Ponan Asin Tapuson an mga Pagtiripon na Nasa Oras
1 An gabos na pagtiripon kan kongregasyon, kabilang an mga pagtiripon bago maglingkod, maninigong ponan asin tapuson na nasa oras. Taano? An pagigin nasa oras nagpaparisa nin pagigin areglado asin nagpapaheling nin konsiderasyon sa gabos na nag-atender. (Ecl. 3:17b; 1 Cor. 14:33) Kita makakapaheling kan satong pagmakolog paagi sa pagkuyog sa minasunod na mga giya tanganing maseguro na an mga pagtiripon ponan asin tapuson na nasa oras.
2 Kita dapat perming magmaigot na mag-abot sa pagtiripon nin amay tanganing makaolay an iba, maasikaso an kaipuhan na mga bagay, asin makikabtang sa panbukas na kanta asin pamibi. Sa pankagabsan, limang minuto an itinatagama para sa kanta asin pamibi. An mga nagrerepresentar sa kongregasyon sa pamibi maninigong isaisip an katuyohan kan pagtiripon asin sambiton ini sa panbukas asin pantapos na mga pamibi. An siring na mga pamibi dai nangangaipong magin halawig.
3 Pagtiripon-Publiko: An mga pahayag-publiko limitado sa 45 minutos. An pagsobra sa oras na itinagama makaaapektar sa pag-adal sa Torrengbantayan na kasunod. An duwang pagtiripon, kabilang an mga kanta asin pamibi, maninigong tapuson sa duwang oras. An mga nagpapahayag sa publiko maninigong sunudon an oras na ipinaheheling sa outline kan Sosyedad asin dai iiba an mayong koneksion na mga bagay, siring sa mga pataratara.
4 Pag-adal sa “Torrengbantayan”: Sarong oras an itinagama sa Pag-adal sa Torrengbantayan, na binabasa an gabos na parapo asin kinokonsiderar an mga hapot sa repaso. An halipot, direktang pan-introduksion na mga komento kan nangengenot dapat na pumukaw nin interes sa pag-aadalan. An saiyang mga komento sa pag-adal dapat na limitado. An pagbanga sa materyal sono sa oras makatatabang saiya na likayan an sobrang paghaloy sa enot na kabtang dangan paghidale sa huring kabtang.
5 Teokratikong Paadalan sa Pagmiministro: Ini 45-minutos na pagtiripon. Minsan ngani an pahayag na nagtotokdo asin an tampok na mga kabtang sa Biblia dai pinaoontok kun tapos na an oras, an mga tugang na nag-aatubang kaini dapat na magdanay sa saindang itinagamang oras. Kun dai ini nagibo, dapat na tawan nin pribadong sadol. Siring man, an sadol kan paraataman sa paadalan dapat na magdanay sa itinagamang oras. Makaeekonomiya sa oras kun an gabos na estudyante nakatukaw sa harani kan plataporma asin kun an kada saro tatapuson tolos an saiyang pahayag kun naubos na an oras.
6 Pagtiripon sa Paglilingkod: Ini man 45-minutos na pagtiripon. Kairiba an Teokratikong Paadalan sa Pagmiministro asin an mga kanta patin pamibi, an bilog na programa dapat na dai lumihis sa sarong oras asin kuwarenta y singko minutos. An mga kabtang na kokobrehan paagi sa hapot-simbagan nangangaipo nin halipot sanang introduksion. Mayo nin pangangaipo na magdugang nin halawig na pan-introduksion na impormasyon. An mga demonstrasyon dapat na prinaktis nin marhay asin andam an mga may kabtang patin nasa tamang lugar na tanganing magamit nin marhay an itinagamang oras.
7 Pag-adal sa Libro kan Kongregasyon: Ini sarong oras na pagtiripon, kabilang an panbukas asin pantapos na pamibi. An gabos na parapo dapat basahon. An nangengenot dapat na pagbarangaon an materyal tanganing malikayan an paghidale sa huring kabtang kan pag-aadalan. An nangengenot dapat na mapagmansay sa kun guranong panahon an ginagamit sa kada parapo. An paggibo kaini nangangaipo nin abilidad sa pagtotokdo.—Tito 1:9.
8 Pagtiripon Bago Maglingkod: Ini dai dapat lumihis sa 15 minutos, kabilang an pagtao nin asignasyon sa teritoryo asin pagtapos paagi sa pamibi. An nangengenot dapat na magpoon na nasa oras, na dai nag-aatraso sagkod na presente an mas dakulang grupo. Basta ikinaasignar na an teritoryo asin nakapamibi na, an grupo dapat na magpasiring tolos sa langtad. Ini nangorognang mahalaga para sa mga payunir.
9 Kita gabos makikinabang sa mga pagtiripon na nagpopoon asin natatapos na nasa oras. Ini nangorognang inaapresyar kan mga may agom na dai nagtutubod na naglalaom na sinda makapuli sa depinidong oras. Daing duwa-duwa, an pagpoon asin pagtapos kan mga pagtiripon na nasa oras pagpapaheling nin konsiderasyon sa gabos na nag-aatender na may sinusunod na mga iskedyul, asin iyan nakakokontribuwir man sa paggibo kan mga bagay sa “disente asin aregladong paagi.”—1 Cor. 14:40.