OSEAS
1 Jehová Diosajj aka arunakampiw Beerí chachan Oseas* yoqapar parläna, kunapachatï Judá markan Uzías,+ Jotán,+ Acaz,+ Ezequías+ sat reyinakapajj apnaqapkäna+ ukapachana, ukhamarak Joás+ chachan Jeroboán+ yoqapajj Israel marka apnaqaskäna ukapachana. 2 Kunapachatï Oseasajj Jehová Diosan arunakap markar yatiykäna ukhajja, Jehová Diosajj akham sasaw Oseasar säna: “Jumajj mä prostitutjam sarnaqkani* uka warmimp casarasim, jupajj yaqha chachanakamp ikintasisaw wawanak ususini, uka wawanakajj jumatakirakïniwa, kuna laykutejj markajj prostitutjam sarnaqasaw* naya Jehová Diosat jitheqtapjje”+ sasa.
3 Ukatwa jupajj Diblaim chachan Gómer sat phuchapamp casarasïna, jupasti usuriptasaw jupatak mä yoqall wawa ususïna.
4 Ukatjja Jehová Diosajj akham sasaw Oseas chachar säna: “Juparojj Jezreel* sutimp ucham. Akat mä jukʼa tiemporojja, Jezreel markan jaqenak jiwarayapjjatap laykojj Jehú chachat jutirinakaruw castigäjja.+ Ukatsti Israel markan reinop* tukjarakëjja.+ 5 Uka urunwa Israelan flechtʼañatak arcop Jezreel vallen pʼakjäjja” sasa.
6 Warmejj wasitat usuriptäna, mä imill wawa ususirakïna. Diosasti Oseasarojj akham sänwa: “Juparojj Lo-Ruhamá* sutimp ucham. Israel markarojj janiw mayampis khuyapayasiñamp uñj-jjäti,+ cheqas jupanakarojj alisnuküwa.+ 7 Ukampis Judá markarojj khuyaptʼayasiñampiw uñjäjja.+ Naya Jehová Diosapaw jupanakar salväjja.+ Jupanakarojj janiw flechtʼañ arcompisa, espadampisa, guerrampisa, caballonakampisa, caballot saririnakampis salvkäti”+ sasa.
8 Lo-Ruhamá sat wawapar ñuñu tʼaqasasti, Gómer warmejj usuriptjjänwa, mä yoqall wawa ususirakïna. 9 Ukatsti Diosajj Oseasarojj akham sänwa: “Juparojj Lo-Ammí* sutimp ucham. Kuna laykutejj janiw jumanakajj markajäpktati, ni nayas jumanakan Diosamäkti.
10 ”Israelan wawanakapajj lamar qotankir chʼallar uñtat waljäniwa, janiw khitis uk jaktʼkaspati ni qhawqhas uks midtʼkaspati.+ Kawkjantï jupanakarojj ‘janiw jumanakajj markajäpktati’+ satäkäna uka lugaranjja, ‘jakkir Diosan wawanakapa’+ sasaw nayajj jupanakar säjja. 11 Judá markankir jaqenakasa Israel markankir jaqenakasa mayachtʼataw tantachthapitäni,+ jupanakatakejj mä pʼeqtʼiri ajllisipjjani, markatsa mistupjjarakiniwa, Jezreelan+ urupajj wali importantëtap layku.
2 ”Jilanakamarojj ‘¡markaja!’*+ sapjjam,
kullakanakamarojj ‘¡Diosajj khuyapayasiñamp uñjkän uka warmïtawa!’*+ sapjjarakim.
2 Mamamarojj juchañchapjjam, juparojj juchañchapjjam,
janiw jupajj esposajäkiti,+ ni nayas jupan esposopäkti.
Jupajj jan jukʼampis mä prostitutjam sarnaqjjpanti,*
janirak adulterio juchsa lurjjpanti.
3 Nayarak jupar isip aparaskirista, kunürutï naskäna ukham jupar jaytasa,
mä wasara oraqer uñtat jaytasa,
mä waña oraqer tukuyas jaytasa,
umat pharjat* jiwayasa.
4 Wawanakaparojj janiw khuyapayasiñamp uñjkäti,
prostitutat sarnaqas* jikjjatat wawanakäpjjatap layku.
5 Mamapajj prostitutat sarnaqatap* layku.+
Warmejj jupanakatak usuriptasaw mä phenqʼa sarnaqäna,+ jupajj akham sänwa:
‘Nayasti nayar wal munirinakajan qhepap saräjja,+
jupanakaw nayarojj tʼantʼajsa, umajsa,
tʼarwajsa, linojsa, aceitejsa, umañajsa churapjjetu’ sasa.
6 Ukhamasti nayajj chʼapinakampiw thakip jarkʼantäjja,
jupan jan pasañapatakejj qalanakampiw mä perqa perqtʼäjja,
ukhamat thakip jan katuñapataki.
7 Jupasti jupar wal munirinakapan qhepap tʼijuni, ukampis janiw jupanakar jikjjatkaniti,+
jupanakarojj thaqaniwa, ukampis janiw katjkaniti.
Ukatsti jupajj akham saniwa: ‘Nayrïr esposojamp kuttʼjjä,+
jichhat sipans nayraw nayatak jukʼamp sumänjja’+ sasa.
8 Jupajj janiw grano jupar churatajsa,+ machaq vino churatajsa, ni aceite churatajsa amuyaskänti,
ni jupar walja qollqe metal churatajsa,
9 ‘Ukatwa nayajj kuttʼasin cosecha tiempon granoj apasjjäjja,
uvasanak apthapipki uka tiempon machaq vinoj apasjjäjja,+
nayasti tʼarwajsa linojsa jupat apaqjjäwa, ukampiw jupajj qʼalal jañchip imtʼasïna.
10 Jichhasti wal munirinakap nayraqatan qʼalalak jupar jaytäjja,
janiw khiti jaqes amparajat jupar salvkaniti.+
11 Juparojj kusisiñap apaqäwa,
fiestanakapsa,+ machaq phajjsinakapsa,* sabadonakapsa, uttʼayat fiestanakapsa apaqarakïwa.
12 Jupan uvas alinakapsa higo qoqanakapsa* tukjaraqäwa, jupajj ukanakat akham sänwa:
“Ukanakajj nayan pagojawa, nayar wal munirinakajaw ukanak churapjjetu” sasa.
Nayasti aleq alinakarukiw ukanak tukuyäjja,
salvaje animalanakaw manqʼantjjarakini.
13 Nayasti Baal idolonakar sacrificionak loqtkäna uka urunakapat juparojj cuenta mayëjja,+
jupajj aretenakapampi adornonakapampi kʼachachtʼasisaw jupar wal munirinakapan qhepap saräna.
Nayat armasjjarakitänwa’,+ siw Jehová Diosajja.
14 ‘Ukhamasti juparojj iyaw sayäwa,
juparojj wasara oraqeruw apäjja,
chuymar purtʼkir parläjja.
15 Ukat uksarusti uvas yapunakap kuttʼayjjäwa,+
jupatakejj Acor+ vallerojj suytʼäwini punkuruw tukuyäjja.
Ukanwa jupajj tawaqökäna uka tiemponjam jaysani,
Egipto oraqet mistunkäna uka urunjama.+
18 Uka urunsti markajatakejj mä pacto luräjja, salvaje animalanakampi,+
alajjpachankir jamachʼinakampi, qatatnaqtir animalanakampi.+
19 Nayajj wiñayatak juman esposomäñatakiw mä compromiso luräjja,
cheqaparjamaw nayajj mä compromiso luräjja,
munasiñat jan jaytjasiñampi ukhamarak khuyaptʼayasiñampi.+
20 Jumampejj jan apanukusiñatakiw mä compromiso luräjja,
jumajj cheqpachapuniw naya Jehová Diosar uñtʼitäta’.+
21 ‘Uka urunwa nayajj jaysäjja’, siw Jehová Diosajja,
‘alajjpachanakaruw jaysäjja,
jupanakasti oraqeruw jaysapjjarakini.+
22 Oraqesti granompiru, machaq vinompiru ukhamarak aceitempiruw jaysani.
Jupanakasti Jezreelaruw*+ jaysapjjarakini.
23 Nayasti markajarojj jathar uñtat oraqer phawantäjja,+
khititï jan khuyaptʼayasiñamp uñjatäkäna* ukarojj khuyaptʼayasiñampiw uñjäjja,
jan markajäki* ukarojj “jumanakaw markajäpjjtajja”+ säwa,
jupanakasti “jumaw Diosajätajja”+ sapjjarakiniwa’”.
3 Ukatsti Jehová Diosajj akham sitänwa: “Jumajj mä kutimp saram, adulterio jucha luraski, yaqha chachamp munatäkaraki uka warmir munasim,+ kunjamtï Jehová Diosajj Israel markankirinakar munaski ukhama,+ ukañkamasti jupanakajj yaqha diosanakaruw arkasipki+ uvas pasasanak* munapjjaraki” sasa.
2 Ukatwa juparojj 15 qollqe metalanakampi mä homer* chikatani cebadampi nayatak alasjjayäta. 3 Ukatjja juparojj akham sayätwa: “Jumajj walja urunakaw nayankaskakïta. Jan jumajj prostitutjam sarnaqjjamti,* ni yaqha chachanakampis ikintasjjamti, nayasti janirakiw jumamp ikthapkäti” sasa.
4 Israel markajj walja tiempow* jan reyini jakani,+ jan principeni, jan sacrificionakani, jan sagrado columnanakani, jan efod* isini+ ukhamarak jan terafim idolonakani,*+ ukatwa ukanakajj pasani. 5 Ukatjja Israel markajj kuttʼanisaw Jehová Diosaparu+ David reyiparu+ thaqapjjani, Jehová Diosan ukarojj khatattʼasisaw jutapjjani, ukhamat tukuy urunakan suma chuymamp uñjatäñataki.+
4 Israel marka, Jehová Diosan arunakap istʼam,
Jehová Diosajj markan jakirinakaruw juzgani,+
markanjja janiw kunatï cheqäki ukasa, munasiñat jan jaytjasiñasa, Dios toqet yatiñas utjkiti.+
2 Falso juramentonakampi, kʼarinakampi,+ jaqe jiwayañanakampi,+
lunthatasiñanakampi, adulterio jucha+ lurañanakampiw taqe cheqan utji,
jaqenakajj yaqhanakan wilap wartasipkakiwa.+
3 Ukatwa markajj llakisiñan uñjasini,+
markan jakirinakajj taqeniw tukusipjjani,
salvaje animalanakasa, alajjpachanakankir jamachʼinakasa,
lamar qotankir chawllanakas jiwarapjjaniwa.
4 “Ukampis jan khiti jaqes yaqha jaqemp chʼajjwpanti ni toqenoqpansa,+
markamajj mä sacerdotemp jiskhisir jaqenakar uñtasitawa.+
5 Ukatwa jumajj urpach lanktʼasïta,
profetasti arumäkaspas ukhamaw jumamp chik lanktʼasirakini.
Nayasti taykamarojj amuktʼayäwa.*
6 Nayar jan uñtʼapjjatap laykojj markajajj amuktʼayatäniwa.*
Nayar jan uñtʼañ munapjjatam laykusti,+
nayatak sacerdotëñam janirakiw munjjäti.
7 Sacerdotenakajj jukʼamp waljaptasajja, naya contrajj jukʼamp juchanak lurapjjarakïna.+
Jupanakan jachʼañchasitapjja jiskʼachatäñaruw tukuyäjja.*
8 Markajajj juchachaski ukhajja, jupanakajj aychampiw likʼintapjje,
jupanakajj markajan juchachasiñap wal munapjje.
9 Markarusa sacerdoterusa uka kikparakiw pasani.
Sarnaqäwinakapat jupanakarojj cuenta mayëjja,
luratanakaparjamaw castigäjja.+
10 Jupanakajj manqʼapjjaniwa, ukampis janiw sistʼasipkaniti.+
Qʼañu jucha lurapjjani,* ukampis janiw mirtapkaniti,+
Jehová Diosar jan akchʼas respetapjjatap layku.
12 Markajankirinakajj maderat lurat idolonakaparuw jisktʼasipjje,
kuntï thujrupajj* siski ukarjamaw lurapjje,
prostitutjam sarnaqañ munañaw* jupanakarojj maysar saranukuyi,
prostitutjam sarnaqasajj* janiw Diosapar sujetasiñ munapkiti.
13 Jupanakajj qollu patjjanakan sacrificionak loqtapjje,+
jiskʼa qollunakanwa sacrificionak jewqʼeyapjje,
roble ukhamarak estoraque sat qoqanakan* jakʼapana, ukhamarak taqe jachʼa qoqanakan jakʼapana,+
uka qoqanakajj sum chʼiwjjatatap layku.
Ukatwa phuchanakapajj prostitutanakäpjje,*
yojjchʼanakapas adulterio jucha lurapjje.
14 Phuchanakaparojj janiw prostitutat sarnaqapjjatapat* cuenta maykäti,
janirakiw yojjchʼanakaparojj adulterio jucha lurapjjatapat cuenta maykäti.
Chachanakajj prostitutanakan ukaruw sarapjje,
templonkir prostitutanakampiw sacrificionak loqtapjjaraki.
Ukham jan amuytʼasir+ markajj tukjatäniwa.
Jumanakajj jan Guilgal+ markarusa ni Bet-Aven+ sat markarus jutapjjamti,
janirak jumanakajj ‘¡kunjamtï Jehová Diosajj cheqpachapun jakkir Diosäkejja!’ sasin juramento lurapjjamti.+
16 Israelajj jan kasusir vacar uñtataw jan istʼasir tukjje.+
¿Jichhasti Jehová Diosajj juparojj mä orqo ovejar uñtasitat pasto oraqen* awatini?
17 Efrainajj idolonakaruw adoraski.*+
¡Juparojj jaytapjjam!
Apnaqerinakapajj* phenqʼaskañanak wal lurañ munapjje.+
19 Thayaw juparojj* chheqanakapampi imjjatani,
jupasti sacrificionakapat phenqʼasiniwa”.
5 “Sacerdotenaka,+ ak istʼapjjam,
Israel marka, amuyump istʼam,
reyin utapankirinaka, istʼapjjam,
jumanakajj juzgatäpjjätawa.
2 Nayar kutkatasirinakajj* sintipuniw jiwarayañar uchasjjapjje,
taqe jupanakaruw nayajj ewjjtʼaskta.*
3 Nayajj Efrainar uñtʼtwa,
Israelajj janiw nayat imantaskaspati.
4 Sarnaqatapajj janiw Diosapar kuttʼayirjamäkiti,
jupanak taypin prostitución lurañ munañanak* utjatap layku,+
naya Jehová Diosarojj janirakiw jupanakan Diosaparjam uñjapkituti.
5 Israelan jachʼa jachʼa tukutapajj jupa contraw parli.+
Israelas Efrainas pachpa juchapat tinkupjje,
Judá markajj jupanak chikarakiw tinku.+
6 Jupanakajj ovej tamapampi ukhamarak vacanakapampiw naya Jehová Diosar thaqapjjetäna,
ukampis janiw jikjjatañ puedipkitänti.
Nayasti jupanakat jitheqtjjayätwa.+
7 Jupanakajj naya Jehová Diosaruw traicionapjjetu,+
kuna laykutejj extranjero wawanakan awkipäjjapjjewa.
Jichhasti jupanakasa oraqenakapasa mä phajjsin manqʼantatäpjjaniwa.
8 ¡Guibeá markan putut phustʼapjjam,+ Ramá+ markan trompet tuktʼapjjam!
¡Bet-Aven+ markan guerran nuwasiñatak artʼasipjjam! ¡Benjamín, tropanak apam!
9 Ay Efraín, jumar castigañ urunjja wali ajjsarkañaruw tuküta.+
Nayajj kunatï jumar cheqpachapun paskätam uk Israelan tribunakap taypin yatiyta.
10 Judá markan principenakapajj qorpanak maysar onjjtayiri jaqenakar uñtasitäpjjewa.+
Jupanakjjarojj umäkaspas ukham wal colerasiñaj warjjatanëjja.
11 Efrainajj tʼaqesiyatawa, cheqaparjam takichatarakiwa,
jupajj enemigopar arkañatak amtatätap layku.+
12 Ukatwa nayajj Efrainatak thuthar uñtatäyätjja,
Judá markankirinakatakejj kunatï ñusantayki ukar uñtasitaraki.
13 Kunapachatï Efrainajj usup uñjäna, Judá markajj llagap* uñjarakïna ukhajja,
Efrainajj Asiria markaruw saräna,+ mä jachʼa reyin ukaruw mensajeronak khitarakïna.
Ukampis reyejj janiw jupanakar qollirjamäkänti,
janiw jumanakan llagam qollirjamäkänti.
14 Cheqas Efrainatakejj nayajj mä wayna leonar uñtasitäyäwa,
Judá markatakejj chʼamani leonar uñtasitarakïyäwa.
Naya pachpaw jupanakarojj jiskʼa jiskʼa tukjäjja, ukatsti sarjjarakïwa.+
Jupanakarojj apasjjäwa, janirakiw khitis jupanakar salvkaniti.+
15 Nayajj sarjjäwa, jupanakajj juchanakapat castigatäpkani ukhakamaw lugarajar kuttʼäjja,
jupanakajj thaqapjjetaniwa.+
Wali llakitäpkani ukhaw yanaptʼaj thaqapjjani”.+
6 “Jutapjjam, Jehová Diosar kuttʼjjañäni,
jupajj jiskʼa jiskʼsa tukjchistojja,+ qollistaniwa.
Nuwantkchistusa, heridanakas chʼoqtʼistaniwa.
2 Pä urutjja, jupajj wasitat jaktayistani.
Kimsa urutjja, sartayistaniwa,
jiwasajj jupa nayraqatanwa jakañäni.
3 Jiwasajj Jehová Diosaruw uñtʼañäni, jupar uñtʼañatakejj wal chʼamachasiñäni.
Kunjamtï intejj alwan qhantʼkejja ukhamarakiw jupajj jiwasan ukar jutani,
wal jalluntir jalljamaw jiwasan ukar jutani,
kunjamtï qhepa jallojj oraqer chʼachʼantki ukhama”.
4 “Efraín, ¿kunsa jumamp luräjja?
Judá, ¿kunsa jumamp luräjja?
Juman munasiñat jan jaytjasirïtamajj alwa urpur uñtasitawa,
jankʼak wañsur sullar uñtasitawa.
5 Ukatwa profetanak taypejj jupanakar jiskʼa jiskʼa khuchunoqäjja,+
lakajat mistur arunakampiw jiwarayäjja.+
Juma contra juchañchäwinakajj qhanjamaw qhanani.+
6 Nayarojj munasiñat jan jaytjasirïñaw* kusisiyitu, janiw sacrificionakajja,
Diosar uñtʼañaw kusisiyitu, janiw nakhantayat ofrendanakajja.+
7 Ukampis jupanakajj aleq jaqenakakïsajj lurat pacto pʼakintapjje.+
Oraqepanwa nayarojj apanukupjjetu.
9 Kunjamtï lunthatanakajj maynir lunthatañatak suyjjatapkejja, ukhamäpjjew sacerdotenakajja.
Siquem marka jakʼanwa thakin jiwayapjje,+
jupanakan sarnaqapjjatapajj phenqʼaskañätap layku.
10 Israel markan sinti jan walinakwa uñjta.
11 Judá, jumatakejj mä cosechaw uttʼayasi,
markajat preso katuntat apatanakar tantachthapkä ukapachana”.+
7 “Kunapachatï nayajj Israelar qollañ munkta ukhajja,
Efrainan pantjasitanakapajj jukʼampiw nayatak qhansti,+
Samarian jan wali luratanakapas ukhamaraki.+
Jupanakajj engañjañ yatipjje,+
lunthatanakajj utanakaruw mantapjje, saqueyjirinakajj anqäjjan atacapjjaraki.+
2 Ukampis jupanakajj janiw chuymanakapan taqe jan wali luratanakap amtkä uk amuyapkiti.+
Jichhasti pachpa jan wali luratanakapaw jupanakar katunti.
Janirakiw jupanakan luratanakapajj ni mayas nayat imtʼatäkiti.
3 Jupanakajj jan wali luratanakapampiw reyirojj kusisiyapjje,
principenakarojj engañonakapampiw kusisiyapjjaraki.
4 Taqe jupanakajj adulterio jucha luririnakäpjjewa,
panaderon naktayat hornor uñtasitaw jupanakajj wal nakhapjje,
uka panaderojj masa lurasin uka masan poqtañapkamaw nina jan nakhayjjeti.
5 Reyisan fiesta urupansti, principenakajj usuntapjjewa,
vino kawsaw coleratäpjje.+
Reyejj burlasirinakampiw sum apasi.
6 Jupanakajj nina nakhir hornor uñtasit chuymanakampiw jakʼachasipjje.*
Panaderojj arum paqaraw iki,
alwasti, uka hornon ninaw wal nakharaki.
7 Taqe jupanakajj mä hornor uñtasitaw nakhapjje,
apnaqerinakaparus* jiwayapjjewa.
8 Efrainajj yaqha markankir jaqenakampiw chikachasi.+
Efrainajj jan jaqokipat moroqʼo tʼantʼar uñtasitawa.
9 Extranjeronakaw jupan chʼamap tukuntapjje,+ ukampis jupajj janiw amuyaskiti.
Ñikʼutanakapajj janqʼoruw tukjje, ukampis jupajj janiw amuyaskiti.
10 Israelan jachʼa jachʼa tukutapajj jupa contraw parli,+
ukhampachas janiw jupanakajj Jehová Diosar kuttʼapkiti,+
ni thaqapkarakisa.
11 Efrainajj taqe kun creyir palomar uñtatawa, jan amuytʼasirirakiwa.*+
Jupanakajj Egiptoruw yanaptʼa mayipjje,+ Asirian yanaptʼap thaqapjjaraki.+
12 Jupanakajj kawkirus sarasipkpan, jupanakjjarojj qänaj* janatatakipunïwa.
Jupanakarojj alajjpachanakankir jamachʼinakarjamaw katuräjja.
Jupanakarojj markapar ewjjtʼaski ukarjamaw cheqañchäjja.+
13 ¡Ay jupanakat kunakïkani, nayat escapapjjatap layku!
¡Jupanakajj tukjataw uñjasipjjani, naya contra juchachasipjjatap layku!
Nayajj jupanakar salvañatakejj listokïyätwa, ukampis kʼarinak nayjjat parlapjje.+
14 Jupanakan yanaptʼa mayiñatak nayar artʼasipjjatapajj janiw taqe chuymäkänti,+
jupanakajj ikiñanakapan llakita quedasipkchïna ukasa.
Grano laykusa, machaq vino laykusa, jupanakajj cuerponakap kharjasipjjäna.
Jupanakajj naya contraw saytʼapjjaraki.
15 Nayajj jupanakar yatichayätwa, amparanakaps chʼamañcharakiyätwa,
ukampis naya conträpjjewa, jan walinak amtapjjaraki.
16 Jupanakajj cambiapjjänwa, ukampis janiw sumpachapunejja.*
Jupanakajj janiw confiykañäpkiti, lluchhu arcor uñtasitäpjjewa.+
Principenakapajj kutkatasis parlapjjatap laykuw espadamp jiwayat uñjasipjjani.
Ukatwa jupanakajj Egipto oraqen jiskʼachatäpjjani”.+
8 “¡Putut phustʼam!+
Enemigow naya Jehová Diosan utaj contrajj mä pakar uñtat juti,+
nayan pactoja+ ukhamarak nayan leyij pʼakintapjjatap layku.+
2 Arnaqasisaw akham sapjjetu: ‘¡Jumajj nanakan Diosajätawa, nanak Israelajj jumaruw uñtʼapjjsma!’+ sasa.
3 Israelitanakajj kunatï sumäki uk apanukupjje.+
Jupanakarojj mä enemigoy arktpan.
4 Jupanakajj reyinak uttʼayapjje, ukampis janiw nayan amtajarjam uk lurapkiti.
Principenak uttʼayapjje, ukampis nayajj janiw jupanakar uñtʼkti.
5 Ay Samaria, vaca qallu idolomajj rechazatawa.+
Jumanak contraw wal colerasta.+
¿Kunapachkamas jumanakajj jan qʼomachasipkäta?
6 Ukajj Israelatwa juti.
Ukajj mä artesanon luratawa, janiw cheqpach Diosäkiti.
Samarian vaca qallu idolopajj tʼunjatäniwa.
7 Jupanakajj thayanak phawasipki,
jachʼa thayanak apthapipjjarakini.+
Kunas achoqaspa ukhajj extranjeronakaw* manqʼantapjjaspa.+
8 Israelarojj enemigow manqʼantani.+
Jichhajj yaqha markanak taypinkarakiniwa,+
jan munat vasor uñtata.
9 Sapaki sarnaqer salvaje asnor uñtataw jupanakajj Asiriar makatapjje.+
Efrainajj prostitutanakwa jupan muniripäñatak contratasi.+
10 Jupanakajj yaqha markanak taypitsa contratapkchejja,
jichhajj jupanakar tantachtʼäwa.
Jupanakarojj reyimpi principenakampiw impuesto mayisajj tʼaqesiyapjjani.+
11 Efrainajj jukʼamp walja altaranakwa jucha lurañatak lurasi.+
Ukanakajj jucha lurañatak altaranakäjjarakiwa.+
13 Jupanakajj sacrificionak regalot churapjjetu, aychsti manqʼantapjjarakiwa,
ukampis naya Jehová Diosajj janiw ukanakamp kusiskti.+
Jichhajj jucha lurapjjatapatwa nayajj amtasëjja, juchanakapatwa castigarakëjja.+
Jupanakajj Egiptoruw kuttʼapjje.*+
14 Israelajj Luriripatwa armtʼasjje,+ templonak lurasiraki,+
Judá markajj jukʼampiw jachʼa perqanakamp muyuntat markanak lurasi.+
Ukampis nayajj markanakapjjarojj nina apayäjja,
uka ninaw sapa maya torrenakap phichantani”.+
9 “Israel marka, jan kusisimti,+
jan markanakjamajj kusisimti.
Prostitutat sarnaqasaw* Diosamat jitheqttajja.+
Taqe grano takiyañ cheqanakan prostitutat sarnaqasin katoqkta uka pagonakamajj juman wali munatänwa.+
2 Ukampis janiw grano takiyañ cheqasa, uvas chʼirwañ lugaras jupanakar manqʼaykaniti,
machaq vinos jupanakan pistʼaniwa.+
3 Efrainajj janiw Jehová Diosan oraqepan jukʼamp jakjjaniti,+
antisas Egiptoruw kuttʼani,
Asiria markanwa kunatï qʼañüki uk manqʼarakini.+
4 Jehová Diosatakejj janiw vino ofrendanak wartjjapjjaniti,+
sacrificionakapajj janiw jupar kusisiykaniti.+
Maynin jiwatapat jaqenakajj manqʼapki uka tʼantʼar uñtasitäpjjaniwa.
Taqe khitinakatï uk manqʼapkani ukanakajj qʼañuchasipjjaniwa.
Tʼantʼapajj jupanakatakikiwa,
janiw Jehová Diosan utapan loqtatäkaniti.
5 ¿Kunsa tantachtʼasiñäki uka urun lurapjjäta,
Jehová Diosan sagrado fiesta urupana?
6 Jupanakajj enemigon jutatapata, jupanakar tukjatäñatwa escapapjjani.+
Egipto markaw jupanakar tantachtʼani,+ Menfis markaw imtʼjjarakini.+
Itapallunakaw qollqe metalat lurat wali valoraninakap katuntasipjjani,
chʼapinakaw carpanakapan utjani.
Jupanakan profetapajj jan amuytʼasirëjjaniwa, nayajj Diosat parlirïtwa siski uka jaqejj loqherjjaniwa.
Niyakejjay jan wal luratamajj waljächejja, jumar uñisiñajj waljarakiwa”.
8 Efrainan marka uñjir guardiapajj*+ Diosampïnwa,+
ukampis jichhajj profetanakapan thakinakapajj+ jamachʼi katurin sipitanakapar uñtasitawa.
Diosan utapan uñisisiñaw utji.
9 Israelitanakajj Guibeá markan urunakapanjamaw sintipun aynachtʼapjje.+
Diosasti jupanakan pantjasitanakap amtani, juchanakapatwa castigani.+
10 Diosajj akham sänwa: “Israelar jikjjatkayäta ukhajja, wasarankir uvasanakar uñtasitänwa.+
Nayra awkinakaparojj higo qoqan* nayrïr achunakaparjamaw uñjayäta.
Ukampis jupanakajj Peor sat lugarankir Baal diosaruw jakʼachasipjjäna,+
uka phenqʼaskañ diosaruw katuyasipjjäna,+
munasipkäna uka diosar uñtasitaw jupanakajj Diosatak ajjtaskañar tukupjjäna.
11 Efrainan jachʼañchäwipajj mä jamachʼir uñtataw sarjje.
Janiw usuriptañasa, ni ususiñas utjkiti.+
12 Wawanakaparojj uywapkchinisa,
jan maynis utj-jjani ukhakamaw nayajj jupanakat wawanakap aparäjja,+
¡jupanakat jitheqtjjä ukhajj jupanakat ay kunakïkani!+
13 Efrainajja pastoni oraqer ayruntatajj* Tiro markaruw amtayitäna,+
jichhasti Efrainajj yoqanakaparuw jiwarayatäpjjañapatak apsuñapa”.
14 Jehová Dios Tata, kuntï churañamäki uk jupanakar churam:
abortir matrizampi jan lecheni waña ñuñumpi.
15 Diosajj akham sarakïnwa: “Taqe jan wali luratanakapajj Guilgal markankänwa,+ ukanwa jupanakar uñisiñ qalltta.
Jan walinak lurapjjatapatwa oraqejat alisnuköjja.+
Janiw mayampis jupanakar munasjjäti,+
taqe principenakapaw jan istʼasirinakäpjje.
16 Efrainajj mä qoqar* uñtasitaw tinkuni.+
Jupanakan saphipajj wañsjjaniwa, jan achoqeri qoqar uñtasitäniwa.
Jupanakatï ususipjjani ukhajja, munat wawanakaparojj jiwayäwa” sasa.
17 Diosajj jupanakar apanukuniwa,
jupar jan istʼapjjatap layku,+
jupanakajj markanak taypin escapnaqerinakäpjjaniwa.+
10 “Israelajj jan wali uvas alir uñtasitawa, achoqaskarakiwa.+
Jukʼamp achoqasajja, altaranakapajj jukʼampiw jiljjatti,+
oraqepan achunakapajj jukʼamp sumäki ukhajja, sagrado columnanakapajj* jukʼamp sumarakiwa.+
2 Jupanakan chuymapajj kʼariwa.*
Jichhasti jupanakajj juchañchatäpjjaniwa.
Mayniw altaranakap tʼunjani, sagrado columnanakapsa tukjarakini.
3 Jichhasti jupanakajj akham sapjjaniwa: ‘Jiwasajj janiw Jehová Diosar ajjsarapkayätanti, ukatwa jan reyinïpktanti.+
¿Kunarak mä reyejj jiwasatak luraspasti?’ sasa.
4 Jupanakajj inamay arunakak parlapjje, falso juramentonak lurapjje,+ pactonak lurapjje.
Jilsunki uka justiciajj camponkir sukanakan jiliri venenoni qorar uñtasitawa.+
5 Samaria markan jakirinakajj Bet-Aven sat markankki uka vaca qallur uñtasit idoloruw ajjsarapjjani.+
Markapajj jupatjamaw llakisini,
yaqha markankir diosanakan sacerdotenakapajj llakisipjjarakiniwa, vaca qallu idolos jachʼañchäwipas jupanakarojj kusisiyänwa.
Vaca qallu idolopajj yaqha markar apatäniwa, jupanakat jayaru.
6 Ukajj mä jachʼa reyitakiw Asiria markar mä regaljam apatäni.+
Efrainajj phenqʼachatäniwa,
Israelajj kawkïr ewjjtʼarutï istʼkäna uka kawsaw phenqʼachat uñjasini.+
8 Israelar juchar+ purtʼasiykäna uka Bet-Aven+ markan alto cheqankir sagrado lugaranakapajj tukjatäniwa.+
Chʼapinakampi qoranakampiw altaranakapan jilantjjani.+
Jaqenakajj akham sasaw qollunakarojj sapjjani: ‘Imjjatapjjeta’ sasa.
Jiskʼa qollunakarojj ‘imantapjjeta’ sapjjarakiniwa.+
9 Ay Israel marka, Guibeá markan urunakapatpachaw jumajj juchachastajja.+
Ukanjja jupanakajj kikpak lurasipki.
Guibeá markan jan cheqaparjam lurir jaqenak contra utjkäna uka guerrajj janiw jupanakarojj qʼal tukjkänti.
10 Nayatï jupanakar cheqañchañ munäjja, cheqañchäwa.
Markanakaw jupanak contrajj tantachtʼasipjjani,
jupanakajj uka pä pantjasitanakapar mayachthapitäkani* ukapachana.
11 Efrainajj grano takiñatak yatichsut terneränwa, uk lurañajj wal gustarakïna,
ukatwa nayajj suma kunkaparojj mä yuku jan uchkti.
Jichhasti mayniruw Efraín patjjar latʼjjatat sarañapatak uchäjja.+
Judajj qholliniwa, Jacobusti jupatakiw rastrillani.
12 Jumanakajj cheqaparjam phawapjjam, munasiñat jan jaytjasirïñ apthapipjjam.
Yapuchañ oraqenak jumanakatak qhollipjjam,+
Jehová Diosar thaqañatak tiempo utjkipana,+
jupajj jutkani kunatï cheqapäki uk yatichapkarakïtam ukhakama.+
13 Ukampis jumanakajj kunatï jan walïki uk phawapjjtajja,
kunatï jan cheqapäki uk apthapipjjaraktajja,+
kunatï engañot achoqki uk manqʼapjjtajja.
Jumanakajj jumanak pachparuw confiyasipjjtajja,
guerran nuwasiri walja jaqenakamaru.
14 Markam contra guerran nuwasir suynatapaw istʼasini,
jachʼa perqanakamp muyuntat taqe markanakamajj tukjatäniwa,+
kunjamtï Salmán chachajj Arbel sat lugarar
guerran nuwasiñ urun tukjkäna ukhama, taykanakajj wawanakapamp chika jiskʼa jiskʼa tukjatäpkäna ukapachana.
15 Betel marka, sinti jan walinak luratam laykojj jumarojj ukhamarak lurapjjätam.+
Willjtarojj Israelan reyipajj cheqpachapuniw tukjatäni”.*+
11 “Kunapachatï Israelajj waynitüskäna ukhajj juparojj munasiyätwa,+
nayasti yoqajarojj Egiptot mistuñapatakiw jawsayäta.+
2 Jupanakajj* israelitanakar jukʼamp jawsapjjäna ukhajja,
israelitanakajj jukʼampiw jupanakat jitheqtapjjäna.+
Kutin kutiniw jupanakajj Baal idolonakar sacrificionak loqtapjjäna,+
idolonakaruw nakhantayat ofrendanak loqtapjjarakïna.+
3 Ukampis nayaw Efrainarojj sarnaqañapatak yatichayäta,+ nayarakiw jupanakarojj ichjjaruyäta,+
ukampis jupanakajj janiw nayan jupanakar qollataj amuyañ munapkänti.
4 Jupanakarojj munasiñampi khuyaptʼayasiñampiw* nayan ukar apaniyäta.+
Jupanakatakejj khititï maynin kunkapat mä yuku apaqki ukar uñtasitäyätwa,
munasiñampiw sapa mayni jupanakatak manqʼa aparapiyäta.
5 Jupanakajj janiw Egipto oraqer kuttʼapkaniti, ukampis Asiriaw jupanakan reyipäni,+
nayan ukar jan kuttʼaniñ munapjjatap layku.+
6 Mä espadaw thaya tutukar uñtatajj markanakap contra jutani,+
punkun trancanakap tukjani, jan wali amtanakap laykuw markanakap manqʼantani.+
7 Markajajj nayar apanukuñak munaski.+
Jupanakajj wali altor kuttʼanipjjañapatak jawsatäpkchisa,* janiw ni maynis sartkiti.
8 Efraín, ¿kunjamarak jumar apanukurismasti?+
Israel, ¿kunjamarak enemigonakamar katuyirismasti?
¿Kunjamarak Admá markarjam lurirismasti?
¿Kunjamarak Zeboyim markar lurkta uka kikpa lurirismasti?+
Nayajj janiw pachpa amuyjjti,
khuyaptʼayasiñaw nayan utjaraki.+
9 Nayajj janiw wal colerasiñaj antutkäti.
Janiw Efrainarojj wasitat tukjkäti,+
nayajj Diosätwa, janiw jaqëkti,
nayajj jumampïki uka Santo Diosätwa.
Janiw juma contrajj wali colerat jutkäti.
10 Jupanakajj wasitat naya Jehová Diosar adorapjjetani,* nayasti mä leonar uñtasitaw wararëjja.+
Wararkä ukapachasti, wawanakapajj inti jalanta toqetwa khatattʼasis jutapjjani.+
11 Egiptot mistunipkani ukhajj mä jamachʼir uñtataw khatatipjjani,
Asiria markat mistunipkani ukhasti, mä palomar uñtataraki,+
nayajj utanakaparuw utjnoqayäjja”, siw Jehová Diosajja.+
12 “Efrainajj kʼarinakak nayar parlitu.
Kawkjansa engañokiw Israelan utjaski.+
Ukampis Judá markajj Diosampiw sarnaqkaraki,
janiw Wali Santo Diosar apanukkiti”+ sasa.
12 “Efrainajj kunatï jan servirïki ukaruw confiyi.*
Uru jurnälaw inti jalsu toqenkir thayar arknaqe.
Kʼarisiñanaksa, tukjañanaksa jiljjattayiwa.
Jupanakajj Asiria markampiw mä pacto lurapjje,+ Egiptoruw aceite apapjjaraki.+
2 Jehová Diosajj Judá markaruw juzgani,+
Jacoburojj sarnaqataparjamaw cuenta mayini,
luratanakaparjamaw kuttʼayarakini.+
3 Taykapan purakapanjja jupajj jilapan kayu talonapat katthapïna,+
taqe chʼamapampiw Diosampejj nuwasirakïna.+
4 Jupajj walpun mä angelampejj nuwasïna, atipjarakïnwa.
Jupajj bendición katoqañatakejj jachänwa, wal ruwtʼasirakïna”.+
Diosajj Betel markanwa jupar jikjjatäna, ukanwa nanakamp* parläna.+
6 “Ukhamajj Diosamar kuttʼam,+
munasiñat jan jaytjasirïñ jan chhaqayamti, kunatï cheqapäki uks janirak chhaqayamti,+
Diosamarojj suytʼapunim.
Taqe ukanaksti wal trabajisaw nayajj jikjjatta, janiw kuna jan walisa ni kuna juchasa nayan utjkiti’ sasa.
9 Ukampis nayajj Egipto oraqetpachwa Jehová Diosamätjja.+
Wasitat jumarojj carpanakan jakayäma,
fiesta urunakanjama.
10 Nayajj profetanakaruw parlayäta,+
jukʼamp walja visionanak jupanakar uñjayayäta,
profetanak taypiw uñachtʼäwinak parlayäta.
11 Engañompi* kʼarisiñampiw Galaad markan utjäna.+
Guilgal markanwa jaqenakajj toronak sacrificiot loqtapjjäna,+
camponkir sukanakan utjki uka qala montonanakar uñtasitaw altaranakapajja.+
12 Jacob chachajj Aram* oraqeruw escapäna,+
Israelajj+ ukanwa mä warmi layku trabajïna,+
mä warmi laykuw ovejanak uñjäna.+
13 Jehová Diosajj mä profeta taypiw Israelar Egiptot apsüna,+
mä profeta taypiw juparojj jarkʼaqarakïna.+
14 Efrainajj Diosan chuymap wal ustʼayäna,+
wila wartatapat juchapajj jupjjankaskakiwa,
Uywiripajj jupar jiskʼachatapatwa kunatï waktʼki uk churani”.+
13 “Kunapachatï Efrainajj parläna ukhajja, jaqenakajj khatatipjjänwa,
Israel markan wali importantënwa.+
Ukampis Baal+ dios kawsaw juchan uñjasïna, jiwjjarakïnwa.
2 Jichhasti jupanakajj jukʼampiw juch lurapjje,
qollqe metalanakapampejj metalat lurat idolonak lurapjjaraki.+
Wali sum idolonak lurapjje, taqe ukanakajj artesanonakan luratkamakiwa.
Jupanakajj idolonakar akham sapjjarakiwa: ‘Sacrificionak loqtir chachanakajj vaca qallu idolonakar jampʼatipjjpan’+ sasa.
3 Ukhamasti jupanakajj alwa urpur uñtasitäpjjaniwa,
kunjamtï sullajj alwpach wañtʼki ukhamäpjjaniwa,
kunjamtï grano takiyañ cheqankir jipejj thayan apatäki ukhamäpjjaniwa,
kunjamtï jewqʼejj techo pʼiyat mistki ukhamäpjjaniwa.
4 Ukampis nayajj Egipto oraqetpachwa juman Jehová Diosamätjja.+
Jumajj janiw nayat sipans yaqha Diosar uñtʼkayätati,
nayat sipans janirakiw yaqha salvirejj utjkiti.+
5 Jumarojj wasara oraqenwa uñtʼayäsmajja,+ waña oraqena.
6 Jupanakajj pastonakapampejj sistʼatäpjjänwa,+
sistʼatäpjjänwa, chuymanakapas jachʼa jachʼaw tuküna.
Ukatwa nayat armtʼasipjjäna.+
7 Nayajj jupanakatakejj mä wayna leonar uñtasitäyäwa,+
thakin muyupayir leopardo animalar uñtata.
8 Wawanakap chhaqayasir tayka osar uñtataw jupanakar jaljjatäjja,
jupanakan pechop chʼiyanoqäjja.
Mä leonar uñtataw jupanakarojj ukan manqʼantäjja.
Mä salvaje animalaw jupanakarojj jiskʼa jiskʼa tukjani.
9 Israel marka, jumarojj tukjätamwa.
Jumajj naya conträtawa, khititï yanapktam uka conträtawa.
10 Taqe markanakaman jumar salvañatakejj ¿kawkinkarak jichhajj reyimasti?+
¿Kawkinkapjjarak apnaqerinakamasti?* Jumajj akham sasaw nayar mayiyätajja:
‘Mä rey churita, principenak churita’+ sasa.
12 Efrainan pantjasitapajj imatäskiwa,
juchapajj imatäskiwa.
13 Parton tʼaqesiñ horasapajj purinjjaniwa.
Ukampis jan amuytʼasir wawawa:
ususiñ horasajj purinjje ukhajj janiw nasiñ munkiti.
Jiwaña, ¿kawkinkaraki venenomasti?*+
Sepultura, ¿kawkinkaraki atipjañamasti?+
Khuyaptʼayasiñajj janiw nä nayraqatan utj-jjaniti.
15 Jupajj cañanak taypinsa panqaraskpan,
inti jalsu toqet mä thayaw jutani, Jehová Diosan thayapa.
Uka thayajj wasarat juti, ukhamat uma phujunak wañtʼayañataki, uma jalsunak pistʼayañataki,
mayniw taqpach wali valoraninakap saqueyjani.+
16 Samariaw juchañchatäni,+ jupajj Dios contraw saytʼasi,+
jupanakajj espadampi jiwayatäpjjaniwa,+
wawanakapajj jiskʼa jiskʼa tukjatäpjjaniwa,
usuriptat warminakapan purakanakapajj chʼiyjatäniwa”.
14 “Israel, Jehová Diosaman ukar kuttʼanjjam,+
pantjasitanakam kawsaw tinktajja.
2 Jehová Diosan ukar kuttʼanjjapjjam, juparojj akham sapjjarakim:
‘Juchanakaj perdonapjjeta,+ kunatï sumäki ukay nanakat katoqtʼasipjjeta,
nanakajj wayna toronaksa sacrificiot loqtapkirisma ukhamwa lakanakajamp jachʼañchapjjäma.+
3 Janiw Asiriajj salvapkitaniti.+
Nanakajj janiw guerran nuwasiñatak caballonakar confiyasipkti,+
ni amparanakajamp luratanakarus “¡Nanakan Diosaja!” sisjjapjjäti,
kuna laykutejj jumaw jan awkini wajcha wawat* khuyaptʼayasiñ yattajja’.+
4 Nayasti jupanakar qolläwa, jupanakajj janiw jaytjasirëjjapjjaniti.+
5 Israelatakejj sullar uñtasitäyäwa.
Jupajj lirio panqarjamaw panqarani,
Líbano toqenkir qoqanakjamaw* saphinakapajj manqhakam saphintani.
6 Jiskʼa ramanakapajj saratataniwa,
olivo qoqar* uñtasit wali sumäniwa,
Líbano toqenkir qoqar uñtasitaw suma oloranïni.
7 Markajajj wasitat chʼiwijan jakani.
Jupanakajj granonak phawapjjani, uvasar uñtasitaw jilsunirakini.+
Kunjamtï Líbano toqenkir vinot parlapki ukhamarakiw jaqenakajj nayat parlapjjani.
8 Efrainajj akham saniwa: ‘¿Nayan kuna yatiñajas idolonakamp utj-jje?’+ sasa.
Nayasti jaysanisaw jupar cuidäjja.+
Enebro sat jachʼa qoqar* uñtasitäyäwa.
Nayaw juparojj achunak churäjja”.
9 ¿Khitis yatiñani jaqejja? Ukanak amuytʼpan.
¿Khitis amuytʼasirejja? Ukanak uñtʼarakpan.
Kuna laykutejj Jehová Diosan thakinakapajj cheqapawa,+
cheqap jaqenakajj uka thakinakan sarnaqapjjani,
ukampis jucharar jaqenakajj uka thakinakan lanktʼasipjjaniwa.
Uka sutejja, Hosaya chachan jiskʼaptayat sutipawa. Uka sutejja, “Jah Diosamp Salvata” jan ukajja “Jah Diosaw Salvi” sañ muni.
Jan ukajja, “yaqhanakamp ikintasis qʼañu jucha luras sarnaqkani”.
Jan ukajja, “yaqhanakamp ikintasis qʼañu jucha lurasaw”.
Uka sutejja, “Diosajj jathanak phawani” sañ muni.
Jan ukajja, “gobiernop”.
Uka sutejja, “jupajj janiw khuyaptʼayasiñamp uñjatäkänti” sañ muni.
Uka sutejja, “janiw markajajja” sañ muni.
Oseas 1:9 texton notap liytʼäta.
Oseas 1:6 texton notap liytʼäta.
Jan ukajja, “qʼañu jucha lurjjpanti”.
Variante: “wañjat”.
Jan ukajja, “yaqhanakamp ikintasis qʼañu jucha luras”.
Jan ukajja, “yaqhanakamp ikintasis qʼañu jucha luratap”.
Jan ukajja, “yupaychapjjäna”.
Jan ukajja, “wawa phajjsinakapsa”.
Jan ukajja, “arbolanakapsa”.
Jan ukajja, “Baal diosaja”.
Jan ukajja, “jakayäjja”.
Uka sutejja, “Diosajj jathanak phawani” sañ muni.
Oseas 1:6 texton notap liytʼäta.
Oseas 1:9 texton notap liytʼäta.
Ukham sasinjja, uvas pasasanakampik lurata mä quequetwa parlaski, falso diosanakar adorañatakiw (yupaychañatakiw) apnaqasïna.
Apéndice B14 uñjjattʼäta.
Jan ukajja, “Jan jumajj yaqhanakamp ikintasis qʼañu jucha lurjjamti”.
Hebreo arunjja, “walja urunakaw”.
“Efod” siski uk glosarion liytʼäta. Apéndice B5 uñjjattʼarakïta.
Jan ukajja, “jan familian diosanakapani”.
Jan ukajja, “tukjäwa”.
Jan ukajja, “tukjatäniwa”.
Jan ukajja, “yatichäwipat”.
Ukajja, “Jupanakajj nayar jachʼañchañat sipansa jiskʼachasipkituwa” sasaw jaqokipasirakispa.
Jan ukajja, “Prostitutjamaw sarnaqapjjani”.
Jan ukajja, “Qʼañu jucha lurañasa”.
Hebreo arunjja, “chuym chhaqtayi”.
Jan ukajja, “jutïrit yatiñatak varapajj”.
Jan ukajja, “qʼañu jucha lurañ munañaw”.
Jan ukajja, “qʼañu jucha lurasajj”.
Jan ukajja, “arbolanakan”.
Jan ukajja, “qʼañu jucha lurapjje”.
Jan ukajja, “qʼañu jucha lurapjjatapat”.
Jan ukajja, “yaqhanakamp ikintasis qʼañu juchsa lurkstajja”.
Hebreo arunjja, “jachʼa lugaran”.
Jan ukajja, “yupaychaski”.
Jan ukajja, “Trigot lurat cervezap”.
Jan ukajja, “prostitutat sarnaqañaruw”.
Hebreo arunjja, “Escudonakapajj”.
“Juparojj” sasinjja, Efrainat parlaski.
Jan ukajja, “redëpjjatam”.
Jan ukajja, “Apostatanakajj”.
Jan ukajja, “nayajj cheqañchäjja”.
Jan ukajja, “prostitutat sarnaqañaruw”.
Jan ukajja, “qʼañu jucha lurañ munañanak”.
Jan ukajja, “ulcerap”. Ukajja llejjtir uñtasitawa.
Jan ukajja, “khuyapayasiñaw”.
Ukajja, “Kunapachatï jupanakajj amtanakapampi jakʼachasipjje ukhajja, chuymanakapajj hornor uñtasitäpjjewa” sasaw jaqokipasirakispa.
Hebreo arunjja, “juezanakaparus”.
Hebreo arunjja, “jan chuymanirakiwa”.
Jan ukajja, “redej”.
Ukajja, jan sumpach adorañat (yupaychañat) parlaski.
Jan ukajja, “espigas”.
Jan ukajja, “jan uñtʼatanakaw”.
Jan ukajja, “yatichäwinak”.
Ukajja, “kuttʼapjjani” sasaw jaqokipasirakispa.
Jan ukajja, “Yaqhanakamp ikintasis qʼañu jucha lurasaw”.
Jan ukajja, “centinelapajj”.
Jan ukajja, “arbolan”.
Variante: “mallkintatajj”.
Jan ukajja, “arbolar”.
“Sagrado columna” siski uk glosarion liytʼäta.
Jan ukajja, “hipocritawa”. Ukajja, jan suma jaqëkasina suma jaqer tuktʼañat parlaski.
Hebreo arunjja, “amuktʼayatäpjjapuniniwa”.
Ukajja, kunjamtï mä yukojj apaski ukham castigo apañat parlaski.
Hebreo arunjja, “amuktʼayatäni”.
“Jupanakajj” sasinjja, Israel markar yatichañatak khitatäpkäna uka profetanakampita yaqha jaqenakampit parlaski.
Hebreo arunjja, “jaqenakan pitanakapäki (kawuyanakapäki) uka munasiña pitanakampiw (kawuyanakampiw)”. Inas ukajj kunjamsa mä awkis mä taykas wawapar sarnaqañapatak pitanakamp (kawuyanakamp) yatichi uk amuytʼayañatakïchi.
Ukajja, sumpach adorañat (yupaychañat) parlaski.
Jan ukajja, “yupaychapjjetani”.
Hebreo arunjja, “Efrainajj thayampiw alimentasi”.
Amuyatajja, Jacob chachat jutirinakat parlaski.
Jan ukajja, “comercianten”.
Ukham sasinjja, inas magianakat parlaskchi.
Jan ukajja, “Siria”.
Hebreo arunjja, “juezanakamasti”.
Jan ukajja, “Seolan”. “Seol” siski uk glosarion liytʼäta.
Jan ukajja, “michʼisiñamasti (agujamasti)”.
Variante: “iñu wawat”.
Jan ukajja, “arbolanakjamaw”.
Jan ukajja, “arbolar”.
Jan ukajja, “arbolar”.