Pagtatao nin Maogma Bilang Payunir
1 “An Dios namomoot sa maogmang paratao.” (2 Cor. 9:7) Inapresyar ni apostol Pablo an pagkamatinao ni Jehova asin ipinaheling ini sa saiyang daing kakuriputan na mga pagpapagal sa tahaw kan mga taga-Tesalonica. Kaya kan huri sinuratan nia sinda: “Kami naogmang gayo na itao sa saindo . . . an maogmang bareta nin Dios.”—1 Tes. 2:8.
2 Arog man daw kaiyan an saboot niato manongod sa paghiras sa iba kan espirituwal na kayamanan na ini? Kun iyo, puwede daw niatong odok na horophoropon an paglaog sa pagregular payunir sa pagpoon kan bagong taon nin paglilingkod sa Setyembre?
KUN ANO AN MAGIGIBO NINDO
3 An paglaog sa pag-auxiliary o regular payunir daing posibilidad na mangyari kun iyan hahalaton sanang mangyari. An positibong paghihingoa na gikan sa pusong may tamang motibo magtatao kan bendisyon ni Jehova. Idolok an bagay na iyan ki Jehova sa pamibi. Ipahayag sa saiya an kamawotan kan saindong puso. (1 Juan 5:14; 2 Tes. 3:1) Turotimbangon nin sadiosan an saindong mga kamugtakan tanganing aramon kun saen kamo makapagliliwat tanganing maotob nindo an mga kahagadan. Tibaad an pagmata nin mas amay sa aga o pag-iskedyul nin paghuhulit sa banggi magpapangyari saindo na maotob ini.
4 An prangkang pakikipag-olay sa ibang payunir, sa saindong paraataman sa paglilingkod, o sa nangengenot sa saindong grupo sa Pag-adal sa Libro kan Kongregasyon puwedeng makatao nin nakatatabang na mga suhestion. (Tal. 15:22; 16:3) An mga miembro kan pamilya puwede man na makapakosog, nangorogna kun sinda mga kapwa parasamba. An eksperyensia nin dakol na payunir na may obligasyon sa pamilya iyo na an mga kaiba ninda sa pamilya nagtatabang sa sainda asin ikinaoogma an mas marahay na espirituwal na kamugtakan kan pamilya na bunga kan pagpapayunir nin sarong miembro.
PAGKAIGWA NIN MARAHAY NA RUTINA
5 An marigon na pangangapot sa sarong timbang na rutina sa pakikikabtang sa apretadong gibohon nin paghuhulit napakahalaga. An disiplina sa sadiri, inisyatiba, asin determinasyon kaipuhan.—1 Cor. 9:23, 25, 27.
6 Magin realistiko sa saindong paglaog sa pag-auxiliary asin regular payunir. Dai kamo makakanompong nin biyong marahayon na mga kamugtakan sa daan na palakaw na ini. Si Jesus nagsabi na an mga inienot an Kahadean maninigong maglaom sa mga kahorasaan kaiba an ipinanugang mga kagayagayahan asin bendisyon ngonyan, asin “sa madatong na palakaw nin mga bagay, daing sagkod na buhay.” (Marcos 10:29, 30; Gibo 14:22) Kaya marahay na arogon an pagtubod asin halimbawa kan mga nagpapayunir sa ibong nin maluyang salud, limitadong panbuhay sa pinansial, o iba pang seryosong mga kaolangan. Linilikayan ninda na gibohon na pinakamahalaga sa saindang buhay an ano man sa daan na palakaw. (1 Cor. 7:29-31) Arog kan sabi nin nagkapirang payunir, nakanood sindang ‘remedyohan an saindang problema’ tanganing makapagpayunir.—Ikomparar an 2 Corinto 12:7-10.
7 An gabos na boluntad na nagtatao gikan sa marahay na puso ipinahahayag na maogma ni Jehova. (Isa. 65:14) Sinda nag-aani nin abunda paagi sa panlaog na katoninongan asin pagkakontento kaiba an nadugangan na pagkamabunga paagi sa pagtabang sa mga tawo na kumampi ki Jehova. An mga bendisyon na iyan makakamtan nindo kun aakoon nindo an imbitasyon na magtao nin maogma bilang auxiliary o regular payunir.—2 Cor. 9:6; Tal. 11:25.