Gibohon na Orog na Nakapagtotokdo an mga Pagtiripon
1 “An sarong bagay na hinangaan ko iyo na an mga hoben asin gurang sa Kingdom Hall nakikabtang sa pagtiripon paagi sa pagkokomento asin paghanap sa mga teksto.” May nadangog na daw kamong nagsabi nin siring manongod sa enot na pagtiripon na inatenderan nia? (1 Cor. 14:25b) An dakol sa sato nakadangog na nin siring na mga kapahayagan. Asin ogmahon nanggad kita na kita nag-atender sa mga pagtiripon na iyan asin nakikabtang sa pagkokomento!
2 Kun kita patienot na nag-aandam, an satong komento orog na makahulogan, asin an pagtiripon nagigin orog na nakapagtotokdo para sa gabos na nag-atender. (Heb. 10:24, 25) Ini maninigong magdoon sa satong isip kan halaga nin mga gibo na kaoyon sa pagtubod.—Sant. 1:25.
KUN KITA NASA PLATAPORMA
3 Laen-laen na tema an pinag-oolayan sa Teokratikong Paadalan sa Pagmiministro. An mga tugang na babae nag-aako nin asignasyon sa mga librong Mabuhay Sagkod Lamang asin Reasoning, na pareho niato ginagamit sa satong ministeryo sa langtad. An mga igwa kan asignasyon na ini puwedeng gibohon na orog na nakapagtotokdo an paadalan paagi sa paggamit nin praktikal na mga eksena sa pag-aatubang kan materyal. Ini makatatabang sa mga presente na maheling kun paano ninda iyan magagamit sa ministeryo sa langtad. An mga tugang na may mga pahayag sa librong Reasoning puwedeng idoon an mga punto na makatatabang sa mga tugang kun naghuhulit sa lokal na teritoryo. An mga tugang na naggigibo kan mga asignasyon sa pagbasa sa Biblia puwedeng gibohon na makahulogan an saindang introduksion asin konklusyon paagi sa pagdodoon nin mga puntong may praktikal na halaga.
4 Tibaad hagadon sato na makikabtang sa demonstrasyon sa Pagtiripon sa Paglilingkod. Kun iyo, mahalaga an pag-andam. Maninigo kitang makanood na gamiton nin tama an mikropono tanganing an gabos makadangog. (Ikomparar an 1 Corinto 14:9.) Dai kamo tumalikod sa mga nagdadangog, kundi perming umatubang sainda. Sa siring, kun ipinaheheling sa kagharong an laog nin sarong libro, maheheling kan mga nagdadangog an tutob kan libro. Kun nakaatubang kita sa mga nagdadangog, madadangog ninda kita nin mas klaro asin maheheling ninda an ekspresyon kan satong lalauogon.
BILANG MGA PARADANGOG
5 Tanganing kamtan an pinakadakulang pakinabang, an gabos na nag-atender kaipuhan na kultibaron an abilidad sa paghinanyog, na dai pinababayaan na magbaragbarag an satong isip. (1 Tim. 4:16; Heb. 2:1) An paghinghing sa ibang harani sato nakaiistorbo. An pagduman sa kasilyas nin dai man kaipuhan makaiistorbo man sa pag-ako niato kan pinakadakulang pakinabang sa pagtiripon asin makaiistorbo man sa iba.
6 Kun kita may saradit na aki, tibaad boot niatong tumukaw harani sa agihan sa likod kan Kingdom Hall tanganing pinakakadikit an maistorbo ninda. Kun maribok, maninigo sindang iluwas nin mga magurang tanganing dai sinda makaistorbo sa iba sa pagtiripon.—Tal. 22:6, 15.
7 Kun kita maghihingoa na gibohon an pagtiripon na orog na nakapagtotokdo sa sato saka sa iba, kita gabos matatabangan na magtalubo sa espirituwal.—2 Tes. 1:3.