Mag-andam Para sa Asin Mag-ogma sa mga Pagtiripon kan Kongregasyon
1 Bilang asosasyon nin magturugang, kita madonong na nagtitiripon nin regular para sa satong semanal na mga pagtiripon. (1 Tim. 4:15, 16) Paano kita makapag-oogma asin makikinabang nin lubos dian?
2 Maninigong regular na magtagama nin panahon sa pag-andam para sa mga pagtiripon. Gurano man kita kasibot, madonong na magkaigwa nin panahon sa pag-andam para sa mga pagtiripon. An iribang pag-andam bilang pamilya nangorognang kapakipakinabang.—Efe. 5:15, 16.
3 Para sa Teokratikong Paadalan sa Pagmiministro: Pagmaigotan na makadungan sa semanal na iskedyul nin pagbasa sa Biblia. (Jos. 1:8) Repasohon an materyal na pag-oolayan, asin darahon an kinakaipuhan na mga publikasyon tanganing masundan nindo an mga espiker.
4 Para sa Pagtiripon sa Paglilingkod: Siyasaton an programang itinao sa An Satong Ministeryo sa Kahadean. Basahon an mga artikulo na pag-oolayan. Kun pag-oolayan an materyal na gikan sa sarong artikulo sa Torrengbantayan, hanapon iyan asin basahon man iyan. Kun idedemonstrar an mga pag-atubang sa paglilingkod sa langtad, repasohon ini nin patienot tanganing magin kamong andam na gamiton iyan sa saindong ministeryo.
5 Para sa Pag-adal sa Torrengbantayan: Basahon nin patienot an leksion, na minamarkahan an simbag sa mga hapot. Hanapon an sitadong mga teksto. Horophoropon kun paano an leksion kaoyon kan aram na nindo. Mag-andam nin haralipot na komento sa kisuerra saro o duwang parapo. Importante ining paagi na gumibo nin “hayag na pagtuga kan satong paglaom.”—Heb. 10:23.
6 Para sa Pag-adal sa Libro kan Kongregasyon: Enot, siyasaton an materyal; konsideraron an titulo kan kapitulo asin mga subtema. Mangnohon an pangenot na mga ideya. Repasohon an nagsusuportar na mga teksto sa Biblia. Pagmaigotan na simbagon an mga hapot sa saindong sadiring tataramon. Dangan repasohon an leksion sa saindong isip.—2 Tim. 2:15.
7 Mag-ogma sa mga Pagtiripon: Tanganing biyong maogma sa mga pagtiripon, importante na umabot sa tamang oras tanganing makapakikabtang sa pambukas na awit asin pamibi, na hinahagad an espiritu ni Jehova. Kun mayo kamo nin aasikasohon na saradit na aki, posibleng pinakamarahay kun matukaw kamo harani sa enotan kan hall kun saen kakadikit an nakadidistorbo. An mga magurang na may saradit na aki na tibaad kaipuhan na iluwas durante kan pagtiripon puedeng makaina sa distorbo paagi sa pagtukaw harani sa pasilyo asin sa likod.
8 Pagmaigotan na makapahingalo bago kamo umatender tanganing makapagdanay kamong puka asin alisto. An paghanap kan mga teksto na binabasa matabang sa saindo na magirumdoman an saindong nadangog. Ipakipag-olay sa saindong pamilya asin mga katood an dapit sa saindong nanonodan. An pag-aplikar sa mga suhestion na ini gigibohon na mas nakaoogma an mga pagtiripon, asin tunay na iyan ‘magsasadol sa sato sa pagkamoot asin sa marahay na mga gibo.’—Heb. 10:24, 25.