Pag-aatubang kan Maogmang Bareta—Paagi sa Mapusong Pag-alok nin Suskripsion
1 An Torrengbantayan iyo an pinakamarahay na magasin sa pag-adal sa Biblia sa ibabaw kan daga! Kombensido daw kamo na ini totoo? Kun iyo, kun siring bako daw na an gabos maninigong tawan kan oportunidad na makasuskriber dian?
2 Paano kamo personal na natabangan kan An Torrengbantayan? An iba tibaad magsabi na pinapagpuka kita kaiyan sa kahulogan kan “tanda kan mga panahon” na ikinariribong nin katawohan ngonyan. (Mat. 16:3) An iba man masabi na sinda naranga kan maogmang bareta na an Kahadean nin Dios sa dai na mahahaloy lalaglagon an mga nan-aapi sa saindang kapwa. Daing duwa-duwa sasabihon niato gabos na iyan nakatabang sato na maparigon an pagtubod sa probisyon na pantubos. An iba man kaipuhan na makanood kan mga katotoohan na ini.
MAGIN POSITIBO SA SAINDONG PUNTO-DE-VISTA
3 An kadonongan nin Dios, bakong an pangangatanosan nin tawo, an idinodoon sa An Torrengbantayan. (Isa. 55:8, 9) An siring na kadonongan kaipuhan na gayo kan gabos ngonyan. Iyan nakapakakarhay sa buhay asin nakatatabang na mapatalubo an tamang mga motibo. (Tal. 9:1-6) Mantang kombensido kaini, iaalok niato an suskripsion na may positibong punto-de-vista. Pag-adalan nin maingat an kada isyu tanganing makanompong nin mga kapahayagan na makatatabang sa mga kagharong. An siring na patienot na pag-andam matabang saindo na magin positibo kun iinaatubang an mga magasin na ini sa ministeryo.
4 An iba tibaad may tendensiang magin negatibo sa pag-alok nin mga suskripsion. Tibaad ipakipag-olay ninda sa kagharong an Topikong Mapag-oolayan, dangan ialok an duwang magasin imbes na an suskripsion. Taano? An kantidad daw an dahelan? Kun iyo, ini bakong praktikal na pangangatanosan. An kantidad kadikiton sana kun ikokomparar sa kinabanon na mga publikasyon, pero an halaga sa nagbabasa labing marhay sa kantidad kaiyan. Kaya magin positibo asin ialok nin entusiastiko an mga suskripsion sa Abril asin Mayo.
5 An sarong tugang na babae nagbugtak nin pasohan na 50 suskripsion sa laog nin duwang bulan. Nakakua sia nin 31 kan enot na bulan asin 19 kan ikaduwang bulan. Sinabi nia na kan an iba mayo nin kuwarta sia nagbuwelta nin tolo o apat na beses tanganing makua an suskripsion. Sa Hapon, an mga tugang nakakua nin labing 71,600 na suskripsion sa sarong bulan kan nakaaging taon, na 57-porsiento an ilinangkaw sa nakaaging taon.
6 Nasa sato an gabos na dahelan na magin mapuso sa satong ministeryo—nasa sato an pagsuportar ni Jehova. (Gibo 14:3) Kun kita makakakua nin suskripsion dangan susundan iyan nin pagpakosog na basahon an mga magasin, an satong mga paghihingoa tibaad magligtas nin buhay nin mga tawo. Kaya entusiastiko asin mapuso niatong ialok an mga suskripsion sa gabos na midbid niato asin sa mga nanonompongan niato sa ministeryo sa langtad.