Bagong Programa sa Pansirkitong Asamblea
1 Bako daw na sinasabi niato ki Jehova, kapareho kan maimbod na mga aki ni Core: “An sarong aldaw sa saimong mga patyo orog na marahay kisa sarong ribo sa ibang lugar”? (Sal. 84:10) Kun siring, ikaoogma niato an programa sa pansirkitong asamblea para sa 1988, poon Pebrero, na nagdodoon kan temang, “An Daing Kaagid na Halaga kan Paglilingkod ki Jehova.” —Fil. 3: 7, 8.
2 An katuyohan kan programa tabangan kitang orog na maapresyar an pambihirang pribilehiyo nin paglilingkod ki Jehova sa partikular na panahon na ini. Si Jesu-Cristo nagtao kan sangkap na halimbawa sa bilog an isip na paglilingkod sa Dios. Kaipuhan na kita magkaigwa kan asin mapagdanay an saiyang kaisipan. (Fil. 2: 5-8) An programa sa pansirkitong asamblea matabang sato na analisaron an satong indibiduwal na paglilingkod sa Dios asin helingon kun saen kita makagigibo nin pag-oswag.
3 Parate niatong nadadangog an mga tataramon na “espiritu nin pagpapayunir.” Ano an espiritu nin pagpapayunir? Paano ikapaheheling kan gabos sa banwaan ni Jehova na igwa sinda kaiyan? An mga hapot na ini sisimbagon. Itatao an Makakasuratan na hatol sa kun paano an maninigong magin punto-de-vista niato sa pagtumang sa satong ministeryo asin kun paano niato iyan maaatubang. An mga hobenes mag-aako nin pagpakosog asin matatabangan na siyasaton an saindang pagpapahalaga kun manongod sa karawat, sine, asin mga programa sa telebisyon. Dugang pa, pag-oolayan an dakol na oportunidad sa paglilingkod na bukas sa mga gurang. —Isa. 48: 17, 18.
4 An sarong kabtang kan programa magtatao nin atension sa mga bagay sa pamilya. Iyan may titulong “Pbgtogdok njn Pamilya na Naglilingkod ki Jehova.” An pangangaipo nin marahay na komunikasyon sa laog kan pamilya pag-oolayan asin idedemonstrar. Tatawan nin atension an mga hapot manongod sa sekular na edukasyon para sa mga aki sa Kristianong mga pamilya.
5 Maninigo na kita gabos magplano na mag-atender sa pansirkitong asambleang ini asin magtao nin atension sa mga madadangog niato. —Heb. 2:1.