Dwi mir 11

Wec ma reco ucikere ngo niwok kud i dhu Jakristu. Kit wec ma thindho thindho ma reco moko nuti m’ukwayu wabed ku wang’wa i kumgi. Ku lapor, mito wabed ku wang’wa kud wawec rac pi dhanu mi thek moko, suru, kunoke pi dhanu mi ng’om mange. Bende, mito ngo wayer wec mir ayany i kumgi. Yer wec ma teng’o jumange. Bed ayika nifoyo jumange afoya kakare nicayugi kunoke niwegiri. Nyithindho mir Israel gibino ku lembe dupa ma gicopo nyutho foyofoc pire, re gibed giwagiri wang’ ma pol. Pidoic mi wagiri nyotho kadok jumange de. Poy nia rapor ma rac ma julib apar gidwogo ko uketho “nyithindho mir Israel ceke ging’ur kum Musa.” (Wel 13:31–14:4) I thenge mange, ka wabefoyo jumange, dhanu ceke copo bedo kud anyong’a. Pieno, say yo m’ifoy ko jumange niai kud i adundeni. w22.04 mba. 8 udu. 16-17

Niai con nitundo tin, Yehova udaru konyo aradu ma wendgi kwanere ngo nidoko jurimbe. Ecopo konyo awiya peri bende nitimo mediri i thenge mi tipo tek gimaru. (1 Kor. 3:6, 7) Kadok ubenen nia ve girwinyo de, Yehova bimedere pare asu nimarugi. (Zab. 11:4) Tek gibenyutho kadok i kadhiri ma nyanok nia “adundegi ubedo ayika” pi ninyayu anyong’a i Yehova, ebikonyogi nidoko jurimbe. (Tic. 13:48; 2 Kei. 16:9) Ecopo konyi iyer wec ma cuu ke i saa ma tap ni awiya peri kinde ma gitie ku yeny mi winjo wecne. (Rie. 15:23) Kunoke ecopo ketho umego kadi nyamego moko mi cokiri utim lembe moko ma ber m’utel nen migi. Kadok i ng’ey ma dong’ gidongo de, Yehova copo ketho gipoy pi gin ma con iponjo kogi. (Yoh. 14:26) Yehova bimiyo iri mugisa tek ibemediri niponjo awiya peri nikadhu kud i wec mi dhogi man timo peri. w22.04 mba. 21 udu. 18

Niai ma dong’ Sitani mbe ku copo mi dok i polo, eloko kwinyo pare zoo iwi dong Jukristu ma juwiro m’udong’, ma gibecero ba Ker pa Mungu man ma “ginwang’u tic mi miyo lembatuca iwi Yesu.” (2 Kor. 5:20; Efe. 6:19, 20) I oro 1918, jukelo adote mi vupo iwi umego abora m’i kind ju m’ubino telo wi tic mi dilo, man jung’olo kol i wigi pi kare ma lee. Udok ubedo ve ‘junego’ the tic mi ju maeno ma juwiro ku tipo. (Nyu. 11:3, 7-11) Ento i caku mi oro 1919, jugonyo umego maeno ma juwiro kud i kol man juthumo cen ther adote ma juketho i wigi. E ndhundhu umego eno gicaku telo kendo wi tic mi Ker. Re eno ucero ngo Sitani niketho wang’e i kum dhanu pa Mungu. Niai eca, eloko dhu “kulo” mi ragedo i kumgi. (Nyu. 12:15) Pieno, mito wan ceke ‘wanyuth cirocir man yiyoyic.’—Nyu. 13:10. w22.05 mba. 5-6 udu. 14-16

Jakwenda Yohana uneno i ginmawokiwang’ ungu ario mi ju m’udiko cing’gi i kum bimobim pa Yehova man ginwang’u mugisa mi kwo ma rondo ku rondo. Ungune mi kwong’o utie ku dhanu elufu dak acel pier ang’wen wi ang’wen (144000). Juting’ogi kud i ng’om kara gibed ni jubim iwi Ker karacelo ku Yesu i polo. Gibibimo ke wi ng’om. (Nyu. 5:9, 10; 14:3, 4) I ginmawokiwang’ne, Yohana uneno gibedo karacelo ku Yesu i polo iwi got Sayuni. (Nyu. 14:1) Niai i rundi ma kwong’a nitundo tin, judaru ng’iyo dhanu elufu swa pi nibedo i ungu maeno mi dhanu 144000. (Luka 12:32; Rum. 8:17) Ento juyero ni Yohana nia, donggi kunoke wendgi ma nok kende re ma bibedo kwo i nindo mi kajik ceng’. (Nyu. 12:17) I ng’eye, i saa mi masendi ma dit, jubiting’ogi pi nicinwang’u juwagi ma gidaru tho ma dong’ gin’i polo, pi nitwiyo dhu kwan 144000. Kuca gibibimo karacelo ku Yesu i Ker pa Mungu.—Mat. 24:31; Nyu. 5:9, 10. w22.05 mba. 16 udu. 4-5

Yesu uponjo julubne nia gibed ku nen ma cuu i wigi gigi. Etielo cwinygi kumae: “Kadok wend yukwiwu ceke de [Mungu] ng’eyo.” (Mat. 10:30) Eno tie tielocwiny mi tuko ngo iwa, asagane ka watie ku nen ma rac i wiwa giwa. Eno ubenyutho nia Wegwa mi polo ubedieng’ lee piwa, man nia piwa utie tek lee i iye. Ukwayu ngo wabed ku jiji nyanok de iwi Yehova nia ewondere niketho wabed jurutic pare, man nia waromo ngo ninwang’u kwo ma rondo ku rondo i ng’om ma nyen. Oro ukadhu udoko 15 kawoni, Otkur ma Wiw ukwayuwa nia wabed ku nen ma e i wiwa giwa: “Andha, etie ber ungo nia wabed ku pidoic m’usagu mukero i wiwa giwa, ma wapar ko nia dong’ waromo man wasagu jumange; kunoke i thenge mange wabed ku paru ma nia tijwa lundo mbe magwei. Tung’ ku maeno, mito ngo wakadh mupaka iwi nen ma watie ko i wiwa giwa; mito wang’ey thenge ma wa tek i iye man ma wa ng’ic i iye.” w22.05 mba. 24-25 udu. 14-16

Ng’atuman m’i kindwa copo timo ang’o pi nigwoko bedo i acel mi cokiri? Tie nibedo ng’atu ma ketho kwiyocwiny. (Mat. 5:9; Rum. 12:18) Saa ceke tek wabemaku yub mi ketho kwiyocwiny i kindwa ku jumange i cokiri, wabimedo leng’o mi paradizo mi tipo. Poy nia Yehova re m’utelo ng’atuman m’ubenwang’ere i paradizo eno pi nitimo ire thier ma leng’. (Yoh. 6:44) Kepar pir anyong’a ma Yehova copo bedo ko, kan ebeneno wabetimo tego mwa ceke pi niketho kwiyocwiny man bedo i acel i kind jurutic pare ma pigi tie tek lee i iye! (Isa. 26:3; Hag. 2:7) Waromo nwang’u bero nenedi i kum mugisa ma Yehova ubemiyo iwa wa jurutic pare? Mito wanyam i lembe lee iwi gin ma wabeponjo i Lembe pa Mungu. Ponji man nyamu i lembe ma kumeno bikonyowa nicego kite ma tung’ tung’ mi Jukristu ma bicwaluwa ninyutho “mer mir umego,” i cokiri, “ng’atuman . . . ni wadi man ni wadi.”—Rum. 12:10. w22.11 mba. 12-13 udu. 16-18

Ka wang’eyo nia Yehova udaru timo iwa kisa, wanwang’u ‘nindo mi yom;’ eno uketho i iye kwiyocwiny mir adunde man pidocwiny ma leng’. Wawinjara kumeno nwang’u “Yehova en gire” re m’utimo iwa kisa ento ungo dhanu. (Tic. 3:19) Ka Yehova utimo iwa kisa, winjiri m’i kindwa kude dwogo kendo kakare calu ve watimo de ngo dubo ire. I ng’ey ma Yehova utimo iwa kisa, edok eketho ngo dubone kendo i wiwa kunoke nimiyo iwa matira pire. (Isa. 43:25) Yehova coro dubo mwa bor kud i kumwa tap “calu [ma] yo nyangu bedo bor ku yo reto.” (Zab. 103:12) Ka waparu pi kisa ma dit pa Yehova, lembene ketho wabedo ku foyofoc lee man lworo. (Zab. 130:4) Timo kisa pa Yehova ujengere ngo iwi dubo ma dit kunoke ma nok ma ng’atini utimo. Yehova tiyo ku ng’eyong’ec m’etie ko i wiwa calu Jacwic, Jamii cik, man Japoklembe pi nineno ka nyo etim kisa ni ng’atini kunoke ngo. w22.06 mba. 5 udu. 12-14

Yehova umiyo genogen ma ber ni dhanu ceke m’umare. Ceng’ini eni ebidaru remokum, can, man tho. (Nyu. 21:3, 4) Ebikonyo “ju ma mol” ma gigene nidwoko ng’om udok ni paradizo. (Zab. 37:9-11) Bende, ebiketho ng’atuman m’i kindwa ubed ku winjiri ma ceng’ini kude, ma winjirine bibedo ber nisagu ma watie ko kawoni. Eno tie genogen ma ber mi tuko nia! Dong’ lembang’o m’uketho cwinywa tek nia Mungu bipong’o lembe m’eng’olo? Yehova pong’o lembang’ola pare kwa. Pieno, watie kud ukungu mandha mi ‘geno Yehova.’ (Zab. 27:14) Wanyutho nia wagene, nwang’u wabekuro ku cirocir man kud anyong’a nindo m’ebipong’o i iye lembang’ola pare. (Isa. 55:10, 11) Dong’ wamedara nigwoko bedoleng’ mwa ni Yehova man wabed ma cwinywa tek nia ebimiyo sukulia “ni dhanu m’ubeyenye ku cwinygi ceke.” w22.06 mba. 20 udu. 1; mba. 25 udu. 18

Calu ma Yehova tie Jawi ot, ukwayu wang’ey nia ebiworo cik mir ukungu m’eketho jukiewo i 1 Timoteo 5:8. Ka wabedo ma cwinywa tek nia Yehova umaruwa man bende juruot mwa, wabibedo mbe ku jiji ma nia wabikoso piny ma watie ku yenyne. (Mat. 6:31-33) Yehova tie Ng’atu ma won berocwiny ma lee, man ebemito epong’ yeny mwa. Kinde m’ecwiyo ng’om, emiyo ngo iwa kende kende piny ma pigi tek ma wakwo ko. Ecwiyo bende piny mange dupa ma beco kara wakwo kud anyong’a. (Tha. 2:9) Kadok watie kende kende ku gin ma romo pong’o yeny mwa de, ukwayu anyong’a unegwa ku maeno ma watie ko, kum Yehova re m’umiye iwa. (Mat. 6:11) Mito wapoy nia piny ceke mi kum ma wabetwonara ko kawoni, jucopo porogi ngo ku gin ma Mungu mwa ma Jamer ubemiyo iwa man m’ebimiyo i nindo m’ubino.—Isa. 65:21, 22. w22.06 mba. 15 udu. 7-8

Dhanu ma nyen kendgi ngo re ma gitie ku yeny mi medo ng’eyong’ec migi iwi Yehova man i Biblia, ento wan ceke. Jakwenda Paulo ukiewo nia nitiyo ku gin ma wabeponjo bikonyowa “nikoyo kind gin ma ber ku gin ma rac.” I nindo maeni ma rac, ma kurajo udaru nyothere, ecopo bedo iwa tek niworo cik mi kurajo ma Yehova uketho. Ento Yesu uketho wabenwang’u tego nikadhu kud i cam mi tipo. Ukungu mi cam mi tipone utie Biblia Lembe pa Mungu. Calu Yesu, wamiyo yung ni nying’ Mungu calu m’uromo pire. (Yoh. 17:6, 26) Ku lapor, i oro 1931, wanwang’u nying’ m’uai kud i Lembagora ma walwong’ara ko nia Jumulembe pa Yehova; man eno ubenyutho nia wamito wang’eyara ku nying’ Wegwa m’i polo. (Isa. 43:10-12) M’umedo maeno, i Biblia—Lok mi ng’om ma nyen, judwoko nying’ Mungu kubang’e kubang’e kakare. w22.07 mba. 11 udu. 11-12

Lemandha m’i Biblia uketho i iye bende lembanyong’a mi Ker pa Mungu. Yesu uporo lemandha mi Ker pa Mungu ku lonyo moko m’upondo. I Matayo 13:44, Yesu uyero kumae: “Ker mi polo tie calu lonyo m’ukanere i podho, ma ng’atu moko uwok unwang’u man ekane kendo; ni kum anyong’a m’ubenege, ecidho man elworo piny ceke m’etie ko, eng’iewo ko podhone.” Poy nia ng’atuno ubino sayu ngo lonyo eno. Ento kinde m’erube, etwonere ku piny dupa, elworo piny pare ceke kara ebed ku lonyone. Pirang’o? Kum eng’eyo nia lonyo m’enwang’une pire ubino tek lee. Wang’eyo nia gin moko mbe i ng’om maeni ma jucopo poro kud anyong’a ma watie ko mi timo ni Yehova kawoni, man genogen mi kwo ma rondo ku rondo i the bimobim mi Ker pare i nindo m’ubino. Rwom ma watie ko mi bedo ku winjiri ma ceng’ini ku Yehova usagu gin moko ci ma waweko. Mutoro mwa ma dit utie “ninyayu anyong’a i iye i lembe ceke.”—Kol. 1:10. w22.08 mba. 15 udu. 8-9; mba. 17 udu. 12

Yozefu ung’eyo nenedi nia timo abor utie ‘dubo ma dit’ i wang’ Mungu? Cik pa Musa m’uwacu kamaleng’ nia “kud itim abor,” udok uwok i ng’ey oro ma romo dak ario. (Ai 20:14, NWT) Re Yozefu ugam ung’eyo Yehova cuu m’enyang’ ko nia ecopo yiyo ngo nia jutim abor. Ku lapor, Yozefu ung’eyo cuu mandha nia Yehova uketho gamiri ubed i kind nico acel ku dhaku de acel. Bende, copere nia ewinjo kite ma Yehova ugam ugwoko ko wang’umire ma Sara wang’ ario zoo, kinde m’ebino i ariti ma jumito make ko ku kero. (Tha. 2:24; 12:14-20; 20:2-7) Yozefu uparu pi lembe maeno, e enyang’ i kum gin ma ber ku gin ma rac i wang’ Mungu. Mer ma Yozefu umaru ko Yehova Mungu uketho emaru bende cik pare mir ukungu man ebedo ku lembakeca mi moko kii i kumgi. w22.08 mba. 26 udu. 1-2

Lembila eni ubeweco ngo iwi cer mi lapor, niwacu i ayi ma dhanu pa Mungu gidoko ko tek kendo i thenge mi tipo i nindo mi kajik ceng’, calu ma walar wanyang’ i wang’e. Ento ebeweco pi cer mi ju m’utho ma bitimere i nindo m’ubino i ng’om ma nyen. Pirang’o wabeyero kumeno? Wec ma nia “utur” jutiyo ko bende i Yob 17:16 ma ceke juweco pigi pi ninyutho “liel.” Lembuno ubenyutho nia Daniel 12:2 ubeweco ngo iwi cer mi tipo ento iwi cer mandha ma bitimere i ng’ey kajik ceng’ man i ng’ey lwiny mi Armagedon. Dong’ Daniel 12:2 m’uwacu nia jumoko bicer pi “kwo ma rondo ku rondo” ubenyutho ang’o? Ebenyutho nia dhanu ma gicer man ma ging’eyo kunoke ma gibemediri ning’eyo, man gibeworo Yehova ku Yesu i kind oro 1000, gibinwang’u kwo ma rondo ku rondo.—Yoh. 17:3. w22.09 mba. 21 udu. 6-7

Wec maeno ubenyutho ngo nia Yehova ubemito wagen jumange i abinga, ento nia wagen gi pilembe gin gigi de ginyuthiri nia gi dhanu ma jugeno. Geno ng’atini tie ve nyutho woro, ma junyuthe nwang’u ng’atune de utie ku timo ma ber; man etie lembe ma ting’o nindo. Icopo medo genogen peri nenedi iwi umego peri? Tim kero ing’eygi cuu. Wec kugi saa ma wun’i kugi i coko. Mak yub mi rweyo kugi lembanyong’a. Nyuth cirocir igi, man mii igi kare ma ginyuth ko nia gi dhanu ma jugeno. I acaki icopo yero ngo lembe peri ceke ni ng’atu ma fodi wucaku beng’eyuru kude ang’eya. Ento kinde ma mer mwu ubemedere, icopo bedo agonya nikoro ire kite m’iwinjiri ko. (Luka 16:10) Dong’ icopo timo ang’o tek umego moko utimo lembe m’uketho gene udoko tek iri? Kudi cwinyi utur pio i kume, kewek saa moko ukadhi. Man kud iwek timo pa ng’atu acel ukab genogen peri iwi umego mange ceke. w22.09 mba. 4 udu. 7-8

Jadit cokiri moko ma nyinge Miqueas ugam ewinjere cuu ngo kinde m’enwang’u nia judong cokiri moko gitime rac. Re ebedo asu ku wang’e man etimo kero nibimo wi kite m’ebino winjere ko. Ebed erwo thiri thiri, m’ekwayu ko Yehova nia ukonye ku tipo ma leng’ man emii ire tego m’ecir ko lembene. Etimo bende sayusac i girasoma mwa kara ukonye. Ponji utie ang’o iwa i lembuno? Tek inwang’u nia umego kunoke nyamego moko utimi rac, kwii kumi man tim tego ibim wi paru ma rac ma copo wok i wii. Saa moko nyo ing’eyo ngo lembe m’ucwale niyero kunoke nitimo iri lembe maeca. Pieno, rwo i bang’ Yehova man kwaye ekonyi inen lembene calu ma ng’atu mange copo nene ko. Nen nia lembe m’etimo iri ubino ngo akakaka man ii niweko ire. (Rie. 19:11) Poy nia Yehova ung’eyo lembe m’ibekadhu kud i iye, man ebimiyo iri tego m’icir ko peko peri.—Ekl. 5:8. w22.11 mba. 21 udu. 5

Ng’ii jurimo m’umaru Yehova. Jurimo m’ing’iyo copo konyi nidoko Jakristu m’uteng’ini. (Rie. 13:20) Julien ma kawoni utie jadit cokiri uyero kumae: “Kinde m’abino aradu, jurimo ma beco m’anwang’u, ubino i saa mi rweyo lembanyong’a. Gibino weg amora, man gikonya nineno anyong’a ma jucopo nwang’u i tic mi lembanyong’a. . . . Anwang’u nia karaman gin m’uketho abino ngo ku jurimo dupa ma beco, utie pilembe abed asayu kwa jurimba ubed dhanu mir adiyo para.” Dong’ kan inwang’u nia i cokiri jumoko nuti ma gitie ngo iri jurimo ma beco ke? Paulo ugam ung’eyo nia dhanu moko m’i cokiri mi rundi ma kwong’a ubino ngo ku paru man timo m’ukwayu Jakristu ubed ko, uketho ewacu nia Timoteo ubed ku wang’e i kumgi. (2 Tim. 2:20-22) Winjiri mwa ku Yehova pire tie tek lee. Wacikara ngo niweko ng’atu moko unyoth winjiri mwa ki ku Wegwa m’i polo, kum watimo tego pi ninwang’e. w22.08 mba. 5-6 udu. 13-15

Tung’ ku dhanu ma gidagu juk m’uai i bang’ Mungu, wan wamaru mwa kite mi paru lembe pare, m’uketho i iye cik pare mi kurajo. Mer maeno doko ma tek ka waporo adwogi ma ber ma wanwang’u i kum woro cik pa Mungu, ku mi ju ma woro ngo cik pare. Kenen peko ma dhanu ubekelo i wigi gigi pi kasegu migi ma gikwero ko juk mi rieko pa Yehova. Man i ng’eye dok inen kite ma kwo peri leng’ ko pilembe ibeworo cik pa Mungu. (Zab. 32:8, 10) Yehova uketho juk mi rieko pare utie pi dhanu ceke, ento ediyo ngo ng’atini adiya nia uwor jukne. Ekoro pir adwogi ma dhanu nwang’u ka gibewinjo ngo jukne. (Rie. 1:29-32) Gibinwang’u “[matoke] mi yo migi gigi.” Kit kwo migi bimiyo igi adieng’acwiny, masendi, man i ng’eye ke nyoth. Tung’ kugi, ju ma gibewinjo juk mi rieko pa Yehova man ma gibetiyo kude, jung’olo igi nia “ng’atu ma tek uwinjo . . . bibedo museme man ebibedo yo ma lworo mi lem ma rac umbe kude.”—Rie. 1:33. w22.10 mba. 21 udu. 11-13

Nilworo Yehova thelembene tie nimiyo ire woro ma thuth ma walworo ko nitimo lembe moko ci ma rac ma romo nyayu can i iye. (Rie. 16:6) Eno ketho wamedara nitimo tego niworo cik mir ukungu pa Yehova mi gin ma ber ku gin ma rac m’ekoro pire i Biblia. (2 Kor. 7:1) Wabibedo kud anyong’a tek wabetimo lembe ma Yehova umaru man wabekoc i kum lembe m’edagu. (Zab. 37:27; 97:10; Rum. 12:9) Ng’atini copo ng’eyo nia Yehova utie ku twero mi ketho cik pi gin ma ber ku gin ma rac, ento en gire re m’ecikere niworo cik mir ukungu pa Mungu. (Rum. 12:2) Nikadhu kud i timo mwa re ma wanyutho nia cik mir ukungu pa Yehova tie yo ma ber akeca m’umaku wakwo ko. (Rie. 12:28) Daudi unwang’u nia eno tie lemandha, uketho eyero ni Yehova kumae: “Ibinyutho ira yo mi kwo: Udul mi mutoro ni i weng’i; mutoro mi nja ni i cingi ma yor acwic.”—Zab. 16:11. w22.10 mba. 8 udu. 9-10

Yesu uweko ngo nibedo ku nen ma cuu i wiye gire. I wang’ nibino iwi ng’om, Yesu utimo lembe ma dongo dupa ma wang’u ijo i tic pa Yehova. Nikume, “piny mange ceke ucwiyere i polo man iwi ng’om.” (Kol. 1:16) Copere nia kinde ma Yesu ubelimo batizo, epoy pi lembe m’etimo saa m’ebino karacelo ku Won. (Mat. 3:16; Yoh. 17:5) Re Yesu udoko ngo jakuhaya kinde m’eparu pi lembuno. Tung’ ku maeno, eyungere ngo nyanok de iwi jumange. Eyero ni julubne nia ebino ngo iwi ng’om “kara jutim ire, ento kara etim man emii kwo pare ni jamgony pi dhanu dupa.” (Mat. 20:28) Eyero bende nia ecopo timo ngo kadok lembe acel de ku yeny pare gire. Eno tie jwigiri mi tuko! Yesu uweko iwa lapor ma ber mandha m’ukwayu walubi. w22.05 mba. 24 udu. 13

Ka Yehova ukeco nitimo kisa, lembe mi kwong’o m’elar eng’iyo iye utie nia, nyo jadubo ung’eyo nia lembe m’etimo utie rac kunoke ngo. Yesu uyero lembuno kamaleng’ i Luka 12:47, 48. Ka ng’atini ukeco nitimo lembe moko, ma ke eng’eyo cuu nia utie lembe ma rac i wang’ Yehova, re asu etime; eca nwang’u etimo dubo ma pek mandha. Ng’atuno utie i ariti ma Yehova copo ng’iyo nia kud etim ire kisa. (Mark. 3:29; Yoh. 9:41) Re nyo asu wacopo bedo ku genogen pi kisa pa Mungu? Eyo! Lembe mange ma Yehova ng’iyo iye utie nia nyo jadubone uloko cwinye i andha. Niloko cwinyjo utie “niwilo paru mijo, timo, man lembakeca.” Uketho i iye pidoic mir ang’eyang’o ma ng’atini bedo ko man can m’ebedo ko i cwinye pi lembe ma rac m’etimo kunoke pi lembe ma ber ma nwang’u ecikere nitimo. Jadubo m’uloko cwinye can nege ngo kende kende pi lembe ma rac m’etimo, ento bende pi winjiri pare m’enyotho ku Yehova. w22.06 mba. 5-6 udu. 15-17

Judegi mwa gibemewo rwonglembe mi vupo iwi umego ma gibetelo wiwa i dilo pa Yehova. (Zab. 31:13) Umego mwa moko jutwiyogi man jung’olo lembe i wigi nia gitie jurunek. Jukristu mi rundi ma kwong’a de ginwang’iri i wang’ lembe ma kumeno, kinde ma judoto jakwenda Paulo man jutwiye mananu i kol. Jumoko giweko konyo jakwenda Paulo kinde ma jutwiye i kol i Roma. (2 Tim. 1:8, 15; 2:8, 9) Kepar kite ma Paulo uwinjere ko. Eciro peko dupa man eketho kadok kwo pare de i ariti pigi. (Tic. 20:18-21; 2 Kor. 1:8) Wan kud wabed nyanok de ve dhanu maeno m’ukwero konyo Paulo. Wang’ey nia Sitani uketho wang’e i kum umego ma gibetelo wiwa. Lembakeca pare utie niketho umego eno ginyoth gwoko bedoleng’ migi kara lembene unyay lworo i iwa. (1 Pet. 5:8) Mediri nikonyo umego peri man dik cingi kugi.—2 Tim. 1:16-18. w22.11 mba. 16-17 udu. 8-11

Copere nia jatimrac m’uloko cwinye ma juguro i ng’et Yesu ma fodi Yesu tho ngo ubino Jayahudi. Juyahudi gibed giworo Mungu acel, ento dhanu mi thek mange gibed giworo mungu dupa. (Ai 20:2, 3; 1 Kor. 8:5, 6) Ka nwang’u jatimrac eno ubino dhanu mi thek mange, nwang’u ecipenjo penji mi giragora ma tin e nia, “In ilworo ngo mungu nyanok de?” M’umedo maeno, Yesu urweyo ngo ni ju m’utie ngo Juyahudi, pilembe ebino ngo pi dhanu mi thek mange ento “i bang’ rombe m’urwinyo m’i ot mir Israel.” (Mat. 15:24) Mungu ugam unyutho ni nyithindho mir Israel nia ebicero ju m’utho. Copere nia jatimrac m’uloko cwinye ung’eyo lembuno, man wec pare bende ubenyutho nia Yehova bicero Yesu kara ebim i Ker pa Mungu. Cibedo ve jatimrac eno ubino ku genogen nia en de Mungu bicere. Tek jatimrac eno utie Jayahudi, nyutho nia eng’eyo lembe iwi Adamu giku Eva. Pieno, ecopo yiyo nia paradizo ma Yesu uweco pire i Luka 23:43 bibedo kabedo ma ber mandha iwi ng’om keni.—Tha. 2:15. w22.12 mba. 8-9 udu. 2-3

Wacopo rweyo lembanyong’a ndhu nikum kony mi tipo pa Mungu. Pirang’o? Pilembe Sitani ubekiedo lwiny i dhogwa kara wajig tic mwa mi rweyo lembanyong’a. (Nyu. 12:17) I nen mi dhanu, wacopo nen ni gin moko ngo ni Sitani. Ento wabeloye nikadhu kud i tic mi lembanyong’a! (Nyu. 12:9-11) Nenedi? Ka waberweyo, eca nwang’u wanyutho nia wabeweko ngo enyay lworo i iwa. Kubang’ nindo ma waberweyo iye, eca nwang’u wabeloye. Dong’ i adundo, gin ma wacopo yero utie nia, tipo ma leng’ re m’ubekonyowa man nia anyong’a ubenego Yehova i kumwa. (Mat. 5:10-12; 1 Pet. 4:14) Tipo pa Mungu copo miyo iwa tego ma wavoy ko peko moko ci ma wanwang’ara ko i tic mwa mi lembanyong’a. (2 Kor. 4:7-9) Wacopo timo ang’o kara wamedara asu ninwang’u tipo pa Mungu? Mito wakwaye thiri thiri, man wabed ma cwinywa tek nia Yehova biwinjo rwo mwa. w22.11 mba. 5 udu. 10-11

Wanyutho nia wamaru umego ku nyimego mwa nwang’u wabetimo kero niketho kwiyocwiny i kindwa kugi. Waii nilubo lapor pa Yehova mi timo kisa. Ka Yehova de ubedo ayika nimiyo Wode utho pi dubo mwa, nyo wan wacikara ngo nibedo ayika nitimo kisa ni umego ku nyimego mwa kinde ma gikoso iwa? Wamito ngo wabed ve jamiru ma rac ma Yesu uweco pire i lembabola pare. Kadok rwoth pa jamiru eno uweko ire banja ma lee de, re en elund etimo ngo kisa ni jamiru wadi m’ubino ku banja pare ma nok. (Mat. 18:23-35) Tek koso winjiri uwok i kindwu ku ng’atu moko i cokiri, nyo icopo bedo ngo ma kwong’a nimaku yub ma wuyik ko lembe m’i kindwu i wang’ cidho i Poy pi tho pa Yesu? (Mat. 5:23, 24) Timo kumeno binyutho nia imaru Yehova giku Yesu lee mandha. w23.01 mba. 29 udu. 8-9

Yo acel m’icopo ng’eyo ko yeny mir umego ku nyimego peri, utie nipenjogi ku penji ma nyayu ngo lewic i wigi. (Rie. 20:5) Nyo gitie ku yeny mi cam, mi yath kunoke mi piny mange? Nyo tic uwekogi kunoke gikoso sente ma gicul ko ot? Tek kony moko nuti ma gavmenti ubemiyo, nyo umito jukonygi kara ginwang’ konyne? Yehova ubekwayu wan ceke watiel cwiny jumange man wakonygi. (Gal. 6:10) Lembe ma wabetimo pi ninyutho mer, kadok ebed ma nyanok, copo bedo ku kony lee ni ng’atu m’uberemo. Nyathin ma nyanok copo cidho karacelo ku junyodo pare pi nicikonyo umego kunoke nyamego moko. Aradu ma wang’e woy copo konyo nyamego moko ku ng’iewo piny kunoke ku tic mange. Jucopo tedo bende cam ni ng’atu m’ubetwoyo. Jumoko ubed uoro wec mi foyofoc iwi karatasi ni judong cokiri ma wang’ ma pol gibetimo tic lee pi nikonyo umego ku nyimego i saa mi thong’om. Etie lembe ma ber mandha ka wan ceke wabemedara ‘nitielo cwinywa i kindwa man niteng’ara’ i kindwa!—1 Thes. 5:11. w22.12 mba. 22 udu. 2; mba. 23 udu. 5-6

Jusadukayo ging’eyo cuu mandha lembe m’i buku abic ma kwong’a mi Lembagora mi dhu Juebrania, re gibed gidieng’ ungo ku lemandha ma pire tek ma nwang’ere i buku maeno ma Mungu uyuyo i wiye. Ku lapor, kinde ma gibino mulo i Yesu pi cer, Yesu upenjogi kumae: “wusomo ngo i buku pa Musa, iwi lembe ma jukoro pi yen m’udinyo nia Mungu uwacu ire kumae: ‘An a Mungu pa Abraham, Mungu pa Isak, man Mungu pa Yakobo’?” (Mark. 12:18, 26) Kadok Jusadukayo gisomo giragora maeno wang’ dupa de, re penji ma Yesu upenjo kogi unyutho kamaleng’ nia gibino dieng’ ungo ku ponji mi cer ma tie lemandha ma pire tek. (Luka 20:38) Ponji utie ang’o iwa i lembe maeno? Ka wabesomo Biblia, mito waketh wiwa i kum lembe ceke ma giragora ubeponjo kowa. Mito ngo waketh wiwa kende kende i kum ponji mir ukungu, ento bende wamed nyang’ mwa i kum lemandha man i kum cik mir ukungu m’ukanere. w23.02 mba. 11 udu. 9-10

Jumulembe ceke ma juweco pigi i giragora ma tin gikadhu kud i peko ma dongo; re asu gigwoko bedoleng’ migi ni Yehova. (Ebr. 11:36-40) Nyo cirocir ma ginyutho man tic ma tek ma gitimo ubedo mi mananu? Ungo nyanok de! Kadok nwang’u i nindo mi kwo migi gineno ngo pong’o mi lembang’ola pa Mungu ceke de, re gimediri nigeno Yehova. Bende, calu ma ging’eyo nia ginwang’u bero i wang’ Yehova, cwinygi bedo tek nia lembe ceke m’eng’olo bitimere. (Ebr. 11:4, 5) Lapor migi copo miyo tego i kumwa kara wamedara nigeno Yehova. Tin wabekwo i ng’om m’ubemedere ameda nidoko rac. (2 Tim. 3:13) Sitani fodi ujigo ngo niketho dhanu pa Mungu i amulaic. Kadok wabinwang’ara kud amulaic ma nenedi i wang’wa de, wek wabed ku lembakeca ma watim ko ni Yehova ku tego mwa ceke man wabed ku tegocwiny nia “waketho genogen mwa i Mungu ma kwo.”—1 Tim. 4:10. w22.06 mba. 25 udu. 17-18

Thelembe acel ma pire tek m’ukwayu wabed ko ku leng’kum ma ber, utie pilembe eno ketho watimo ni Yehova ku copo mwa ceke. (Mark. 12:30) Pieno wamito ngo watim lembe ma copo nyotho leng’kum mwa. (Rum. 12:1) Re eno nyutho ngo nia dong’ remo copo makuwa ngo. Kadok kumeno, watimo tego mwa ceke pi ninyutho ni Wegwa m’i polo nia wabeneno kwo m’emiyo iwa ni gin ma pire tek. Remokum ku tiyo copo cerowa nitimo lembe dupa ma con wabed watimo. Lembene copo dieng’o cwinywa man wabedo ku can. Re wacikara ngo niwenjara ma nia dong’ kud wadieng’ ku leng’kum mwa. Pirang’o? Pilembe kadok watii kunoke waberemo, asu wacopo paku Yehova calu m’ubimo Daudi utimo. Etie lembe ma jukocwiny ninyang’ nia kadok watii kunoke waberemo de, asu piwa tie tek i Mungu mwa. (Mat. 10:29-31) Kadok watho de, ebicerowa. (Yob 14:14, 15) Ka fodi wakwo, wamito watim kero wagwok leng’kum mwa man kwo mwa. w23.02 mba. 20-21 udu. 3-5

Nyo nying’ udul ma dit bibedo asu i buku mi kwo nitundo i ng’ey both migi kud i lwiny mir Armagedon? Eyo. (Nyu. 7:14) Yesu uyero nia dhanu maeno ma gitie calu rombe, gibimondo “i kwo ma rondo ku rondo.” (Mat. 25:46) Ento ju maeno ma giboth kud i Armagedon gibinwang’u ngo ndhundhu kwo ma rondo ku rondo. I the bimobim mi oro elufu acel, Yesu “bikwayugi man ebitelo wigi i bang’ pii mi kwo m’ubedhenyini.” Ju ma giworo telowic pa Kristu man ma junwang’u gigwoko bedoleng’ migi ni Yehova i nindo mi poko lembe ma tokcen, nying’gi bikiewere mi magwei i buku mi kwo. (Nyu. 7:16, 17) Ento jubinyotho diegi cen i Armagedon. Yesu uyero nia “gibicidho i nyoth ma rondo ku rondo.” (Mat. 25:46) Ku kony mi tipo ma leng’, jakwenda Paulo de uyero nia “dhanu maeno gibinwang’u matira mi nyoth ma rondo ku rondo.”—2 Thes. 1:9; 2 Pet. 2:9. w22.09 mba. 16 udu. 7-8

Giracwiya pa Yehova copo konyo juruot ninambu ma ber kud anyong’a man niketho mer m’i kindgi udok ma tek. Yehova ucwiyo kabedo ma beco iwi ng’om, ma i igi wacopo timo lembe ma wamaru. Juruot dupa bemaru nicidho karacelo pi nineno kaka ma jugwoko i iye lei, nicidho i ng’om kiaru, iwi gudi kunoke i dhu wat. I ng’om ma nyen pa Mungu, junyodo kud awiya zoo gibinwang’u anyong’a i kum giracwiya pa Yehova nisagu m’i wang’e zoo. Tung’ ku lembe m’ubetimere tin eni, wabibedo mbe ku thelembe mi lworo yedi kadok gin de gibilworowa ngo. (Isa. 11:6-9) Wabinwang’u anyong’a rondo ku rondo i kum piny ma Yehova ucwiyo. (Zab. 22:26) Ento wu junyodo, kud wukur nitundo saa maeca ka nya wubicaku ponjo awiya mwu nineno giracwiya kud anyong’a. Kan ibetiyo ku giracwiya pi niponjo lembe ni awiya peri iwi Yehova, m’umbe jiji gibituc nibedo ku paru ma rom ku p’Ubimo Daudi m’uyero kumae: ‘E [Yehova], tic moko mbe ma calu tic peri.’—Zab. 86:8. w23.03 mba. 25 udu. 16-17