daniel de uyero lembe m’urombo, nia ker ma dit mir Angleterre kud Amerika ‘binyotho piny [i ayi] ma wang’u ijo.’ (Dan. 8:19, 23, 24.) Eno tap gin m’utimere i saa mi lwiny mir ario mi ng’om zoo. Atum ario mi bom m’ugam udaru lwinyne ubino ma Angleterre kud Amerika re ma giyiko. I ayi maeno re ma bimobim ma dit mir Angleterre kud Amerika uketho ‘mac uai i polo uloro iwi ng’om.’ w22.05 mba. 10 udu. 9