JOSUÉ

1 Jehová Diosan Moisés serviripajj jiwjjäna uka qhepatjja, Moisesar yanapiri Josué*+ sat Nun chachan yoqaparojj akham sasaw Jehová Diosajj säna:+ 2 “Moisés servirijajj jiwatäjjewa.+ Jichhajj wakichtʼasim, jumasa markankirinakasa Jordán jawira paskatapjjam, kawkïr oraqtï Israel markar churkä uka oraqer sararakim.+ 3 Kunjamtï Moisés servirijar siskayätjja, ukarjamaw kayunakamamp taktʼapkäta taqe uka lugaranak churapjjäma.+ 4 Jumanakankir oraqejja, wasarat qalltasajj Líbano cheqakamäniwa, Éufrates sat jachʼa jawirkama, mä arunjja hititanakajj jakapki uka cheqkama,+ inti jalanta toqensti Mar Grande* sat lamar qotakamaraki.+ 5 Jiwañamkamajj janiw khitis juma contrajj saytʼkaniti.+ Kunjamtï Moisesampïkayätjja, ukhamarakiw jumampïskäjja.+ Janiw jaytjkämati, ni apanukkämasa.+ 6 Jan ajjsaramti,* chʼamani saytʼasim,+ nayra awkinakamar juramentompi arskayäta uka oraqe herenciat katoqapjjañapatakejja,+ jumaw aka markar yanaptʼäta.

7 ”Janipun ajjsaramti,* wali chʼamani saytʼasim, Moisés servirijajj jaytawayktam uka Leysti, wali amuyumpi phoqarakim. Janirak uka Leyit ni kupirusa ni chʼeqarusa saranukumti,+ ukhamat kawkir sarasas wali yatiñampi taqe kunsa lurañamataki.+ 8 Aka Leyinakan libron arunakapatjja yaqhanakarojj parlañamapuniwa,*+ uruy arumaw liytʼañama lupʼiñamaraki,* ukhamat kunatï ukan qellqatäki ukarjam sum phoqañamataki.+ Ukhamatwa taqe kunas sumaru sarani, wali yatiñampirakiw taqe kunsa luräta.+ 9 Nayajj jumar sissmawa: jan ajjsaramti,* wali chʼamani saytʼasim. Janirak ajjsarañat khatatimti, ni sustjasimsa, kawkirus sarkchïtajja Jehová Diosamaw jumampïskani”+ sasa.

10 Ukatjja Josué chachajj akham sasaw marka pʼeqtʼirinakar säna: 11 “Campamento paskasajj akham sasin markankirinakar sapjjam: ‘Manqʼañanak wakichasipjjam, akat kimsa urutjja Jordán jawira paskatapjjäta, ukhamat ukar purisajja kawkïr oraqtejj Jehová Diosamajj churapkätam ukan jakapjjañamataki’+ sasa”.

12 Rubenitanakarusa, gaditanakarusa, Manasesan chikat tribuparusa akham sasaw Josué chachajj säna: 13 “Kuntï Jehová Diosan Moisés serviripajj sapkayätam uk amtasipjjam:+ ‘Jehová Diosamaw sumankañsa aka oraqsa churapjjtamjja. 14 Warminakamasa, wawanakamasa, uywanakamasa, Moisesajj Jordán jawira aksa toqenkir oraqe* churapktam ukanwa jakapjjani.+ Ukampis guerran nuwasir chʼamani chachanaka,+ nuwasiñatakjam formtʼataw mayni jilanakaman nayraqatap paskatapjjañama.+ Jumanakaw yanaptʼapjjañama, 15 kunapachatï jilanakamar Jehová Diosajj jumanakarjam sumankañ churkani, ukhamaraki Jehová Diosapan churat oraqe katupkani, ukhakamaw yanaptʼapjjañama. Ukatjja kawkïr oraqtï jakañatak churapktam ukaruw kuttʼanjjapjjäta, kawkïr oraqtejj Jehová Diosan Moisés serviripajj churapkayätam uka oraqe katupjjarakïta, Jordán jawirat inti jalsu toqenkir oraqe’”.+

16 Jupanakajj akham sasaw Josué chachar sapjjäna: “Kuntï sapkista ukanak taqpach lurapjjäjja, kawkirutï khitapkitäta ukarus sarapjjarakïwa.+ 17 Nanakajj taqe kuntï Moisesajj sapkitäna ukarojj istʼapjjayätwa, ukhamarakiw jumarojj istʼapjjäma. Jehová Diosamajj cheqpachapun jumampïpan, kunjamtejj Moisesampïkäna ukhama.+ 18 Khititejj arunakamar jan istʼkani, mayitanakamsa jan phoqkani ukajja, jiwayatäniwa.+ Janipun ajjsaramti,* wali chʼamani saytʼasim”+ sasa.

2 Ukatsti Nun chachan Josué yoqapajja, jan khitin uñjkataw Sitim oraqet+ pä chachanak uñaqerinakjam khitäna. Jupanakarojj akham sänwa: “Sarapjjam, Canaán oraq uñaqanipjjam, yamas Jericó marka sum uñaqanipjjäta” sasa. Sarasasti Rahab+ sutini prostituta warmin utaparuw puripjjäna, ukanwa quedasipjjarakïna. 2 Jericó markan reyiparusti akham sasaw yatiyasïna: “Israelit chachanakaw jichha arumajj oraqes uñaqer mantanipjjatayna” sasa. 3 Uk istʼasajja Jericó markan reyipajj Rahab warmir yatiyanipjjañapatakiw akham säna: “Utamar purisin quedasipki uka chachanakar irpsunim, jupanakajj taqpach oraq uñaqeriw jutapjje” sasa.

4 Ukampis Rahab warmejj uka pä chachanakarojj imantänwa. Ukatsti akham sänwa: “Uka chachanakajj akar purinisipkapuniwa, ukampis kawkitsa jutapjje uk janiw yatkayätti. 5 Chʼamakthapirojj markan punkunakap niya llawintañampïsipkäna ukhaw uka pä chachanakajj sarjjapjje. Kawkiruy sarjjapjjchi, janiw yatkti. Jumanakatï ratuk arktapjjasmajja, jupanakarojj katjapjjasmawa” sasa. 6 (Ukampis Rahab warmejja, techor irpkatasaw uka chachanakarojj techon lino alinakajj filaki uchatäkäna uka taypir imantäna). 7 Reyin khitat chachanakajj uka pä chachanakar katjañatakiw Jordán jawira toqer tʼijukam arktapjjäna, jawir umajj pasañjamäki uksa cheqanakaru,+ markan punkupsti arktirinakan mistutapjjaruw llawintjjapjjarakïna.

8 Uñaqer chachanakajj janïr ikipkäna ukhaw Rahab warmejj jupanakan ukar techor makatäna. 9 Jupasti chachanakarojj akham sänwa: “Jehová Diosajj aka marka jumanakar churañapätap sum yatta,+ jumanakat wal ajjsarayasipjjta.+ Taqe aka markankirinakajja, jumanakat istʼasajj janiw kamachirjamäpkisa,+ 10 Egipto markat mistunipkayäta ukhajj kunjamsa Jehová Diosajj jumanak nayraqatan Mar Rojo qotan umanakap wañtʼayäna,+ kunjamsa jumanakajj amorreonakan Sehón,+ Og+ sat pä reyinakaparojj Jordán jawira khurkatan* qʼal jiwarayapjjayäta ukanak sum istʼapjjta. 11 Taqe ukanakat parlir istʼasajj walpun ajjsarayasipjjta,* janirakiw khitis jumanak contrajj saytʼasirjamäkiti, jumanakan Jehová Diosamajj alajjpachansa aka oraqensa Diosätap layku.+ 12 Jichhajj mirä amp suma, Jehová Diosan sutipjjaruy mä juramentompi arsupjjam, kunjamtï nayajj jumanakar munasiñat jan jaytjasirïtaj uñachtʼayapksmajja, ukhamarakiw jumanakajj tatajan familiaparojj munasiñat jan jaytjasirïpjjatam uñachtʼayapjjäta. Arunakam phoqerïpjjatam yatiñajatakejj mä señal churapjjeta.* 13 Jumanakaw jan jiwapjjañapatakejj tatajatsa, mamajatsa, jilanakajatsa, kullakanakajatsa, ukhamarak taqe jupanakankirinakatsa khuyaptʼayasipjjañama, jumanakaw jiwañat salvapjjetäta”*+ sasa.

14 Chachanakasti sapjjarakïnwa: “¡Janitï ukarjam lurapkäjja, nanakaw jumanak lantejj jiwapjjäjja!* Kunarutï nanakajj jutapkta uk jan yatiyapkäta ukhajja, Jehová Diosajj aka oraq churapkitani ukhajj munasiñat jan jaytjasirïpjjatajwa uñachtʼayapjjäma, arunakajsa phoqapjjarakïwa” sasa. 15 Ukatjja Rahab warmejj ventanatwa uka chachanakarojj mä pitampi* warkoqäna, utapajj markan murallapat mä ladonkänwa. Cheqas jupan utapajj markan murallap patjjan utachatänwa.+ 16 Rahab warmisti chachanakarojj sarakïnwa: “Qollunak toqer sarapjjam, jumanakar thaqerinakampi jan katjayasipjjañamatakejja, kimsüruw ukan imantasipjjäta. Ukatsti jupanakajj markar kuttʼanjjapjjani ukhaw jumanakajj kawki cheqattï jutapkta ukar kuttʼjjapjjäta” sasa.

17 Chachanakasti sapjjarakïnwa: “Juramenton arsurapipksma uka arunakar phoqapjjäwa,+ 18 ukhamäñapatakejj markar mantanipkä ukhaw kawkïr ventanattï saraqapkä ukar aka llijkir wila color pitampi* chintʼañama. Uta manqharojj jumamp chikaw tatamarusa, mamamarusa, jilanakamarusa, kullakanakamarusa, tataman familiaranakaparus tantachtʼañama.+ 19 Maynitï utamat anqar mistusin jiwani ukhajja, jupan juchapäniwa, janiw nanakajj juchanïpkäti. Maynitejj jumamp chikäkasina uta manqhan jan waltʼayat uñjasini* ukhajja, jiwatapat nanakaw juchanïpjjä. 20 Nanakajj kunarus aka markar jutapjjta uk arsüta ukhajja,+ juramenton arsurapipksma uka arunakan jan phoqasitapat janiw nanakajj juchanïpkäti” sasa. 21 Rahab warmisti sarakïnwa: “Walikiwa, kunjamtï sapkta ukarjamaw luräjja” sasa.

Uk sasajj khitanukjjänwa, chachanakasti sarjjapjjarakïnwa. Ukatjja llijkir wila color pita* ventanar chintʼäna. 22 Chachanakasti qollunak toqeruw sarjjapjjäna, kimsüruw ukan quedasipjjarakïna, jupanakar thaqapkäna ukanakan kuttʼapjjañapkama. Jupanakar thaqerinakasti, taqpach thakinakanwa thaqtapjjäna, ukampis janiw jupanakar katjapkänti. 23 Qollunak toqet saraqanjjasajja, uñaqeri pä chachanakajj jawira paskatasajj Nun chachan Josué yoqapan ukaruw sarapjjarakïna. Taqe kunatï jupanakar paskäna ukanakwa Josué chacharojj taqpach yatiyapjjäna. 24 Jupanakajj akham sasaw Josué chachar sapjjäna: “Jehová Diosajj taqpach oraqwa churjjestu.+ Uka markankir jaqenakajj jiwasanakat istʼasajj janiw kamachirjamäpkisa”+ sasa.

3 Josué chachajj wali alwat sartasïna, ukat mayni israelitanakamp chikarakiw Sitim+ cheqat sarasajj Jordán jawirar puripjjäna. Janïr khurkatar paskasajj ukanwa uka arumajj iktʼapjjäna.

2 Kimsa urunakatjja, marka pʼeqtʼirinakajj+ campamento taypi paskasaw 3 markankirinakarojj akham sapjjäna: “Jehová Diosaman pactor mantat arcapa levita sacerdotenakampi apat+ uñjapjjäta ukhajja, kawkjankapktatï uka cheqat sartasajj arkapjjañamawa. 4 Ukampis jumanakajj niya 890 metronak* jayatakwa arkapjjañama, janiw jakʼachasipjjätati, ukhamat kawki thaksa sarapjjañama uk yatipjjañamataki, jumanakasti janiw kunapachas uka thak sarapkayätati” sasa.

5 Josué chachasti markarojj sänwa: “Jumanakajj qʼomachasipjjam,+ Jehová Diosajj musparkañanakwa qharürojj jumanak taypin lurani”+ sasa.

6 Josué chachasti sacerdotenakarojj sarakïnwa: “Pactor mantat arca aptapjjam,+ ukatsti markan nayraqatap sarapjjam” sasa. Jupanakasti arca aptasajj markan nayraqatapwa sarapjjarakïna.

7 Ukatsti Jehová Diosajj akham sasaw Josué chachar säna: “Jichhüruw taqe Israel markan uñjkat jumarojj jachʼar aptäma,+ ukhamatwa jupanakajj jumampïskataj yatipjjani,+ kunjamtejj Moisesampïkayäta ukhama.+ 8 Pactor mantat arca apiri sacerdotenakarojj akham sañamawa: ‘Jordán jawira uma jakʼaru purisajja, umar mantasaw ukan saytʼapjjäta’+ sasa”.

9 Josué chachasti israelitanakarojj akham sänwa: “Akar jutapjjam, Jehová Diosaman arunakap istʼapjjam” sasa. 10 Ukatjja Josué chachajj saskakïnwa: “Jakkir Diosajj jumanak taypinkaskatapsa,+ ukhamarak cananeonakarusa, hititanakarusa, heveonakarusa, perizitanakarusa, guirgaseonakarusa, amorreonakarusa, jebuseonakarus+ jumanak taypit alisnukuñapätapsa, akhamatwa yatipjjäta: 11 oraqpachan Tatitupäki ukan pactor mantat arcapaw jumanak nayraqat sarani, Jordán jawiraruw apapjjarakini. 12 Jichhasti Israel markan tribunakapatjja, 12 chachanak ajllisipjjam, sapa tribut mä chacharuw ajllipjjäta.+ 13 Oraqpachan Tatitupäki uka Jehová Diosan arcap apir sacerdotenakan kayu plantanakapajj Jordán jawirar taktʼapkani* ukhajja, amsta toqet jalanir umanakajj mä perqar uñtasitaw pachpar saytʼani”+ sasa.

14 Ukatsti israelitanakajj Jordán jawira paskatañataki campamentonakapat sartapkäna ukhajja, pactor mantat arca apir sacerdotenakajj+ markan nayraqatapwa sarapjjäna. 15 Arca apir sacerdotenakajj Jordán jawiraruw puripjjäna (cosecha tiempon sapüruw Jordán jawirajj wali phoqa jilaras mantirïna),+ kayunakapamp umar taktʼapjjäna ukhajja, 16 alay toqet jalanir umanakajj saytʼapjjänwa. Jukʼamp jaya cheqanwa Zaretán jakʼankir Adán sat markan mä perqar uñtasit saytʼäna. Aynach toqer jalir umanakasti Arabá qotaru, jan ukajj Mar Salado* qotar saraqasaw wañtʼjjäna. Uka umanakan saytʼjjepanwa Israel markankirinakajj Jericó toqer pasjjapjjarakïna. 17 Jehová Diosan pactor mantat arca apir sacerdotenakajja, taqe Israel markajj waña oraq pasapjjañapkamaw Jordán jawira taypin waña oraqen saytʼatäsipkäna.+

4 Taqpach israelitanakajj Jordán jawira paskatjjapjjäna ukhajja, Jehová Diosajj akham sasaw Josué chachar säna: 2 “Markankirinakat 12 chachanak ajllisipjjam, sapa tribut mä chacharuw ajllipjjäta,+ 3 jupanakarojj sarakïtawa: ‘Sacerdotenakajj Jordán jawira taypin saytʼatäpkäna uka cheqatjja,+ 12 qalanak aptapjjam, kawkjantï ikipkäta ukjar uchapjjarakim’+ sasa”.

4 Ukhamasti Josué chachajj israelitanak taypit ajllita 12 chachanakaruw jawsäna, sapa tributjja mayakama, 5 jupanakarusti Josué chachajj sänwa: “Jehová Diosaman arcap nayräjj sarasajj Jordán jawir taypir mantapjjam, sapa maynirakiw mä qala aptasajj kallachipjjar apañapa, israelit tribunakajj qhawqhäpkitï ukarjama. 6 Uka qalanakajj kuntï Diosajj jumanakatak lurki uk amtayañatakiwa. Wawanakamatejj* akat qheparojj ‘¿kunatsa aka qalanak akar uchapjjta?’+ sasin jisktʼapjjätam ukhajja, 7 jumanakajj akham sapjjañamawa: ‘Jordán jawiran umanakapaw Jehová Diosan pactor mantat arcap nayräjjan saytʼäna.+ Kunapachatï arcajj Jordán jawir paskatäna ukhajja, Jordán jawiran umanakapajj pachparuw saytʼäna. Aka qalanakajj Israel markankirinakan taqe ukanak walja tiempotak amtapjjañapatakiwa’+ sasa”.

8 Israelitanakajj Josué chachan arunakaparjamaw lurapjjäna. Kuntï Jehová Diosajj Josué chachar siskäna ukarjamaw 12 qalanak Jordán jawir taypit aptapjjäna, Israelan tribunakapajj qhawqhäpkitï ukarjama. Kawkjantï ikipjjañapäkäna ukjaruw uchapjjarakïna.

9 Josué chachajj Jordán jawir taypiruw 12 qalanak ucharakïna, kawkjarutï pactor mantat arca apir sacerdotenakajj taktʼapkäna ukjaru.+ Uka qalanakajj jichhürkamaw ukankaski.

10 Pactor mantat arca apir sacerdotenakajj Jordán jawir taypiruw saytʼapjjäna, kuntï Jehová Diosajj Israel markar lurapjjañap maykäna taqe ukanak lurañ tukuyapjjañapkama, taqe ukanaksti Josué chacha taypiw mayïna. Kunjamtï Moisesajj Josué chachar siskäna ukarjamaw lurapjjarakïna. Ukañkamajj jankʼakiw Israel markankirinakajj jawir paskatapjjäna. 11 Taqe israelitanakajj jawir pasjjapjjäna ukhajja, Jehová Diosan arcapasa sacerdotenakasa markan uñjkataw pasapjjarakïna.+ 12 Rubenitanakasa, gaditanakasa, Manasesan chikat tribupasa nuwasiñatakjam formtʼataw+ mayni israelitanakan nayraqatap pasapjjäna, kunjamtï Moisesajj siskäna ukarjama.+ 13 Niya 40.000 soldadonakaw nuwasiñ armanakampi wakichtʼatäpjjäna, jupanakajj Jehová Diosan uñjkataw Jericó markan wasar pampa oraqenakapar pasapjjarakïna.

14 Uküruw Jehová Diosajj Josué chacharojj Israel marka nayraqatan jachʼar aptäna.+ Kunjamtï Moisesar wal respetapkänjja,* ukhamarakiw Josué chacharojj taqe jakäwipan wal respetapjjäna.+

15 Jehová Diosajj akham sasaw Josué chachar säna: 16 “Pactor mantat arca apiri sacerdotenakarojj Jordán jawirat mistunipjjañapatak mayim”+ sasa. 17 Ukatwa Josué chachajj sacerdotenakar akham säna: “Jordán jawirat mistunipjjam” sasa. 18 Kunapachatï Jehová Diosan pactor mantat arcap apiri sacerdotenakajj+ Jordán jawir taypit mistunjjapjjäna, sacerdotenakan kayu plantanakapas waña oraqer taktʼjjäna ukhajja, Jordán jawiran umanakapajj qalltanjamaw wali phoqa jilaras mantjjäna.+

19 Israel markajj nayrïr phajjsina tunkïri urunwa Jordán jawir paskatäna, Guilgal+ cheqanwa campamentonakap saytʼayapjjäna, Jericó markan inti jalsu toqenkir qorpanakapana.

20 Jordán jawirat apanit 12 qalanakjja, Guilgal+ cheqaruw Josué chachajj uchäna. 21 Ukatjja israelitanakarojj akham sänwa: “Wawanakamajj ‘¿kunatsa aka qalanak akar uchapjjta?’+ sasin jutïrin jisktʼapjjätam ukhajja, 22 wawanakamarojj akham sasaw qhanañchapjjäta: ‘Israel markajj waña oraqwa Jordán jawir pasäna.+ 23 Jehová Diosasaw pasapjjañajkamajj Jordán jawiran umanakap nanakan uñjkat wañtʼayäna, kunjamtï Jehová Diosasajj pasapjjañajkam Mar Rojo qotan umanakap nanakan uñjkata wañtʼaykäna ukhama.+ 24 Jehová Diosan amparapajj qhawqha chʼamanis+ uk taqe markanakan yatipjjañapatakiw jupajj ukham luräna, ukhamaraki Jehová Diosar wiñay ajjsarapjjañamataki’ sasa”.

5 Jordán jawirat inti jalanta toqenkiri* amorreonakan taqpach reyinakapasa,+ lamar qota jakʼankiri cananeonakan taqpach reyinakapasa,+ kunjamsa Jehová Diosajj israelitanakan pasapjjañapkamajj Jordán jawiran umanakap jupanakan uñjkata wañtʼayäna ukanak istʼapjjäna ukhajja, walpun ajjsarayasipjjäna,*+ israelitanak kawsajj jan chʼamaniw uñjasipjjäna.+

2 Uka tiemponjja, Jehová Diosajj akham sasaw Josué chachar säna: “Cuchillonak qalat lurasim, israelit chachanakaruw circuncidäta”*+ sasa. 3 Ukatwa Josué chachajj cuchillonak qalat luräna, israelit chachanakaruw Guibeat-Haaralot* cheqan circuncidarakïna.+ 4 Aka razón utjipanwa Josué chachajj jupanakar circuncidäna: Egipto markat mistunipkäna taqe uka chachanakajja, mä arunjja guerran nuwasiri* markankir taqe chachanakajja, Egiptot mistunisajj wasara oraqena ukhamarak thakinwa jiwarapjjäna.+ 5 Egipto markat mistunipkäna ukanakat taqeniw circuncidatäpjjäna, ukampirus Egipto markat mistunjjasina, wasara oraqena ukhamarak viajen nasirinakajj janiw circuncidatäpkänti. 6 Israelitanakajj 40 maranakaw wasaran sarnaqapjjäna,+ guerran nuwasiri chachanakajj taqeni jiwapjjañapkama, jupanakajj Egipto markat mistunisajj Jehová Diosar janiw istʼapkänti.+ Jehová Diosasti kawkjantï leches miskʼis wal utjki uka oraq+ janipuniw uñjayapkämati sasaw jupanakar mä juramento lurasin säna,+ uka oraqsti jiwasar churañatakiw Jehová Diosajj mä juramento lurasin nayra awkinakasar arsüna.+ 7 Ukatwa yoqanakaparojj jupanak lanti uka oraqer irpantäna.+ Jupanakaruw Josué chachajj circuncidäna. Jupanakajj janiw viajen circuncidatäpkänti.

8 Markpachar circuncidañ tukuyapjjäna ukhajja, waliptapjjañapkamaw pachpa campamentopan quedasipjjäna.

9 Jehová Diosajj akham sasaw Josué chachar säna: “Egipto markajj phenqʼachapkayätam uk jichhüruw apaqapjjsma” sasa. Ukatwa jichhürkamajj uka cheqajj Guilgal*+ sutimpi uñtʼasi.

10 Israelitanakajj Guilgal cheqanwa campamentopankasipkäna, ukhaw nayrïr phajjsit 14 urunak saraqatarojj jaypʼu toqer Pascua amtapjjäna,+ Jericó markan wasar pampa oraqenakapana. 11 Pascua pasatatjja, oraqen achunakapwa manqʼañ qalltapjjäna, uka pachpa urunwa Pascua pasatat jan levaduran tʼantʼampi+ grano jampʼimpi manqʼapjjäna. 12 Qhepürusti oraqen achunakap manqʼapjjäna ukhajj janiw maná manqʼajj utj-jjänti. Israelitanakatakejj janis maná manqʼajj jukʼamp utj-jjchïnjja,+ uka marajj Canaán oraqen achunakapwa manqʼapjjäna.+

13 Mä urojja, Josué chachajj Jericó marka jakʼankaskäna ukhaw espadas aytʼasita+ mä chacharu+ jupan nayraqatapan uñjäna. Uka chachar jakʼachasisasti akham sasaw jisktʼäna: “¿Nanakampïtati, jan ukajj nanak conträtacha?” sasa. 14 Ukjjarusti uka chachajj sänwa: “Janiwa, antisas Jehová Diosan ejercitopankir mä principjamaw* jutta”+ sasa. Uk istʼasasti Josué chachajj oraqer puriñkam altʼasisaw jupa nayraqatan qonqortʼasïna, ukatsti akham sänwa: “Tata, ¿naya servirimarojj kuns yatiyitäta?” sasa. 15 Jehová Diosan ejercitopankir principejj sänwa: “Kayunakamat wiskhum* apsusim, taktʼaskta uka cheqajj sagradowa” sasa. Josué chachajj jankʼakiw uka arunak phoqäna.+

6 Israelitanakar ajjsarapjjatap laykojj Jericó markajj suma llawintatänwa, janiw khitis mistkänti ni mantkänsa.+

2 Jehová Diosasti akham sasaw Josué chachar säna: “Jericó marksa, reyipsa, guerran nuwasir chʼamani chachanakapsa jumaruw katuysma.+ 3 Soldadonaka, taqe jumanakajj mä kutiw Jericó marka anqäjj muytapjjäta. Sojjta uruw ukham lurapjjañama. 4 Arca nayraqatanjja paqallqo sacerdotenakaw paqallqo pututunak* apapjjañapa. Paqallqöri urunsti, paqallq kutiw marka anqäjj muytapjjañama, sacerdotenakaw uka pututunak phustʼapjjañapa.+ 5 Kunapachatï pututunak phustʼir istʼapjjäta, mä arunjja suynir istʼapjjäta ukhajja, jankʼakiw taqpach soldadonakajj guerran nuwasiñatakjam wali jachʼat artʼasipjjani. Ukatsti markan murallapajj allthaptaniwa,+ soldadonakasti taqeniw sarasajj markar cheqaki mantapjjañapa” sasa.

6 Sacerdotenakar tantachtʼasajja, Nun chachan Josué yoqapajj akham sänwa: “Pactor mantat arca aptapjjam, paqallqo sacerdotenakaw paqallqo pututunak aptʼat Jehová Diosan arcap+ nayraqat sarapjjañapa” sasa. 7 Ukatsti Josué chachajj soldadonakar sarakïnwa: “Jumanakajj nayraqat sarapjjam, marka anqäjj muytapjjam. Wali armantat soldadonakasti+ Jehová Diosan arcap nayräjj sarapjjañapa” sasa. 8 Kunjamtï Josué chachajj soldadonakar siskänjja, ukarjamaw Jehová Diosan nayräjjap sarasajj paqallqo pututunak apiri paqallqo sacerdotenakajj pututunak phustʼapjjäna, jupanakan qhepapwa Jehová Diosan pactor mantat arcapjja apapjjäna. 9 Wali armantat soldadonakasti, pututunak phustʼir sacerdotenakan nayräjjap sarapjjäna. Qhepäjj sarir soldadonakasti arcan qhepap sarapjjarakïna, ukañkamajj jan amuktʼasaw sacerdotenakajj pututunak phustʼapjjäna.

10 Josué chachasti akham sasaw soldadonakar säna: “Janiw artʼapjjañamäkiti ni arunakamas istʼasiñapäkiti. Janipuniw kuna arus lakanakamat mistuñapäkiti, kunürutejj ‘¡artʼapjjam!’ sapkäma ukürkama. Ukhakiw jumanakajj artʼapjjañama” sasa. 11 Jupasti Jehová Diosan arcap marka anqäjj muytayanipjjañapatakiw mayïna, jupanakasti mä kutiw muytayanipjjäna, campamentor kuttʼanjjasajj ukanwa ikipjjäna.

12 Qhepärmanthisti Josué chachajj wali alwat sartäna, sacerdotenakasti Jehová Diosan arcapwa+ apapjjäna, 13 paqallqo pututunak apir paqallqo sacerdotenakajj Jehová Diosan arcap nayräjj sarapjjäna, jan amuktʼasaw pututunak phustʼapjjäna. Wali armantat soldadonakajj jupanak nayra sarapjjäna, qhepat arkir soldadonakasti Jehová Diosan arcap qhepap sarapjjäna, ukañkamajj sacerdotenakajj jan amuktʼasaw pututunak phustʼasipkakïna. 14 Payïri urunjja mä kutimpiw marka anqäjj muytapjjäna, ukatsti campamentoruw kuttʼanjjapjjarakïna. Sojjta urunakaw ukham lurapjjäna.+

15 Paqallqöri urunjja wali alwaw willjta horasan sartapjjäna, ukhamarakiw marka anqäjj muytapjjäna, ukampis ukürukiw paqallq kuti muytapjjäna.+ 16 Paqallqöri kutinjja sacerdotenakajj pututunak phustʼapjjäna. Josué chachasti soldadonakarojj akham sänwa: “¡Artʼapjjam,+ Jehová Diosaw markjja jumanakar churapjjtam! 17 Markasa kunanakatï uka markan utjki ukanakasa qʼala tukjatäñapawa,+ taqe ukanakajj Jehová Diosankiwa. Rahab+ prostituta warmimpi utapan jupampïpki jupanakakiw jakapjjañapa, jupaw khitktan uka uñaqerinakar imanti.+ 18 Kunatï qʼala tukjatäñapäki ukanakat jitheqtapjjam,+ ukhamat ukanak munasin jan apasipjjañamataki.+ Ukanaktï aptasipjjasmajja, Israelan campamentopajj qʼala tukjataw uñjasispa, cheqas jan waltʼayataw uñjasispa.+ 19 Ukampirus qollqesa, qorisa, kunanakatï cobreta hierrota luratäki ukanakasa, Jehová Diosatakejj sagradowa.+ Ukanakajj kawkjantï wali valoraninakajj Jehová Diosan utapatak imaski uka cheqaruw uchasiñapa”+ sasa.

20 Ukatjja pututunak phustʼapjjäna ukhajja, soldadonakajj jachʼat artʼapjjäna.+ Pututunakan phustʼasitap suynir istʼasasti, soldadonakajj guerran nuwasiñatakjam wali jachʼatwa artʼapjjäna, ukaratpachaw murallajj allthaptäna.+ Ukjjarusti soldadonakajj markaruw mantapjjäna, sapa maynirakiw markar cheqaki mantapjjäna, ukhamatwa mark katuntapjjäna. 21 Jupanakasti taqe kunatï uka markan utjkäna ukanakjja, qʼalwa espadampi tukjapjjäna, chachanaksa, warminaksa, waynanaksa, tawaqonaksa, jilïr chachanaksa, jilïr warminaksa, toronaksa, ovejanaksa, asnonaksa qʼal tukjapjjäna.+

22 Josué chachasti marka uñaqanipkäna uka pä chachanakarojj akham sänwa: “Prostituta warmin utapar mantapjjam, uka warmirusa taqe jupankirinakarusa irpsunipjjam, kunjamtï juparojj juramentomp arsupkta ukarjama”+ sasa. 23 Uñaqanipkäna uka wayna chachanakasti, mantasajj Rahab warmiruw irpsunipjjäna, tataparusa, mamaparusa, jilanakaparusa, taqe jupankirinakarus irpsunipjjarakïnwa. Cheqas taqpach familiaparuw irpsunipjjäna,+ ukatsti israelitanakan campamentopat anqäjjaruw yaqha cheqar irpapjjäna.

24 Ukatjja marksa kunanakatï ukan utjkäna ukanaksa phichantapjjänwa. Ukampis qollqsa, qorsa, kunanakatï cobreta hierrota luratäkäna ukanaksa, kawkjantï wali valoraninakajj Jehová Diosan utapatak imaski uka cheqaruw uchapjjäna.+ 25 Rahab sat prostituta warmimpiru, tatapan familiapampiru, ukhamarak taqe jupankirinakarukiw Josué chachajj jan jiwaykänti.+ Josué chachajj Jericó marka uñaqanipjjañapatak khitkäna uka chachanakar imantatapatwa,+ Rahab warmejj jichhürkam Israel markan jakaski.+

26 Ukapachaw Josué chachajj juramentomp arsüna,* akham sasa: “Aka Jericó marka wasitat saytʼayir jaqejja, Jehová Dios nayraqatan maldisitäpan. Cimientonakap uchir jaqejja, jilïr yoqall wawap aptʼaspan, punkunakap lurir jaqesti sullka yoqall wawap aptʼaspan”+ sasa.

27 Jehová Diosajj Josué chachampïnwa,+ jupajj oraqpachan wali uñtʼatäjjarakïnwa.+

7 Ukampis israelitanakajja, kunatï qʼala tukjatäñapäkäna ukampejj janiw kunjamtï Diosajj jupanakar maykäna ukarjam lurapkänti. Judá tribunkiri Zérah chachan familiapat jutirïki, Zabdí chachan allchhipäki, Carmí chachan Acán+ sat yoqapaw kunatï qʼala tukjatäñapäkäna ukanakat apasitayna.+ Ukatwa Jehová Diosajj israelitanakatak wal coleräna.+

2 Josué chachajja, Bet-Aven marka jakʼankiri, Betel+ markat inti jalsu toqenkiri Hai sat markaruw Jericó markat chachanak khitäna, akham sasa: “Makatapjjam, uka oraqe uñaqanipjjam” sasa. Ukatwa chachanakajj Hai+ markar makatasin uka marka uñaqapjjäna. 3 Kuttʼanisajja Josué chacharojj akham sapjjänwa: “Janiw taqpach soldadonakan makatapjjañapajj wakiskiti. Hai markar atipjañatakejj 2.000 jan ukajj 3.000 soldadonakakiw wakisi. Uka markan jukʼanikiw jakapjje, taqpach soldadonakar khitasajj inakiw qariyaskasma” sasa.

4 Ukatwa niya 3.000 soldadonakajj Hai markar makatapjjäna, ukampis uka markankiri chachanakat escapanjjapjjänwa.+ 5 Hai markankir jaqenakajja, 36 israelit chachanakaruw jiwarayapjjäna. Hai markan anqäjj punkupat Sebarim* sat cheqakamaw arktapjjäna, thakin arktasajj israelitanakar atipjasipkakïnwa. Ukatwa israelitanakajj ajjsarañat wal khatatipjjäna.*

6 Uk uñjasasti Josué chachajj llakisiñatwa isip chʼiyjasïna, Jehová Diosan arcap nayräjjanwa ajanup oraqer puriyañkam altʼasïna, jaypʼukamaw ukhamäskäna. Jupasa Israel markankir ancianonakasa* pʼeqenakapar laqʼamp willjjatasisipkakïnwa. 7 Josué chachajj akham sänwa: “Taqe Kunjjar Munañani Jehová Dios Tata, ¿amorreonakampi tukjatäñatakikit Israel markar thaki irpanisajj Jordán jawira pasayanta? ¡Jordán jawira khurkatan* kusisitak jakasipjjeriskayäta! 8 Jehová Dios Tata, perdontʼita, ¿Israel markajj enemigonakapat escapanipjjepan jichhajj kamsäsa? 9 Cananeo jaqenakasa aka oraqen jakir taqe jaqenakasa ukanak pasatap yatipjjani ukhajja, nanakarojj muyuntapjjetaniwa, sutinakajsa qʼal aka oraqet chhaqtayapjjani. ¡Jachʼa sutimas kunakïkani!”+ sasa.

10 Jehová Diosasti Josué chacharojj sarakïnwa: “¡Sarthapim! ¿Kunatsa ajanum oraqer puriyañkam ukan jaqosta? 11 Israel markaw juchachasi. Jupanakajj pactoj pʼakintapjje,+ kuntï nayajj phoqapjjañapatak siskayäta uka pacto janiw phoqapkiti. Jupanakajj kunatï qʼala tukjatäñapäkäna ukanakatwa apaqasipjje,+ lunthatasisajj+ kunatï jupanakan utjki ukanak taypiruw jamasar imantapjje.+ 12 Ukatwa israelitanakajj enemigonakap contrajj jan saytʼasirjamäpkaniti. Israelitanakajj qʼala tukjatäñar katuyatäjjapjjatap laykojja, kutjtanisaw enemigonakapat escapanjjapjjani. Janitï qʼala tukjatäñapäkäna uk jumanak taypit chhaqtayapkätajja, janiw mayampis jumanakampëjjäti.+ 13 ¡Sarthapim, markar qʼomacham!+ Jupanakarojj akham sätawa: ‘Qharürutak qʼomachasipjjam, Israel markan Jehová Diosapajj akham siwa: “Israel marka, kunatï qʼala tukjatäñapäki ukajj jumanak taypinkiwa. Janitï jumanak taypit uk chhaqtayapkätajja, janiw enemigonakam contrajj saytʼasiñ puedipkätati. 14 Jumanakajj alwaw Dios nayraqatan uñstapjjañama, sapa tribuw uñstañapa, kawkïr triburutï Jehová Diosajj ajllkani uka tributjja,+ sapa familiaw uñstañapa, kawkïr familiarutï Jehová Diosajj ajllkani uka familiatjja, sapa mayni utankirinakaw uñstañapa, Jehová Diosajj ajllkani uka utankirinakatjja, sapa familia pʼeqtʼiriw uñstañaparaki. 15 Ukatjja kunatï qʼala tukjatäñapäkäna ukanakat apaqeri jaqeru katjasini ukhajja, jupasa taqe jupankirinakasa jiwayatäsin ninamp phichantatäñapawa,+ Jehová Diosan pactop pakʼintatapata+ ukhamarak Israel markan mä phenqʼaskañ luratapata” sasa’”.

16 Qhepärmanthejj alwat sartasaw Josué chachajj Dios nayraqatar Israel marka uñstayäna, sapa tribuw uñstäna, tribunakatjja Judá tribuw ajllitäna. 17 Ukatsti Judá tribunkiri sapa familiaruw Dios nayraqatar uñstayäna, ukanakat zerahitanakan familiapaw ajllitäna,+ ukatjja Dios nayraqataruw uka familia uñstayäna, uka familiatjja sapa familia pʼeqtʼiriruw uñstayarakïna, jupanakat Zabdí chachaw ajllitäna. 18 Ukjjarusti Zabdí chachan utapankirinakatwa Dios nayraqatar uñstayäna, jupanakatjja sapa familia pʼeqtʼiriw uñstarakïna, ukhamatwa Judá tribunkiri Zérah chachan familiapat jutirïki, Zabdí chachan allchhipäki, Carmí chachan Acán sat yoqapajj ajllitäna.+ 19 Josué chachajj akham sasaw Acán chachar säna: “Wawa, mirä amp suma, Israel markan Jehová Diosapar jachʼañcham, jupar yatiyjjarakim. Mirä amp suma, kuntï lurkta uk yatiyita. Jan kunsa imtʼistati” sasa.

20 Acán chachajj akham sasaw Josué chachar säna: “Cheqas Israelan Jehová Diosap contrajj nayaw juchachasta, akanakwa lurta. 21 Kuntï katuntañasäkäna ukanak taypinwa nayajj Sinar+ cheqana lurat jila alani isimpi, 200 siclo* metal qollqenakampi, medio kilo jila* qorimpi uñjta, ukatwa ukanak wal munasajj aptastjja. Jichhasti ukanakajj carpaj manqhan oraqen imantatäskiwa, qollqesa qorisa uka manqhan imantatawa” sasa.

22 Josué chachajj jankʼakiw jaqenak khitäna. Jupanakasti Acán chachan carpaparuw tʼijupjjäna, jila alani isisa ukhamarak isi manqhan imat qollqesa ukankaskänwa. 23 Kunanakatï carpan utjkäna ukanak apsunisajja, Josué chachan ukaru ukhamarak taqe israelitanakan ukaruw apanipjjäna, Jehová Diosan nayraqataparuw uchapjjarakïna. 24 Ukjjarusti Josué chachajj Israel markamp chikaw Zérah chachat jutir Acán+ chacharusa, Acán chachan yoqanakapsa, phuchanakapsa, toronakapsa, asnonakapsa, yaqha uywanakapsa, ukhamarak qollqsa, suma issa, qorsa,+ carpapsa, taqe kunatï jupankkäna ukanaksa, Acor+ valle cheqar apapjjäna. 25 Josué chachajj sänwa: “¿Kunatsa jan walir puriyapjjesta?+ Jehová Diosajj jumaruw jichhürojj jan walir purtʼasiyarakïtam” sasa. Ukatsti taqe israelitanakaw Acán chacharojj qalampi jaqjapjjäna,+ taqe jupankirinakarojj ninampiw phichantapjjarakïna.+ Ukhamwa taqe jupanakarojj qalampi jaqjapjjäna. 26 Ukatjja Acán chachan jiwat cuerpopjjarojj qalanak montontʼapjjäna, ukasti jichhürkamaw montontʼatäski. Ukhamatwa Jehová Diosan wali colerasiñapajj apjtäna.+ Ukatwa uka cheqajj jichhürkamas Acor* valle sutimpi uñtʼasi.

8 Jehová Diosajj akham sasaw Josué chachar säna: “Jan ajjsaramti ni sustjasimsa.+ Soldadonakamp Hai marka contra makatam. Hai markan reyip jumaruw katuysma, jaqenakapsa, markapsa, oraqepsa katuyaraksmawa.+ 2 Kunjamtï Jericó markarusa reyiparusa lurktajja,+ ukhamarak Hai markarusa reyiparus luram, ukampis uywanaka ukhamarak kunanaktï katuntapkäta ukanakakwa jumanakatak apasinipjjañama. Mä akatjamat tukjañatakejj Hai marka qhepäjjaruw soldadonak imantañama” sasa.

3 Ukatjja Josué chachasa soldadonakasa Hai marka contraw makatapjjäna. Josué chachajj guerran nuwasir 30.000 chʼamani chachanakwa ajllïna, arumaw khitarakïna. 4 Jupanakarojj akham sasaw säna: “Jumanakajj mä akatjamat tukjañatakiw Hai marka qhepäjjar imantasipjjañama. Uka markat jan jayankapjjamti, taqenis wakichtʼatäpjjam. 5 Nayasa taqe soldadonakasa uka markaruw jakʼachasinipjjä. Mayürjam nanak contra mistunipjjani ukhajja,+ escapanjjapjjäwa. 6 Jupanakajj arktanipjjetani ukhajja, nanakajj markat jayakamaw arktayasipjjä, jupanakajj akham sapjjaniwa: ‘Nayrjamaw jupanakajj escapasipki’+ sasa. Ukatsti nanakajj escapanjjapjjäwa. 7 Jumanakajj kawkjantï marka tukjañatak imantasipkäta uka cheqat sartasajja, ratukiw uka mark katuntapjjañama. Jehová Diosamaw uka mark katuyapjjätam. 8 Uka marka katuntasajja, jankʼakiw phichantapjjañama.+ Jehová Diosan arunakaparjamaw taqe kunsa lurapjjañama. Nayaw taqe ukanak jumanakar sapjjsma” sasa.

9 Josué chachajj uka soldadonakaruw khitäna, jupanakasti kawkjantï mä akatjamat tukjañatak imantasipjjañapäkäna ukjaruw sarapjjäna, Betel markampit Hai markampit taypiruw sarapjjäna, Hai markat inti jalanta toqeru. Uka arumajj mayni soldadonak taypinwa Josué chachajj ikïna.

10 Wali alwat sartasajja, Josué chachajj soldadonakaruw tantachtʼäna. Ukatsti jupasa Israel markan ancianonakapasa Hai markaruw uka soldadonak anakipjjäna. 11 Josué chachajj taqe soldadonakamp+ chika sarasaw Hai marka nayräjjar jakʼachasipjjäna. Hai markat alay toqeruw* sarapjjäna, mä vallekiw jupanakampir Hai markampirojj jaljäna. 12 Ukañkamajj Hai markat inti jalanta toqeruw Betel+ markampit Hai markampit taypir niya 5.000 chachanak imantasiyäna.+ 13 Soldadonakajj Hai markat alay toqeruw* nayrïr campamento uttʼayapjjäna,+ qhepapat sarir soldadonakajj inti jalanta toqeruw uttʼayapjjarakïna.+ Uka arumasti chika vallekamaw Josué chachajj mantäna.

14 Hai markan reyipajj ukanak uñjäna ukhajja, kawkjantï wasara* pampajj uñstkäna uka cheqaruw jupasa markankir chachanakasa Israel markampi nuwasiñatak wali alwat jankʼak mistupjjäna. Soldadonakajj marka qhepäjjaruw jupanakar mä akatjamat tukjañatak imantasipjjäna, ukampis reyejj janiw uk yatkänti. 15 Hai markankir chachanakajj jupanak contra sartasipjjäna ukhajja, Josué chachasa Israel markankirinakasa taqeniw thak sarasajj wasara pampa toqer escapapjjäna.+ 16 Israelitanakar arktañatakejj Hai markankir taqe jaqenakaruw jawsthapipjjäna. Josué chachar arktasasti, jupanakajj markat jayarstʼjjapjjänwa. 17 Hai markatsa Betel markatsa taqe chachanakaw israelitanak contrajj mistupjjäna. Jupanakajj markan punkunakap qʼal llawinukusaw israelitanakar arktapjjäna.

18 Jehová Diosajj akham sasaw Josué chachar säna: “Amparamankki uka lanza Hai marka toqer aytam,+ jumaruw uka marka katuyäma”+ sasa. Josué chachasti, Hai marka toqeruw amparapankkäna uka lanza aytäna. 19 Amparap loqtäna ukhajja, marka qhepäjjan imantasir soldadonakajj jankʼakiw mä akatjamat sartapjjäna, markar tʼijuntasajj qʼalwa uka mark katuntapjjäna, jankʼakirakiw phichantapjjäna.+

20 Hai markankir chachanakajj markap uñtanipjjäna ukhajja, markat alajjpachkam jewqʼe mistur uñjapjjäna, janirakiw kawkirus escapirjamäjjapjjänti. Wasar pampar escapirinakasti, jupanakar arktapkäna ukanak contraw kuttʼanipjjäna. 21 Josué chachampi Israel markankirinakampejja, imantasipkäna uka soldadonakan marka katuntir uñjasasa markat jewqʼe misturi uñjasasa, kutjtanisaw Hai markankir chachanak contra saytʼasipjjäna. 22 Hai marka katuntir soldadonakajja, markat mistunisajj Hai markankir chachanakan ukaruw jutapjjäna, ukhamatwa Hai markankir chachanakajj muyuntat uñjasipjjäna, yaqhep israelitanakajj aksata yaqhepanakajj uksat muyuntapjjäna. Taqeniruw jiwarayapjjäna, janirakiw khitis escapkänti.+ 23 Hai markan reyiparojj katuntasaw Josué chachan ukar apapjjäna.+

24 Kawkjarutï israelitanakar arktanipkäna uka wasara pampanwa Israel markajj Hai markankir taqe jaqenakar jiwarayäna, jupanakat sapa mayniruw espadampi jiwayapjjäna, ukatsti taqe israelitanakaw Hai markar kuttʼanipjjäna, taqeniruw espadamp jiwarayapjjäna. 25 Uka urunjja, chachanakatsa warminakatsa Hai markankirinakajj taqeniw jiwarapjjäna, 12.000 jaqenakaw jiwarapjjäna. 26 Josué chachasti Hai markankir taqe jaqenakar qʼal jiwarayapjjañapkamajj+ amparapamp aytkäna uka lanza+ janiw apaqkänti. 27 Kunjamtï Jehová Diosajj Josué chachar siskänjja, ukarjamaw israelitanakajj uka markan uywanakapsa kunanaktï katuntapkäna ukanaksa jupanakatak apasinipjjäna.+

28 Josué chachajj Hai marka phichantäna, uka markajj wiñayatak qʼala allthapita montontʼatänwa,+ jichhürkamas ukham qʼala allthapitäskakiwa. 29 Hai markan reyiparojj jaypʼukamaw mä lawar* warkkatäna, janïra inti jalantkipanwa Josué chachajj jiwat cuerpop apaqayjjäna.+ Ukatsti apaqerinakajj markan punkup nayräjjaruw cuerpop liwtapjjäna, cuerpopjjarojj qalanakwa montontʼapjjarakïna, ukajj jichhürkamaw ukankaski.

30 Ukapachaw Josué chachajj Ebal+ qollun Israel markan Jehová Diosapatak mä altar luräna, 31 kunjamtï Jehová Diosan Moisés serviripajj israelitanakar siskäna, Moisesan Leyinakan libropan+ qellqatäkäna ukarjama, ukansti akham siwa: “Mä altaraw entero qalanakat lurasiñapa, uka qalanakajj janiw kuna hierrot lurat herramientampis kamachtʼatäñapäkiti”+ sasa. Ukjjaruw jupanakajj nakhantayat ofrendanaksa sumankañ sacrificionaksa Jehová Diosar loqtapjjäna.+

32 Ukatjja israelitanakan nayraqatapan+ Moisesajj qellqkäna uka Leyinakwa+ Josué chachajj qalanakar copiäna. 33 Taqe Israel markasti, ancianonakapampi, marka pʼeqtʼirinakapampi ukhamarak juezanakapamp kunaw pactor mantat arca ladonakapan saytʼasipjjäna, Jehová Diosan pactor mantat arcap apiri levita sacerdotenakan nayräjjapana. Extranjeronakasa israelitanakasa taqeniw ukankapjjäna.+ Jupanakat chikatanejja, Guerizim qollu uñkatasiruw saytʼasipjjäna, chikatasti Ebal+ qollu uñkatasiruw saytʼasipjjarakïna (kunjamtï nayrajj Jehová Diosan Moisés serviripajj siskäna ukarjama),+ ukhamat Israel markar bendisiñataki. 34 Ukatsti Josué chachajj Leyin taqpach uka arunakapwa jachʼat liytʼäna,+ kunjamtï Leyinakan libron qellqatäkäna ukarjamaw bendición arunaksa+ maldición arunaksa+ liytʼäna. 35 Kunanaktï Moisesajj siskäna ukanakwa Josué chachajj taqpach Israel congregación nayraqatan liytʼäna.+ Warminakasa, wawanakasa, jupanak taypin jakiri* extranjeronakasa+ ukankapjjarakïnwa.

9 Jordán+ jawira khurkatan qollu toqenkiri reyinakasa, Sefelá toqenkir reyinakasa, Mar Grande*+ sat lamar qota jakʼankir reyinakasa, Líbano uñkatasinkir reyinakasa taqeniw ukanak istʼapjjäna. Uka reyinakasti hititanakana, amorreonakana, cananeonakana, perizitanakana, heveonakana, jebuseonakan+ reyinakapänwa. 2 Jupanakasti Josué chachampi Israel markampi nuwasiñatakiw mayachtʼasipjjäna.+

3 Gabaón+ markan jakirinakajja, kuntï Josué chachajj Jericó+ markarus Hai+ markarus lurkäna ukanak istʼapjjarakïnwa. 4 Ukatwa jupanakajj sum amuytʼasisajj manqʼañanak merqʼe costalanakar uchapjjäna, lipʼichit lurat merqʼe vino wayaqanakamp chikaw asnonakar khumuntapjjäna, uka wayaqanakasti phallata watantata ukhamänwa. 5 Kayunakaparojj watantata thantha wiskhunak* uchasipjjäna, merqʼe isinakampi isthapitäpjjarakïnwa. Apasipkäna taqe uka tʼantʼanakas wali wañänwa qʼala tʼunartatarakïnwa. 6 Ukatsti Guilgal+ cheqaruw kawkjankkantï Josué chachajj uka campamentor sarapjjäna, Josué chacharusa israelit chachanakarus akham sapjjänwa: “Nanakajj wali jaya markat jutapjjta. Mirä amp suma, nanakampi mä pacto lurapjjam” sasa. 7 Ukampis israelit chachanakajj akham sasaw heveonakar+ sapjjäna: “Inas jumanakajj nanak jakʼan jakasipksta. ¿Kunjamsa jumanakamp mä pacto lurapjjeristjja?”+ sasa. 8 Jupanakasti Josué chacharojj akham sapjjänwa: “Nanakajj jumanakan servirinakamäpjjtwa”* sasa.

Josué chachajj jupanakar sarakïnwa: “¿Jumanakajj khitinakäpjjtasa? ¿Kawkitsa jutapjjta?” sasa. 9 Ukjjarusti jupanakajj sapjjarakïnwa: “Nanaka servirinakamajj Jehová Diosan sutipar respetapjjataj laykuw wali jaya markat jutapjjta.+ Taqe kunanaktï jupajj Egipto markan lurkatayna ukhamarak jupan wali uñtʼatätapsa nanakajj istʼapjjtwa,+ 10 taqe kunanaktï Jordán jawira khurkatankir* amorreonakan pä reyinakapar lurkäna ukanaksa istʼapjjaraktwa. Uka reyinakajja Hesbón markankiri Sehón,+ ukhamarak Basán oraqenkiri Og+ reyinakänwa. Og reyejj Astarot markankänwa. 11 Ukatwa ancianonakajasa markajankirinakasa akham sapjjetu: ‘Viajiñatak manqʼañanak apasipjjam, jupanakamp jikisir sarapjjam. Jupanakar akham sapjjarakim: “Nanakajj jumanakan servirimäpjjäwa,+ mirä amp suma, nanakampi mä pacto lurapjjam”+ sasa’. 12 Jumanakan ukar jutañataki utanakajat mistunipkta ukhajja, aka tʼantʼanakajj juntʼüskänwa. Jichhajj uñjapjjam, tʼantʼanakajj wali wañäjjewa qʼala tʼunartatäjjarakiwa.+ 13 Lipʼichit lurat aka vino wayaqanakas vinomp phoqantapkayät ukhajj machaqäsipkänwa, jichhajj qʼala phallaratäpjjewa.+ Isinakajasa wiskhunakajasa* viajet wali jaya jutapjjataj laykojj qʼala thantharatäjjewa” sasa.

14 Uk satasti israelit chachanakajj uka jaqenakan mä qhawqha manqʼañanakap katusaw uñakipapjjäna, ukampis janiw Jehová Diosar jisktʼasipkänti.+ 15 Josué chachajj jupanakampiw sumankañar mantäna,+ uka jaqenakar jan jiwayañatakejj mä pacto luräna. Marka pʼeqtʼirinakajj ukhamarakwa jupanakatak mä juramento lurapjjäna.+

16 Uka jaqenakampi pacto lurapkäna uka kimsa uru qhepatjja, israelitanakajj jupanak jakʼan jakasipkatap yatipjjäna. 17 Ukanak yatisasti israelitanakajj kimsïr urunwa uka jaqenakan markanakapar puripjjäna. Markanakapajj Gabaón,+ Kefirá, Beerot, Quiryat-Jearim+ sat markanakänwa. 18 Ukampis marka pʼeqtʼirinakajj Israelan Jehová Diosapan sutipjjar juramento lurapjjatap laykojja,+ israelitanakajj janiw jupanakarojj kuns lurapkänti. Ukatwa Israel markpachajj marka pʼeqtʼirinak contra parlapjjäna. 19 Marka pʼeqtʼirinakasti Israel markpacharojj akham sapjjänwa: “Nanakawa Israelan Jehová Diosapan sutipjjarojj jupanakatak mä juramento lurapjjta, ukatwa jupanakar jan kuns kamachksnati. 20 Ak lurapjjañäni: janiw jupanakar jiwaykañäniti, jupanakarutï jiwaysnajja mä juramento jupanakatak lurapjjataj laykojj Diosaw jiwas contra colerasispa”+ sasa. 21 Marka pʼeqtʼirinakajj akham sasipkakïnwa: “Janiw jupanakar jiwaykañäniti, markpachataki lawa pallirïpjjpan, uma waysurïpjjpan” sasa. Ukhamwa marka pʼeqtʼirinakajj jupanakar sapjjäna.

22 Josué chachajj jupanakar jawsasajj sarakïnwa: “Jumanakajj nanak jakʼanwa jakasipkatätajja, ¿kunatsa ‘nanakajj wali jaya markat jutapjjta’ sasin engañapjjesta?+ 23 Jichhürut uksarojj jumanakajj maldisit jaqenakäpjjätawa,+ Diosajan utapatakiw wiñayatak esclavonakjam lawa pallirïpjjäta, uma waysurïpjjäta” sasa. 24 Uk satasti jupanakajj Josué chachar akham sapjjänwa: “Jehová Diosamaw Moisés serviriparojj taqe aka oraqe jumanakar katuyañapataki, ukhamarak aka oraqen taqe jakirinakapar jumanak nayraqatan qʼal tukjañapataki mayitayna,+ ukanakwa nanaka servirinakamarojj sum yatiyapjjetu. Ukanak yatisajj vidanakajat wal llakisipjjta,+ ukatwa ukham lurapjjta.+ 25 Jichhajj amparamankapjjtwa, kunatï amuyumarjamajj sumäki cheqapäki ukarjam nanakamp luram” sasa. 26 Josué chachajj ukarjamaw luräna. Israelitanakan amparapatwa jupanakar salväna, janiw jiwayapkänti. 27 Uküruw Josué chachajj jupanakar uttʼayäna, jupanakajj Israel markpachatakisa Jehová Diosan altarapatakisa, kawkjtï Diosajj ajlliñapäkäna uka cheqanwa+ lawa pallapjjañapäna, uma waysupjjañapäna.+ Jupanakasti jichhürkamaw uk lurasipki.+

10 Josué chachajj Hai marka katuntasaw qʼal tukjäna, kunjamtï Jericó markarusa reyiparusa+ lurkänjja, ukhamarakwa Hai markarusa reyiparus+ luräna, Gabaón markankirinakajj Israel markamp sumar mantasaw+ jupanak taypin jakapjjäna. Jerusalén markan Adoni-Zédec reyipajj taqe ukanak istʼäna ukhajja, 2 walpun sustjasïna, Gabaón markajj mä reyin apnaqat markanakjam wali jachʼätap layku.+ Hai markat sipans wali jachʼänwa,+ taqenirakiw guerran nuwasir chachanakäpjjäna. 3 Ukatwa Jerusalenan Adoni-Zédec reyipajj Hebrón markan Hoham reyiparusa,+ Jarmut markan Piram reyiparusa, Lakís markan Jafía reyiparusa, Eglón markan Debir reyiparus+ mä yatiyäwi apayäna, akham sasa: 4 “Yanaptʼir jutapjjeta, Gabaón markar atacañäni, jupanakajj Josué chachampi israelitanakampiw sumar mantapjje”+ sasa. 5 Ukatwa Jerusalén markan reyipasa, Hebrón markan reyipasa, Jarmut markan reyipasa, Lakís markan reyipasa, Eglón markan reyipasa ejercitonakapamp chika tantachtʼasipjjäna. Amorreonakan uka phesqa reyinakapajja,+ Gabaón markar sarasaw campamentop uttʼayasipjjäna, uka marka contra nuwasiñataki.

6 Gabaón markankir chachanakajja, Guilgal campamentoruw mä yatiyäwi apayapjjäna,+ Josué chachar akham yatiyapjjañapataki: “Jan esclavonakamarojj apanukupjjestati.+ ¡Jankʼakiy nanakan ukar jutam! ¡Yanaptʼasipjjakitaya! ¡Salvapjjeta! Qollunak toqenkir amorreonakan taqpach reyinakapaw nanak contra mayachtʼasipjje” sasa. 7 Ukatwa Josué chachajj soldadonakampi ukhamarak guerran nuwasir chʼamani chachanakamp chikajj Guilgal markat Gabaón markar makatäna.+

8 Jehová Diosajj akham sasaw Josué chachar säna: “Jan jupanakar ajjsaramti,+ jupanakjja amparamaruw katuysma.+ Jupanakat janiw maynis juma contrajj saytʼaskaniti”+ sasa. 9 Josué chachasti Guilgal markat arum paqar jutasaw mä akatjamat jupanakar atacäna. 10 Jehová Diosajj amorreonakar qʼal pantjasiyäna,+ ukhamatwa israelitanakajj Gabaón markan jupanakar qʼal jiwarayapjjäna. Bet-Horón markar makatki uka thak arktasajja, Azecá, Maquedá markanakar puriñkamaw jupanakar jiwarayapjjäna. 11 Israelitanakat escapasajj Bet-Horón markat saraqki uka thak saraqasipkäna ukhajja, Jehová Diosajj Azecá markakamaw alajjpachat jachʼa qala chhijchhinak jupanakjjar puriyanïna, ukhamatwa jupanakajj jiwarapjjäna. Cheqansa israelitanakan espadapampi jiwaririnakat sipansa, chhijchhimpi jiwaririnakaw jukʼampïna.

12 Kunürutejj Jehová Diosajj israelitanakan uñjkat amorreonakar atipjkäna ukhaw Josué chachajj israelitanak nayraqatan Jehová Diosar akham säna:

13 Israelitanakajj enemigonakapat vengasipkäna ukhakamajja, intejj pachparuw saytʼäna, phajjsis janiw onjjtkänti. ¿Janit ukajj Jasar libron qellqatäki?+ Intejj chika alajjpachanwa saytʼäna, niya uru jurnälarakiw jan onjjtkänti. 14 Janipuniw uka nayrasa uka qhepatsa uka urur uñtasitajj utjkänti, uküruw Jehová Diosajj mä chachan arup istʼäna.+ Cheqans Jehová Diosaw Israel markap laykojj nuwasiskäna.+

15 Ukanak pasatatsti, Josué chachajj taqpach israelitanakamp chikaw Guilgal cheqankir campamentor kuttʼjjäna.+

16 Ukañkamasti phesqa reyinakajj escapasaw Maquedá markankir mä qollu pʼiyar imantasipjjäna.+ 17 Josué chacharojj akham sasaw yatiyapjjäna: “Phesqa reyinakarojj Maquedá markankir mä qollu pʼiyan imantasit katjapjje”+ sasa. 18 Josué chachajj sarakïnwa: “Uka qollu pʼiyan mantañaparojj jachʼa qalanakamp atkatapjjam, uñjapjjañapatakejj chachanak uchapjjarakim. 19 Jiltʼirinakajj jan ukhamakïpjjamti, enemigonakamarojj arktasin jiwarayanipjjam.+ Jan markanakapar mantayapjjamti, Jehová Diosajj jumanakan amparanakamaruw jupanakar katuyapjjtam” sasa.

20 Josué chachasa israelitanakasa jupanakar atipjasaw qʼal jiwarayapjjäna, jachʼa perqanakamp muyuntat markanakar escapas imantasirinakakiw mä qhawqhanejj jan jiwayatäpkänti. Uka qhepatjja, 21 taqe soldadonakaw Josué chachan ukarojj sumaki kuttʼanjjapjjäna, jupajj Maquedá cheqankir campamentonkaskänwa. Janirakiw khitis israelitanak contrajj kuns arskänti. 22 Ukatsti Josué chachajj akham sänwa: “Qollu pʼiyar mantañankki uka qalanak apaqapjjam, phesqa reyinakarojj akar irptanipjjam” sasa. 23 Ukatwa jupanakajj qollu pʼiyat aka phesqa reyinakar irptanipjjäna: Jerusalén markan reyiparu, Hebrón markan reyiparu, Jarmut markan reyiparu, Lakís markan reyiparu ukhamaraki Eglón+ markan reyiparu. 24 Josué chachan ukar uka reyinak irptanipjjäna ukhajja, jupajj taqe israelit chachanakaruw jawsayäna, jupamp chika sarapkäna uka soldadonakan comandantenakaparojj akham sänwa: “Akar jakʼachasinipjjam. Aka reyinakan kunkapjjar* taktʼasipjjam” sasa. Ukatwa jupanakajj jakʼachasinisajj uka reyinakan kunkapjjar taktʼasipjjäna.+ 25 Josué chachasti jupanakarojj sarakïnwa: “Jan ajjsarapjjamti, ni sustjasipjjamsa.+ Jan aynachtʼapjjamti,* chʼamani saytʼasipjjam, jumanakamp nuwasiri taqe enemigonakamarojj ukhamwa Jehová Diosajj lurani”+ sasa.

26 Ukatsti Josué chachajj jiwayasaw reyinakarojj phesqa lawanakar* warkkatäna, jaypʼukamaw uka lawanakan warkkatatäsipkäna. 27 Inti jalantarusti, Josué chachajj uka lawanakat apaqayjjänwa,+ kawkjantï imantasipkäna uka qollu pʼiyaruw jaqontayarakïna. Uka qollu pʼiya mantañarusti, jachʼa qalanakwa uchapjjäna, ukanakajj jichhürkamaw ukankaski.

28 Josué chachasti, Maquedá+ marka katuntkäna uka urunwa espadampi jiwarayäna. Uka markan jakirinakarusa reyiparusa qʼal tukjäna, taqeniruw* jan mayani jiwarayäna.+ Kunjamtï Jericó markan reyipar lurkänjja, ukhamarakwa Maquedá+ markan reyipar luräna.

29 Ukatjja Josué chachajj taqe israelitanakamp chikaw Maquedá markat Libná+ markar saräna, Libná marka contraw nuwasirakïna. 30 Jehová Diosajj ukhamarakiw uka marksa reyipsa israelitanakan amparapar katuyäna.+ Jupanakajj jiwarayapjjänwa, markankir taqe jaqenakarojj espadampiw jan mayan jiwarayapjjäna. Kunjamtï Jericó markan reyiparojj lurapkänjja, ukhamarakwa Libná markan reyiparojj lurapjjäna.+

31 Ukatsti mäkiw Josué chachajj israelitanakamp chik Libná markat Lakís+ markar saräna, uka markar purisajj campamentop uttʼayasaw uka marka contra nuwasïna. 32 Jehová Diosajj israelitanakan amparaparuw Lakís marka katuyäna, jupanakajj payïr urunwa uka marka katuntapjjäna. Uka markan jakir taqe jaqenakaruw espadampi jiwarayapjjäna,+ Libná markarjamaw lurapjjarakïna.

33 Guézer+ markan Horam reyipajja Lakís markar yanaptʼañatakiw makatäna, ukampis Josué chachajj juparusa markapankirinakarusa qʼal jiwarayäna, janirakiw jupanakat khitis salvaskänti.

34 Ukatjja Josué chachajj taqpach israelitanakamp chikaw Lakís markat Eglón+ markar saräna, uka markar purisajj campamentop uttʼayasaw uka marka contra nuwasïna. 35 Uka urunwa jupanakajj uka marka katuntasin espadampi jiwarayapjjäna. Uka markankir taqe jaqenakaruw uka pachpa urun qʼal tukjapjjäna, Lakís+ markarjamaw lurapjjarakïna.

36 Ukatsti Josué chachajj taqpach israelitanakamp chikaw Eglón markat Hebrón+ markar makatäna, uka marka contraw nuwasirakïna. 37 Uka marka katuntasasti, markarusa, reyiparusa, markanakaparusa, markankir taqe jaqenakarus espadampiw jiwarayapjjäna, janirakiw maynis salvaskänti. Kunjamtï Eglón markar lurkänjja, ukhamarakwa Josué chachajj Hebrón markarusa ukan jakir taqe jaqenakarus qʼal tukjäna.

38 Qheparusti Josué chachajj israelitanakamp chikaw Debir+ markar kuttʼanisajj uka marka contra nuwasïna. 39 Debir marksa, reyipsa, markanakapsa qʼal jupajj katuntäna, espadampiw jiwarayapjjarakïna, Debir markankir taqe jaqenakaruw qʼal tukjapjjäna,+ janirakiw maynis salvaskänti.+ Kunjamtï Hebrón markarusa, Libná markarusa reyiparus lurkänjja, ukhamarakwa Josué chachajj Debir markarusa reyiparus luräna.

40 Josué chachasti qollunak toqenkir taqe markanak katuntäna, Négueb, Sefelá+ toqenaksa, qollu parkinaksa, taqe reyinakapsa qʼal katuntäna. Janiw maynis salvaskänti,+ kunjamtï Israel markan Jehová Diosapajj siskänjja, ukarjamaw qʼal jiwarayäna.+ 41 Josué chachajj Cadés-Barnea+ cheqat Gaza+ markakamaw katuntäna, Gosén+ toqet Gabaón+ markakamaw katuntarakïna. 42 Jehová Diosajj Israel markap layku nuwasitap laykojja, taqe uka reyinaksa taqe oraqenakapsa, Josué chachajj taqpach mayak katuntäna.+ 43 Ukatjja Josué chachajj taqe israelitanakampiw Guilgal cheqankir campamentor kuttʼanjjäna.+

11 Hazor markankir Jabín reyejj ukanak istʼäna ukhajja, aka reyinakaruw mä yatiyäwi apayäna: Madón+ markan Jobab reyiparu, Simrón markan reyiparu, Acsaf+ markan reyiparu, 2 alayankir* qollunak toqenkir reyinakaru, Kinéret qotat aynach toqen* pampankir* reyinakaru, Sefelá toqenkir reyinakaru, inti jalant toqen Dor+ markan qollu parkinkir reyinakaru, 3 ukhamarak inti jalsu, inti jalanta toqenkir cananeonakana,+ amorreonakana,+ hititanakana, perizitanakana, qollunak toqenkir jebuseonakana, Mizpá oraqenkiri Hermón+ qollu jakʼankir heveonakan+ reyinakaparu. 4 Uka reyinakajj taqe ejercitonakapampiw mistupjjäna, lamar qota lakankir chʼallar uñtat waljanïpjjapunïnwa, walja caballonakampi, ukhamarak guerran nuwasiñatak carronakampi. 5 Taqe uka reyinakajja, mayachtʼasiñwa amtapjjäna. Jutasasti Merom markan uma jalsup jakʼaruw campamento uttʼayasipjjäna, Israel marka contra nuwasiñataki.

6 Ukatwa Jehová Diosajj Josué chachar akham säna: “Jan jupanakar ajjsaramti,+ qharüru niya aka horasarojj taqpachaniruw jumanakan amparamar katuyäjja. Jumanakajj jiwarayapjjarakïtawa. Caballonakaparojj kayunakapat usuchjañama,+ carronakapsti ninampiw phichantañama” sasa. 7 Josué chachajj taqpach soldadonakapampiw mä akatjamat jupanakar atacäna, Merom markan uma jalsu cheqapana. 8 Jehová Diosajja Israelan amparaparuw jupanakar katuyäna,+ israelitanakajj atipjasaw Jachʼa Sidón+ markakama, Misrefot-Maim+ markakama ukhamarak inti jalsu toqenkiri Mizpé vallekam arktapjjäna, taqeniruw jiwarayapjjäna, janirakiw khitis salvaskänti.+ 9 Josué chachajj kunjamtï Jehová Diosajj siskäna ukarjamaw jupanakar luräna, caballonakaparojj kayunakapat usuchjäna, carronakapsti ninampiw phichantarakïna.+

10 Ukatsti Josué chachajj kuttʼanisaw Hazor marka katuntarakïna, reyiparojj espadampiw jiwayäna.+ Hazor markajja, uka nayrajj taqe uka markanakan capitalapänwa, ukatwa jupajj uka marka katuntäna. 11 Uka markankir taqe jaqenakarojj espadampi jiwarayasaw qʼal tukjapjjäna.+ Janirakiw khitis salvaskänti.+ Hazor markarojj phichantarakïnwa. 12 Uka reyinakan markanakapwa Josué chachajj katuntäna, taqe reyinakaparojj espadampi jiwarayasaw atipjäna.+ Kunjamtï Jehová Diosan Moisés serviripajj siskänjja, ukarjamaw qʼal tukjäna.+ 13 Ukampis israelitanakajj jiskʼa qollunak patjjar uttʼayat markanak janiw phichantapkänti, Josué chachajj Hazor markak phichantäna. 14 Kunanaktï uka markan katuntapkäna ukanaksa uywanaksa israelitanakajj taqpach jupanakatak apasipjjäna.+ Jaqenakarojj sapa mayniruw espadampi jiwarayapjjäna.+ Janirakiw maynis salvaskänti.+ 15 Kunjamtï Jehová Diosajj Moisés serviripar siskänjja, ukhamarakwa Moisesajj Josué+ chachar säna, Josué chachasti ukarjamaw lurarakïna. Kuntï Jehová Diosajj Moisesar siskänjja, ukanak taqpachwa Josué chachajj phoqäna.+

16 Josué chachajj aka oraqenak taqpach katuntäna: qollunak toqenkir oraqenaka, Négueb+ toqenkir taqpach oraqenaka, Gosén markankir taqpach oraqenaka, Sefelá,+ Arabá,+ ukhamarak Israelan qollunak toqenkir oraqenakapa, Sefelá toqenkir oraqenakapa,* 17 Seír toqer makatki uka Halac qollutjja Líbano vallen Hermón+ qollu jakʼankiri Baal-Gad+ markakama. Uka markanakan taqpach reyinakaparojj katuntasaw atipjas jiwarayäna. 18 Josué chachajj walja tiempow taqe uka reyinakamp nuwasïna. 19 Janiw kawkïr markas israelitanakamp sumar mantkänti, Gabaón+ markan jakiri heveonakakiw israelitanakampejj sumankapjjäna. Mayni markanakjja guerran nuwasisaw katuntapjjäna.+ 20 Israel marka contra nuwasipjjañapatakejja, Jehová Diosaw jupanakan chuymanakap qalarayasipjjañapatak jaytäna,+ ukhamat jupajj jan khuyaptʼayasis taqenir jiwarayañapataki.+ Kunjamtï Jehová Diosajj Moisesar siskänjja, ukarjamaw qʼala jiwarayatäpjjañapäna.+

21 Uka tiemponjja qollunak toqenkiri Hebrón, Debir, Anab markanakankir anaquim+ sat jaqenakaruw jiwarayäna, Judá, Israel markanakan qollunak toqen jakir anaquim sat jaqenakarus ukhamarakiw jiwarayäna. Jupanakarusa markanakaparusa qʼal tukjäna.+ 22 Janiw anaquim sat jaqenakat ni maynis israelitanakan oraqepan utj-jjänti. Anaquim sat jaqenakajj Gaza,+ Gat,+ Asdod+ markanakanak utj-jjäna.+ 23 Kunjamtï Jehová Diosajj Moisesar siskänjja, ukhampunwa Josué chachajj uka oraqenak katuntäna.+ Ukatjja Israel markaruw Josué chachajj herenciat churäna, sapa tribur qhawqchʼatï waktʼki ukarjam jaljasipjjañapataki.+ Janirakiw uka oraqenakan guerran nuwasiñajj jukʼamp utj-jjänti.+

12 Israelitanakajj aka reyinakaruw Jordán jawirat inti jalsu toqen atipjapjjäna, Arnón+ vallet Hermón+ qollukam katuntapjjäna, inti jalsu toqerusti taqpach Arabá katuntapjjarakïna.+ 2 Uka reyinakat maynejj amorreonakan Sehón+ reyipänwa, jupajj Hesbón markan jakäna. Jupasti Arnón+ valle qorpankki uka Aroer+ mark apnaqäna. Arnón chika vallet qalltasajj Jaboc vallekamaw jupankäna. Galaad oraq chikatpach apnaqarakïna. Jaboc vallejj ammonitanakan qorpapänwa. 3 Uka reyejja inti jalsu toqerojj Arabá toqet Kinéret+ qotakamaw* apnaqarakïna, ukhamarak Arabá qotakama, mä arunjja Mar Salado* qotakamaw apnaqarakïna. Inti jalsu toqerusti Bet-Jesimot cheqakama, aynach toqerusti* Pisgá+ qollu parkinakkama.

4 Ukatjja israelitanakajj Basán oraqen Og+ reyin oraqenakap katuntapjjarakïna, uka reyejja refaím+ jaqenakatjja qhepïrïnwa, jupajj Astarot, Edréi markanakan jakarakïna. 5 Jupasti Hermón qolluna, Salecá markana ukhamarak taqe Basán+ oraqen apnaqäna, guesuritanakana, maacatitanakana+ qorpanakapkama ukhamarak Galaad oraqe taypikama, Hesbón+ markankir Sehón reyin oraqenakapkama.

6 Jehová Diosan Moisés serviripampi israelitanakampiw jupanakar atipjapjjäna,+ ukatsti Jehová Diosan Moisés serviripaw rubenitanakaru, gaditanakaru ukhamarak Manasesan chikat tribuparu+ uka oraqenakap herenciat churäna.

7 Josué chachampi israelitanakampejj aka reyinakaruw Jordán jawirat inti jalanta toqen atipjapjjäna, Líbano+ vallenkir Baal-Gad+ markat Seír+ toqer makatki uka Halac+ qollukama, ukatsti Josué chachajj Israelan tribunakaparuw qhawqchʼa oraqetï waktʼkäna ukarjam churäna,+ 8 qollunak toqenkir oraqenaka, Sefelá toqenkir oraqenaka, Arabá toqenkir oraqenaka, qollu parkinakankir oraqenaka, wasar pampankir oraqenaka ukhamarak Négueb+ toqenkir oraqenaka. Uka oraqenakajj hititanakana, amorreonakana,+ cananeonakana, perizitanakana, heveonakana, jebuseonakana+ oraqenakapänwa. Reyinakajj akanakänwa:

13 Josué chachajj wali awkëjjänwa, walja maranëjjarakïnwa.+ Ukatwa Jehová Diosajj jupar akham säna: “Jumajj wali awkëjjtawa, walja maranëjjaraktawa, ukampirus walja oraqenak katuntañaw faltaski. 2 Aka oraqenakaw katuntañäski:+ filisteonakan taqpach oraqenakapa, guesuritanakan+ taqpach oraqenakapa 3 (Egiptot inti jalsu toqen* Nilo jawiran umanakapat saraqki uka jawirat* alay toqen* Ecrón markan qorpapkama, ukajj cananeonakan oraqepat uñtʼatänwa)+ filisteonakan+ phesqa apnaqerinakapan oraqenakapamppacha: gazeonakana, asdoditanakana,+ asquelonitanakana,+ guititanakana+ ukhamarak ecronitanakan+ apnaqerinakapan oraqenakapa; aynach toqerojj* avim+ sat jaqenakan oraqenakapa; 4 cananeonakan taqpach oraqenakapa; sidonionakan+ Meará markapat Afec markakama ukhamarak amorreonakan qorpapkama; 5 guebalitanakan+ oraqenakapa, inti jalsu toqerojj taqe Líbano oraqemppacha, Hermón qollu jakʼankir Baal-Gad markat Lebó-Hamat+ cheqakama;* 6 qollunak toqen taqe jakirinaka Líbano+ toqet Misrefot-Maim+ cheqakama; ukhamarak taqe sidonionakaru.+ Nayaw israelitanakan uñjkat jupanakar alisnuköjja.+ Jumajj israelitanakar uka oraqenak herenciat churañamawa, kunjamtï sisksma ukarjama.+ 7 Uka oraqenakjja qhawqchʼatï waktʼki ukarjamaw llätunka tribunakarusa Manasesan chikat tribuparus herenciat jalanoqañama”.+

8 Manasesan chikat tribupasa, rubenitanakasa, gaditanakas herencia katusjjapjjänwa, Moisesaw Jordán jawirat inti jalsu toqenkir uka oraqenak jupanakar churäna, kunjamtï Jehová Diosan Moisés serviripajj churkäna ukarjama:+ 9 Arnón+ valle jakʼankir Aroer+ markatjja, chika vallenkir markampi Medebá toqenkir pampampi, Dibón markakama; 10 Hesbón markat apnaqeri amorreonakan Sehón reyipan taqpach markanakapa, ammonitanakan+ qorpanakapkama; 11 ukhamarak Galaad oraqenaka, guesuritanakan oraqenakapa, maacatitanakan+ oraqenakapa, Hermón taqpach qollu, Basán+ toqenkir taqpach oraqenaka, Salecá+ markakama; 12 Basán oraqenkir Og reyin taqpach oraqenakapa, jupajj Astarot, Edréi markanakat apnaqäna. (Refaím jaqenakat jupaw qhepïrïna).+ Moisesaw jupanakar atipjasajj alisnuküna.+ 13 Ukampis israelitanakajj janiw guesuritanakarusa maacatitanakarus alisnukupkänti,+ ukatwa Guesur, Maacat toqenkirinakajj israelitanak taypin jichhürkam jakasipki.

14 Leví triburukiw herenciajj jan churaskänti.+ Kunjamtï Israel markan Jehová Diosapajj jupanakar siskänjja,+ Diosatak ninamp nakhantayat ofrendanakaw jupanakan herenciapänjja.+

15 Moisesasti rubenitanakan tribuparojj sapa familiaparjamaw herencia churäna. 16 Jupanakan oraqepajj Arnón valle jakʼankir Aroer markatjja, chika vallenkir markampi ukhamarak Medebá jakʼankki uka taqpach pampa oraqempïnwa; 17 Hesbón, ukhamarak pampankir markanakapa,+ Dibón, Bamot-Baal, Bet-Baal-Meón,+ 18 Jáhaz,+ Quedemot,+ Mefaat,+ 19 Quiryataim, Sibmá,+ vallen qollupankir Zéret-Sáhar, 20 Bet-Peor, Pisgá+ oraqen qollu parkinakapa, Bet-Jesimot,+ 21 pampankir taqe markanaka ukhamarak amorreonakan Sehón reyipan taqpach markanakapa, jupajj Hesbón+ markat apnaqäna. Moisesaw uka reyirojj atipjäna,+ madianitanakan pʼeqtʼirinakapampiru: Eví, Réquem, Zur, Hur, Reba,+ jupanakajj uka oraqenakan jakapjjäna, Sehón reyin servirinakapäpjjarakïnwa.* 22 Beor chachan Balaam+ sat yatiri+ yoqaparojj israelitanakaw mayninakamp chika espadampi jiwayapjjäna. 23 Rubenitanakan qorpapajj Jordán jawirkamänwa. Uka oraqenakajj rubenitanakan sapa familiaparjam katuyat herenciänwa, markanakampi ukhamarak jiskʼa markanakapampi.

24 Ukatsti Moisesajj Gad triburuw herenciap churarakïna, gaditanakan sapa familiaparjama, 25 jupanakan oraqenakapajj Jazer+ markamppachänwa, Galaad oraqenkir taqpach markanakampi, ammonitanakan+ chikat oraqenakapampi, Aroer markakama, ukajj Rabá+ marka uñkatasinkiwa; 26 Hesbón+ markat Ramat-Mizpé ukhamarak Betonim markanakkama, Mahanaim+ markat Debir markan qorpanakapkama; 27 valle toqenjja, Bet-Haram, Bet-Nimrá,+ Sucot,+ Zafón markanaka, Hesbón+ markankir Sehón reyin oraqenakapänwa, uka oraqenakajj Jordán jawirat inti jalsu toqenkänwa, Kinéret*+ qotakama. 28 Uka oraqenakajj gaditanakan sapa familiaparjam katuyat herenciänwa, markanakampi ukhamarak jiskʼa markanakapampi.

29 Manasesan chikat tribuparuw Moisesajj herencia churäna, Manasesan chikat tribuparojj sapa familiaparjama.+ 30 Jupanakan oraqenakapajj Mahanaim+ markat Basán toqenkir taqpach oraqempi, Basán oraqenkir Og reyin taqpach oraqenakapampi ukhamarak Basán toqenkir Jaír+ chachan taqe campamentonakapampi, 60 markanakampi. 31 Galaad oraqenakat chikatasa, Basán toqenkir Og reyin Astarot, Edréi+ markanakapasa, Makir chachan yoqanakapar churatänwa, jupajj Manasés chachan yoqapänwa, Makir+ chachan yoqanakapat chikataniruw sapa familiaparjam churasïna.

32 Uka oraqenakwa Moisés chachajj herenciat churäna, Moab oraqen utjki uka wasar pampana, Jericó+ uñkatasinkir oraqena, Jordán jawirat inti jalsu toqenkir oraqena.

33 Ukampis Moisesajj janiw Leví triburojj herencia churkänti,+ Israel markan Jehová Diosapaw jupanakan herenciapänjja, kunjamtï jupajj siskäna ukarjama.+

14 Israelitanakajj akhamwa Canaán oraqen herenciat oraqe katusipjjäna. Eleazar sacerdotempi, Nun chachan Josué yoqapampi, Israel tribunakan pʼeqtʼirinakapampiw jupanakar uka oraqe herenciat churapjjäna.+ 2 Kunjamtï Jehová Diosajj llätunka chikatani tribunakatak Moisés taypi siskänjja,+ ukarjamaw sorteot herencia katoqasipjjäna.+ 3 Pä tribu chikatanirojj Jordán jawirat khurkataruw* Moisesajj churäna,+ levitanakasti janiw mayni tribunakamp chikajj herencia katoqapkänti.+ 4 José chachat jutirinakajj pä triburjam uñjatänwa:+ Manasés tribumpi, Efraín tribumpi.+ Levitanakajj janiw oraqe herenciat katoqapkänti, jan ukasti jakasipjjañapatak markanakampi,+ uywanakapatak pastoni oraqenakampik+ katoqapjjäna. 5 Kunjamtï Jehová Diosajj Moisesar siskänjja, ukarjamaw israelitanakajj oraq jaljasipjjäna.

6 Ukatjja Judá tribunkir chachanakaw Guilgal+ cheqan Josué chachar jakʼachasipjjäna, Jefuné sat quenizita chachan Caleb+ yoqapajj akham sasaw jupar säna: “Kuntï Jehová Diosajj Moisés serviripar+ Cadés-Barnea+ cheqan nayampita jumampita siskäna uk sum yattajja.+ 7 Kunapachatï Jehová Diosan Moisés serviripajj Cadés-Barnea cheqat oraqenak uñaqaniñatak khitkitäna+ ukhamarak cheqa yatiyäwinakampi kuttʼankayäta+ ukhajja, nayajj 40 maranïskayätwa. 8 Nayamp chika sarapkäna uka jilatanakajar istʼasajja, markankirinakajj ajjsarañat wal khatatipjjäna,* ukampis nayajj taqe chuymaw Jehová Diosajar istʼaskakiyäta.+ 9 Uka urunwa Moisesajj mä juramenton akham säna: ‘Kayunakamampi sarnaqawaykta uka oraqejja, jumatakisa yoqanakamatakisa jaya tiempotak herenciäniwa, Jehová Diosajar taqe chuyma istʼaskakitam layku’+ sasa. 10 Kunjamtï Jehová Diosajj siskäna+ ukarjamaw aka 45 maranakajj jakayaskitu,+ uksti Israel markajj wasara oraqen sarnaqaskäna+ ukhaw Jehová Diosajj Moisesar säna. Nayajj jichhürkamaw jakaskta, 85 maranëjjaraktwa. 11 Moisesajj khitkitäna ukürjamaw jichhajj chʼamanïskakta. Ukürjamaw nuwasiñatakisa yaqhanak lurañatakis chʼamajajj utjaskitu. 12 Ukhamajj kunjamtï Jehová Diosajj uka urun siskänjja, ukarjam qollunak toqenkir oraqenak churita. Jumajj anaquim+ sat jaqenakan utjatapa ukhamarak jachʼa perqanakamp muyuntat markanak utjatapwa uka urun istʼayätajja,+ ukhamïpans Jehová Diosaw cheqpachans nayampïskani,+ Jehová Diosan arsutaparjamaw nayajj uka jaqenakar uka oraqenakat alisnuköjja”+ sasa.

13 Josué chachasti Jefuné chachan Caleb yoqaparuw bendisïna, Hebrón oraqwa herenciat churäna.+ 14 Ukhamatwa jichhürkamajj Hebrón oraqejj herenciat Jefuné sat quenizita chachan Caleb yoqapankaski, Israelan Jehová Diosapar taqe chuyma istʼaskakitap layku.+ 15 Hebrón oraqejj Quiryat-Arbá+ sasin uñtʼatänwa (anaquim sat jaqenak taypinjja Arbá chachajj wali importante jaqënwa). Janirakiw uka oraqenakan guerran nuwasiñajj jukʼamp utj-jjänti.+

15 Judá tribunkir familianakar churat oraqejja,*+ Zin sat wasara toqerojj Edom+ oraqen qorpapkamänwa, Négueb oraqen aynach toqepkama.* 2 Aynach toqenkir* qorpapajj Mar Salado* qotat qalltäna,+ qotajj oraqer muykatki uka aynach toqeta.* 3 Acrabim+ cheqar makatki uksakamaw aynach toqer* saräna, Zin sat wasara pasasasti aynach toqetjja* Cadés-Barnea+ cheqaruw makatäna, Hezrón, Addar markakama, ukatjja Carcá toqeruw muytarakïna. 4 Ukatsti Azmón+ cheqaruw pasäna Egipton+ jawirapkama, qorpapajj Mar Grande* sat lamar qotaruw tukuyäna. Ukanakänwa aynach toqenkir* qorpanakapajja.

5 Inti jalsu toqenkir qorpapajj Jordán jawira toqen Mar Salado* qotänwa, alay toqenkir* esquina qorpapasti qotajj oraqer muykatki ukhänwa, Jordán jawirajj tukuyki uka cheqana.+ 6 Uka qorpasti Bet-Hoglá+ marka makatäna, Bet-Arabá+ marka alay toqe* pasäna, Rubén chachan Bohán+ yoqapan qalapkamaw makatarakïna. 7 Acor+ vallet Debir markakamaw qorpajj makatäna, alay toqerusti* Guilgal+ markakamaw muytarakïna, uka markajja Adumim cheqar makatki uka uñkatasinkänwa, jawir aynach toqena.* En-Semes+ cheqan umanakap pasarakïna, En-Roguel+ cheqaruw tukuyäna. 8 Uka qorpasti Hinón+ valle* toqeruw makatäna, aynach toqerojj* jebuseonakan+ qollu parkipkama, mä arunjja Jerusalén+ markakama, inti jalanta toqerusti Hinón valler uñjjatki uka qollu patjjakama, uka vallejj alay toqen* Refaím valle jakʼankänwa. 9 Qorpasti qollu patjjat Neftóah+ cheqan uma jalsupkamänwa, Efrón qollun markanakapkama. Uka qorpajj Baalá markakamänwa, mä arunjja Quiryat-Jearim+ markakama. 10 Qorpasti Baalá markat muytasajja inti jalanta toqen Seír qollukamänwa, ukatjja alay toqerusti* Jearim qollun parkinakap pasäna, mä arunjja Kesalón marka toqeruw saräna, Bet-Semes+ markar saraqasajj Timná+ cheqaruw pasarakïna. 11 Alay toqerojj* Ecrón+ markan qollu parkinakapkama, Sikerón cheqakama ukat Baalá qolluruw pasäna Jabneel cheqakama, qorpajj Mar Grande* sat lamar qotaruw tukuyäna.

12 Inti jalanta toqenkir qorpajj Mar Grande*+ sat lamar qota lakänwa. Ukanakänwa Judá tribunkir familianakan taqpach qorpanakapajja.

13 Kuntï Jehová Diosajj Josué chachar siskänjja, ukarjamaw Josué chachajj Jefuné chachan Caleb+ yoqaparojj Judá chachat jutirinak taypin oraqe churäna, Quiryat-Arbá oraqe, mä arunjja Hebrón+ oraqe churäna (Arbá chachasti Anac chachan awkipänwa). 14 Ukatwa Caleb chachajj Anac+ chachan Sesái, Ahimán, Talmái+ sat kimsa yoqanakaparojj uka oraqet alisnuküna, jupanakajj Anac chachat jutirïpjjänwa. 15 Uka cheqatjja Caleb chachajj Debir+ markankirinak contraw nuwasir makatarakïna. (Nayrasti Debir markajj Quiryat-Séfer satänwa). 16 Ukatjja Caleb chachajj akham sänwa: “Khititejj Quiryat-Séfer marka atacasin katuntkani uka chacharojja, Acsá sat phuchajwa warmipäñapatak churäjja” sasa. 17 Caleb chachan Quenaz+ jilapan Otniel+ yoqapaw uka marka katuntäna. Ukatwa jupajj Acsá+ sat phuchapar warmipäñapatak katuyjjäna. 18 Kunapachatï Acsá sat warmejj chachapan utapar sarkäna ukhajja, tatapat mä oraqe mayiñatakiw chachapar säna. Ukatjja jupajj asnopat saraqäna.* Caleb chachasti phuchaparojj akham sasaw jisktʼarakïna: “¿Kuns munta?”+ sasa. 19 Phuchapasti sänwa: “Mirä amp suma, nayarojj mä bendicionay churita, jumajj aynach toqenjja* waña oraqe churistajja, jichhajj Gulot-Maim* oraqe churita” sasa. Ukatwa tatapajj Gulot Alto ukhamarak Gulot Bajo oraqenak churäna.

20 Judá tribun sapa familiapar churat herenciajj ukänwa.

21 Judá tribun aynach toqenkir* markanakapajj akanakänwa, Edom+ oraqemp colindäpjjänwa: Cabzeel, Éder, Jagur, 22 Quiná, Dimoná, Adadá, 23 Quedes, Hazor, Itnán, 24 Zif, Télem, Bealot, 25 Hazor-Hadatá, Queriyot-Hezrón, mä arunjja Hazor marka, 26 Amam, Sema, Moladá,+ 27 Hazar-Gadá, Hesmón, Bet-Pélet,+ 28 Hazar-Sual, Beer-Seba,+ Biziotías, 29 Baalá, Iyim, Ézem, 30 Eltolad, Kesil, Hormá,+ 31 Ziclag,+ Madmaná, Sansaná, 32 Lebaot, Silhim, Ain, Rimón.+ Taqpachanisti 29 markanaka, jiskʼa markanakapampi.

33 Sefelá+ toqenkir markanakajj akanakänwa: Estaol, Zorá,+ Asná, 34 Zanóah, En-Ganim, Tapúah, Enam, 35 Jarmut, Adulam,+ Socó, Azecá,+ 36 Saaraim,+ Aditaim, Guederá, Guederotaim.* Taqpachanisti 14 markanaka, jiskʼa markanakapampi.

37 Zenán, Hadasá, Migdal-Gad, 38 Dileán, Mizpé, Jocteel, 39 Lakís,+ Bozcat, Eglón, 40 Cabón, Lahmam, Kitlís, 41 Guederot, Bet-Dagón, Naamá, Maquedá.+ Taqpachanisti 16 markanaka, jiskʼa markanakapampi.

42 Libná,+ Éter, Asán,+ 43 Iftá, Asná, Nezib, 44 Queilá, Aczib, Maresá. Taqpachanisti llätunka markanaka, jiskʼa markanakapampi.

45 Ecrón markampi, uka jakʼankir markanakampi, jiskʼa markanakapampi; 46 Ecrón markat inti jalanta toqerojj Asdod marka jakʼankir taqe oraqenakampi, jiskʼa markanakapampi.

47 Asdod+ markampi, uka jakʼankir markanakampi, jiskʼa markanakapampi; Gaza+ markampi, uka jakʼankir markanakampi, jiskʼa markanakapampi, Egipton jawirapkama, Mar Grande* sat lamar qotakama, qota jakʼankir oraqenakkama.+

48 Qollu toqenkir markanakajj akanakänwa: Samir, Jatir,+ Socó, 49 Daná, Quiryat-Saná, mä arunjja Debir marka, 50 Anab, Estemó,+ Anim, 51 Gosén,+ Holón, Guiló.+ Taqpachanisti 11 markanaka, jiskʼa markanakapampi.

52 Arab, Dumá, Esán, 53 Janim, Bet-Tapúah, Afecá, 54 Humtá, Quiryat-Arbá, mä arunjja Hebrón+ marka, Zior markampi. Taqpachanisti llätunka markanaka, jiskʼa markanakapampi.

55 Maón,+ Carmelo, Zif,+ Jutá, 56 Jezreel, Jocdeam, Zanóah, 57 Cayín, Guibeá, Timná.+ Taqpachanisti tunka markanaka, jiskʼa markanakapampi.

58 Halhul, Bet-Zur, Guedor, 59 Maarat, Bet-Anot, Eltecón. Taqpachanisti sojjta markanaka, jiskʼa markanakapampi.

60 Quiryat-Baal, mä arunjja Quiryat-Jearim+ marka, Rabá markampi. Taqpachanisti pä marka, jiskʼa markanakapampi.

61 Wasara toqenkir markanakajj akanakänwa: Bet-Arabá,+ Midín, Secacá, 62 Nibsán, Jayu Marka, En-Guedí.+ Taqpachanisti sojjta markanaka, jiskʼa markanakapampi.

63 Jerusalén markan jakapkäna+ uka jebuseonakarojja,+ Judá tribunkir chachanakajj janiw alisnukuñ puedipkänti,+ ukatwa jebuseonakajj Judá markan jakiri jaqenakamp chikajj Jerusalén markan jichhürkam jakasipki.

16 José chachat jutirinakarojj+ aka oraqenakaw sorteot waktʼäna,+ Jordán jawirat Jericó marka pasasajja, Jericó markan inti jalsu toqenkir umanakapkama, Jericó marka uñkatasinkki uka wasarat makatasajj Betel markan qollu toqenkir oraqenakapar puriñkama.+ 2 Luz marka jakʼankki uka Betel markat Atarot markankir arkitanakan qorpapkama. 3 Ukatjja inti jalanta toqeruw jafletitanakan qorpapkam saraqäna, Bet-Horón Baja,+ ukhamarak Guézer+ markanakan qorpapkama, Mar Grande* sat lamar qotaruw tukuyarakïna.

4 Ukhamaw José chachat jutiri,+ Manasés tribumpi Efraín tribumpejj oraqenak katupjjäna.+ 5 Efraín chachat jutiri sapa familian qorpanakapajj akanakänwa: herenciapan qorpapajja, inti jalsu toqerojj Atarot-Addar+ markänwa, Bet-Horón Alta+ markakama, 6 Mar Grande* sat lamar qotaruw tukuyarakïna. Micmetat+ lugarajj alay toqenkänwa,* qorpajj inti jalsu toqerojj Taanat-Siló marka toqeruw muytäna, inti jalsu toqetjja Janóah markakama. 7 Janóah markatjja Atarot ukhamarak Naará markanakkamaw saraqäna, Jericó+ markar purisajj Jordán jawira toqeruw sararakïna. 8 Tapúah+ markatjja qorpajj inti jalanta toqeruw Caná markan jawirapkam purïna, Mar Grande* sat lamar qotaruw tukuyarakïna.+ Efraín tribun sapa familiaparjam churat herenciajj ukhamänwa. 9 Efraín chachat jutirinakajja, Manasés+ tribur churat herencia taypinwa yaqha markanakanïpjjarakïna, jiskʼa markanakapamp kuna.

10 Guézer+ markan jakir cananeonakarojj janiw alisnukupkänti, jichhürkamaw cananeonakajj Efraín tribunkirinak taypin jakasipki,+ chʼama tukuñ trabajonak phoqapjjaraki.+

17 Manasés+ triburuw sorteojj+ waktʼäna, jupajj José chachan jilïri yoqapänwa.+ Niyakejjay Manasés chachan Makir+ sat jilïr yoqapajj guerran nuwasiri chachächïnjja, Galaad ukhamarak Basán oraqenakwa katoqäna.+ Makir chachajj Galaad chachan tatapänwa. 2 Ukatjja Manasés chachat jutiri mayni wawanakapatakiw sapa familiarjam sorteot waktʼarakïna: Abí-Ézer+ chachan yoqanakapataki, Hélec chachan yoqanakapataki, Asriel chachan yoqanakapataki, Siquem chachan yoqanakapataki, Héfer chachan yoqanakapataki, Semidá chachan yoqanakapataki. Jupanakaw José chachan Manasés yoqapat jutirinakänjja, uka chachanakajj sapa familiatänwa.+ 3 Ukampis Zelofehad+ chachajj janiw yoqanakanïkänti, jan ukasti phuchanakanikïnwa. Zelofehad chachajj Héfer chachan yoqapänwa, Héfer chachasti Galaad chachan yoqapänwa, Galaad chachajj Makir chachan yoqapänwa, Makir chachasti Manasés chachan yoqapänwa. Zelofehad chachan phuchanakapan sutinakapajj akanakänwa: Mahlá, Noá, Hoglá, Milcá, Tirzá. 4 Jupanakasti Eleazar+ sacerdotena, Nun chachan Josué yoqapana, Israel tribun pʼeqtʼirinakapan nayraqatapar uñstasinjja, akham sapjjänwa: “Jehová Diosaw jilanakaj taypin herencia katoqapjjañajatakejj Moisesar säna”+ sasa. Ukatwa Jehová Diosan mayitaparjamajj tatapan jilanakap taypin herencia katoqapjjäna.+

5 Manasés triburojj janiw Jordán jawira khurkatankir* Galaad, Basán oraqenakakejj waktʼkänti, jan ukasti yaqha tunka oraqenakampiw waktʼarakïna,+ 6 Manasés tribunkiri warminakajj Manasés chachat jutiri chachanak taypin herencia katoqapjjatap layku. Manasés chachat jutiri mayni chachanakajj Galaad oraqwa katoqapjjarakïna.

7 Manasés tribun qorpapajj Aser tribun qorpapat Siquem+ marka uñkatasinkir Micmetat+ cheqakamänwa, aynach toqerusti* En-Tapúah cheqan jakirinakan oraqenakapkama. 8 Tapúah+ oraqejj Manasesankjjänwa, ukampis Manasés tribun qorpapankir Tapúah markajj Efraín chachat jutirinakankjjänwa. 9 Qorpajj Caná markan jawirap toqeruw saraqäna, jawiran aynach toqeparu.* Manasés tribun markanakap taypinjja, Efraín tribun markanakapaw utjarakïna. Manasés+ tribun qorpapajj jawirat alayankänwa,* Mar Grande* sat lamar qotaruw tukuyarakïna.+ 10 Aynach toqenkir* oraqejj Efraín tribunkänwa, alay toqenkir* oraqejj Manasés tribunkarakïnwa, Mar Grande* sat lamar qotaw qorpapänjja.+ Manasés tribun oraqenakapajja,* Aser tribun oraqenakapkamaw alay toqer* purïna, inti jalsu toqerusti Isacar tribun oraqenakapkama.

11 Isacar, Aser tribunakan oraqenakapatjja, aka markanakampi, jakʼankir markanakampi ukhamarak uka markanakan jakirinakampejj Manasés tribunkjjänwa: Bet-Seán, Ibleam,+ Dor,+ ukhamarak En-Dor,+ Taanac,+ Meguidó alto toqenkir kimsa markanakampi.

12 Ukampis Manasés chachat jutirinakajj janiw uka markanak katuntañ puedipkänti. Cananeonakajj uka oraqenpunwa jakañ munapjjäna.+ 13 Israelitanakajj chʼamani markäjjapjjäna ukhajja, cananeonakarojj chʼama tukuña trabajonakaruw uchapjjäna,+ ukampis janiw taqpachanir alisnukupkänti.+

14 José chachat jutirinakajj akham sasaw Josué chachar sapjjäna: “¿Kunatsa sorteot+ waktʼapkitu ukat mä partek herenciat churapjjesta?* Nanakajj waljanïpjjtwa, Jehová Diosaw jichhakam bendisipjjetu”+ sasa. 15 Josué chachajja jupanakar akham sarakïnwa: “Niyakejjay Efraín+ tribun qollu toqenkir oraqejj jumanakatak jiskʼakïchejja, waljanïpjjatam laykojj montenkir* oraqer makatapjjam, ukatsti perizitanakana,+ refaím jaqenakan+ oraqenakapat mä cheqa jumanakatak qʼomachasinipjjam” sasa. 16 José chachat jutirinakajj akham sasaw Josué chachar sapjjäna: “Qollu toqenkir oraqenakajj nanakatak jiskʼakiwa, ukhamarus valle toqen jakir cananeonakajj guerran nuwasiñataki hierrot lurat jusinakani* carronakanïpjjewa,*+ Bet-Seán+ markankirinakasa, uka jakʼankir markankirinakasa, Jezreel+ vallenkirinakasa ukham carronakanïpjjarakiwa” sasa. 17 Ukatwa Josué chachajj José chachat jutiri Efraín, Manasés tribunakarojj akham säna: “Waljanïpjjtawa, chʼamani markanakäpjjaraktawa. Janiw mä oraqek katoqapkätati,+ 18 jan ukasti qollu toqenkiri oraqenakas jumanakankarakiniwa.+ Montëkchi* ukasa, jumanakatakiw qʼomachasipjjäta, oraqenakaman qorpapajj uka cheqakamaw purirakini. Cananeonakajj guerran nuwasiñataki hierrot lurat jusinakani* carronakanïpkchisa,* chʼamani markäpkchi ukasa, jupanakarojj alisnukupjjätawa”+ sasa.

18 Ukatsti taqpach Israel markaw Siló+ markan tantachtʼasipjjäna, ukanwa Diosamp jikisiñ carpa*+ saytʼayapjjarakïna, oraqenakajj jupanakan amparapankjjatap layku.+ 2 Ukampis israelitanakan paqallqo tribunakaparojj janïraw herenciapajj churatäkänti. 3 Ukatwa Josué chachajj israelitanakar akham säna: “¿Kunatsa payachasipjjta? Sarapjjam, nayra awkinakaman Jehová Diosapajj churapktam uka oraqe taqpach katuntanipjjam.+ 4 Sapa tribut kimsa chachanak ajllisipjjam, nayaw jupanakar khitäjja, jupanakajj sarasaw taqpach oraqe muytanipjjañapa, ukatsti herenciapajj qhawqchʼasa ukarjamaw mapanak lurapjjañapa. Ukatsti nayan ukaruw kuttʼanipjjañaparaki. 5 Qhawqchʼas jupanakar waktʼi ukarjamaw paqallqor jaljasipjjañapa.+ Judá tribusti aynach toqenkir* oraqeparuw quedasini,+ José chachat jutirinakajj alay toqenkir* oraqeparuw quedasipjjarakini.+ 6 Jumanakajj oraqe uñakipasajj mapanak lurapjjam, ukatjja paqallqo partenakaruw oraqe jaljapjjañama, ukatsti nayan ukar apanipjjam, nayaw jumanakataki Jehová Diosasan nayraqatapan suertenak willtarapipjjäma.+ 7 Ukampis levitanakarojj janiw kuna herencias jumanak taypin churatäkaniti,+ jupanakan herenciapajj Jehová Diosan sacerdotepjam serviñawa.+ Gad, Rubén tribunakasa Manasesan chikat tribupasa+ Jordán jawirat inti jalsu toqeruw herenciap katusjjapjje, Jehová Diosan Moisés serviripaw jupanakar uk churäna” sasa.

8 Chachanakasti sarañatakiw wakichtʼasipjjäna, ukatsti Josué chachajj oraqet mapanak luranipjjañapäkäna ukanakarojj akham sänwa: “Sarapjjam, oraqe uñakipasajj mapanak luranipjjam, ukatjja nayan ukar kuttʼanipjjam, nayaw Siló markan Jehová Dios nayraqatan suertenak willtarapipjjäma”+ sasa. 9 Uk satasti chachanakajj oraqe uñakipiriw sarapjjäna, paqallqoruw oraqe jaljapjjäna, qhawqha markanakas utji ukarjam jaljasajj mä documentoruw qellqtʼapjjarakïna. Ukatjja Josué chachan ukaruw Siló markankir campamentor kuttʼanipjjäna. 10 Josué chachasti Siló markanwa Jehová Dios nayraqatan jupanakatak suertenak willtarapïna.+ Ukjanwa Josué chachajj qhawqchʼa oraqetï jupanakar waktʼkäna ukarjam israelitanakar jalanoqäna.+

11 Ukatsti nayrïr sorteojj Benjamín tributakiw sapa familiaparjam waktʼäna, sorteot katoqkäna uka oraqepajj Judá tribunkiri+ ukhamarak José chachat jutirinak+ taypinkänwa. 12 Alay toqenkir* qorpapajj Jordán jawirat qalltäna, Jericó+ markat alay toqerojj* qollu parkinkir oraqenakapkama, inti jalanta toqerusti qollu toqenkir oraqenak makatasajj Bet-Aven+ wasar toqeruw sararakïna. 13 Qorpasti Luz markar saraskakïnwa, Luz markan aynach toqep* qollu parkinkir oraqenakapkama, mä arunjja Betel+ markakama. Qorpasti Atarot-Addar+ markaruw saraqäna, Bet-Horón Baja+ markat aynach toqenkki* uka qollukama. 14 Qorpajj inti jalanta toqer sarasajj aynach toqeruw* muytäna, Bet-Horón markar uñjjatki uka qollutjja aynach toqeru.* Quiryat-Baal markaruw tukuyäna, mä arunjja Quiryat-Jearim+ markakama, uka markajj Judá tribun markapawa. Inti jalanta toqenkir qorpanakajj ukhamänwa.

15 Aynach toqenkir* qorpajj Quiryat-Jearim markat qalltäna, ukatsti qorpajj inti jalanta toqer saraskakïnwa, Neftóah+ cheqan uma jalsunakap toqeru. 16 Hinón valle*+ uñkatasinkki uka qollu aynachkamaw qorpajj saraqäna, uka qollusti Refaím+ vallenkiwa alay toqena,* ukatsti Hinón valleruw saraqäna, aynach toqerojj* jebuseonakan+ qollu parkinkir oraqenakapkama, ukatjja En-Roguel+ cheqaruw saraqarakïna. 17 Qorpasti alay toqer* sarasajj En-Semes cheqakamaw sararakïna, ukjatsti Guelilot cheqaruw saräna, ukajja Adumim+ cheqar makatki uka uñkatasinkiwa, ukatjja Rubén chachan Bohán+ sat yoqapan qalapkamaw qorpajj+ saraqäna. 18 Arabá uñkatasinkki uka alay toqenkir* qollu parkinak sarasajj Arabá toqeruw saraqäna. 19 Qorpasti Bet-Hoglá+ markan alay toqenkir* qollu parkinakapkamaw saräna, Mar Salado*+ qotajj oraqer muykatki uka alayaruw* tukuyarakïna, Jordán jawiran aynach toqeparu.* Aynach toqenkir* qorpanakajj ukhamänwa. 20 Inti jalsu toqenkir qorpajj Jordán jawiränwa. Benjamín chachat jutirinakan sapa familiapar churat herenciajj ukhamänwa, sapa ladon qorpanakaparjama.

21 Benjamín tribun familianakapan markanakapajj akanakänwa: Jericó, Bet-Hoglá, Émec-Queziz, 22 Bet-Arabá,+ Zemaraim, Betel,+ 23 Avim, Pará, Ofrá, 24 Kefar-Amoní, Ofní, Gueba.+ Taqpachanisti 12 markanaka, jiskʼa markanakapampi.

25 Gabaón,+ Ramá, Beerot, 26 Mizpé, Kefirá, Mozá, 27 Réquem, Irpeel, Taralá, 28 Zelá,+ Ha-Élef, Jebusí, mä arunjja Jerusalén,+ ukatjja Guibeá,+ Quiryat markanakampi. Taqpachanisti 14 markanaka, jiskʼa markanakapampi.

Benjamín chachat jutiri sapa familiapar churat herenciajj ukhamänwa.

19 Payïri sorteojj+ Simeón+ tributakiw sapa familiaparjam waktʼäna. Herenciapajj Judá+ tribun herenciap taypinkänwa. 2 Herenciapajj akanakänwa: Beer-Seba,+ Seba, Moladá,+ 3 Hazar-Sual,+ Balá, Ézem,+ 4 Eltolad,+ Betul, Hormá, 5 Ziclag,+ Bet-Marcabot, Hazar-Susá, 6 Bet-Lebaot,+ Saruhén. Taqpachanisti 13 markanaka, jiskʼa markanakapampi. 7 Ain, Rimón, Éter, Asán.+ Taqpachanisti pusi markanaka, jiskʼa markanakapampi. 8 Uka markanak jakʼankir taqe jiskʼa markanakapampi Baalat-Beer markakama, mä arunjja aynach toqenkir* Ramá markakama. Simeón tribun sapa familiapar churat herenciajj ukhamänwa. 9 Judá tribun oraqepajj wali jachʼänwa, ukatwa Simeón chachat jutirinakajj Judá tribun oraqepat herencia katoqapjjäna. Ukhamasti Simeón chachat jutirinakajj Judá tribun herenciap taypinwa oraqe katoqapjjäna.+

10 Kimsïri sorteojj+ Zabulón+ chachat jutirinakatakiw sapa familiaparjam waktʼäna. Herenciapan qorpapajj Sarid markakamänwa. 11 Qorpapajj inti jalanta toqenkir Mareal markaruw makatäna, Dabéset markakama, ukatjja Jocneam marka uñkatasinkki uka vallekama. 12 Sarid markatjja inti jalsu toqeruw saräna, Kislot-Tabor cheqan qorpapkama, ukatjja Daberat+ markaruw saräna, ukjatsti Jafía toqeruw makatarakïna. 13 Uka cheqatjja qorpajj inti jalsu toqeruw Gat-Héfer,+ Et-Cazín toqenakar saraskakïna, Rimón markar purisasti Neá toqeruw sararakïna. 14 Alay toqerusti* qorpajj Hanatón marka muytasajj Iftá-El sat valleruw tukuyäna, 15 Catat, Nahalal, Simrón,+ Idalá, Belén+ markanakkama. Taqpachanisti 12 markanaka, jiskʼa markanakapampi. 16 Zabulón chachat jutirinakan sapa familiapar+ churat herenciajj ukhamänwa. Uka markanakasa jiskʼa markanakapasa jupanakankänwa.

17 Pusïri sorteojj+ Isacar+ chachat jutirinakatakiw sapa familiaparjam waktʼäna. 18 Qorpanakapajj akanakänwa: Jezreel,+ Kesulot, Sunem,+ 19 Hafaraim, Shion, Anaharat, 20 Rabit, Quisión, Ébez, 21 Rémet, En-Ganim,+ En-Hadá, Bet-Pazez. 22 Qorpasti Tabor,+ Sahazuma, Bet-Semes toqenakar purisajj Jordán jawiraruw tukuyäna. Taqpachanisti 16 markanaka, jiskʼa markanakapampi. 23 Isacar tribun sapa familiapar+ churat herenciajj ukhamänwa. Uka markanakasa jiskʼa markanakapasa jupanakankänwa.

24 Phesqëri sorteojj+ Aser+ tributakiw sapa familiaparjam waktʼäna. 25 Qorpanakapajj akanakänwa: Helcat,+ Halí, Beten, Acsaf, 26 Alamélec, Amad, Misal. Inti jalanta toqerusti Carmelo,+ Sihor-Libnat toqenakaruw qorpajj purïna, 27 inti jalsu toqerojj Bet-Dagón markaruw kuttʼäna, Zabulón tribun qorpapar purisasti, alayarojj* Iftá-El sat valleru ukhamarak Bet-Émec, Neiel markanakaruw purïna, chʼeqa toqerojj Cabul markaruw sararakïna, 28 ukatjja Ebrón, Rehob, Hamón, Caná markanak pasasajj Jachʼa Sidón+ markaruw purïna. 29 Qorpasti Ramá markaruw kuttʼarakïna, jachʼa perqanakamp muyuntat Tiro+ markakama. Ukatjja Hosá markar kuttʼanisajja, Mar Grande* sat lamar qotaruw tukuyäna, Aczib, 30 Umá, Afec,+ Rehob+ markanakajj uksa toqenkarakïnwa. Taqpachanisti 22 markanaka, jiskʼa markanakapampi. 31 Aser tribun sapa familiapar+ churat herenciajj ukhamänwa. Uka markanakasa jiskʼa markanakapasa jupanakankänwa.

32 Sojjtïri sorteojj+ Neftalí chachat jutirinakatakiw sapa familiaparjam waktʼäna. 33 Qorpapajj Hélef markat qalltäna, Zaananim+ cheqankir jachʼa qoqanakapat* ukhamarak Adamí-Néqueb, Jabneel cheqanakat Lacum cheqakama, ukatsti qorpajj Jordán jawiraruw tukuyäna. 34 Qorpasti inti jalanta toqeruw Aznot-Tabor markar kuttʼäna, ukatjja Hucoc toqer sarasajj aynach toqeruw* Zabulón tribun qorpapar purïna, inti jalanta toqerojj Aser tribun qorpapkama. Inti jalsu toqerojj Judá oraqkama, Jordán jawira toqena. 35 Jachʼa perqanakamp muyuntat markanakajj akanakänwa: Zidim, Zer, Hammat,+ Racat, Kinéret, 36 Adamá, Ramá, Hazor,+ 37 Quedes,+ Edréi, En-Hazor, 38 Yirón, Migdal-El, Horem, Bet-Anat, Bet-Semes.+ Taqpachanisti 19 markanaka, jiskʼa markanakapampi. 39 Neftalí tribun sapa familiapar+ churat herenciajj ukhamänwa. Uka markanakasa jiskʼa markanakapasa jupanakankänwa.

40 Paqallqöri sorteojj+ Dan+ tributakiw sapa familiaparjam waktʼäna. 41 Herenciapan qorpapajj akanakänwa: Zorá,+ Estaol, Ir-Semes, 42 Saalabín,+ Ayalón,+ Itlá, 43 Elón, Timná,+ Ecrón,+ 44 Eltequé, Guibetón,+ Baalat, 45 Jehúd, Bene-Berac, Gat-Rimón,+ 46 Me-Jarcón, Racón, qorpasti Jope+ jakʼa pasarakïna. 47 Ukampis Dan tribun oraqepajj jupanakatak wali jiskʼakïnwa.+ Ukatwa jupanakajj Lésem+ markar makatasajj jupanak contra nuwasipjjäna, marka katuntasasti espadampiw jaqenakar jiwarayapjjäna. Uka marka katuntasajj ukanwa jakapjjarakïna. Lésem suti lantejj Dan sutimpiw uchapjjäna, nayra awkipan Dan sutipampi.+ 48 Dan tribun sapa familiapar churat herenciajj ukhamänwa. Uka markanakasa jiskʼa markanakapasa jupanakankänwa.

49 Ukhamwa sorteot jaljirinakajj herenciat churañatakejj oraqe jalanoqapjjäna. Ukatjja israelitanakajj Nun chachan Josué yoqaparuw jupanak taypin mä herencia churapjjäna. 50 Josué chachajj Efraín tribun qollunak toqenkir Timnat-Sérah+ oraqe mayïna, ukatwa jupanakajj Jehová Diosan aruparjam uka oraqe churapjjäna. Jupasti mä marka saytʼayasaw ukan jakarakïna.

51 Uka oraqenakwa Eleazar sacerdotempi, Nun chachan Josué yoqapampi, Israel tribun pʼeqtʼirinakapampejj Siló+ markan sorteotkam herenciat churapjjäna,+ Jehová Dios nayraqatana ukhamarak Diosamp jikisiñ carpar+ mantañ cheqana. Ukhamwa jupanakajj oraqe lakirañ tukuyapjjäna.

20 Ukatjja Jehová Diosajj akham sasaw Josué chachar säna: 2 “Israelitanakar akham sañamawa: ‘Kunjamtï Moisés taypi sapkayäsmajja, imantasiñ markanak jumanakatak ajllisipjjam,+ 3 ukhamat jan amanut* mä jaqer jiwayki uka jaqejj ukar escapjjañapataki. Uka markanakanwa jiwat jaqen wilapat vengasiri jaqet imantasipjjäta.+ 4 Jiwayir jaqejj uka markanakat mayaruw escapjjañapa,+ markar mantañäkis uka punkun saytʼasajja,+ uka markan ancianonakap nayraqatanwa kunatï paski uk yatiyañapa. Ukatsti jupanakajj markaruw katoqapjjañapa, jupanakamp chika jakañapatakis mä lugar churapjjañapa. 5 Jiwat jaqen wilapat vengasiri jaqetï jupar arktanejja, jupanakajj janiw jaqe jiwayirirojj katuyapjjañapäkiti, jupajj janiw jiwayañ amtampi jaqe masipar jiwaykiti, janirakiw uka nayras uñiskänti.+ 6 Jaqe jiwayirejja marka nayraqatan* juzgatäñapkamaw uka markan jakañapa,+ uka tiempon jachʼa jilïr sacerdotëki ukan jiwañapkamarakiw uka markankañapa.+ Ukatjja jaqe jiwayirejj kawkïr markattï escapanki uka markar kuttʼjjaspawa, markaparusa utaparus mantjjaspawa’+ sasa”.

7 Ukatwa jupanakajj Neftalí oraqen qollunak toqenkir Galilean Quedes marka yaqhachapjjäna,*+ Efraín tribun qollunak toqenkir Siquem marksa,+ Judá tribun qollunak toqenkir Quiryat-Arbá marksa,+ mä arunjja Hebrón marksa yaqhachapjjarakïnwa. 8 Jordán jawira toqen Jericó markat inti jalsu toqenjja Bézer marka ajllipjjäna,+ Rubén tribun wasara pampa oraqepana. Gad tribun oraqepanjja Galaad oraqenkir Ramot+ marka ajllipjjäna. Manasés tribun+ oraqepanjja Basán toqenkir Golán+ marka ajllipjjäna.

9 Taqe israelitanakatakisa israelitanak taypin jakasiri extranjeronakatakisa, uka markanakwa ajllipjjäna. Khititï jan amanut* jaqe masipar jiwayki ukajj uka markar escapjjañapataki,+ ukhamat marka nayraqatan* janïr juzgatäkasajj jiwat jaqen wilapat vengasiri jaqemp jan jiwayatäñapataki.+

21 Levitanakan familia pʼeqtʼirinakapajj Eleazar+ sacerdoteru, Nun chachan Josué yoqaparu ukhamarak Israel tribun pʼeqtʼirinakaparuw jakʼachasipjjäna, 2 Canaán oraqenkiri Siló+ markanwa jupanakarojj akham sapjjäna: “Moisés taypiw Jehová Diosajj jakasipjjañajataki markanakampi, uywanakajatak pastoni oraqenakampi+ katoqapjjañajatak säna” sasa. 3 Ukatwa israelitanakajj Jehová Diosan arsutaparjamajj pachpa herenciapat markanaka,+ pastoni oraqenaka levitanakar churapjjäna.+

4 Cohatitanakan+ familianakapatakiw sorteojj waktʼäna, Aarón sacerdotet jutiri levitanakarojj Judá tributa,+ Simeón tributa,+ Benjamín tributwa+ 13 markanak sorteot churapjjäna.

5 Mayni cohatitanakarusti Efraín tribun+ familianakapata, Dan tribun familianakapata, Manasesan chikat tribupan+ familianakapatjja, tunka markanakwa sorteot churapjjäna.

6 Guersonitanakarojj+ Isacar tribun familianakapata, Aser tribun familianakapata, Neftalí tribun familianakapata, Basán toqenkir Manasesan chikat tribupan+ familianakapatjja 13 markanakwa sorteot churapjjäna.

7 Meraritanakajj+ sapa familianakaparjamaw Rubén tributa, Gad tributa, Zabulón tributa+ 12 markanak katoqapjjäna.

8 Ukhamwa israelitanakajj uka markanaka, pastoni oraqenakapampi levitanakar sorteot churapjjäna, kunjamtï Jehová Diosajj Moisés taypi siskäna ukarjama.+

9 Ukatwa Judá tribusa Simeón tribusa aka sutinakani markanak jupanakar churapjjäna,+ 10 uka markanakwa Aarón chachat jutiri levitanakan cohatita familianakapar churapjjäna, nayrïr sorteojj jupanakar waktʼatap layku. 11 Judá tribun qollunak toqenkir oraqenakapanjja, Quiryat-Arbá markwa jupanakar churapjjäna,+ mä arunjja Hebrón+ marka churapjjäna, uka jakʼankir pastoni oraqenakapampi. (Arbá chachajj Anac chachan awkipänwa). 12 Ukampis uka markan jan yapuchat oraqenakapsa jiskʼa markanakapsa Jefuné chachan Caleb yoqaparuw oraqepäñapatak churapjjäna.+

13 Aarón sacerdotet jutirinakarojj jaqe jiwayiritak imantasiñ marka churapjjäna,+ mä arunjja Hebrón+ marka churapjjäna, pastoni oraqenakapampi, Libná+ markampi pastoni oraqenakapampi, 14 Jatir+ markampi pastoni oraqenakapampi, Estemoa+ markampi pastoni oraqenakapampi, 15 Holón+ markampi pastoni oraqenakapampi, Debir+ markampi pastoni oraqenakapampi, 16 Ain+ markampi pastoni oraqenakapampi, Jutá+ sat markampi pastoni oraqenakapampi, Bet-Semes markampi pastoni oraqenakapampi. Uka pä tributjja llätunka markanaka.

17 Benjamín tribut aka markanak churapjjäna: Gabaón+ markampi pastoni oraqenakapampi, Gueba markampi pastoni oraqenakapampi,+ 18 Anatot+ markampi pastoni oraqenakapampi, Almón markampi pastoni oraqenakapampi. Taqpachanisti pusi markanaka.

19 Aarón chachat jutir sacerdotenakarojj 13 markanakampi pastoni oraqenakapampi churapjjäna.+

20 Levitanak taypinkiri cohatitanakan mayni familianakaparojj Efraín tribun markanakapatwa sorteot churapjjäna. 21 Jupanakajj jaqe jiwayiritak imantasiñ marka churapjjäna,+ Efraín tribun qollunak toqenjja Siquem+ markampi pastoni oraqenakapampi, Guézer+ markampi pastoni oraqenakapampi, 22 Quibzaim markampi pastoni oraqenakapampi, Bet-Horón+ markampi pastoni oraqenakapampi. Taqpachanisti pusi markanaka.

23 Dan tribut aka markanak churapjjäna: Eltequé markampi pastoni oraqenakapampi, Guibetón markampi pastoni oraqenakapampi, 24 Ayalón+ markampi pastoni oraqenakapampi, Gat-Rimón markampi pastoni oraqenakapampi. Taqpachanisti pusi markanaka.

25 Manasesan chikat tributjja aka markanak churapjjäna: Taanac+ markampi pastoni oraqenakapampi, Gat-Rimón markampi pastoni oraqenakapampi. Taqpachanisti pä marka.

26 Cohatitanakan mayni familianakapajja, tunka markanakampi pastoni oraqenakapampi katoqapjjäna.

27 Levitanakan familiapat jutiri guersonitanakajja,+ Manasesan chikat tribupatwa jaqe jiwayiritak imantasiñ marka katoqapjjäna, mä arunjja Basán oraqenkir Golán+ markampi pastoni oraqenakapampi, Beesterá markampi pastoni oraqenakapampi. Taqpachanisti pä marka.

28 Isacar tribut+ aka markanak churapjjäna: Quisión markampi pastoni oraqenakapampi, Daberat+ markampi pastoni oraqenakapampi, 29 Jarmut markampi pastoni oraqenakapampi, En-Ganim markampi pastoni oraqenakapampi. Taqpachanisti pusi markanaka.

30 Aser tribut+ aka markanak churapjjäna: Misal markampi pastoni oraqenakapampi, Abdón markampi pastoni oraqenakapampi, 31 Helcat+ markampi pastoni oraqenakapampi, Rehob+ markampi pastoni oraqenakapampi. Taqpachanisti pusi markanaka.

32 Neftalí tribut aka markanak churapjjäna: jaqe jiwayiritak imantasiñ marka,+ mä arunjja Galilea toqen Quedes+ markampi pastoni oraqenakapampi, Hamot-Dor markampi pastoni oraqenakapampi, Cartán markampi pastoni oraqenakapampi. Taqpachanisti kimsa markanaka.

33 Guersonitanakan sapa familianakapan taqpach markanakapajja, 13 markanakänwa pastoni oraqenakapampi.

34 Meraritanakan familianakapat+ mayni levitanakajj Zabulón tributjja+ aka markanak katoqapjjäna: Jocneam+ markampi pastoni oraqenakapampi, Cartá markampi pastoni oraqenakapampi, 35 Dimná markampi pastoni oraqenakapampi, Nahalal+ markampi pastoni oraqenakapampi. Taqpachanisti pusi markanaka.

36 Rubén tribut aka markanak churapjjäna: Bézer+ markampi pastoni oraqenakapampi, Jáhaz markampi pastoni oraqenakapampi,+ 37 Quedemot markampi pastoni oraqenakapampi, Mefaat markampi pastoni oraqenakapampi. Taqpachanisti pusi markanaka.

38 Gad tribut+ aka markanak churapjjäna: jaqe jiwayiritak imantasiñ marka, mä arunjja Galaad+ oraqenkiri Ramot markampi pastoni oraqenakapampi, Mahanaim+ markampi pastoni oraqenakapampi, 39 Hesbón+ markampi pastoni oraqenakapampi, Jazer+ markampi pastoni oraqenakapampi. Taqpachanisti pusi markanaka.

40 Meraritanakarusti, mä arunjja levitanakan mayni familianakaparojja 12 markanakwa sapa familianakaparjam churapjjäna.

41 Israelitanakan oraqenakap taypinjja levitanakan taqpach markanakapajj 48 markanakänwa, pastoni oraqenakapampi.+ 42 Sapa mayni uka markanakajj pastoni oraqenakampi muytatkamakïnwa.

43 Kuntï Jehová Diosajj israelitanakan nayra awkinakapar juramentomp siskänjja,+ ukarjamaw jupanakarojj taqpach oraqenak churäna, jupanakasti uka oraqenakwa katupjjäna, ukanwa jakapjjarakïna.+ 44 Kunjamtï Jehová Diosajj israelitanakan nayra awkinakapar juramentomp siskänjja,+ ukarjamaw jupanak jakʼankiri taqpach enemigonakapat samarañ churäna, taqpacha enemigonakapatjja janiw maynis israelitanak contra saytʼasiñ puedkänti.+ Jehová Diosajj jupanakan taqpach enemigonakaparuw amparapar katuyäna.+ 45 Jehová Diosajj Israel markar arskäna uka suma promesanak luratapatjja, janiw ni mä promesa luratapas jan phoqaskänti, taqpachaw phoqasirakïna.+

22 Josué chachasti rubenitanakaru, gaditanakaru, Manasesan chikat tribuparuw jawsthapïna, 2 jupanakarojj akham sänwa: “Jumanakajj kuntï Jehová Diosan Moisés serviripajj sapkayätam ukanak taqpach phoqapjjtajja,+ kunanaktï nayajj sapkayäsma ukanaksa taqpach istʼapjjaraktajja.+ 3 Nayrat jichhürkamajja, janiw jilatanakamar jaytanukupktati,+ Jehová Diosaman mandamientonakapsa phoqapjjaraktawa.+ 4 Jichhasti kunjamtï siskänjja, ukarjamaw Jehová Diosamajj jilanakamar samarañ churi.+ Ukhamajj utanakamar kuttʼjjapjjam. Jehová Diosan Moisés serviripajj Jordán jawirat khurkatar* churapktam uka oraqer kuttʼjjapjjam.+ 5 Ukampis Jehová Diosan Moisés serviripajj churapktam uka mandamientsa Leysa wali amuyumpipun phoqapjjam,+ Jehová Diosamar taqe chuyma munasisa,+ thakipan sarnaqasa,+ mandamientonakap phoqasa,+ jupat jan jitheqtasa,+ taqe chuymampi taqe almampi*+ jupar servisa”+ sasa.

6 Ukatjja Josué chachajj bendisisaw jupanakar khitjjäna, jupanakasti utanakaparuw sarjjapjjarakïna. 7 Manasesan chikat tribuparojja Moisesajj Basán+ toqenwa herenciat oraqe churjjäna, chikatanirusti Josué chachajj Jordán+ jawirat inti jalanta toqenkir oraqe churäna, jilanakapamp jakapjjañapataki. Utanakapar khitjjäna ukhajja, Josué chachajj bendisïnwa, 8 jupanakarojj akham sänwa: “Utanakamarojj kunanakatï wali valoranïki ukanakampi kuttʼjjapjjam, walja uywanakampi, qollqempi, qorimpi, cobrempi, hierrompi ukhamarak walja isinakampi.+ Enemigonakamankir katuntapkta ukanakatjja, jumanakatak apasipjjam,+ jilanakamamp jaljasipjjarakim” sasa.

9 Ukatjja rubenitanakasa, gaditanakasa, Manasesan chikat tribupasa mayni israelitanakan ukat sarjjapjjänwa, kawkïr oraqtï Jehová Diosajj jakapjjañapatak Moisés taypi churkäna,+ uka oraqeruw jupanakajj Canaán oraqenkir Siló markat Galaad oraqer kuttʼjjapjjäna.+ 10 Jordán toqenkir Canaán oraqer puripjjäna ukhajja, rubenitanakasa, gaditanakasa, Manasesan chikat tribupasa Jordán jawir jakʼarojj mä altar saytʼayapjjäna, uka altarajj wali jachʼänwa, musparkañarakïnwa. 11 Ukatsti mayni israelitanakajj ukanak istʼasajj+ akham sapjjänwa: “Rubenitanakasa, gaditanakasa, Manasesan chikat tribupasa Jordán toqenkir Canaán oraqen qorpapäki ukjanwa mä altar oraqesan saytʼayasipjje” sasa. 12 Ukanak istʼasasti, israelitanakajj markpachaw Siló+ markan tantachtʼasipjjäna, ukhamat jupanak contra nuwasir sarañataki.

13 Ukatjja israelitanakajj Eleazar sacerdoten Finehás+ yoqaparuw Galaad oraqenkir rubenitanakan ukaru, gaditanakan ukaru, Manasesan chikat tribupan ukar khitapjjäna. 14 Jupamp chikajj tunka pʼeqtʼirinakaw sarapjjarakïna, Israelan sapa tribupat sarapjjäna. Uka chachanakajj Israel markan utjir waranq waranqa chachanakan familianakap pʼeqtʼirinakänwa.+ 15 Kunapachatï jupanakajj Galaad oraqenkir rubenitanakan ukaru, gaditanakan ukaru, Manasesan chikat tribupäki ukar puripjjäna ukhajja, jupanakarojj akham sapjjänwa:

16 “Jehová Diosan markapankirinakajj taqpachaniw akham sapjje: ‘¿Kunatsa jumanakajj yaqha altar lurasajj Israelan Diosapar traicionapjjta?+ Jehová Dios contra saytʼasisasa mä altar jumanakatak lurasas Jehová Diosaruw apanukupjjtajja.+ 17 ¿Peor sat cheqan jucha luratasajj jiskʼakïnti? Jehová Diosan markapajj mä usumpi castigatänwa,+ jichhakamaw uka jucha luratasat tʼaqesiskaraktanjja. 18 ¿Jumanakajj Jehová Diosarut apanukupjjäta? Jumanakatï jichhürun Jehová Dios contra saytʼasipjjätajja, qharürojj taqe Israel markpachatakiw Diosajj colerasini.+ 19 Jumanakan oraqenakamatejj jan qʼomäkchejja, Jehová Diosan oraqepar jutapjjam,+ kawkjankkitï Jehová Diosan tabernaculopajj ukaru.+ Nanak taypin jakapjjam, ukampis yaqha altar lurasajj jan nanakamppach Jehová Dios contra saytʼayapjjestati. Nanakan Jehová Diosajan altarapajj utj-jjapjjetuwa.+ 20 Kunapachatï Zérah chachan Acán+ yoqapajj kunatï qʼala tukjatäñapäkäna ukanak apasis juchachaskäna ukhajja, ¿janit Diosajj Israel markpachatak coleraskänjja?+ Janirakiw jupa sapakejj juchapat jiwkänti’”.+

21 Ukanak satasti rubenitanakasa, gaditanakasa, Manasesan chikat tribupasa akham sasaw Israel markan utjir waranq waranqa chachanakan familianakap pʼeqtʼirinakarojj sapjjäna:+ 22 “¡Jehová Dios, diosanakan Diosapa! ¡Jehová Dios, diosanakan Diosapa!+ Kunatsa nanakajj uk lurapjjta uk Diosajj yatiwa, Israel markas yatirakiniwa. Nanakatejj Jehová Dios contra saytʼasipjjsta, juparojj apanukupjjaraksta ukhajja, jichhürojj jan nanakar perdonapjjestati. 23 Nanakatejj Jehová Diosar apanukuñataki, nakhantayat ofrendanak loqtañataki, grano ofrendanak loqtañataki ukhamarak sumankañ sacrificionak loqtañataki mä altar lurapjjsta ukhajja, Jehová Diosaw uk uñjaskani.+ 24 Ukampis janiw ukhamäkiti, nanakarojj yaqhaw llakisiyapjjetu, ukatwa uk lurapjjta. Nanakajj akham sapjjtwa: ‘Jutïrinjja, wawanakapajj akham sasaw wawanakasar sapjjaspa: “¿Kuna derechompis jumanakajj nanakamp chik Israelan Jehová Diosapar adorapjjta?* 25 Jehová Diosaw jumanakampi, nanakampi, gaditanakampi, rubenitanakampi jaljañatakejj Jordán jawira qorpat ucharapistu. Jumanakajj janiw Jehová Diosar adorañatakejj* kuna derechonïpktasa” sasa. Ukhamwa wawanakapajj Jehová Diosar adorañat* wawanakasar jarkʼapjjaspa’ sasa.

26 ”Ukatwa akham sapjjta: ‘Jiwasajj jankʼak mä altar lurapjjañäni, ukampis ukajj janiw nakhantayat ofrendanakatakïkaniti ni sacrificionak loqtañatak altaräkanisa, 27 jan ukasti uka altarajj jumanakataki, nanakataki, jiwasjjar jutir wawanakasatak testigot saytʼañapatakiwa,+ uka altarajj kunjamsa nakhantayat ofrendanakampi, sumankañ sacrificionakampi+ ukhamarak yaqha sacrificionakampi Jehová Diosar servipjjäjja uk uñachtʼayañatakiwa, ukhamat wawanakamajj wawanakajar jutïrin jan akham sapjjañapataki: “Jumanakajj janiw Jehová Diosar adorañatakejj* kuna derechonïpktasa” sasa’. 28 Ukatwa akham sapjjarakta: ‘Jutïrintejj jiwasarusa jiwasjjar jutir wawanakasarus ukham sapjjestaspa ukhajja, akham sañäniwa: “Nayra awkinakasajj Jehová Diosan altarap kikpa lurapkäna uka altar uñjapjjam, uka altarajj janiw nakhantayat ofrendanakatakïkiti ni sacrificionak loqtañatakïkisa, jan ukasti jumanakataki nanakataki testigot saytʼañapatakiwa” sasa’. 29 Jehová Diosan altarapajj tabernaculop nayräjjankiwa,+ ¡nanakajj janipuniw nakhantayat ofrendanaka, grano ofrendanaka ukhamarak sacrificionak loqtañatak yaqha altar lurasin Jehová Dios contrajj saytʼasipkiristti,+ janirakiw Jehová Diosarojj apanukupkiristti!” sasa.

30 Rubén chachata, Gad chachata ukhamarak Manasés chachat jutirinakan arunakap istʼasajja, Finehás sacerdotesa, jupamp chika sarir marka pʼeqtʼirinakasa, Israel markan utjiri waranq waranqa chachanakan familianakap pʼeqtʼirinakas kusisitäjjapjjänwa.+ 31 Ukatwa Eleazar sacerdoten Finehás yoqapajja, Rubén chachata, Gad chachata ukhamarak Manasés chachat jutirinakarojj akham säna: “Jichhajj yatjjapjjtwa, Jehová Dios contra jan saytʼasipjjatam laykojja, Jehová Diosajj jiwas taypinkaskiwa. Jichhajj janirakiw Jehová Diosajj castigkistaniti” sasa.

32 Ukatjja Eleazar sacerdoten Finehás yoqapasa, pʼeqtʼirinakasa, Galaad oraqenkir rubenitanakana ukhamarak gaditanakan oraqepat Canaán toqeruw kuttʼanjjapjjäna, mayni israelitanakaruw taqe ukanak yatiyapjjarakïna. 33 Ukanak istʼasasti israelitanakajj kusisitäpjjänwa. Diosaruw israelitanakajj jachʼañchapjjäna, rubenitanaka gaditanaka contra nuwasir sarañatsa kawkjantï jakapkäna uka oraqe tukjañatsa janirakiw parljjapjjänti.

34 Ukatjja rubenitanakasa gaditanakasa altararojj suti uchapjjäna,* akham sasa: “Aka altaraw jiwas taypin Jehová Diosajj cheqpach Diosätap uñachtʼayir testigojja” sasa.

23 Jehová Diosajj israelitanakar jupanak jakʼankiri enemigonakapat samarañ churkäna+ uka walja urunak qhepatjja, kunapachatï Josué chachajj wali awkëjjäna, walja maranëjjarakïna+ ukhajja, 2 Josué chachajj taqe Israel markpacharuw jawsthapïna,+ Israelan ancianonakaparu, pʼeqtʼirinakaparu, juezanakaparu, jilïrinakaparu.+ Jupanakarojj akham sänwa: “Nayajj wali awkëjjtwa, walja maranëjjaraktwa. 3 Jehová Diosamajj kunanaktï jumanak layku taqe uka markanakar lurkäna uk jumanak pachpaw uñjapjjtajja, Jehová Diosamaw jumanak lantejj nuwasiskäna.+ 4 Nayaw inti jalanta toqen jakasir markanakarojj Jordán jawirat Mar Grande* sat lamar qotakam alisnukta, ukatsti jumanakaruw+ sorteotkam+ uka oraqenak churapjjsma. Yaqhep markanakajj pachpankasipkiwa, ukampis oraqenakapajj jumanakankiwa.+ 5 Jehová Diosamaw jumanak nayraqatat uka markanak nukhurpayäna,+ jumanakatakiw alisnukurakïna. Jumanakasti kunjamtï Jehová Diosamajj arskäna ukarjamaw uka markanakan oraqenakap katuntapjjtajja.+

6 ”Jichhasti jumanakajj janipun ajjsarapjjamti,* ukhamat kunatï Moisesan Leyinakan libropan+ qellqatäki taqe ukanak phoqapjjañamataki, ukarjam lurapjjañamataki, ukatakejj janiw uka Leyit kupirus ni chʼeqarus saranukupjjañamäkiti,+ 7 janipuniw jumanak taypinkki uka markanakampejj chikachasipjjañamäkiti.+ Janipuniw diosanakapan sutinakaps aytapjjañamäkiti+ ni sutinakapjjarus juramento lurapjjañamäkiti, janipuniw ukanakar servipjjañamäkiti ni altʼasipjjañamäkisa.+ 8 Jumanakajj janipuniw Jehová Diosamat jitheqtapjjañamäkiti,+ kunjamtï jichhürkamajj lurapkta ukhama. 9 Jehová Diosajj wali chʼamani jachʼa markanakaruw jumanak nayraqatat alisnukuni,+ kuna laykutejj nayrat jichhakamajj janiw ni mä chachas jumanak contra saytʼaskiti.+ 10 Jehová Diosan jumanak lanti nuwasitap laykojja,+ jumanak taypinkiri mä chachakiw 1.000 chachanakar arktani,+ kunjamtï jupajj siskäna ukarjama.+ 11 Ukhamasti Jehová Diosamarojj munasipjjapunim,+ wali amuyumpipun sarnaqasa.+

12 ”Ukampis jumanakatï Diosar apanukus jumanak taypinkir markanakamp mayachasipjjäta,+ yoqanakapampisa phuchanakapampis casarasipjjäta,+ uka markankirinakampis chikachasipjjarakïta ukhajja, 13 jumanakajj yatipjjañamawa, Jehová Diosamajj janiw jumanakatak uka markanak alisnukjjaniti.+ Uka markanakajj jumanakatak mä trampäniwa, jikhaninakamatakejj mä asutʼïniwa,+ nayranakamatakis mä chʼapirakïniwa, Jehová Diosamajj churapktam uka suma oraqet chhaqtapjjañamkama.

14 ”Jichhajj niyaw jiwañampëjjta, jumanakajj taqe chuymamampi, taqe almamampiw* sum yatipjjtajja, kuntï Jehová Diosamajj jumanakar sapkayätam taqe uka suma arunakapajj phoqasïnwa. Jumanakatakejj taqpachaw phoqasïna, janiw ni mayas jan phoqaskänti.+ 15 Ukampis kunjamtï Jehová Diosaman arsut taqe arunakapajj jumanakatak phoqaskejja,+ Jehová Diosajj ukhamarakwa arsutaparjamajj taqe jan waltʼañanak jumanakatak apanini, ukatsti kawkïr suma oraqtï Jehová Diosamajj churapktam uka oraqetjja qʼal tukjapjjätam.+ 16 Jumanakatï Jehová Diosamajj phoqañatak churapktam uka pacto pʼakintapjjäta, sarasin yaqha diosanakar servipjjäta, ukanakarus altʼasipjjarakïta ukhajja, Jehová Diosajj jumanakatak wal colerasini,+ churapktam uka suma oraqetsa jankʼakiw chhaqtapjjarakïta”+ sasa.

24 Ukatsti Josué chachajj Israelan taqpach tribunakaparuw Siquem cheqan jawsthapïna, ancianonakaparu, pʼeqtʼirinakaparu, juezanakaparu, jilïrinakaparu.+ Jupanakajj taqpachaniw cheqpach Diosan nayraqatapan saytʼasipjjäna. 2 Josué chachasti akham sasaw markpachar säna: “Israel markan Jehová Diosapajj akham siwa: ‘Nayra tiemponakanjja+ jumanakan nayra awkinakamasa+ Abrahán chachampin Nacor chachampin Taré awkipasa, Éufrates jawir khurkatanwa jakasipjjäna, yaqha diosanakaruw servipjjarakïna.+

3 ”’Tiempompejja jumanakan Abrahán nayra awkimaruw+ Éufrates jawir khurkatat ajllista, ukatsti taqpach Canaán oraqe muytañapatakiw jupar mayta, wawanakaps wal mirtayarakta.+ Juparusti Isaac yoqapwa churta.+ 4 Isaac chacharusti Jacob, Esaú yoqanakap churarakta.+ Qhepatjja Esaú chacharojj Seír qollu oraqepäñapatak churta.+ Jacob chachas yoqanakapas Egipto markaruw saraqapjjarakïna.+ 5 Ukatjja Moisesaru Aaronaruw jumanakar yanaptʼapjjañapatak khitarakta,+ Egipto markar plaganakamp jan waltʼayasaw uka markat jumanakar irpsunipjjsma.+ 6 Kunapachatï nayajj tatanakamaru Egiptot irpsunkayäta,+ jupanakas qotar puripjjarakïna ukhajja, egipcionakajj jumanakan tatanakamarojj Mar Rojo sat qotakamaw guerran nuwasiñatak carronakampi caballot sarir soldadonakampi arktapjjäna.+ 7 Jupanakasti naya Jehová Diosaruw artʼasinipjjetäna,+ ukatwa nayajj egipcionakat mä chʼiyar qenayampi jarkʼaqayäta, qotan umanakapampiw jupanakar chhaqtayarakiyäta,+ jupanak pachpaw kuntï nayajj Egipton lurkayäta uk uñjapjjäna.+ Ukatjja jumanakajj walja maranakaw wasara oraqen jakapjjarakiyätajja.+

8 ”’Nayasti Jordán jawira khurkatan* jakasiri amorreonakan oraqeparuw irpanipjjayäsma, jupanakasti jumanak contraw nuwasirakïna.+ Ukampis jupanakan oraqep katupjjañamatakejj amparanakamaruw katuyapjjsma, jumanak nayraqatanwa jupanakar qʼal tukjarakta.+ 9 Ukatjja Zipor chachan yoqapäki Moab markan reyipäkaraki uka Balac chachaw Israel contra nuwasïna. Ukatwa jupajj Beor chachan Balaam yoqaparojj jumanakar maldisiñapatak jawsayäna.+ 10 Ukampis nayajj janiw Balaam chachar istʼkayätti.+ Ukhamatwa jupajj walja kuti jumanakar bendisipjjayätamjja,+ nayasti jupan amparapatwa salvapjjarakiyäsma.+

11 ”’Ukatsti Jordán jawira paskatasajja,+ jumanakajj Jericó+ markaruw puripjjayätajja. Jericó markan pʼeqtʼirinakapasa,* amorreonakasa, perizitanakasa, cananeonakasa, hititanakasa, guirgaseonakasa, heveonakasa, jebuseonakasa jumanak contraw nuwasipjjäna, ukampis jupanakarojj nayaw jumanakan amparanakamar katuyapjjsma.+ 12 Nayaw jumanak nayraqatan ajjsarañ uchta, uka ajjsarañaw jumanak nayraqatat jupanakar alissüna,+ amorreonakan pä reyinakaparus ukhamaraki. Janiw jumajj ni espadamampis ni flechtʼañ arcomampis jupanakar alisnukkayätati.+ 13 Kawkïr oraqtï jumanakajj jan chʼama tukus katupkta, kawkïr markanaktï jumanakajj jan saytʼayapkta ukanakwa churapjjsmajja,+ ukanakanwa jakapjjaraktajja. Jumanakajj jan ayrupkta* uka uvas achunaka, olivo achunakwa manqʼasipkaraktajja’.+

14 ”Ukhamasti Jehová Diosar ajjsarapjjam, juparojj taqpach chuymampi,* jan saraqas* servipjjam,+ jumanakan nayra awkinakamajj Éufrates jawir khurkatana, Egipto markana yaqha diosanakar servipkäna ukanakjja apanukupjjam,+ Jehová Diosar servipjjam. 15 Jichhasti Jehová Diosar serviñatejj jumanakatak jan walïkchejja, khitirus jumanakajj serviñ munapjjta uk jichhürpach ajllisipjjam:+ nayra awkinakamajj Éufrates jawir khurkatan servipkäna uka diosanakaruti+ jan ukajj jumanakajj jakapkta uka oraqenkir amorreonakan diosanakaparuch servipjjäta.+ Ukampis nayasa familiajasa Jehová Diosaruw servipjjäjja”.

16 Uk satasti markankirinakajj akham sapjjänwa: “Nanakajj janipuniw Jehová Diosar apanukusajj yaqha diosanakar servipkiristti. 17 Jehová Diosasaw nanakarusa nayra awkinakajarus Egipto markan esclavösipkayäta+ ukhajj irpsunipjjetäna,+ juparakiw nanakan uñjkata walja milagronak* luräna,+ kawkïr thaktï jutapkayäta kawkïr markanaktï pasanipkayäta ukhasa, jupaw nanakarojj jarkʼaqapjjetäna.+ 18 Jehová Diosaw taqe markanakar alisnuküna, uka oraqenakan nanak nayra jakir amorreonakarus ukhamaraki. Ukhamasti nanakajj Jehová Diosaruw servipjjarakëjja, jupaw nanakan Diosajajja” sasa.

19 Josué chachajj markankirinakar akham sarakïnwa: “¿Jumanakajj Jehová Diosar servisipkakïtati? Jupajj santo Diosawa,+ jupa saparuk servipjjañamwa muni.+ Janiw saytʼasipjjatamsa ni juchanakamsa perdonkaniti.+ 20 Jumanakatï Jehová Diosar apanukus yaqha markanakan diosanakapar servipjjätajja, jupajj jumanak contraw saytʼani, nayrajj sumanaksa jumanakatak lurkchïnjja tukjapjjätamwa”+ sasa.

21 Ukampis markankirinakajj akham sasaw Josué chachar sapjjäna: “¡Nanakajj Jehová Diosaruw servipjjäjja!”+ sasa. 22 Ukatwa Josué chachajj markankirinakar akham säna: “Jumanak pachpaw testigöpjjtajja, jumanakaw Jehová Diosar serviñ ajllipjjtajja”+ sasa. Jupanakajj sapjjarakïnwa: “Nanakaw testigöpjjta” sasa.

23 Josué chachajj sarakïnwa: “Ukhamajj jumanak taypin utjki uka yaqha markanakan diosanakap apanukupjjam, Israel markan Jehová Diosapar taqe chuymampi servipjjam” sasa. 24 Markankirinakajj akham sasaw Josué chachar sapjjäna: “¡Nanakajj Jehová Diosajaruw servipjjäjja, juparuw istʼapjjarakëjja!” sasa.

25 Ukatsti Josué chachajj uküruw Israel markampi mä pacto luräna, jupanakatakejj Siquem cheqanwa mä ley apsüna. 26 Ukatsti Josué chachajj Diosan Leyinakan libroparuw+ uka arunak qellqäna, ukatjja Jehová Diosan sagrado lugarap* jakʼankki uka jachʼa qoqa* jakʼaruw mä jachʼa qala+ aptasajj saytʼayäna.

27 Josué chachajj markpacharuw akham säna: “Aka qalaw jiwasatakejj mä testigöni,+ aka qalaw kunanaktï Jehová Diosajj siskistu ukanak taqpach istʼi, ukaw jumanakatakejj testigot saytʼani, ukhamat Diosamar jan apanukupjjañamataki” sasa. 28 Ukatjja Josué chachajj sapa mayniruw markankirinakarojj herenciat churat oraqenakapar khitjjäna.+

29 Taqe ukanak pasatatsti, Nun chachan yoqapäki Jehová Diosar servirïkaraki uka Josué chachajj 110 maranëjjäna ukhaw jiwjjäna.+ 30 Herenciat churapkäna uka oraqeruw jupar imtʼjjapjjäna, Timnat-Sérah+ oraqena, ukasti Efraín tribun qollu toqenkir oraqepankiwa, Gaas qollut alay toqena.* 31 Josué chachan jakañapkamasa, kawkïr ancianonakatejj Josué chachat sipans jukʼamp jakapkäna ukanakan jakapjjañapkamasa, Israel markajj Jehová Diosar serviskakïnwa. Uka ancianonakajj kunanaktï Jehová Diosajj Israel markatak lurkäna taqe ukanaks uñjapjjarakïnwa.+

32 José chachan chʼakhanakapjja,+ Egipto markat apanisajj Siquem markaruw israelitanakajj imtʼjjapjjäna, Jacob chachajj Hamor+ chachan yoqanakapat 100 qollqe metalamp+ alkäna uka oraqena. Hamor chachajj Siquem chachan awkipänwa. José chachat jutirinakarojj uka oraqe herenciat churapjjäna.+

33 Aarón chachan Eleazar yoqapas jiwjjarakïnwa.+ Juparusti Finehás+ yoqapan jiskʼa qolluparuw imtʼjjapjjäna, ukjja Efraín tribun qollunakapanwa jupar churapjjäna.