Ayi mi konyo ju ma juwodho kud i cokiri

1-2. (a) Yehova neno ju ma gitimo dubo akakaka nenedi? (b) Yehova tie ku genogen ma kani yor i bang’ judubo?

YEHOVA MUNGU yiyo ngo kit timo ceke; kadi ecwaku de ngo dubo. (Zab. 5:4-6) Ebekwayuwa nia wawor cik pare ma pwe m’emiyo iwa i Lembe pare. Ento eng’eyo nia watie ku dub’alaga. Pieno ebekwayu ngo nia wawore calu ve watie dhanu ma pwe. (Zab. 130:3, 4) Re i saa ma rom eno, emiyo ngo wang’e ni ‘dhanu ma giloko bero pare ma yawe mbe udoko igi thelembe mi bedo ku timo mir acidi man mi thwon.’ (Yuda 4) Pi thelembe maeno re ma Biblia uweco pi “nyoth mi dhanu ma woro ngo Mungu” i lwiny mi Armagedon.—2 Pet. 3:7; Nyu. 16:16.

² Ento Yehova ubemito ngo nia ng’atu moko acel de unyothere. Calu ma waponjo i Otkur ma Wiw maeni, Biblia ukoro kamaleng’ nia “ebeyenyo dhanu ceke gilok cwinygi.” (2 Pet. 3:9) Pi nilubo lapor pa Yehova, judong cokiri ginyutho cirocir kinde ma gibeii nikonyo ju m’utimo dubo ma pek kara giwil timo migi man gicor kendo ceng’ini i vut Yehova. Ento jumoko m’utimo dubo ma pek giloko ngo cwinygi. (Isa. 6:9) Jumoko gimediri asu ku timo migi ma rac kadok nwang’u judong cokiri gitimo kero wang’ dupa pi nikonyogi gilok cwinygi. Ubekwayu jutim ang’o i saa ma kumeno?

“[WUWODH] JADUBO CEN”

3. (a) Biblia uyero nia kwayu jutim judubo m’uloko ngo cwinygi nenedi? (b) Ka ng’atini ukwero niloko cwinye, pirang’o wacopo yero nia ku yore moko eng’iyo en gire nia juwodhe kud i cokiri?

³ Tek jadubo moko uloko ngo cwinye, judong cokiri gimbe ku ng’iyong’ic mange ma gicopo timo m’uweko nilubo telowic ma nwang’ere i 1 Jukorintho 5:13 m’uwacu kumae: “[Wuwodh] jadubo cen kud i kindwu.” I ayi moko waromo yero nia jadubo ung’iyo gire nia juwodhe kud i cokiri; eca nwang’u ekayu gin m’ecoyo. (Gal. 6:7) Pirang’o wabeyero kumeno? Pilembe ekwero kony ma wi wadi wi wadi ma judong cokiri gikonye ko kara elok cwinye. (2 Ub. 17:12-15) I ayi maeno, timo pare re m’unyutho nia ekwero nikwo nimakere ku cik pa Yehova.—Poy. 30:19, 20.

4. Pirang’o jutwong’o nia juwodho jadubo moko m’uloko ngo cwinye kud i cokiri?

⁴ Ka jadubo moko uloko ngo cwinye man juwodhe cen kud i cokiri, jumiyo atwong’a ni cokiri nia dong’ etie ngo Jamulembe pa Yehova.a Jumiyo ngo atwong’a maeno pi ninyayu lewic i wiye, ento kara umego ku nyimego m’i cokiri giwor telowic ma Biblia umiyo ma nia ‘juwek nidikiri’ ku ng’atune, man nia ‘kadok acama de kud jucam’ kude. (1 Kor. 5:9-11) Etie lem ma kakare ka Biblia umiyo telowic maeno. Poy nia jakwenda Paulo ukiewo kumae: “Thobi ma nyanok thumo i kwen ceke.” (1 Kor. 5:6) Pieno tek juwodho ngo jadubo moko m’ukwero niloko cwinye kud i cokiri, eno romo ketho jumange giparu nia pire tie tek ungo niworo cik ma pwe pa Yehova.—Rie. 13:20; 1 Kor. 15:33.

5. Ukwayu wabed ku nen ma kani iwi ng’atu ma juwodho kud i cokiri, man pirang’o?

⁵ Dong’ ukwayu wabed ku nen ma kani iwi jayic wadwa ma juwodho kud i cokiri? Kadok nwang’u wadikara ngo kude de, re ukwayu ngo wanene ve dong’ embe ku genogen mi dwogo, ento calu rombe m’urwinyo. Ka rombe moko uweko dwol ke eromo dwogo kendo i iye. Poy nia rombe maeno m’urwinyo uthiero kwo pare ni Yehova. Ento ku lem ma rac, pi kawoni ebekwo ngo nimakere ku lembang’ola mi thieriri parene, uketho etie i ariti mi bayu kwo ma rondo ku rondo. (Eze. 18:31) Re kadok kumeno de, tek fodi Yehova tie ayika nitimo kisa ci wabedo ku genogen nia ng’atuno bidwogo. Dong’ judong cokiri gicopo konyo jadubo ma juwodho kud i cokiri nenedi?

KITE MA JUDONG COKIRI GIKONYO KO JU MA JUWODHO KUD I COKIRI

6. Judong cokiri gibitimo ang’o pi nikonyo ng’atu ma juwodho kud i cokiri?

⁶ Nyo ka juwodho ng’atini cen kud i cokiri ci juwenje ma dong’ esay de gire nia ebidwogo i bang’ Yehova nenedi? Ungo nyanok de! Kinde ma komite mi judong cokiri gibenyutho ni jadubo m’uloko ngo cwinye nia jubiwodhe kud i cokiri, gibikoro ire lembe m’ukwayu etim pi nidwogo i cokiri. Re judong cokiri gibijik keno kende ngo. Wang’ ma pol, gibinyutho ni dhanu ma kumeno nia gibimaru nirombo kugi kendo i ng’ey dwi moko, pi nineno ka nyo adundegi ulokere. Tek ng’atu moko ma juwodho kud i cokiri utie ayika nirombo kugi kendo, i saa mi rombone gibikwaye ku yaw yaw nia elok cwinye man edwog i cokiri. Kadok nwang’u i saa maeca ewilo ngo pidoic pare de, judong cokiri gibitimo kero nirombo kude kendo i ng’eye man gibikwaye nia elok cwinye.

7. Judong cokiri gi ii nilubo lapor mi kisa pa Yehova nenedi yor i bang’ ju ma juwodho kud i cokiri? (Yeremia 3:12)

⁷ Judong cokiri gitimo kero nilubo lapor mi kisa pa Yehova yor i bang’ ju ma juwodho kud i cokiri. Ku lapor, yang’ con Yehova ugam ukuro ngo nia dhanu pare ma Juisrael gikegilok cwinygi kan ekonygi. Ento eoro jubila pare i bang’gi ma fodi giloko ngo cwinygi. Calu ma waponjo i thiwiwec mir ario m’i Otkur ma Wiw maeni, Yehova unyutho nia etie jakisa ma lee kinde m’ekwayu jabila Hoseya ucidh ugam dhaku pare edok kude kadok nwang’u ebino medere ku dubo pare. (Hos. 3:1; Mal. 3:7) Pi nilubo lapor pa Yehova, judong cokiri gimito ku cwinygi zoo nia ng’atu m’utimo dubo ma pek ulok cwinye man edwogi, man giketho ngo nia ebed ire lembe ma tek nitimo kumeno.—Som Yeremia 3:12.

8. Lapor pa wod m’urwinyo ma Yesu umaku ubekonyowa nenedi ninyang’ lee i ngisi man kisa pa Yehova? (Luka 15:7)

⁸ Wakedwogu iwi lapor pa wod m’urwinyo ma waweco pire i thiwiwec mir ario m’i Otkur ma Wiw maeni. Kinde ma won unene ebedwogo i pacu, ‘eringo ecidh egwake, ecwiyo limbe bende.’ (Luka 15:20) Poy nia wegone ukuro ngo nia wode ukwaye etim ire kisa. Ento en re m’eringo i bang’e pilembe emare. Judong cokiri de gi ii ninyutho pidoic ma rom eno yor i bang’ ju m’ukier. Gibemito rombe maeno m’urwinyo “udwog i pacu.” (Luka 15:22-24, 32) Anyong’a bedo nuti i polo kinde ma jadubo moko uloko cwinye, man iwi ng’om bende kumeno!—Som Luka 15:7.

9. Yehova ubekwayu judubo ku yaw yaw nia gitim ang’o?

⁹ Nimakere ku lembe ma waponjo nitundo kawoni, ubenen kamaleng’ nia Yehova weko ngo jadubo m’uloko ngo cwinye ubed i cokiri. Ento eloko ngo ng’eye ni judubo; ebemito nia gidwogi. Kite m’ewinjere ko yor i bang’ judubo m’uloko cwinygi nwang’ere i Hoseya 14:4 m’uwacu kumae: “Abikeyo koso gwoko bedoleng’ migi. Abimarugi ma judiya adiya ngo, pilembe ng’eicwiny para ulokere cen kud i kume.” (NWT) Lembuno ubenyutho nia judong cokiri gicikiri niyenyo alokaloka ceke m’ubenyutho nia ng’atini ucaku beloko cwinye. Man eno ucikere nicwalu ju ma giweko Yehova nidwogo i bang’e m’umbe galu.

10-11. Judong cokiri gibi ii nikonyo ju ma juwodho kud i cokiri con nenedi?

¹⁰ E ka dong’ ju ma juwodho con kud i cokiri ma nyo oro udaru kadhu lee i wigi ke? Saa moko nyo gidaru weko timo m’uketho juwodhogi kud i cokiri kunoke copere nia dong’ gibepoy de ngo i kum thelembe m’uketho juwodhogine. Kadok gidaru galu lee woko de, judong cokiri gicikiri ni ii nisayu kakagi man niliewogi. I saa mi liewne judong cokiri gibiwok kwayu kadok nirwo kugi man gibikwayugi ku yaw yaw nia gidwog i cokiri. Tek ng’atini uweko cokiri oro udaru kadhu lee, ma jiji mbe ecopo doko ng’ic lee i thenge mi tipo. Pieno ka ng’atu ma kumeno uyero nia ebemito edwog i cokiri, judong cokiri gicopo maku yub kara juponj kude Biblia kadok i wang’ nidwoge. Judong cokiri re ma gibing’iyo ng’atu ma bitelo wi ponji mi Bibliane.

¹¹ Pi nilubo lapor mi kisa pa Yehova, judong cokiri gibiyenyo kaka dhanu ceke m’uweko Yehova man gibikwayugi nia gidwog i bang’e. Tek jadubo moko unyutho nia eloko cwinye man eweko timo pare ma rac, jucopo dwoge i cokiri m’umbe galu.—2 Kor. 2:6-8.

12. (a) Ukwayu judong cokiri gibed ku wang’gi lee mandha i lembe ma kani? (b) Pirang’o ukwayu ngo wapar nia Yehova copo timo ngo kisa ni kit judubo moko? (Nen bende korolembe mi there.)

¹² Lembe moko tie ma kwayu judong cokiri gibed ku wang’gi lee mandha i igi i wang’ nidwogo ng’atini i cokiri. Ku lapor, tek jugam juwodho ng’atu moko kud i cokiri pilembe etiyo ku nyathin ma nyanok yanga yanga, emaku nyathin ma nyanok ku kero kunoke etiyo ku rieko pi nilalu gamiri pare, ukwayu judong cokiri ginyang’ cuu nia andha eloko cwinye. (Mal. 2:14; 2 Tim. 3:6) Gicikiri nigwoko udul rombe. Re i saa ma rom eno, ukwayu ngo giwil nia Yehova bijolo jadubo m’unyutho nia eloko cwinye i andha man m’uweko timo pare ma rac. Pieno kadok nwang’u judong cokiri gicikiri nibedo ku wang’gi i kum ju m’utiyo kud abombi pi nitimo juwagi rac de, re ukwayu ngo gipar nia dong’ Yehova copo timo ngo kisa ni dhanu ma kumeno.b—1 Pet. 2:10.

GIN MA COKIRI COPO TIMO

13. Tung’ tung’ ma kani m’utie i kind kite ma wakwo ko ku ng’atu ma judong cokiri gimiyo ire juk ku ng’atu ma juwodho kud i cokiri?

¹³ Calu ma waneno i thiwiwec m’ukadhu, saa moko jutwong’o nia ng’atu moko unwang’u juk. I saa ma kumeno, wamedara nidikara kude pilembe wang’eyo nia edaru loko cwinye man eweko timo pare ma rac. (1 Tim. 5:20) Fodi asu etie ng’atu acel m’i cokiri man etie ku yeny mi tielocwiny mir umego ku nyimego pare kara emedere nitimo gin m’atira. (Ebr. 10:24, 25) Ento lembe pare ukoc bor dit ku pa ng’atu ma juwodho kud i cokiri. ‘Waweko nidikara’ ku ng’atu ma kumeno, man ‘kadok acama de wacamu ngo kude.’—1 Kor. 5:11.

14. Jukristu gicopo tiyo nenedi ku pidocwiny migi ma Biblia uponjo i lembe m’umulo kum ju ma juwodho kud i cokiri? (Nen bende cal.)

¹⁴ Nyo lembe ma waai waneno ubenyutho nia wacikara niwil magwei ku ng’atu ma juwodho kud i cokiri? Ungo. I andha wabidikara ngo kude. Re Jukristu gicopo tiyo ku pidocwiny migi ma Biblia uponjo pi ning’iyo ka nyo gibilwong’o kunoke ngo ng’atu ma juwodho kud i cokiri ubin i coko, eno ke tek etie wat migi kunoke tek ebino jarimgi ma ceng’ini. Dong’ kan ebino ke? Con wabed wamotho ngo ng’atu ma kumeno. Ento i lembe maeni de ukwayu Jakristuman utii ku pidocwiny pare ma Biblia uponjo pi ning’iyo gin m’ebitimo. Jumoko giromo winjiri ngo rac ka gibemotho ng’atu ma kumeno kunoke ka gibejole i coko. Re ukwayu ngo watel wec hai kude kadi kud wadikara kude.

15. 2 Yohana 9-11 uweco pi kit dubo ma nenedi? (Nen bende sanduku ma thiwiye tie, “Nyo Yohana giku Paulo zoo giweco pi kit dubo ma rom?”)

¹⁵ Jumoko giromo penjiri kumae: ‘Nyo Biblia uyero ngo nia Jakristu m’umotho ng’atu ma kumeno udikere bende karacelo kude i tic pare ma reco?’ (Som 2 Yohana 9-11.) Verse mange m’udhoko kum verse maeni ubenyutho nia telowic ma nwang’ere i iye uweco pi ju m’ujai i kum yiyoyic man ju m’ubemewo timo ma reco ku kero. (Nyu. 2:20) Pieno, tek ng’atu moko ubemewo ponji mi ju m’ujai i kum yiyoyic kunoke timo mange ma reco, judong cokiri gicikiri ngo niciliewe. Re wabayu ngo genogen nia saa moko wiye bilero. Ento ka fodi wiye lero ngo, wabimothe ngo, man kadok alwong’a de wabilwong’e ngo i coko.

LUB LAPOR MI NGISI MAN MI KISA PA YEHOVA

16-17. (a) Yehova ubemito judubo gitim ang’o? (Ezekiel 18:32) (b) Kinde ma judong cokiri gibeii nikonyo ju m’utimo dubo ma pek, gicopo nyutho nenedi nia gibetimo tic karacelo ku Yehova?

¹⁶ Waponjo lembang’o i thiwiwec abic m’i Otkur ma Wiw maeni? Yehova ubemito ngo nia ng’atu moko acel de utho! (Som Ezekiel 18:32.) Ento ebemito judubo girip kindgi kude. (2 Kor. 5:20) Pi thelembe maeno re ma niai con, Yehova ubed ukwayu thiri thiri dhanu pare ma gijai man bende dhanu ma tung’ tung’ nia gilok cwinygi man gidwog i bang’e. Judong cokiri gitie ku rwom mi timo tic karacelo ku Yehova nwang’u gibeii nikonyo ju m’utimo dubo ma pek kara gilok cwinygi.—Rum. 2:4; 1 Kor. 3:9.

¹⁷ Kepar pir anyong’a ma bedo i polo saa ma jadubo moko uloko cwinye! Anyong’a nego Wegwa m’i polo ma Yehova lee mandha saa ceke ma kan acel m’i kind rombe pare m’urwinyo udwogo i cokiri. Mer ma wamaru ko Yehova medere nidoko tek kinde ma wabenyamu i lembe iwi ngisi, kisa man bero pare ma yawe mbe.—Luka 1:78.