Һиссә 7

Үсјанын нәтиҹәси нә олду?

1-3. Јеһованын һаглы олдуғуну заман неҹә ҝөстәрди?

АЛЛАҺЫН рәһбәрлик һүгугуна даир мүбаһисәли суала ҝәлдикдә исә, әсрләр боју Аллаһдан асылы олмајан инсан рәһбәрликләри нәјә ҝәтириб чыхармышдыр? Инсанлар өзләринин Аллаһдан јахшы рәһбәр олдугларыны сүбут етмишләрми? Әҝәр инсанларын бир-бирләринә гаршы етдикләри рәһмсизлијин фактлары әсасында мүһакимә етсәк, ајдын олур ки, јох.

² Улу валидејнләримиз Аллаһын рәһбәрлијини инкар етдикдән сонра, бәдбәхтликләр башланды. Онлар һәм өзләрини, һәм дә онлардан төрәнәҹәк бәшәр аиләсини әзаба дүчар етдиләр. Онлар өзләриндән башга һеч кими тәгсирләндирә билмәздиләр. Аллаһын Кәламы дејир: “Она гаршы фәсад етдиләр, онун оғуллары дејилләр, онларын ејибидир” (Тәснијә 32:5).

³ Тарих ҝөстәрди ки, Аллаһын Адәмлә Һәвваја, Онун һимајәсиндән чыхарларса ҹырлашыб, нәтиҹәдә өләҹәкләри барәдә етдији хәбәрдарлыг доғрудур (Тәквин 2:17; 3:19). Онлар Аллаһын рәһбәрлијиндән чыхдылар вә вахт кечдикҹә доғрудан да ҹырлашыб өлдүләр.

4. Нәјә ҝөрә бизим һамымыз гејри-камил, хәстәлијә вә өлүмә мејлли доғулуруг?

⁴ Сонрадан онларын бүтүн нәсилләри илә баш верән һадисә Ромалылара 5:12 ајәсиндә изаһ олунур: “Неҹә ки, ҝүнаһ тәк бир адам [бәшәр аиләсинин атасы Адәм] васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир”. Буна ҝөрә дә, улу валидејнләримиз Аллаһын нәзарәтинә гаршы үсјан етдикдә гејри-камил ҝүнаһлы олдулар. Ҝенетика ганунуна ујғун олараг, онлар өз нәсилләринә газандыглары гејри-камилликдән башга һеч бир шеј верә билмәдиләр. Бу сәбәбдән бизим һамымыз гејри-камил, хәстәлијә вә өлүмә мејлли доғулуруг.

5, 6. Инсанларын сүлһ вә фираванлыг јаратмаг ҹәһдләри барәдә тарих нә ҝөстәрир?

⁵ Чох әсрләр кечди. Империјалар бир-бирини әвәз етди. Истәнилән һакимијјәт нөвләриндән истифадә едилди. Лакин инсан аиләсинә дәфәләрлә бәдбәхтликләр үз верди. Фәрз етмәк оларды ки, алты мин илдән сонра инсанлар артыг бүтүн дүнјада сүлһ, әдаләт вә фираванлыг јаратмагда ­наилијјәтләр газанаҹаг вә ејни заманда хејирхаһлыг, мәрһәмәт вә әмәкдашлыг кими кејфијјәтләри рәһбәр тутаҹаглар.

⁶ Анҹаг, әслиндә һәр шеј там әксинәдир. Инсанларын гурдуглары һеч бир һакимијјәт нөвү һамыја сүлһ вә фираванлыг ҝәтирмәди. Биз јалныз ХХ әсрдә алман фашизминин төрәтдији ҝеносид заманы милјонларла инсанларын мәһв едилдијини вә 100 милјондан артыг инсанын мүһарибәләрдә мүнтәзәм сурәтдә гәтлә јетирилдијини ҝөрүрүк. Бизим зәманәмиздә сајсыз-һесабсыз инсан дөзүмсүзлүк вә сијаси фикир ајрылығына ҝөрә инҹидилмиш, гәддарҹасына өлдүрүлмүш вә һәбсханалара салынмышдыр.

Буҝүнкү вәзијјәт

7. Бәшәр аиләсинин буҝүнкү вәзијјәтини неҹә тәсвир етмәк олар?

⁷ Бундан әлавә, инсан аиләсинин буҝүнкү вәзијјәтини дә ҝөздән кечирин. Ҹинајәт вә зоракылыг гаршысыалынмаз бир вәзијјәтдәдир. Наркотикдән суи-истифадә епидемија кими ҝениш јајылмагдадыр. Ҹинси әлагә јолу илә өтүрүлән хәстәликләр пандемија һалына чеврилмишдир. Милјонларла инсанлар өлүмлә нәтиҹәләнән ГИЧС хәстәлијинә тутулур. Тәк-түк адамларын чох бөјүк вар-дөвләтә саһиб олдуглары һалда, һәр ил милјонларла инсанлар аҹлыгдан вә ја хәстәликдән өлүр. Инсанлар торпағы чиркләндириб, гүввәдән салырлар. Һәр јанда аиләләр дағылыр вә әхлаг дәјәрләри тапдаланыр. Һәгигәтән дә, буҝүнкү шәраит “бу әсрин танрысы” олан Шејтанын ијрәнҹ рәһбәрлијини әкс етдирир. Онун идарә етдији дүнја дујғусуз, гәддар вә тамамилә әхлагсыздыр (2 Коринфлиләрә 4:4).

8. Биз нә үчүн инсан наилијјәтләрини һәгиги инкишаф адландыра билмәрик?

⁸ Аллаһ инсанлара, елми вә мадди инкишафын зирвәсинә чатмаг үчүн кифајәт гәдәр вахт вериб. Анҹаг каман вә охун пулемјотла, танкларла, реактив бомбардманчы тәјјарә вә нүвә силаһлары илә әвәз едилмәси әсл инкишафдырмы? Јер үзүндә бир-бирләри илә сүлһ ичиндә јашаја билмәјән инсанларын космоса учмасыны инкишаф адландырмаг олармы? Инсанларын ҝеҹә вахты, һәтта бә’зи јерләрдә ҝүндүз белә күчәдә ҝәзмәјә горхмаларыны инкишаф адландырмаг олармы?

Заман нә ҝөстәрди?

9, 10. а) Өтән јүзилликләр нәји ајдын ҝөстәрди? б) Аллаһ ирадә азадлығыны нә үчүн ҝери алмады?

⁹ Заман ҝөстәрди ки, Аллаһын рәһбәрлијиндән асылы олмајан инсанлар өз аддымларыны мүвәффәгијјәтли етмәк имканында дејилләр. Онлар үчүн гидасыз, сусуз вә һавасыз јашамаг мүмкүн олмадығы кими, буну етмәк дә мүмкүн дејил. Сүбут ҝөз габағындадыр: Гидадан, судан вә һавадан асылы олараг јарадылдығымыз кими, һәмчинин Аллаһын рәһбәрлијиндән асылы олаҹаг тәрздә јарадылмышыг.

¹⁰ Пислијә јол вермәклә, Аллаһ бирдәфәлик ҝөстәрди ки, ирадә азадлығындан суи-истифадә етмәјин нәтиҹәләри аҹынаҹаглы олур. Ирадә азадлығы гијмәтли һәдијјә олдуғундан, ону инсанларын әлиндән ҝери алмаг әвәзинә, Аллаһ јол верди ки, ондан суи-истифадә етмәјин нә демәк олдуғуну ҝөрсүнләр. Аллаһын Кәламы, “аддымларыны доғрултмаг јеријән инсанын әлиндә дејилдир” дејән заман һәгигәти сөјләјир. О, һәмчинин доғру олараг билдирир ки, “бир адамын диҝәр адам үзәриндә һакимијјәти онун зәрәринәдир” (Јеремја 10:23; Ваиз 8:9).

11. Инсан рәһбәрлијинин һәр һансы нөвү изтираблары арадан галдырыбмы?

¹¹ Аллаһын алты мин ил әрзиндә јол вердији инсан рәһбәрлији инандырыҹы тәрздә ҝөстәрир ки, изтираблары арадан галдырмаг инсанын әлиндә дејил. Вә о, буну һеч бир заман едә билмәмишдир. Мәсәлән, вахтилә Исраилин падшаһы Сүлејман бүтүн мүдриклији, ­зәнҝинлији вә гүдрәти илә инсан рәһбәрликләринин төрәтдикләри пис нәтиҹәләри арадан галдыра билмәди (Ваиз 4:1-3). Еләҹә дә бу ҝүн дүнја лидерләри, һәтта ән јени техники наилијјәтләрин көмәклији илә дә изтираблары арадан галдырмаг игтидарында дејилләр. Ән дәһшәтлиси дә одур ки, тарихин ҝөстәрдији кими, Аллаһын һөкмранлығындан асылы олмајан инсанлар изтираблары арадан галдырмаг әвәзинә, онлары чохалтмышлар.

Аллаһын узагҝөрәнлији

12-14. Аллаһын изтираблара јол вермәси нәтиҹәдә һансы даими фајданы ҝәтирәҹәкдир?

¹² Аллаһын изтираблара јол вермәси, бизим үчүн ағрылы олмушдур. Анҹаг Аллаһ узагҝөрән олдуғундан билирди ки, узун мүддәт кечдикдән сонра јахшы нәтиҹәләр һасил олаҹаг. Аллаһын узагҝөрәнлији јаратдығы варлыгларына јалныз бир нечә ил вә ја бир нечә мин ил дејил, милјон илләр, бәли, әбәдијјән фајда ҝәтирәҹәкдир.

¹³ Әҝәр ким исә ҝәләҹәкдә ирадә азадлығындан суи-истифадә едәрәк, Аллаһын һәрәкәт тәрзини шүбһә алтына гојарса, она өз нөгтеји-нәзәрини сүбут етмәк үчүн вахт вермәјә еһтијаҹ олмајаҹагдыр. Аллаһ үсјанчылара артыг мин илләр вермәклә, каинатын һәр јериндә әбәдијјән истифадә олуна биләҹәк гануни бир гәрар гәбул етмишдир.

¹⁴ Аллаһын бу вахтаҹан писликләрә вә изтираблара јол вермәси сајәсиндә тамамилә сүбут олунаҹагдыр ки, Аллаһын разылығы олмадан һеч бир шеј мүвәффәгијјәтли ола билмәз. Шүбһәсиз, ајдын олаҹагдыр ки, инсанларын вә ја руһани мәхлугларын һеч бир мүстәгил планлары узунмүддәтли фајда ҝәтирә билмәз. Нәтиҹәдә, Аллаһын һәр бир үсјанчыны дәрһал јох етмәјә тамамилә һаггы олаҹагдыр. “Писләри һәлак едәр” (Мәзмур 145:20; Ромалылара 3:4).

[15-ҹи сәһифәдә олан шәкил]

Улу валидејнләримиз Аллаһдан асылы олмамағы сечдикдән сонра, нәтиҹәдә гоҹалыб өлдүләр.

[16-ҹы сәһифәдә олан шәкил]

Аллаһдан асылы олмајан инсан рәһбәрлији чох аҹынаҹаглы олду.

[Иҹазә илә]

U.S. Coast Guard photo