Pag-aatubang kan Maogmang Bareta—Paagi sa mga Artikulo sa Satong mga Magasin na Para sa mga May Espesyal na Pinagkakainteresan
1 Ngonyan, an Watch Tower Society ipinaaabot an maogmang bareta sa mga interesado sa gabos na lugar. An Torrengbantayan ipinupublikar sa 103 na tataramon na may promedyong iniimprenta na 13,045,000 asin an Magmata! nasa 54 tataramon na ngonyan na may promedyong iniimprenta na 11,350,000. Pribilehiyo niato na gamiton an mga magasin na ini sa pag-aatubang kan maogmang bareta sa “gabos na klase nin tawo.”—1 Tim. 2:4.
ITAMPOK AN MGA ARTIKULO NA PARA SA MGA MAY ESPESYAL NA PINAGKAKAINTERESAN
2 Kun nakakaresibi kamo nin bagong luwas kan mga magasin, naoogma daw kamong tapuson na basahon iyan tanganing aramon kun paano kita pinakikinabang ni Jehova paagi sa inandam na materyal? (Isa. 48:17) Pagkatapos, taano ta dai magdesisyon kun arin na artikulo an gusto nindong iatubang sa langtad? Seguro may maririsa kamo na pagkakainteresan nin nagkapirang tawo sa saindong teritoryo. An sarong huwes sa Ohio nagsurat nin pasasalamat sa sarong mag-agom na Saksi na nagdara saiya nin luwas kan Awake! manongod sa problemang pag-inom asin pagmaneho nin sakayan.
3 Apuwera sa pag-alok kan mga magasin sa harong-harong, ipinaheheling daw nindo an mga artikulong kawiliwili sa mga nasa pinagtatrabawohan nindo? Sinosongko daw nindo an komersial na mga lugar sa pag-alok nin mga magasin sa mga oras na dai naghihidale an mga kagsadiri? Ihinihiras daw nindo an katotoohan sa iba na nasa tinampo kun may oportunidad kamo? An dakol na tugang na lalaki asin babae ginigibo ini nin epektibong gayo, na dinodolok an mga tawo na dai makakaolay sa ibang paagi. Sa paaging ini tinatawan ninda nin modernong pag-aplikar an Talinhaga 1:20.
MARAHAY NA AROGAN
4 Kan kaolayon ni Jesus an Samaritana na nagduman sa sarong bobon, sia nagsabi: “Kun naaaraman mo kutana . . . kun siisay an nagsasabi sa saimo, ‘Painoma man ako,’ naghagad ka kutana sa saiya, asin tinawan ka nia kutana nin tubig na buhay.” (Juan 4:7-10) Kun paanong an babaeng idto dai midbid si Jesus o an katotoohan na dara nia, siring man an mga tawo ngonyan tibaad dai kita midbid o dai aram an halaga kan mensaheng dara niato sa sainda. Si Jesus nakipag-olay sa mga tawo sa gabos na angay na okasyon asin lugar—marahay na arogan para sa sato.
5 Gibohon logod niato an bilog niatong makakaya na ihiras sa iba an marahay na espirituwal na kakanon sa satong mga magasin! An mga minaako kaiyan na may pag-apresyar tibaad sa huri magiyahan pasiring sa “mga burabod kan tubig nin buhay.”—Kap. 7:17.